|
لا اعلم لماذا تغير حالي
السلام عليكم ورحمة الله وبركاته
أحب أسلم على جميع أعضاء المنتدى اللي يذكروني واللي مايعرفوني كذلك بتكلم بالعااميه >>كالعاده بصراحه انا ضاايق صدري من فترة قلت بكتب مشكلتي لعل وعسى القى اللي يواسيني http://forum-static.hawaaworld.com/i...s1/smile27.gif لي يومين وأنا بدوامة بكاااء ... أول شيء بكتب لكم عن نفسي : أنا مطلقه من سنه ونص تقريباا عمري21 ( الطلاق جا مني خلع يعني ) موهنا مشكلتي ... مشكلتي مع اهلي لي كم شهر وأنا مقتلبه فووق تحت وماأدري شالسبب ؟!! متولد بقلبي حقد على أهلي ومنكد علي عيشتي وعلى أهلي ... مع اني بالنسبه لبنات جيلي اعتبر اكثر التزاماا وسابقه عمري بتصرفاتي وتفكيري وهذا سبب من اسباب قلّة صداقاتي لأني اخالط اللي بنفس عمر امي .. أدرس في الجامعه وقربت أتخرج ان شااء الله وقسمي جداا صعب وما فيه من يساعدني حتى مالي صديقات في الجامعه (صدااقه قويه) ودايماا محظوظه بناس بدال ماأستفيد منهم هم يستفيدون مني http://forum-static.hawaaworld.com/i...s1/smile27.gif ومن النوع اللي أشيل هم فضيع .. قبل الاختبارات بأسبوع تجيني حالة اكتئاب فضييعه والنوم يصير صعب علي جداا .. للمعلوميه ترا هذي الحاله جديدة علي من بعد طلاقي لأني أحاول أعوض اللي راح بمستوى أفضل والحمدلله قدرت لكن كل هذا على حساب صحتي (هذا سبب من أسباب نفسيتي الزفت ) كارهه الجامعه كررره فضيع واحسها سبب تعاستي الأول خااصة انها شاركتني في مراحل مختلفه من حياتي (عزباء-متزوجه-مطلقه) مالي خوات اشتكيلهم الحال ويشاركوني ومالي صديقه افضفض لها كل اللي بخاطري لأني ماحصلت الصديقه اللي افكارها نفس افكاري وتعطيني حلول منطقيه ! وأهلي كل مااشتكيت لهم خاصه عن الجامعه يبدون بالاستهزاء بي : دلوعه ومن هالكلام واذا شافوني وصلت حدي يعني مريييضه يواسوني بكلمات بسييييطه تصدقون اني دايماا اصيح مااحد يدري عني ! حتى مرة شافني أخوي وقال وش فيك قلت مافيني شيء بس ضايق صدري شوي وراح قال لأمي ولاجت تشوف وش فيني ولاشيء ولاكلمتني بالموضوع اساساا ودي تجيني مررة وتتناقش معي وتعرف وش الأشياء اللي تضايقني خاصه اني بنتها الوحيدة والكبيره بعد.. ترا أمي تموت علي لكن مافيه أي تعبير للمشاعر عندهاا وهي تسوي كذا من باب انها ماتكبر الموضوع ! حتى انا مااستغنى عن امي ودايماا اشاورها ومااعتبرها امي اعتبرها اختي الكبيره لأنها ماتحسسني بحنان الأم ... عمرها ماضمتني اوباستني اوقالت ياابنيتي .... >>>ان شااء الله تكونون فهمتوا وش قصدي . المشكله الأساسيه واللي اجبرتني اني اكتب مشكلتي .. الحمد لله انا جميله (مع اني مااحب اقول عن نفسي هالشيء) ووين مااروح لازم انخطب (ماشاء الله ) وترا الجمال موكل شيء لكن انا معروفه بأخلاقي الحمدلله وأعرف كيف أكسب قلوب الناس وواثقه من نفسي ومحترمه نفسي بلبسي >>>طبعاا هذا تنويه للبنات اللي يقولون ليش ماننخطب ! وأول ماتطلقت تقدم لي خطاااب كثير واغلبهم عزاب ... وهذا اللي سبب غرور في نفس أهلي يتشرطون على كيف كيفهم الى درجت انهم وصلوا لمرحله