|
اختي الصغيره وخطبتها
السلام عليكم انا عضوة جديده اتمنى تتقبلوني بصدر رحب قريت مواضيع كثيرة وشفت تفاعلكم مع الاعضاء وتحمست اكتب موضوعي محتاجة ارائكم فعلا لان النت وسيلتي الوحيد اني اقول بخاطري مشكلتي باختصار اني معلمة عمري 25 سنة وعندي اختي تو تخرجت من الثانويه هالاسبوع عمرها 18 انخطبت قبلي واهلي فرحو وموافقين انا طرت وربي من الفرحه واقنعت امي توافق لان اللي خطبها اخلاقه عاليه هو من قرايبنا وقد شفته وانا صغيره هو بعمري او يمكن اكبر مني بكم شهر انا مع هالفرحة حسيت بكسره قويه حسيت اني كبرت وماعدت مرغوبه حسيت اني مو جميله مع اني والله وبشهاده الكل جميله وجامعيه وهاديه ومالي بالامور السيئه انا احس انه شعوي طبيعي واي وحدة بمكاني بتحس فيه خصوصا ان الفرق بيني وبين اختي كبير طول عمري اعتبرها طفله وادخل مواقع مشاكل زوجيه واشياء اقرا واقولها انا بتثقف لاني بسن زواج كنت استصغرها وماحسيت انها بتكون قبلي انا مو حاسدتها هي تستاهل وربي وفرحانة لها بس احس زواجها بيعلن للكل اني كبرت اللي يذبحني اني انخطب نااااااااااادر وان انخطبت ماتتم خطبتي لاتقولو عين وماعين انا اقرا الرقيه وارتاح واحافظ ع الاذكار مشكلتي اني مو قادرة اخبي حزني عن اهلي وجهي يفضحني لدرجة امي تقول لو ماتبين نوافق نرفض والبنت باقي صغيره لكن انا رفضت وقلت خليها تتزوج ليش لو ماتزوجت انا بوقفها معي والله احس ان خاطري مكسور لو كان الولد صغير وقريب لعمرها بقول اصغر مني لكن اكبر مني وامه دايم تمدحني ليش مافكرت فيني انا احس هزت ثقتي بنفسي احس مو قادرة اواجه احد اكتب لكم والعبره خانقتني من امس حزينة وبغرفتي اتحجج بالصداع وانا وربي بكيت لما تعبت فوق هالاحساس المتعب وقله الثقه اللي جتني خوفي من بكرا خوفي من نظرة الناس لي وشماتة كثير ناس خوفي من فراق اختي الصغيره اللي مسليتني والله انا معاها واحس بوحشه كيف لو تروح وربي الليل صعب علي احس بوحدة تذبحني والشي الاهم من كل هذا خوفي على نفسي صحيح عيب اقول هالكلام لكن وربي انا محتاجة للزواج احس صرت بسن ودي اتزوج اكون اسره ودي بزوج رجل معاي اعيش معاه وربي لما اروح السوق من اكثر من سنة اشتري ملابس قصيره واشياء ماتناسب البسها كوني ملتزمة ولما تسالني اختي ليه تشترينها كنت اضحك اقول حق بكرا لو اتزوج احس تحطمت وماعاد للحلم هذا قيمة الحين الناس بتستضعفني ومابيتقدم لي الا شخص كبير او عادي تعبت من اني احس اني اقل من اهلي وخواتي وبنات عمي والله كان ودي وحلمي اتزوج ابيكم تدعولي وتدلوني على طريقه اخبي هالحزن عن اهلي وماحسسهم اني زعلت وابي تدعولي بالهدايه وربي جتني رغبه اخش شات اتعرف اسمعغ اغاني استغفر الله احس ابي انتقم من نفسي احس كهت نفسي |
الله يرزقك بزوج الصالحه يارب
