|
كيف أخلي أبوي يحب زوجي ؟؟!!
السلام عليكم ورحمة الله وبركاااااااااااااااته زوجي رجل طيب ودمث الأخلاق جدا وأبوي نفس الشي أنا إنسانة هادية وفي حالي أنا من بد كل خواتي الأقرب لأبوي حتى طريقة تفكيرنا ونظرتنا للأمور متقاربة وكثير نجلس نتحاور ونتناقش سواء في السياسة أو الاقتصاد وأمور غيرها كثير ولما يصير جدال في البيت غالبا أكون في صف أبوي يقولون إلي يحبه الحبيب حبيب عشان كذا توقعت إني لما أتزوج إن زوجي بيكون مقرب جدا من أبوي لكن للأسف طلع العكس تماما أيام الخطبة كانت الأمور عادية جدا ومالاحظت شي غريب لكن من صار الزواج انقلب أبوي على زوجي صار مايطيقه ولا يطيق طاريه ولما نجيهم زيارة ألاحظ على أبوي نظراته القاسية لزوجي وكيف انه يدقق على كل كلمة يقولها زوجي ويدور له الزلة بالملقاط وزوجي ملاحظ وساكت ومتحمل علشاني ،،، وكنت أتمنى أعرف السبب خصوصا إن تعامل زوجي مع أبوي قمة في الاحترام والتقدير بعد شهور من الزواج وتحليل لكثير من المواقف اكتشفت إن أبوي مايسوي كذا إلا غيرة من زوجي لأنه خذني من تحت جناحه وإنه صار هو الأقرب لي يعني العادة إن الأم هي الي تغار من زوجة ولدها وتبدا تنكد عليهم حياتهم أنا صاير معاي العكس بالضبط أبوي يغار من زوجي وفعلا يحاول يبعدنا عن بعض بأي شكل !!!! أبي حل مدري شسوي كيف أقدر أخلي أبوي يحب زوجي ويعامله مثل مايعامل أزواج خواتي الباقيات ؟؟!!!! لأن الحياة كذا صعبة الأمور كل مالها تتعقد وفيه تفاصيل كثيرة لو أقولها يشيب شعر روسكم |
وعليكم السلام أختي الفاضلة هو يكون مثل ما ذكرت غيرة لعلها بسبب فقد والدك لحنان البنت وخاصة أنك اقرب بنته إلى قلبه وأكثر من يفهمه ويقدره ويحترمه وفترة زيارتك لأهلك ممكن أنك تكونين قريبة من والدك كما كنت قبل زواجك حتى تنتهي فترة الزيارة وترجعي لبيتك ولو حصل إساءة من والدك لزوجك فالافضل لزوجك هو رد الإساءة بالإحسان هذا إذا افترضنا إن زوجك على علم بما تعرفين أنت من سبب تغير والدك في تصرفاته وكلامه مع زوجك والله يبعد عنكم وساوس الشيطان عزوبي بس رجل |
كم لك متزوجه؟أظن مالك كثير صح
نفس وضعي أول ماتزوجت أبوي كان يحب زوجي قبل مايتزوجني بس من أول ماصار العقد وأبوي تغير على زوجي ونفس الشي زوجي ملاحظ بس يطنش لأنه عارف أن أبو يكان مره يحبني بين خواتي حتى وقت العقد كان قاعد يصيح الله يحفظه علشان كذا دايم لما تروحي البيت بيني لأبوك بطريقة مباشره أوغير مباشره أن زوجك يحبه مثل أبوه ويحترمه كثير ومايجيب سيرته الابالخير ونفس الشي عند زوجك قولي له أبوي مره يحبك ويمدح فيك صدقيني مع الوقت بترجع الأمور لما كانت عليه من الحب والأحترام بكره أبوك بيتأقلم على الوضع الحين لي سبع سنوات والحمدالله الوضع ممتاز |
عزوبي بس رجل
كلامك صحيح أختي ندى طمنيتني كثير لأنك عشتي التجربة أنا باقي شهر وأكمل سنة على زواجي وأصلا زواجي تأخر كثير فأبوي تعود على وجودي حيل بالبيت ولما تزوجت اضطريت أنتقل منطقة بعيدة حيل فصار الفقد مضاعف أنا كنت أفكر فعلا في النصيحة الي قلتيها بس كنت خايفة انها ماتجيب النتيجة المطلوبة لكن الحين اقتنعت بها أكثر وببدأ أسويها بالتدريج بين الاثنين لأن حتى زوجي صار ماخذ موقف من أبوي جزاك الله كل خير أختي ريحتي بالي |
كلام الأخوان والأخوات ماعليه غبار وهو الاحتمال الأكبر,
والاحتمال الثاني(ضعيف)ممكن يكون زوجك أخطأ(بدون قصد)أثناء أو بعد العقد,فأخذها والدك في خاطره.. تقربي من والدك ودعي زوجك يتقرب أكثر أثناء زيارتكم.. والله ييسر أموركم.. |
| الساعة الآن 07:46 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©