|
مشكلتي .... جمال زوجي
انا فتاة على قدر من الجمال و(كنت) على ثقة كبيرة من نفسي
تقدم لي احد الشباب وفي يوم الشوفة فوجئت بكونه بارع الجمال .. أعني ان جماله ملفت ماشاء الله عليه واخذت امي تغمز وتهمس بجماله .. وبعد بحث واستخارة تمت الموافقة بدأت مشكلتي من قبل الزواج في ملكتي جاء الناس يهنئوني بعد خروج العريس والكل يمدح عريسي وحسن اختياري في الوقت الذي اردت ان تكون الاضواء كلها لي خطفها مني -دون قصد منه- لم اكن ابالي في البداية ولكن بعد زواجنا صار يستحيل الخروج معه .. انا اللي اعرفو الشباب يطالعو في البنات في الاسواق والمجمعات بس دايما يسير معانا العكس فملامحو الاوروبية تلفت الانتباه عليه وكم مرة انتبه البنات يطالعو فيه ويتغامزو واللي يحرق دمي انو مافي اعتبار لوجودي :19: هو مرة خجول وعلى طول يحمر لمن يشوف كدة ويقوللي انت احلى من كل البنات وهادول اصلا ماعندهم خجل ولاحياء وانا عيني ماتشوف غيرك والله ماسرت اخليه يلبس ثوب واحنا خارجين .. يلبس بنطلون عشان يحسبو اجنبي ويتركو في حالو ! حتى امي تفرق في معاملة ازواج اختي ودايما زوجي بكفة والباقيين بكفة وتقول انو زوجي مميز وحلو !! وهادا يجيب الخصام والغيرة بيني وبين اخواتي :mad: والله ياناس يمكن تحسبو الموضوع هين بس مع الايام بيزيد حبي لو وتزيد غيرتي عليه وماسرنا نخرج الا ونرجع متخاصمين بسبب الموضوع دا .. والله انا مو مقصرة معاه في البيت اتزين واكشخ ما ابغا عينو تزوغ هادا واحنا لسة ما عندنا اولاد كيف لمن احمل وجسمي يتغير واتخن !! :( اخاف الشيطان يوسوس ويقول ايش مقعدني وانا الف وحدة تتمناني هو الحمدلله طيب مرة وحنون ويصلي ما اشوف عليه عيوب الا شكله !! لو اقدر كنت قلتلو يغطي وجهو :d فقدت ثقتي بنفسي وزهقت من مقارنات الناس بيني وبين زوجي !! تتوقعو ايش الحل ؟؟ |
لا حول ولا قوة الا بالله
يعني اذا تزوجت الوحدة وسيم مو عاجب واذا تزوجت قبيح مو عاجب.... اذا طلعتوا لوني وجهة بالاسود ... واذا رديتو غسلية وبكذا ترتاحين |
حبيبتي .. اولا الف مبروك الزواج ربي يديم بينكم المودة يارب
غاليتي البنات الوقحات الي يطالعوا فيه برى ما ياثروا فيه اذا كان ما اثروا فيه وهو عازب و راح خطب وحدة بنت ناس شرواك كي بيأثروا فيه وهو متزوج؟؟؟؟ خلي ببالك انه يستحقرهم و صدقيني بطريقتك هذه انتي اللي بتطفشيه .. كثرة الغيرة و النكد تطفش الرجال اذا طعتوا سوى مالك دخل من اللي يطالع اهم شي هو غاضض بصره و خلاص الموضوع راح يكون صعب بالبداية لكن عودي نفسك و هذبيها على الصبر و التحمل و التطنيششششش خلي سوالفك معاه سوالف حلوة ضحك ووناسة .. حب و اعجاب .. سواء و انتو برى او اذا رجعتوا .. و لما ترجعوا البيت اشكريه و قولي له كم انك استمتعي بالطلعة معاه الجمال مو شكل .. فا حتى لو الوحدة فاااااائقة الجمال لكنها نكدية .. الزوج يتعود على شكلها الخارجي و لكن يمل بعدين من طبعها و غيرتها .. اتعوذي من ابليس و لا تطشي زوجك بالغيرة و المشاكل اللي مالها داعي و عيشي معاه احلى ايام حياااتكم اضرب لك مثل باحدى قريباتي .. متزوجة برجل ماشاء الله عليه وسيم و هي فعلا اقل منه جمالا ولهم 10 سنوات الان و يموووت فيها الله يديم عليهم السعادة يارب و السبب انها طيبة جدا معاه و بشوووشة لابعد درجة حياتهم كلها ضحك ووناسة ربي يسعدهم و ما تنكد عليه .. بالعكس هي اللي تلبسه و تعطره و تكشخه و تقول لازم تكون على سنجة عشرة :) وهو مبسوط طبعا و يحبها و لا عمره شاف لحد غيرها ... اما بالنسبة للوالدتك ... فا كلميها بينك و بينها و فهميها انه هذا الشي يخلق حساسيات بينك و بين خواتك و ان شاء الله تتفهم موقفك .. الله يسعدك حبيبتي |
والله ماسرت اخليه يلبس ثوب واحنا خارجين .. يلبس بنطلون عشان يحسبو اجنبي ويتركو في حالو
ههههــــــــــ:d بنات ابليس مايخلون حد بحاله !!! حسبي الله عليهم !!! انتي لاتنبهينه ع الموضوع وتخلينه براسه !!! |
لو اقدر كنت قلتلو يغطي وجهو
هههههههههههههههههههههههههه حلوه هذي أختي مادام يخاف الله فلا تخافي عليه ولوكان جميل كيفما كان واتركي الغيرة الزائدة لاننها ستتطور الى الشك الذي هو مفتاح الإنفصال |
ما شاء الله .. الله يحفظـه و يخليـه لك حرام عليـك لا تهدميـن حياتـك بـ يـدك وشـ ذنبـه هو ؟!! دامه أخلاق و يخاف الله و ما يضايقـك بـ شي ليش تسويـن مشكله من لا شـيء !! أنا ماني شايفـه فيه مشكله الحقيـقه حافظـي عليه و على بيـتك لا تخلين أي شي يأثر على حياتـكم دامكم متفاهميـن (: الله يسعـدكم و يحفظكم من كـل مكروه |
مرحبا حبيبتي
انا مراح اطول عليك الكلام بس بقولك البنات لو يمشي واحد شكله عااااادي يطالعون فيه عادي صارو البنات بدوووون حيا وهذا شي مره كبير ومتعب بس حبيبتي تاكدي مافي رجال احلى من الحرمه لان المراءه تجمل حالها باشياء كثيره البس المكياج الشعر ولايضيق صدرك حبيبتي الله يجملك بعيونه ولاينظر لغيرك ياااارب ........................ |
الله يعينك والله
اللي عندنا ........... ونغاار عليهم فما بالك بجميييل |
اقتباس:
الجمال جمال الروح . هذا للي يدرك معنى الجمال !!!! |
غاليتى أعتقد جمال زوجك مافى أى مشكله المشكله
التى بحياتك عدم ثقتك بنفسك وعدم تقدير الذات حاولى تعززى ثقتك بنفسك من خلال كتب للتنمية الشخصيه أو أحضرى بعض الدورات عن الثقه بالنفس أياكى أن تشعرى زوجك بهذا الشعور لان غلط أن يشعر بذلك صدقنى أنت لو تقديرك لذاتك أرتفع سوف تتغبر حياتك وتشعرى بالأستقرار أتمنى لكى التوفيق |
| الساعة الآن 03:51 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©