|
مشكلتي .. مع أهل زوجي ؟
السلام عليكم ورحمة الله ..
شلونكم ؟ آنه حابه آآخذ رايكم ... واقتراحاتكم شنو اسوي :21: لأني متحيرة .. ~ اليوم " الخميس " ف اروح بيت اهلي .. اوصل ريلي الشغل وآخذ السيارة واروح بيت اهلي في الطريج كنا قاعدين نتحجى ومن سالفة لي سالفة دار بينا هَـ الحجي + ابوي يتشره ويتحلطم - على شنو ؟ + يقول إنج ماتنزلين تساعدين أمي - بس انت تدري إن آنه انزل ... بس ماقدر انزل من الصبح + وحتى أمي تقول تنزلين متأخرة ويكول اغلب الاشياء مستويه - انت تجوفنا ب أي ساعة ننام ... ننام بعد صلاة الفجر زين مني اقعد 11 أو 12 + قال لي انزين شنو ناوية تسوين ؟ - باسلم أمري لله وباحاول انزل من وقت .. وآنه ما احب كل مره وتنفتح هَـ السالفة ليش يحسسوني إن هَـ الامر واجب علي ؟ ليش ما ابقى على راحتي ؟ + ب الليل بنتحجى في الموضوع - ما ابي اتحجى في الموضوع ... لأن انفتح وايد .. ولا تتحسس من كلامي بيبي آنه ما احب إن تكون علي واجبات اتجاه غيري ؟ ومو شرط إن آنه اقعد من وقت عشان اسوي شي ؟ اقعد متأخرة وكاني اسوي السلطه واغسل المواعين واغسل الخضرره / أولاً - شرايكم ب اللي صار ؟ ثانياً - شنو الشي اللي لازم - ب رايكم - إن اسويه ؟ ِ× وردتـ ( ـــه |
أنتم نظامكم تاكلون مع بعض؟
والا لك مطبخك الخاص وتسوين أكلكم بنفسك؟ |
وردة ... أنتي ساكنة عند أهل زوجك بنفس البيت ؟؟؟
. . نحتاج تفاصيل ؟؟ عشان يقدروا الأعضاء يردوا يا قلبي ؟؟ |
أختي نبض الدان ... تقدرين تقولين إي
يعني عمتي أم ريلي تسوي الغدى واحنا ب الإضافة ل اخوان ريلي ونسوانهم ناخذ الغدى من عند أهل ريلي asali ... إي اختي ب نفس البيت بس احنا ساكنين فوق يعني عندنا شقة في بيت اهل ريلي / مع التفاصيل : أم ريلي تطبخ الغدى بعد أذان الظهر يعني اتصلي واتسويه .. وآنه انزل بعد الصلاة واحياناً على الـ 11 يعني قبل الصلاة أنزل واهمه لازم يبوني من الصبح انزل !! ما اقدر يوم اللي اقعد الصبح ابدي اغراض شقتي من غسيل ثياب وكواي ومسح و و و إلخ وغالباً اقعد 10 ونص .. لان انام متأخرة لأن الليل الوقت الوحيد اللي اقدر اقعد فيه ويه زوجي أما الصبح غالبا يطلع ويه ابوه يقضون اغراض و و و إلخ وبعدها الساعة 3 ونص الظهر يروح الشغل وما يرد إلا 12 ونص ب الليل ! واليوم قلت له خل نطلع بروحنا نسوي اكلنا وناكل بروحنا قال لي لو عندي ميزانية جان من غير ما تقولين وآنه ما ابي اضغط عليه .. لأن ادري لو عنده ما بيقصر معاي ! بس آنه متضايقة من الوضع وايدددد .. لأن و ب صراحة في بيت اهلي متعودين كل شي يوصل لي حد غرفنا < هَـ الشي سبب لي مشاكل حالياً في حياتي ! انزززين شالحل ؟ شاسوي ؟ شالصرفه ؟ آنه من النوع اللي يحب يسوي الشي براحته لأني مزاجية متى ما حلى لي بقد من وقت بس إن كل مره تتكرر نفس السالفة مو قادره استحمل ! |
حبيبتي زينب