يردون الخاطب من أول مكالمه .... امي تضع شروط وأبوي شروط وأنا على الهااامش .. طبعاا العزاب اللي ارفضوهم لأنهم يشتغلون بقطاعات مايحبها أبوي >>تعقد من بعد طليقي او مايكون عنده شهاده جامعيه ... وأمي ماتبغى اللي مطلق وعنده بنت اوولد وتمشي وتقول هالشرط المشكله اني واجهتها وقلت انا مايهمني انه يكون عنده ولد او بنت اذا كان ماافيه عيووب ... اهم شيء عندي انه مايكون متزوج انا عاارفه ان اهلي يبغون لي السعاده والكمال لكن مهما كان انا افكر بالمنطق يعني مهما كان انا مطلقه يعني الكامل والله لو انه شاااايب بياخذ بنت ماراح يعيبه شيء !! طبعاا هذي الأفكار تراكمت بعقلي وتحولت لتصرفات وعصبيه لاأراديه تضايقني قبل ماتضايق أهلي وماصارحت اهلي فيها لأني ماحصل الوقت المناسب أمي يانايمه او تكلم بالتلفون حتى احياناا اكون اتكلم معها ومتحمسه فجأة ترفع السماعه وماادري الاوهي قايله (الووو)!!!! وكأنه شيء ضروري طيب المكالمه ماتتأجل دقيقتين ؟!! طيب اللي خلاني بدوامة بكاء .. ان الخطاب أحس انهم قلو مررة واول مايخطبني الواحد نحس انه هو الرجل المناسب نسأل عنه وتطلع لنا عيووب الدنياا وهذا ماحصل بالضبط مع آخر واحد .. وصارت عندي صدمه ماادري وش السبب .. ودايماا اشوف احلام شينه شفت الوزغ والجرذي والحيه بأحلامي احياناا اقول عين وصابتني لأني متغيره من كل النواحي أول كنت استغرب من اللي ترفع صوتها على امها ! كنا انا وأمي مثل الصديقاات ويزداد تعاملنا عند الناس فالعيون عليناا .. ودايماا كنت اتكلم على البنات اقول امي هي صديقتي .... اللحين صرنا مثل الجارات ودايماا هوااش على أتفه الأسباب ماأدري هل أنا صرت دقيقه أو امي بعد تغيرت أضرب لكم مثال : أنا جداا حريصة على النظافه والترتيب حتى أمي كانت مثلي لكن أحسهاا صارت أقل أهتمام وأنا صرت أكثر اهتمام:( وصارت تشاركني بنفس الغرفه ودورة المياه أكرمكم الله وهذا مازاد الطين بلله وزياده كنت اكثر التزاماا من اللحين من ناحية الدين واكثر خشوع في الصلاة لكن اللحين كل صلاتي هواجييس كنت آخذ الأمور بسعة صدر وبساطه أكثر خااصه في موضوع الدراسه والكل ملاحظ هالشيء لكن حالياا ماادري وش اللي جاني؟!! وأول ماتطلقت زاد وزني واحلويت كثيرر ووالله انه فيه كذا وحده كل مارحت لمكان تمسكني وتجلس تقص علي مشاكلها مع زوجه وتقول وش رايك ودي اتطلق !!! (شجعتهم على الطلاق على قولتهم ) لأن نفسيتي وشخصيتي جداا تغيرت للأفضل ...... لكن انقلبت فوق تحت http://forum-static.hawaaworld.com/i...s1/smile27.gif بنت الحلوين حالياا مختلفه كلياا عن بنت الحلوين سابقاا ادري ان كلامي مو واضح لكن حاولت قدر الامكان اصفصف اللي يدور بخاطري لأن الأفكار مترااكمه عندي !! واعذروني على الكتابه باللهجه النجديه البحته :25: لكن حبييت اكتب مشكلتي بكل عفويه ومصداقيه .. زبدة الموضوع : أنا تغيييييييرت :( ليه؟!! انتظر آرائكم وتحليلاتكم لمايدور معي الإشراف : تم تعديل العنوان ليتناسب مع المضمون . |
غيرت فقط لانك عندك عطش عاطفي . . انتي تحتاجين لشيئين في غاية الاهمية عندك ..