انتي مازلتي قويااا عزيزتي وانا افهم شعورك ووالله حااسه بك ادعي ربك وداومي على الأستغفار وبعدين وش حكاية الشات ومدري ايش انتي اكبر من كداا موتنكسري على طوووول خليك قويه الحياه فيهاا وفيهاا ومن اولها اتحطمتي خلك ثقتك قويه بنفسك اكثر واشغلي نفسك باي شي الحياه مب زواج بس امسحي هالتفكير من رااسك وليش تشتري ملابس لزواج والله انتي غريبه انتي ضاامنه تعيشين لبكره؟ عشان تشترين ملابس لزواج؟ اهدي وارجعي لربك وقولي الحمدلله على نعمة الاسلام و العافيه والجمال |
اقتباس:
اختي الغاليه اسعدني ردك وفرحني دعائك والله ربي يرزقك ويريحك بالنسبه للشات وهالهبال احس جاني ضعف وتفكير مو اكثر وربي يعصمني عن هالطريق وبالنسبه اني غريبه واشتري اشياء بدي عليها لا وربي لاغريبه ولاشي بس كنت احلم بالزواج واتمناه وكنت اشوف اشياء ماقصد قمصان نوم ولاشي خاص للمتزوجين لا اشياء عاديه يلبسونها حتى البنات مثلا تنورة قصيره او فستان حلو احس ساعتها انه حيل حلو وخاطري فيه واشتريه والبسه يطلع حلو علي بس ماقدر البسه برا كونه قصير فاجلس بفرحه وتفاؤل اخليه لبكرا ولا الاعمار بيد الله ولاضامنه نفسي وبالنسبه للتحطيم انا فعلا تحطمت انا يا اختي بامور كثيرة وضعي مايمشي بالوظيفه جلست انتظر انتظر مع اني امتياز وخبرات ودورات وطولت وتعبت وربي الله لايعيدها من ايام لين ربي رزقني بعد تعب سنوات وبعدها قدمت انا واختي الكبيره للماجستير ومعدلي اعلى لكن انقبلت هي وانا لا وفرحت لها وربي مابينت حزن جتني هستيريا ضحك وهبال لدرجة حسيت نفسي مو طبيعيه لكن الشعره اللي قصمت ظهر البعير هالخطبه وربي فرقي عن اختي 6 سنوات او 7 هذي خطبه بكرا زواج وحمل وانا كل مالي اذبل انا حاسه بضعف مو قادرة اواجه احد حتى الطاعه وربي موقادرة كنت اقوم الليل واصوم واسوي اللي اقدر عليه الحين موقادرة احس بثقل وربي الصلاه اليها واحسها جبل انا اقرا كثير بالامور النفسيه وتطوير الذات وكنت اقول هذي وساوس وهبال لكن موقادرة اتخلص منها اول عمري مافكرت اطلب من احد الدعاء غير امي وابوي اقول باقي الناس ماهم وسطاء عني انا ادعي ربي بنفسي الحين صرت اتمنى احد يدعيلي يرقيني يقرا علي ماعدت اقدر اسوي شي انا مقصره بالطاعه كثير واحس ذنوبي تثقلني لكن وربي مابيدي حل حاولت كل الاساليب تعبت وخطبة اختي زادت همومي هموم وربي كرهت الزواج وماعدت اتمناه زي اول لكن احس بكسره الكل يشوفني ومنكسر خاطره علي وانا ماعدت قادرة ارجع ثقتي بنفسي |
،
وعليكم السلام ورحمة الله وبركاته مراحب أختي الغالية ( كنت قوية ) والمفروض واللي نتأمله إنك ( تستمري قوية ) وحياكِ الله في منتدانا وإن شاء الله تستفيدي وتفيدي :17: نرجع لمشكلتك يالغالية زواج أختكِ مو نهاية العالم أو مثل ما قلت إعلان إنك كبيرة وبايرة بالعكس يمكن يكون باب رزق لكِ بدون ما تحسين .. وأنت مو أول ولا أخر بنت تتزوج أختها قبلها .. أنا خواتي ثنتين منهم تزوجوا قبل الكبار أخر وحدة تزوجت قبل 6 شهور وأختي الكبيرة عايشه حياتها ( وإن كانت مجروحه من الداخل لكن ما بينت لأي أحد بالعكس وقفت يوم الزواج وأستقبلت المعازيم ورحبت فيهم ولا تركت لأي أحد مجال يتشم فيها ... وحتى