زوجتي تطلب الطلاق
 

السلام عليكم ورحمة الله وبركاته

مسائكم خير

مشكلتي مع زوجتي مشكله جابت لي الهم والغم لا ليلي ليل ولا نهاري نهار بكل اختصار تزوجت من سنتين بالضبط رزقي الله بمولود عمره الآن 7 أشهر ,, كلنا يعرف ان مافيه بيت ماتحصل فيه مشاكل من اي نوع ,, انا مشكلتي مع زوجتي شبه دائمه او مستمره زوجتي من النوع العصبي الحمقي الحاااار !! تعصب وتصرخ وتخلي عاليها واطيها بأسباب تافهه ماتستاهل أبدا ونادرا جدا جدا جدا ان يمر اسبوع ماتصرخ فيه وتزمجر وتشيل الارض على راسي !! وانا كاتم غيضي واحاول امسك اعصابي أكثر قدر ممكن وكل مره انجح وامشيها الى ان تطور الامر لحظه الغضب ان تشتمني واحيانا تقول "انت ماربتك حرمه" لاني امي رحمها الله متوفيه وانا صغير وربتني زوجه ابي رحمه الله ايضا !! ودائما لحظه الغضب لاتمسك اعصابها وكله يا اخوان ويا اخوات على توافه الأمور المهم وخلاصة الكلام انا ما ابغى حل للمشكله هذي لان هذا طبعها وخطيئتي اني تزوج بنت أهلي مايعرفون عنها شي الا انها قريبه لنا من بعيد فقط !! مرت الايام والشهور على زواجنا حتى مر الشهر الفائت في رمضان تحديدا اذكر كانت جالسه في الصاله تسوي الفطور وكان الولد مضايقها حبتين الى ان طاشت وابعدته بمرفقها وطاح على راسه وبكي بقوه انا في هاللحظه صرخت في وجهها "ليه كل هالعصبيه السالفه ماتستاهل تردعينه كذا "!! هي صرخت في وجهي وقالت ليه انت ماشلته عني تشوفني مشغوله طبعا قالت الكلام تصرخ بشده بوجهي انا مسكتها مع عضدها وقلت لها لاترفعين صوت بوجهي اقص لسانك تراني متحملك اكثر من اللازم وحرارتك هذي خليها في بيت اهلك مو علي انا وولدي ! قالت "اقوول ابعد"!! وضربتني بيدها ورفستني برجليها ( دائما تمد يدها علي) وانا امسكها احاول اهديها مابي امد يدي عليها اخيرا من شده عصبيتها تكرمون "بصقت في وجهي" !!! فانا في هذه اللحظه قلت لها شوفي مرات كثيره عدت الا هالمره كأنك خطاك طالت انا اوريك ورحت جبت العقال وحطيته في يدي وهددتها فيه ان رفعتي صوتك ياويلك !! رفعت صوتها اكثر من ماينبغي "اعتقد الجيران سمعوا صراخها" وشتمتني بكلام لايقال هنا أبدا انا بلمحه بصر ولاول مره من زواجنا اعطيتها كف على وجهها من قوته آلمتني يدي !! ثم اعقبته بالعقال على ساقيها ضربتين وعلى ظهرها ضربه !! هي طبعا بكت وطلبت الطلاق وللعلم حتى قبل الضرب هي كانت تطلب الطلاق على كل مشكله تحدث !!! والان من بعد المشكله الكبيره الي صارت مادري وش صار فيها مره تقول هذي ماعندها مانع تعيش معي ومره تقول هذي خلااااص مستحيل يعني انا اوديها لاهلها شبه يومي وترجع معي عادي بس اول شي يزعلها او يغضبها على طول طلقني ياخي مابيك انا قرفت من هالعيشه ومن هالحياه كلها والخ!!
يعني مشاعر متضاربه وانا بصراحه مليت من هالحاله بيني وبينكم انا مابي اطلق ابدا مهما صار مو عشاني احبها لكن ولدي انا متعلق فيه لدرجه لاتوصف فهل من حقها انها تذهب بالولد لو صار ماصار لاقدر الله ..


اخواني اخواتي الكرام الكلام الي فوق هذا كله شرح اقدر اقول انه موجز ومفصل بنفس الوقت !! المراد والمطلوب ليس حل المشكله لانها بصراحه طبيعه والطبيعه صعب تغييرها البنت حاره وعصبيه لكن الي ابغى اعرفه هل لها الحق في حضانه الولد !!! اذا لاقدر الله تم الطلاق وهي من طلب الطلاق؟؟؟ وهل يرجع لي المهر ولا استمر بتقسيطه وكل شي يروح هباءا منثورا !!!؟؟؟
لان بصراحه انا مابي الطلاق ولا اقدر استمر احمل نفسي ديون على الفاضي !!