الاشباع العاطفي و الاستقلال في الحياة و القرار و ان اردت المزيد فعلي الرحب و السعة .. |
ماشااء الله عليـكـ ^^
اكيــد أريد المزيد وأنا بانتظاارك ..... كمّل لعلي على ايدكـ احصّل الحل .. |
الاشباع العاطفي
بامران الاول .. ارسمي لنفسك فتي احلام .. و احبيه و ادعي ربك يرزقك اياه في الدنيا .. فان لم يرزقك اياه في الدنيا فاليرزقك اياه في الجنه ان شاء الله الثاني .. اقراي سيرة النبي صلي الله عليه و سلم و افهمي كيف ضحي صحابته من اجل هذا الدين و كيف كانوا يحبون بعضهم بعضا و اقرأي عن الصحابيات و كيف كانت تضحياتهم و افضل كتاب عن ذلك هو "نساء حول الرسول" اربطي نفسك عاطفيا بهذا المجتمع و احبيه و ان استطعتي ان تجدي الصحبه الصالحه في المسجد فلا تتركيها ، فبهذه الصحبه يتم لك الاشباع العاطفي .. اما عن استقرار القرار .. 1- طريقة العصا و الجزرة .. اخدمي من حولك حتي يصلوا لدرجة كبيرة من الاحتياج اليك .. ثم اطلبي منهم حقك في الحصول علي استقلال عادل .. فان رفضوا .. فاحرميهم من هذه الخدمات بحجم يتناسب مع حجم رفضهم 2- اجعلي لنفسك مساحة من الحرية لا تتعارض او تتقاطع مع حدود الاخرين و خطوطهم الحمراء ارجو الاستفسار ان كان شيئا مما ذكرته غير مفهوم |
يا عمري انتبهي تسمحين لأهلك يردون الخطاب والله بعدين ما تلقين اللي يطق باب بيتكم
وبعدين لا تنسين الاستغفار وقيام الليل وقرأة القران اما من ناحية الجامعه شدي حيلك لأن مراح احد يفيدك بحياتك غير شهادتك اما من ناحية الوالده حاولي تتقربين منها لأن مافي ماتحب بنتها وانسي طليقك لاتذكرينه وتجددين المواجع الله يفرج همك ورددي دعاء لأاله الاانت سبحانك اني كنت من الضالمين |
ماتفتقدين اليه هو ماتفتقده كل امرأة تزوجت وعاشت باستقلالية وبيت خاص وزوج
ثم خرجت بخفي حنين لاهي التي بقيت كما هي ولا التي هي عاشت حياة المتزوجين وذاقت طعمها كما يجب وضعك ليس كما هو وضع الفتيات نظرآ لإحساسك إجبارآ بالنقص لأن الطلاق يكسر المرأة حتى وإن استطاعت المرأة العيش بعد ذلك بل وسـ تستطيع في أكثرها لكن يظل الطلاق حاجزآ مريعآ لها وضعها في الحياة ليس هو الوضع الطبيعي لكل امرأة بنت > مخطوبة > متزوجة > أم ,,, وهكذا لكن المعادلة الآن بنت >مخطوبة > متزوجة >مطلقة أي عادت كما هي ولكن بشكل آخر شكل تكره جميع النساء مهما كانت قوتهن كل ماعليك أن تتنفسي الصعداء تفكري جيدآ ماهي الحياة ولم وجدنا هنا ؟ لاتضعي الزواج هو الاستقرار الوحيد بالحياة بل اجعلي قوة إيمانك وقربك من ربك هي الراحة والطمأنينه والسكينة التي تزرع في قلبك حب كل شئ وبالنسبة لأحلامك يجب ان تستشيري وتستفسري عن تفسيرها لأن الحية هي امرأة عدوة والله أعلم اقرأي على نفسك وامك ولاتنسي الأذكار وسؤال الشيخ عن تفسيرالأحلام وفقك الله |