الوحدة فبيت ابوها غير عن بيت زوجها ولو كانت ببيت لحالها اقترح لو تنامين شوي العصر وإذا جاء زوجك تكوني مصحصحة وتجلسون للفجر وتقومين عشر تصيرين على عشر ونصف تحت لأن أم زوجك لو مكان أمي بقول معاها حق لأنكم تاكلون من طبخها وهي مهما كان ماتقدر تسوي كل شيء بنفسها والا إذا عندك مطبخ صغير تسوين يوميا صنية مثلا مكرونة أو خضار بالدجاج أو غيره بحيث انك تشتغلي شغل بيتك وانتي تسوين الجزء من الأكل |
المفروض كل وحده من الزوجات تطبخ يوم
وممكن من الليل او العصر تحضرين غدى ثاني يوم نص تحضير وبكذا يكون ساعدتيها بدون ماتنزلين الصبح أنا جتني فترة اسهر بالليل ولا اصحى بدري اسوي الغدى فكنت اطبخ من الليل واذا صحيت متأخره يصير التجهيز اسهل عندي سؤال ليه العيال مايجيبون لامهم خدامه تساعدها وقت نومتكم |
شوووووووووفي يا الوردة زينب ، لا تزعلي من كلامنا
إنت تعرفي الأعضاء يقولوا اللي يشوفوه صح و دامك جيتي فاسمعينا للآخر :) حبيبتي دامكم تاكلوا سوا و أم زوجك اللي تطببخ يوميا فإنت انسي بيت أهلك دحين ،، الأصول و الواجب يقول إنه ما يصير هي بسن أمك و تطبخ لكم و إنتم نايمين بجد سامحيني و الله - عيييييب و إنت ما ترضي بالعيب أبدا هي ما تدخلت بحياتك مع زوجك ، هي تكلمت بالأصول و من حقها بجد تخيلي أمك مكانها و زوجة اخوك تعمل كذا ؟؟؟؟؟؟؟؟؟ الشئ الثاني ،، زوجك يخرج من الساعة 3 لحد 12 الليل ليييييييه الأشغال اللي تعمليها في الصبح زي الكوي و الغسيل ،، ما تعمليها بالفترة هذه ؟؟؟؟ مو صح كلامي ؟؟؟؟؟؟ من 3 - 12 ،، عندك 9 ساعات أقل شئئئئئئئئئئئ تنامي فيها ساعتين مثلا ،، بقيت لك 7 ساعات .. تنظفي البيت و تكوي و تغسلي وووو إلخ ،، نقول 3 ساعات مثلا ؟؟؟؟ بقيت لك 4 ساعات كمان ;) ساعة تروحي عند أم زوجك وو تسأليها إيش بتطبخوا بكرة علشان أجهز و أساعد من دحين باللي أقدر عليه ؟ فرضا هي بتعمل لكم مثلا ( رز ) ؟؟؟؟ فإنت تجهزي في ساعة السلطة و الشوربة مثلا لازم تتساعدوا معها الصراحة بقيت لك 3 ساااااااااااااااااااااااااااعات أقل شئ تتحممي ، تجهزي العشاء ، تتعطري ، تتمكيجي و تلبسي بالرااااااااااااااااااااااااااااااااااااحة ;) شوفي ، نحن علاقتنا بزوجة أخوي ماشاء الله كويسة لكن أتخيل لو أمي تعمل كذا ،، و زوجة أخوي فرضا تجي تاكل و أمي تطبخ لهم يوميا و الله إني ما أسكت الصراحة عالوضع .. ؟؟؟؟؟؟ بجد تخيلي أمك مكانها ؟ ترضيها على أمك ؟ يعني إنت تعودتي على الخدم في بيت أهلك طيب أم زوجك معليه ، مو خدامة عندكم تخدمكم .. يعني بجد ما يصير .. |
صحححح كلاااامكم ... بس آنه احسني ماني قااادرهـ اتأقلم
بس قاعده احاول ! |
اقتباس:
شهادة حق لازم تنقال حتى لو كانت مرة,,الأخت روح الطير كفت ووفت:17: |
^
الأخت تعاندني ، ليه مرة ؟؟؟؟؟؟؟ فيني شئ ؟؟؟؟ :( |
| الساعة الآن 12:35 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©