|
رضيعي ولين العظام
أمس أخذنا صغيري لطبيب الأطفال لأن شكله أخذ عدوى خفيفة مني وقلنا بالمره يكشف عليه ويشوف نموه وكذا أول ما شاف صدره وبطنه قالي تعرضينه للشمس المباشرة مو من خلال الزجاج يوميا من غير ملابس قلت لا قال تعطينه صناعي قلت لا قال ولا رضعة قلت لا قال ولا شيء غير الرضاعة قلت ولا شيء قال الولد فيه بداية لين عظام والمفروض انك دخلتي له الزبادي من 4 شهور خصوصا انه رضاعة طبييعة أما الصناعي يكون مدعم قلت الحين كل دكتور يقول شيء الكلام حاليا انه إلى 6 شهور فقط رضاعة طبيعية وأي أخصائي أطفال يقول كذا قال لي هذا الرأي الحديث والأطباء الصغار الخريجين الجدد وأغلبهم عالمدارس الأمريكية حتى في التلفزيون نشوف نفس الكلام أما أنا دارس على المدارس الانجليزية القديمة الصعبة وصار لي خبره 30 سنة وعلى الكلام القديم ولاحظت خلال الفنرة اللي هنا في السعودية ازدياد حالات لين العظام بشكل كبير في السنوات الأخيره ومع الممارسة لاحظت سوء النظرية الجديدة على الأطفال فأطباء الجيل الجديد هذا رأيهم وأنا هذا رأيي وكتب للولد على مكملات كالسيوم هو نصح أدخل له الزبادي والسيريلاك والأكل دام إني أرضعه طبيعي بس أنا الحين متردده ايش أسوي وعلى فكره ولدي باقي له اسبوع تقريبا ويكمل5 شهور بنتي ما صار معي هذا الشيء يمكن لأنهم كانو كاتبين لها على نقط فيتامين د من بدري وبعدين كتبوا لها على مكملات كالسيوم خبراتكم آرائكم ونصائحم |
اولا ربي يحميه لك هو و اخته
شوفي رأي طبيب اخر ... على سبيل الاحتياط و التاكد ابني كان عالرضاعة الطبيعية لمدة ست شهور زي ما ينصحوا هنا و انا ببريطانيا مو بامريكا فا حتى هنا الحين طالعين بهالشي .. الرضاعة تكون اول ست شهور و بعدين الاكل عشان يقلل من حساسية الاكل و نزيد من جاهزية الجهاز الهضمي بس ابني من اول ما انولد نصحوني بقطرات فيتامين د لانه زي ماتعرفي باروربا مافي شمس فا احتمال لين العظام اذا كان اصلا فعلا عنده بداية لين عظام .. تكون بسبب قلة تعرضه للشمس و نقص فيتامين د مو بسبب الرضاعة و عدم ادخال الاكل .. برايي اعرضيه على طبيب اخر عشان تتاكدي و شوفي اذا بيوصفوا له فيتامين د ... |
يعني ما فهمت صار الصناعي الان افضل من الحليب الطبيعي؟
عموما يلا ابدئي اعطيه اكل من الان وعرضيه للشمس يوميا زي ما قالك + فيتامين د ولا تخافي انا اكلت ولدي وهو بعمر ولدك والحمدلله مشيت الامور تمام واذا لزم الامر جربي تخلطي حليب صناعي مع السيريلاك بدل المويه يعني اخلطي الحليب الصناعي مع اكله سواء خضار او سيريلاك وان شاء الله يتحسن |
اقتباس:
والله ودي آخذه لطبيب ثاني لكن زوجي يقول ايش بتستفيدين سواء عنده لين عظام ولا لا العلاج وكتب لك اياه وهو Osteocare Liquid و أنا لسه ما بديت معاه لأن مكتوب عليه من 6 شهور وزوجي يقول ابدأي معاه مو مشكلة وشكلي بسوي كذا إن شاء الله وربي الحافظ لكن فعلا مستغربة مسألة لين العظام صحيح ما أعرضه للشمس كل يوم بس وقت نطلع من البيت تجيه شمس حقت اسبوع لكن بيني وبينك ثنتين من قرايبي يرضعون طبيعي صار في عيالهم لين عظام وكنت أقول ربما تغذيتهم سيئة عشان كذا أثر على عيالهم فهل يكون هذا السبب أو قلة التعرض للشمس الله العالم وبالنسبة لكلام الدكتور اللي رحناه نفس كلام الكبار عندنا وقت ما اعطي شيء لعيالي بس أرضعهم ما يخلون شيء اول بنتي الحين الولد نحيل مش دبدوب وجسمه رخو ليش ما تذويقينهم ليش ما تعطينهم انتو كلكم عطيانكم أكل وأعشاب وكل شيء وما فيكم إلا العافية وأنا أظن قرار الرضاعة الطبيعية لست أشهر ما جا إلا بعد دراسات الله يعين يا اختي وبالنسبة لفيتامين د الكالسيوم اللي كتب لي عليه الدكتور مدعم أيضا بفيتامين د هو نفس اللي آخذه بين فتره وفترة لكن كبسولات أحسن من اللي يصرف في المستشفيات الحكومية شاكرة لك اهتمامك ومشاركتك وربي يحفظ لك ابنك ويقر عينك فيه |
اقتباس:
