خلافنا حول هدايا الزفاف
 

أعزائي الأعضاء ، أنا عضوة جديدة من البحرين و حبيت أعرفكم بنفسي من خلال مشاركتي الأولي
من فترة تعرفت على هذا المنتدى و بالذات قسم المتزوجين لأني كنت مقبلة على الزواج فكنت ابي اتعرف أكثر على الحياة الزوجية و المشاكل اللي ممكن تواجهني في حياتي المستقبلية
أنا ألحين صار لي تقريبا أربعة شهور متزوجة و كنت مخطوبة لمدة سنة
يمكن هذه أول مرة أفكر أسجل و أشارك معاكم شي مضايقني لأن يمكن ما عرفت أقول لأحد ثاني عن اللي في صدري
القصة صارت على هدايا الزواج. زوجي قال لي في بداية الزواج: الهدايا من أغراض للشقة بنشوف ماذا نحتاج منها و بنستخدمه و الذهب طبعا لكِ و الفلوس الكاش أنا باخذهم لأني محتاج. أنا ما اعترضت إن ياخذ الفلوس لأني أدري إن مصاريفه كثيرة. و ألحين الحمد لله أوضاعنا زينة و كل شي ماشي.

أول أمس كانت خالته زايرتنه توها لأن كانت مسافرة و توها قدرت تجينا ، و عطتني هدية الزواج مبلغ من المال. بعدين لما راحت هو قال لي طبعا المبلغ بكون لي. أنا حزتها رميت الفلوس على الطاولة وقلته اوكي خذهم و رحت عنه لغرفة ثانية
جه وراي و يقول لي ليش انتي تبين الفلوس؟ قلت له لأ وبعد هذي خالتك خلاص خذ إنت الفلوس ( و أنا كنت حاطه في خاطري لأن أحس إن هذي الفلوس المفروض تكون لتكملة باقي أثاث الشقة) و حاولت أغير الموضوع
هو زعل من حركتي و ليش أنا رميت هالفلوس بهذي الطريقة و عطاني الفلوس و قال لي خلاص أنا ما ابي شي. أنا على طول اعتذرت منه وهو قبل اعتذاري بس ما قبل ياخذ الفلوس
أمس كان حده جاف معاي على الرغم من محاولاتي إن يرجع الوضع طبيعي. و في الليل شافني أصيح لما هو كان توه راجع من بره و ردينا فتحنا الموضوع.
هو سألني ليش أنا سويت كذا ، و أنا شرحت له و قلت له إن هذا شيء المفروض مشترك قال لي بس أنا مسئولياتي أكثر و بعدين باخذ هذي الفلوس بصرفها على من. فأنا قلت له مو بس انت مضغوط ماديا أنا بعد و صاير خاطري اشتري اشياء مو قادرة و ضربت له مثال ساعة يد ودي اشتريها فهو قال انت شقد عندك و ما تحتاجين ( انا كان قصدي اضرب مجرد مثال و احنا من تزوجنا ما شريت لي شي و هو مو مقصر على روحه) و بعدين هدايا الذهب و الساعات كلها صارت لك و أنا ما قلت لك عطيني منها شي.
اللي حز في نفسي ان هو ما ذكر شكثر أنا أساعده ماديا و عمره ما اشتكى أو احتاج فلوس إلا و أنا ساندته (أنا موظفه ). المهم صكينا السالفة و تصالحنا بس أنا للحين حازة في نفسي إنه عايرني على نتفة ذهب و اني كأني مو محتاجة شي ( الأشياء اللي شريتها لي من تجهيزات العروس كلها من عرق جبيني و تعبي و هدية أبوي الله يخلي لي يعني أنا أصلا ما ثقلت عليه أبدا)
هو ما يدري اني كنت اقصر على روحي بس عشان اعطيه و ما اخليه يشتكي ، يمكن عشان جدي صايرة حزينة
سامحوني طولت عليكم و يمكن تشوفون السالفة بايخه بس ما ادري ليش متضايقة حيل ،و هو بعد أحسه لليوم مو طبيعي و أنا مو قادرة أبادر بفرفشة الجو. هل عندكم نصائح لي و شلون أقدر أرجع طبيعية و أنا متضايقة من معايرته؟

هل سبق وظهرت منه بوادر بخل أو مواقف حسيتي فيها انه بخيل عليكي بالذات عدا هذا الموقف ؟

هل يعلم انك ضيقتي على نفسك حتى تساعديه ؟؟؟ من الممكن انه يشعر بأنك مرتاحة ماديا مثله وغير محتاجة لأي شيء وهو يتصرف على هذا الاساس ...