العريس كان مناسب للكبيرة من ناحية العمر بس أولاً وأخيراً هذي أرزاق يقسمها الله بين عباده كما يشاء ..) وهذي بعد صديقتي أكبر مننا ودخلت الجامعة متأخرة وتعثرت بالدراسة كثير ومرت بأزمات وكانت أقل أخواتها جمال تزوحت أختها اللي أصغر منها بــ 4 سنوات بس عيني عليها باردة ماشاء الله من أول ما تملكت أختها وه تخطط معها نسوي كذا نروح للسوق الفلاني نشتري هذا ونخلي هذا وتروح مع أختها لعيادات التجميل وتتابع كورساتها و تجي عندنا بالجامعة تحكي ايش عملت مع أختها ويوم الزواج كانت قمة لابسه أفخم فستان والميك آب و الشعر توب صراحة وتستقبل لا وعازمة كل صحباتنا ماتركت أحد إلا وعزمته حسيتها بجد فرحانة .. وبعد الزواج بأسبوع إنخطبت :14: وربي يتمم أمرها على خير لو أعد النماذج ما أخلص وصدقيني إني ما أبالغ عشان أخفف عليكِ لأنها من الواقع أنتِ لإنك متوترة شوي حآسه إن الموضوع صعب اقتباس:
أولاً أمام نفسكِ ورغباتها وأكيد تعلمين أن الجنة حفت بالمكارهـ والنار بالشهوات وأنتِ ماشاء الله كبيرة وعاقلة وملتزمة كما ذكرتِ أعلم إنها لحظة ضعف كتبتِ عبارتكِ فيها .. لكن لا تسترسلي معها أبد ولا تضعفي أمام الشيطان فهو حريص على إغواءكِ لحظات ضعفكِ إلتفتي حولك وشوفي البنات أقمار و متعلمات لكن نصيبهن تأخر .. ومع ذلك ما يأسوا من رحمة ربكِ جهزي معاها ولا تبينن شيء لها لأنه بيألمك ويألمها ويألم أهلك بعد و إطلبي الله يلهمك الصبر ويغنيكِ بالحلال عن الحرام ولا تفكرين كثير بالزواج صحيح هو حلم كل بنت بس لا يكون تفكيرك كله منصب عليه .. حققي أهداف أخرى لأن الحياة ماتتوقف على الزواج فقط .. ولما تقفل الدنيا بوجهك سواء بدراسة أو زواج لا تيأسي وتقولي ربي ما خلق الشقاء إلا لــي وأنا حظي تعيس وغيرهـ من الكلام المحبط لأنك ماشاء الله كملتي دراسة وتخرجتِ وتوظفتِ كمان .. ليه نشوف الجانب السلبي والحاجات الحلوة ننساها :25: ؟ الله يرزقكِ الزوج التقي النقي ويصير الفرح فرحين بإذن الله :d |
ياحبيبتي
انا اصغر من اختي بسنتين ملكتي بعد اسبوعين وهيا لسه ما اتخطبت والله انها واقفه جنبي ولسه اليوم طالعين السوق سوا هادا كلو من عند الله والنصيب سبحان الله مايعرف كبير او صغير جاها نصيبها وانتي بإذن الله تعالى حيجيكي نصيبك ويارب قريب كمان لا تفكري ولا تحطي في بالك وانتبهي يبان عليكي تراها ممكن تتأثر وتفكر انك ماتبغيلها الخير انا كنت اخاف انه اختي تكون متأثره لاني احبها وهي في مقام امي عندي بس شفت الفرحة في عيونها وسعادتي كبرت بفرحتها فيا ولو اقولك ماشاء الله كيف تخاف عليا من عيون الناس ماتصدقي الحمدلله على اختي يارب والله يبارك لك في اختك ويبارك لها فيكي وعقبالك حبيبتي لا تيأسي ولا تقنطي الدعاء وسهام الليل والاستغفار وحتشوفي الله يرزقك ابن الحلال عاجلا غير اجل وكل بنات المسلمين يارب العالمين |
تم النقل إلى القسم الأنسب.. الإشراف أسأل الله العلي القدير أن يرزقك الزوج الصالح التقى النقى عاجلاً غير آجل وجميع بنات المسلمين.. |