وشكرا لكم واتمنى منكم الدعاء لي بالخيره ولكم المثل

ساعدها كن لها يد العون

يعني شجاركم برمضان ليس له سبب

طيب هي مشغوله بالمطبخ وانت تقول متعلق بولدك خلي الولد معك العب معه لحين تنتهي من الطبخ ثم المطبخ خطر عليه طبخ واكل سخن وووووووو



العصبيه لها اسبابها ومنها عدم الاكتفاء الجنسي يسبب العصبيه عند المرأه

ادوية المانع للانجاب

وتجاهل الزوج وانشغاله عن زوجته وعدم التغزل بها وايضا ان لا يشاركها همومها ومشاغلها


انتم اثنان تعاونو في مملكتكم


ابحث عن اسباب العصبيه وعالجها

الله يهديكم ويهدي سركم انتم الاثنين بدها طولت بال وان شالله ما بيصير في طلاق ولا شي ربنا بيصلح الاحوال بيناتكم انت الله يهديك ما كان لازم تضرب لانه بيصير الغلط عليك كان ابسط شيء افتح الباب وامشي لاي مكان حتى انت تهدا وصدقيني هي كانت ستنشغل عليك لو طولت شوي بعدين لا تزعل نفسك من انها ضريت ولدها لو لاحظت بعد شوي لح يرمي نفسو بحضنها لانها امه .هي عيب تسب وتشتم وتفل اكبر عيب لكن ممكن تأديبها او بالاحرى ترويضها. لان الطلاق يؤثر على الطفل وهو طبيعي سيكون في حضانة امه لأنه ينظر في الحضانة مصلحة المحضون قبل الحاضن اقول لك الله يهديكم ويصلح بينكم

مأدري ليه تعاطفت مع زوجتك أحسها مضغوطه عشان كذا عصبيتها

لكن زودتها شوي بمدة اليد والبصق

طيب كيف تكون في الحالات الثانيه لما ماتكون معصبه

وهل تناقشت معها وبينت لها تضايقك من أسلوبها ؟؟

انت عطيت زوجتك فرصه انها تتمادى في الاساءة لك .. لو من البدايه متعامل بحزم مع قلة ادبها

و موديها بيت اهلها عشان يأدبونها كان ما صار هذا حالك .. يعني انت ايضا شريك في وضعك الصعب

انت طووول هذه الفتره لم تتخذ معها اي اسلوب لكي يردعها عن سوء تصرفاتها معك ..

هل اشتكيت عليها عند اهلها و قلت لهم ان بنتهم ما تحترمك ؟؟

هل تركتها في بيت اهلها فتره عشان تحس انك مو راضي عن اسلوبها معك ؟؟

هل زوجتك تدرك انها عصبيه وان عصبيتها قد تهدم بيتها ؟؟

وش رايك تاخذ زوجتك عند استشاري في العلاقات الزوجيه عشان يسنعها ..

بالنسبه للطلاق فالولد بلا شك في حضانة امه ..

بالنسبه لرد المهر لك يجب ان تطلب هي الخلع من المحكمه عشان ترد لك المهر ..

هي عصبية وأنت عصبي والضحية الطفل حكموا شخص معروف بالحكمة بينكم وأذكر له آنزعاجك الشديد من ذكرها الطلاق وأنك يوما ماستجعلك تفقد صوابك وتنطقها
المرآة كثيرا ماتطلب الطلاق وهي تنتظر أن يحضنها زوجها وتعرف غلاها عنده
راجع معاملتك معها ومالذي يجعلها عصبية وبين لها أن الشجار بينكم يضر بالطفل كثيرا
أسأل الله أن يألف بين قلبيكم ويصلح أمركما

انت اللي جبته لنفسك لاراح الاحترام انتهى كل شي بصراحه ما اتخيل نفسي ابصق على زوجي ماني معصومه من الخطا بس خطا عن خطا اما سالفه عيشه تقرف وطلقني فهذا شي عادي انا كمان اقوله وانا مستحيل اكون جاده بس زعل والحظانه للام طبعا عطها فرصه تروح لاهلها وتجلس فتره صدقني بتحن وبترجع بس حط انت الشروط علشان تعيشون بسلام

الله يهديها زوجتك صراحه مو كل هذي عصبيه هي خذت وجه عليك من البدايه وانت ساكت لها!!!!
قوووويه حركتها فيك ومن امن العقاب اساء الادب... مهما كان لابد ان يكون هناك هيبه لزوج ...والحضانه يحق لك تاخذ ولدك في الاسبوع 24ساعه .. والله لايوصلكم لهال المواصيل لازم تفاهم معها بحزم

زوجه غريبه والله يعينك
لازم تعدل من معاملتها معك والا الحياة هكذا لاتدوم ...