|
طفلي ثلاث سنوات ويتلفظ الفاظ بذيئة نصائحكم
السلام عليكم ورحمةالله وبركاته
عندي ولدي عمره ثلاث سنوات وتسعه اشهر مررره شقي ويقول كلمات مو زينه مثل يا كلب يا ملعون يا حيوان وكمان يتفل ويضرب اخوه عمره سبع سنوات واخته سنه ونص ويصارخ ويتكلم بصوت عالي ولا همه احد يرمي ويكب ابوه مره يدلعه ما عرف وش يسوي معه وانا اهدد واتوعد ولا همه كل يوم اشوفه اسوء من اليوم الي قبل وكل ما سوى شي غلط وقلنا اليوم مافيه طلعه معانا يبكي ويقول اسف يا ملاعين يعني مرررررررره مجنني حتى الاكل ما نعرف ناكل منه ان سوينا كبسه قال وين الرز الابيض وان سوينا رز ابيض قال وين الاحمر ويحوس السفره علينا والله عجزت معاه ويفكر انه اذا قال اسف ان كل شي راح يتصلح اخوه الكبير عكسه تماما الله يحفظه هادي ويسمع الكلام حتى لمن كان في سنه وشو الحل ارجوكم قبل يجيني الضغط والسكر :( |
اقتباس:
اهلا عزيزتي .. أنا عندي الحل وحل مجرب ومضمون 100% وأنا واخواني قد سبق امي وخالاتي استخدمولنا هالعلاج يوم كنا صغار الحل هو الفلفل .. او الزنجبيل .. او البهارات .. لما يقول كلام بذئ على طول قوليله (( هالحين أجيب الفلفل )) وجيبي الفلفل او البهارات .. عشان يعرف انو كل الكلام البذئ مربوط بشي مايحبه ويكررهه مره .. ولا تنتظرينه يفتح فمه ع طول امسحيه بشفايفه ..وماراح يضره .. يومين و ع طوووووووووووول ترك هالعاده .. جربي وبتشوفي ..:17: |
جربي تخوفينه بالصرصور مثالا اتقوليله الحين بجيب الصروصور:22:
|
الف شكر للرد السريع والله دائما اهدد بالفلفل والشطه بس الحين شوفوا الفلفل قدامي :) وان شاءالله يجي بفايده
|
لا حرام لا تضغين فلفل .. يمكن يحس بالوحده .. جربي تكوني صديقته و لطيفه معه .. و كلميه بلطف و أحضنيه كثيرا و قبليه و حاولي تثني عليه ,., و عاقبيه ليس بالفلفل .. و لكن لا تلعبي معه .. و لعبي مع أخوه ..
بالتدريج سيهدأ .. + إقرأي عليه قرآن إجعليه ينام على القرآن .. و ممكن تقرأين له قرآن بماء الذي سيشربه .. صدقيني سيتحسن .. أعتقد انه يحتاج لأحد يعطيه جرعاات حنان بزياده لا بمعاقبته بالفلفل أو الملح .. ؟؟؟ هو طفل .. أكيد سمع الكلمه من أحد و حفظها .. و إلا لما تفوه بها .. كافيئه ماديا و معنويا كلما تحسن . ... |
ع سالفه الأكل معظم الأطفال الأذكياء يتبعون نفس السياسيه ..
|
في طريقه .. في التشجيع ع الأكل ..
تغيير الأسماء للأكل و طريقه التقديم .. مثلا .. أسكريم البطيخ .. و يكون مقدم بارد .. كاكاو الخس .. و هكذا .. + لعب مسابقات للأكل .. من سيفوز فريقين هو فريق .. أخوه فريق .. أم تقسيم العائله فريقين .. عند الأكل .. لتشجيعه ع الأكل لا أكثر .. معظم الاطفال بشهيه ضعيفه .. أعتقد دمجه مع أطفال من سنه هو الحل الأمثل لفتح شهيته .. دعواتج لي بالتوفيق و الهدايه .. |
عمره ثلاث سنوات صغير مره انا كنت مثلك اغضب واتنرفز لما اولادي يقولوا كلمه وسخه او يسبوا ولكن مع التجربة اصبحت اكثر تعقل اسمعي كل انسان سبحان الله خالقه بشخصية و سمات معينه انتي بمخك راسمه شيء معين مو لازم طفلك يصبح مثل ماانتي عايزه انتي بكذا تقيديه انتي بشخصيته هذي حاولي انك تربينه طبعا وكل واحد وله تقبل يختلف عن الثاني ولا تنسين ان الطفل الثاني يحتاج تربيه معينه يوجد كتب كثيره عن الطفل الثاني في علم النفس وخصوصا ان بعده طفله وبفترة قصير نسبيا يعني هو الان يواجه مشكلتين حاولي تحتضنيه اكثر ابتعدي عن اعنف نهائيا(ضرب - هواش - حرمان- التخويف ) عمره تحت الخمس سنوات فيه اطفال اذكياء يفهمون و يكون عندهم حس علشان كذا هم مطيعين اما ولدك مو فاهم ايش المطلوب منه او ينسى بسرعة ما عليك الا انك تهدي هو يشوف ردت فعلك فيكرر العمل انتي تغيفلي او نبهيه بطريقه ما بعيدا عن تكبير الامر لان ذلك يرسخ المشكلة .