كيف تعامله معك ومع اهلك ؟؟ هل يحترم رأيك ؟؟

خلاص انتبهي على نفسك ترا الزوج اذا تعود ياخذ من زوجتو ما رح يترك لها قرش واحد ورح تنزل من عينو وما عاد ينظر الا لمالها


انتبهي من هذه النقطه جيدا الزوج هو اللي يصرف على البيت ما تغلبك العاطفه والحب وووووو

افصلي بين الحب والواقع

هو ما يدري اني كنت اقصر على روحي بس عشان اعطيه و ما اخليه يشتكي ، يمكن عشان جدي صايرة حزينة



لا عزيتي لاتمني علي زوجك وقفتك معه واحتسبي الاجر من الله

ولكن في المرات القادمه خليك حريصه

وخليه هو الذي يتحمل صرفيات البيت حتي لوكنت موظفه فراتبك لك

وكونك تصرفي علي البيت فهذا من كرم اصلك ونبل معدنك


هو بعد أحسه لليوم مو طبيعي و أنا مو قادرة أبادر بفرفشة الجو. هل عندكم نصائح لي و شلون أقدر أرجع طبيعية و أنا متضايقة من معايرته؟
التوقيع


نسي الموضوع تماما


وخليك طبيعه واعتبري الذي حصل درس من دروس الحياه


ولا عاد تناقشيه في الموضوع


في رعايه الله

هي كما أطلقتي عليها .. مشكلة صغيرة ..

وفقكم الله لما يحبه ويرضاه ..

أشكركم جميعا على تعليقاتكم اللي أسعدتني و ريحتني كثييييير
زوجي ولله الحمد مو بخيل بس مشكلته ساعات إنه مبذر ألحين طبعا تحسن الوضع لأني من أيام الخطوبة كنت خطوة بخطوة معاه عشان يضع ميزانية لكل شهر ، و هو فعلا يعرف إني مرتاحة ماديا بس هذا لأني أعرف شلون أوفر من معاشي و أصرف باعتدال مع العلم إن معاشه أكثر من معاشي.
أما بالنسبة لتعامله مع أهلي فهو طيب و حبوب و مزوح و الحمد لله يعاملني باحترام و تقدير و يحترم رأيي. و أنا متأكدة لو كان عنده فلوس ما بيقصر علي.
أختي GREEN222 صحيح كلامك من ناحية التعود لكن من ناحية ثانية أنا أحس بالعكس أنا أكبر في عينه وهو يقول لي دايما إن لما الله يوسع عليه ودي يعوضني و أحسه بالعكس يتضايق لما ياخذ مني و في مرات يرجع لي اللي أخذه ، بس مثل ما انت قلت أنا خايفه من مسألة التعود.
عزيزتي نور دبي شكرا لكلامك الطيب و فعلا أنا محتسبة الأجر من عند الله سبحانه و تعالي ولا عمري فكرت اني أعير زوجي بفلس خذاه مني بس تعرفين الواحد يحز في نفسه لما يعطي هالكثر و يشوف إن الطرف المقابل غفل أو تناسى في موقف ما مثل ما صادني في ذاك الموقف
و راح أنفذ نصايحكم إني أنسى الموضوع و بالفعل أمس صرنا أنا وياه أحسن و بدأت ترجع المياه لمجاريها
و أخوي أبو عبدالله شكرا على دعواتك و أحب أشكركم كلكم مرة ثانية أسعدني مروركم و إنكم خذيتوا من وقتكم و قريتوا مشكلتي