تصدقين عاد ليته طرى علي أقول للدكتور هل تقصد بكلامك الصناعي أفضل من الطبيعي لأن على كلامه الطبيعي لازم يجيه تدعيم من الأكل بدري على 4 شهور والصناعي في نسب مدعمه بالكالسيوم زياده ولو بتخليه من غير شيء لست شهور عادي وبالنسبة للشمس بحاول عالأقل من الشباك افتحه وأحط الولد وإن شاء الله لو ما تحسنت أموره يمكن أبدأ أدخل له الأكل بس يمر الاسبوع ويدخل الشهر السادس بالنسبة للخلط مع الحليب فكرة والله ما طرت لي بس يمكن أطبقها مرحليا لو صار أي تحسس ولا إمساك ولا شيء أعرف من ايش الله يعطيك العافية ويحفظ لك ولدك ويرزقك بنوته زي العسل |
توي اتذكرت كولورز
لما وديت ولدي تطعيمة ابو شهرين كنت وقتها مدخله الصناعي انا من بدري + طبيعي الدكتور سالني يرضع طبيعي ؟ قلت لا يرضع مخلط قالي ايه لانه لو يرضع طبيعي فقط لازم اكتبله على فيتامينات وذكرلي اياها بس بما انه بتعطيه الصناعي ولو شويه خلاص كافي لانه الحليب الصناعي مدعم توي اتذكرت كلامه لما قريت ردك .. يلا لا تشيلي هم استني اسبوع وشدي الهمه اعطيه زبادي وسيريلاك مخلوط بالصناعي مع الفيتامينات وان شاء الله خير طمنينا عنه بعدين.. |
حبيبتي .. سألت طبيب
المهم قالي كيف عرف انه الولد عنده لين عظام ؟؟؟ عمل له فحصوصات ولا بس من النظر . قلت اعتقد من النظر قال لو فحص صدره و شاف عظام الصدر و كانت زي كدا مثلا بس على اخف طبعا http://www.nlm.nih.gov/medlineplus/e...size/18111.jpg مثلا فاهذا ما يدل على لين العظام و انما عل نقص فيتامين د لانه ما يتعرض للشمس ... اما اذا كان زي الصورة او اكثر فهذا معناه انه نقص الفيتامين فعلا ادى الى لين العظام عل العموم مثل ما قالت كرؤيستالا استني شوي و بعدين اعطيه زبادي و ابدأي بالاكل مابقي معك شي للست شهور :) |
اقتباس:
لأن بنتي عطوها فيتامينات من وقت ولدت ووكتبوا لها على فيتامين د من بدري لأننا ساكنين في شقة بس سبحان الله مو المفروض الحليب الطبيعي ربي مجهزة بكل احتياجات الطفل يعني ما نحتاج فتامينات ومدعمات ولا تغذيتنا وكمية الحليب اللي عندنا مو لهناك الله يعين وجزاك الله خير عزيزتي على اهتمامك |
اقتباس:
هو فعلا الطبيب بعد ما شاف صدره سألني الأسئلة اللي ذكرتها وقال لي انه بداية لين عظام و ماقال نقص فيتامين د لأن اللي في ولدي أقل من اللي في الصوره اللي حطيتيها جزاك الله خير ربما ربط نقص الفيتامين ببداية لين العظام فخرعني صراحة ,,, الله يطمنك ويجزاك خير عموما ببدأ معاه الكالسيوم المدعم بفيتامين د وكلها كم من يوم بس يدخل في السادس شوي إن شاء الله ببدأ معاه في الأكل وتتحقق أمنية بنتي اللي كل مره أشوفها تآكل وتحاول تأكل الولد معاها إذا صرت مو عندهم وتجيني تركض خصوصا تجربتها الأولى يا ماما ترى اخوي يأكل فتح فمه وأكل يبدو إنها كانت تعتقد ما عنده أسنان ما يآكل ولا يفنح فمه ووعدتها بس يبدأ يآكل بخليها تستلم نص المهمة شكرا لك عزيزتي ولاهتمامك |
colors
سامحيني على كثر المداخلات بس موضوعك قلقني صراحة و لخبطني .. لانه طول عمرنا نعرف انه حليب الام كاامل من وين طلعوا الا بفيتامين د و ببقية الفيتامينات و المكملات من الان افكر بالبيبي الثاني :) و كيف بسوي فيه ارضعه و لا اعطيه صناعي :) المهم رجعت ادور و لاقيت الحلقة الناقصة اللي طمنتني رغم انها بديهية مكتوب انه طبعا حليب الام من المفترض يكون كامل و فيه جميع الفيتامينات و المعادن من وين بتجي هذه الفيتامينات و المعادن .. اكيد من جسم الام فاذا كان جسم الام فيه نقص فيتامين د مثلا فا حليبها ما بيكون فيه فيتامين د بالكمية المناسبة و الكافية للطفل فلهذا السبب حبيبتي السر مو بانه نعطي اولادنا حليب مدعم من اول يوم ( زي ما كانت حاطة براسي بسوي مع الطفل الثاني بعد موضوعك :) ) و انما بالاهتمام بتغذية الام تمماااااامماا و الحرص كل الحرص انه غذائها فيه كافة الفيتامينات الغذائية اللي تحتاجها و اللي يحتاجها الطفل ... فاذا كان جسم الام سليم و كامل .. راح يكون حليبها كامل و جسم طفلها صحي .. سبحااان الله كل شي يقع على الام .... الله يعينا ... قريت المعلومة و حبيت افيدك فيها حبيبتي |
| الساعة الآن 03:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©