- تخويف الطفل يجعله اما مهزوز او عدائي - سمعت من دكتورة ان من الاسباب الغير عضوية(النفسية) لرائحة الفم الكريهة الضرب مع الفم او وضع نكهة غير مرغوبة في الطفولة ياحبي له وش يقول آسف يا ملاعين روعة صراحة نكته وسعي صدرك |
اول شي وانا خوك هذولا اطفال لا زم يصلحوا كذا وصدقيني مابيطول على هذا الحال
ان شاء الله لكن شوفي الطريقه او الشي اللي يحبه وابعديه عنه هدديه قولليه ترا مابصلح لك كذا الا لمن تسكت وكذاا........ وخليكي قريبه منه عشان مايفقد عاطفتك كأم ولا تهملينه لان الاطفال من السن الصغير ذكي جدااااااااااا الله يخليه لك ويصلحه ويخلي اطفال المسلمين ويصلحهم يرجى الانتباه عند كتابة لفظ المشيئة |
الرز الابيض
بسم الله الرحمن الرحيم
اختي الكريمة السلام عليكم ورحمة الله وبركاتة الله يعينك ويصبرك على تربيتهم وبالنسبة لموضوع الرز الابيض والرز الاصفر في قصة الله كانت تقول انه في واحد كان متعب اهله وماياكل وقت الاكل ويدلع عليهم هذا ابغاه وهذا ما ابغاه وكانوا تعبانين معاه المهم مره اشتكى ابو الولد لواحد من جيرانه وقاله الولد متعبني وش اسوي معاه اقترح عليه جاره انه يرسله لقلان من الناس وكان هذاك الرجل ابو اولاد كثير وحالته المادية بسيطه على قد حاله مثل مايقولون المهم الرجال ارسل ولده عند الرجل ابو العيال الكثير لكي يعلمه الادب وفي اليوم الاول طبعا حضر الطعام فقام اولاد الرجل بسرعة واكلوا الاكل كله بسرعة طبعا ولد الرجال متعود على من يجي ويترجاه علشان ياكل ويمنيه وش تبغى حبيبي من اكل الولد لاحظ انه ماحد اعطاه وجهه ولاعزمه ومر علية يوم كامل مادخل فمه لقمه وحده ولما قرصة الجوع تصدقوا كان اول واحد يقعد على السفرة في اليوم الثاني واكل الموجود وبشراهة على الام ان تربي ابنها تربية متزنة لا افراط ولاتفريط والامر الثاني اللي ممكن نجربه من الطفل المدلل هو اننا نشد عليه يعني اذا قال ما ابغى الا الرز الابيض نقوله معليش حبيبي مافي رز ابيض في رز اصفر ماتبغى لاتاكل طيب ما اكل عادي هو لو جيعان راح ياكل اي شي اتركيه وخلوا كلمتكم وحده مو واحد يشد وواحد يرخي طيب قل ادبه احبسيه في غرفة معزولة لفترة خمس دقايق واخبريه انك تحبيه بس ماتحبين سلوكه استخدمي معه اسلوب العصاء والجزرة ترى ها الاسلوب مو حكر على السياسة فقط التربية هي سياسة ايضا بالنسبة للضرب ممكن يكون اسلوب تربية بس مو على الوجه تحاشي الوجه وادعيلهم الله يهديهم والله الموفق اذا سوء له اكل |
| الساعة الآن 07:19 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©