مرحبا حبيبتي ...شوفي ياقلبي مافي بنت راح تظل من غير زواج المهم الرجل الصالح والنصيب الزين
وبعدين انتي توك صغيره والله العظيم تزوجت عمري 19سنه وتحسفت اني ما اخذت وقتي الحمدالله على كل حال بس انا الحين اقول لزوجي لوعندي بنتوته والله ما ازوجها الافوق 25سنه عشان تتزوج بعقل موطياره المراهقه .... والله الي بسنك الى الان ماتزوجو ا خلك بس من السوالف والله انك قمر 14 وغير هذا جامعيه وملتزمه بكرا يجيك هذا المضيع بيتكم ههههههههههه ويسعد قلبك حبيبتي لاتحاتين اختك محتاجه لك لاتخلينها افرحي لها وادعيلها عشان ربي يوفقك ويسعدك ويفرج همك ان شاء الله ... طمنيني عليك واعتبريني اخت وصديقه لك اذا ماعندك مانع.... |
اقتباس:
ماقصرتي يالغاليه كلامك ريحني ربي يسعدك ربي يستجيب دعائك ويجبر كسري ويهديني ويغفر لي ربي يرزقني القوة واواجه ضعفي صحيح في حاجات حلوة وربي مانسيتها واشكر فضل ربي علي بس هالزواج يمثل لي اكبر واكثر من شي ودي اعف نفسي ودي ارتاح وربي صرت غيورة وحساسه لابعد الحدود والاهم صرت وحيده مدري من حط قانون اللي تتزوج تترك صديقاتها البنات انا كل صديقاتي ماعادو يتواصلون معي وربي يمكن مسج بالسنة ماعدت حتى احط رصيد بجوالي ماعدت احتاجه دايم فاضي ومهجور نفس صاحبته الكل بلا استثناء واعذرهم زواج وعيال لكن وربي احس بوحدة وهم ربي يغسل قلبي منه ويصبرني وربي عاتبت صديقتي مرة ذي كنت اعتبرها اختي واحب اشكيلها وافرحلها واسولف تقبلت عتابي بمزح وانا مزحت عشان مابين زعل ومن يومها ماسمعت صوتها الله كريم واختي لاتوصيني عليها وربي لاقوم فيها قومة ماصارات والله انا مستحيل اتركها المصيبه اني لو بنصح لو بقول شي احاتي يقولون غارت ولاشي صرت اكتم بصدري واسكت الحين اهلي مجتمعين يسولفون بالموضوع وانا طلعت لانه عيب بنظرهم اجلس اسمع لاني بنت صغيره على الامور صغيره والعمر يمشي هم يتناقشون وانا بغرفتي وربي تعبت هالحياة |
اقتباس:
ربي يوفقك يالغلا ويتمم عليك ويسعدك واختي بعيوني وربي حتى اليوم طلبت تشيل شيره انا مارضيت لان هي ماتدري بالخطبه حنا مخلينا بعد اختبارها القدرات فقلت لها بعد الثلاثاء اشيلك شيرة واضبطك قالت ليش مو الحين ابتسمت وماعلمتها بعد الثلاثاء بيكون خطبتها رسمي فابيها تكون افضل بنت انا بطبعي اتزين واكشخ حيل وخايفه هالمرة اكشخ اخاف يقولون غارت وتبرز نفسها مع اني طبعي انيقه بقوة لكن بحاول اطلع طبيعيه ابيج تدعيلي ماتخنقني العبرة ولا اتفشل قدام احد وربي اني بكايه وحساسه وخايفه احد يستضعفني يارب قويني |
اقتباس:
جزاك الله خير اختي المراقبه على الدعاء انا كتبت موضوعي بقسم اخر عمدا لان هالقسم اسمه يتعبني وربي مزعج اسم عوانس اكتبو تاخر زواج اي شي تعبتني هالكلمة اسمعها مليون مرة سواء بمزح او استهبال عشان كذا هربت من هالقسم لكنك رجعتيني له |
| الساعة الآن 11:27 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©