d- good man :d
أشكرك اخوي والله يجعل ماكتبت في موازين حسناتك صدقني وأنا أقرأ ردك ابتسمت .. تدري ليش ؟ لأني كنت أطبقها بعفويه من غير ماأدري بنتائجها الايجابيه واللي كانت ملحوظه علي .. لكن أشكرك فعلاا على تذكيرك لي يعني مثلاا فارس الأحلام بالفعل كنت راسمه مخطط في بالي للشخص اللي أفضله وكيف راح اتعامل معه لأني كنت في قمممة التفائل .. لكن حالياا ومع تكرار المواقف ذاتها حسيت انه احد صحااني من الحلم والخيال اللي كنت عايشه فيه وتفاجأت بالوااقع !! باختصار ولأول مرة أقولها أنا للأسف انكسرت من شيء فوق طاقتي ... والدليل اني بكيت ولأول مرة قدام أهلي ومو بكاء طبيعي مع العلم ان دمعتي ماتنزل بالساهل وماابالغ اذا قلت عدد مرات بكائي معدووده حتى في أصعب الواقف ! وايضاا قراءة الكتب اللي تتكلم عن الرسول والصحابه فعلاا معاك حق لها مفعول قووي ومؤثر أشكرك من كل قلبي على مساعدتك لي واعتذر على ازعاجـكـ وان شااء الله بطبق كل نصاائحك ... وتسمع النتائج المبهجه قريب:d ومصير بنت الحلوين ترجع كما كانت ^^ |
اقتباس:
و من نااحية طليقي شاايلته من رااسي وماادري عنه اذا هوحي اوميت اصلاا والدراسه : الله ييسرها ويفكنا منها قريب ان شااء الله جزااك الله الف خير |
اقتباس:
فعلاا أنت جبتها عالجرح يمكن الكلام اللي قلته تفكير بااطني وماظهر لي الابعد ماوصلت للحاله هذي هو فعلاا ان الطلاق أخذ مني شيء لكن الحمدلله أعطاني أشيااااء ... وفيه معلومه ماقلتها وأنت ذكرتني فيها : أنا لي فترة وكل ماتقدم لي أحد وأهلي يسألون عنه ويبحثون ويدققون في المعلومات .. أبدأ أحسسهم بالذنب وأقول لو أنكم سويتوا نفس اللي جالسين تسوونه في اللي يخطبوني حالياا من بحث وسؤال مع طليقي كان ماوقع الفاس بالراس ... وبصراحه بيني وبينك :) أنا ماأحس بالندم على الماضي وراضيه بنصيبي لكن من كثر ماأنا أحاول ألفت انتباههم لي وأحسسهم بأن اللي صار لي موشيء بسيط صرت أمارس هالأسلوب ...وياخوفي تكون عقوبه علي ! لأنهم شافوني أني ماأعطيت أي اهتمام لموضوع الطلاق وصرت أسمع منهم كلام جارح بعض المرات طبعاا من غير قصدهم .... عموماا .. ماادري كيف أشكركم لأنكم جالسين تساعدوني على ايجاد خيوط المشكله كنت في دوااامه وماأعرف كيف أطلع منهاا ! واذا عرفت سبب المشكله الأساسي باذن الله راح أحصّل الحل .. مع اني أحياناا أحس ان دراستي وقلقي الزائد سبب رئيسي ويؤثر على نفسيتي وتفكيري فيتحول لتفكير سلبي ... |
أنتِ في حاجة للزوج والعاطفة والرومانسية والإستقرار والأمومة ,,, وكل هذا في دواخلك ويضغط عليك لينزل دموعكِ ,,,
|
| الساعة الآن 08:25 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©