|
كيف اتصرف مع اختي.....
السلام عليكم ورحمة الله وبركاته
كيف الحال اخواتي واخواني.. راح ادخل بالموضوع مباشره اختي عمرها 17سنه من شهر تقريبا لاحظت عليها انها متغيره وانا شكيت بالوضع قمت اراقبها بتصرفاتها حاولت اشوف جوالها مااقدر رقم سري ودايم صامت وبيوم دخلت تسبح دورت جوالها مابقى مكان وبالاخير قلت برنه وبس اتصلت لقيته انتظار يعني تتكلم بالحمام انا خلاص زاد الشك عندي وقبل اسبوع نامت والجوال جنبها جيت وفتحته وللاسف شكي بمحله اختي تكلم ولد ومين الولد الصدمه ولد خالتي الي بعمرها ............. انا انصدمت ومخي وقف عن التفكير انصدمت بالي شفته وقريته ماتوقعت كذا كلام وكلام...... وبالاخير انصدم ان وحده من خالاتي عندها علم بالموضوع ...عرفت من المسجات الي قريتها.. انا فكرت وقلت انا الي بكلمها جيت قبل اسبوع وجلست معاها لوحدي سالتها وقالت ايه اكلمه واحبه وجلست اتكلم معاها وقلت لها هذا حرام ووووووووووووو حاولت فيها واهي تقول لي مو عيب ولاحرام هذا ولد خالتي واهو بعد يحبني قلت لها اي حب اي خرابيط الي بالسر ومن ورى اهلك وبعد الكلام الطووووويل قالت لي خالتي تدري وماقلت لي شي قلت لها بس الغلط غلط عاد خالتك تدري او ماتدري اهي ماتعرف الصح من الغلط شكلها هذا غلط وهددتها تبعد عنه ولاتكلمه احسن قالت لي بكل شده ماراح اتركه......وبقيت اسبوع كل اكلمها مافيه فايده وهددتها بقول لامي قالت لي قولي.... قلت لامي اليوم واهي جالسه معانا امي انصدمت وقالت لها صحيح كلام اختك...؟؟؟ قالت ايه صح اكلمه امي قالت لها وليه تكلمينه قالت احبه وخالتي تدري اني اكلمه واذا عندك كلام كلميها انا انصدمت وفجاه امي عصبت وضربت اختي وانا ماخليت امي تضربها اكثر واخذت الجوال والاب توب من عندها وقالت لها مافيه طلعه الا للمدرسه بس طبعا امي اتصلت لخالتي وقالت لها انتي كيف تعرفين وساكته عن الموضوع..؟؟ماادري شنو ردت عليها خالتي طبعا خالتي جات البيت عندنا بعدها بساعه وعصبت علي قالت لي انتي فتانه قلت لها والله فتانه لاني ماارضى بالغلط والشي الي صار غلط وانتي ساكته وفرحانه قالت لي مو حرام ولا عيب هذا ولد خالتها قلت لها ياسلام والله عذر اقبح من ذنب...... قلت لها مين الي لاعب عليك وقالك مو حرام من متى انقلب الحرام حلال.... وامي كلامها مثل كلامي.... طبعا انا عرفت ليه اختي قالت كذا من كلام خالتي.... حبيت رأيكم كيف نتصرف احين...؟؟ كيف نغير رأيها ...؟؟ |
خلاص قولو لخالتك يحبها يخطبها من ابوها
|
اول شي اختي انتي مو غلطانه والله يقويك ولو كنت بمكانك لصلحت اكثر ماافيه شي اسمه حب الي بيها يجي يخطبها |
أين الوالد عن هذه الأحداث ؟
..... لو قلت لك اسحبوا منها الجوال وعاقبوها بذلك فإن هذا لا يجدي .. فالقسوة مع المراهقين لا يزيدهم إلا عنادا .. إن كان ابن خالتك كفأ للزواج فلم ير للمتحابين مثل النكاح .. أو كانت الماديات لا تسمح فعلى الأقل يتم قرانهما .. وإن كان مراهقا مثلها فأرسلوا له رجلا من عندكم يفهمه بأسلوب لين ويقنعه بحرمة ما يفعل ويحاول أن يصرفها عنه .. أو تكلمه أمك فهي خالته .. لكن بالحكمة والموعظة الحسنة .. |
وعليكم لسلام ورحمة الله وبركاته
انتي ماسويتي غلط اني سويتي عين العقل انقول عنهم حركة طيش بس المصيبه خالتك كيف ترضى عل عيالها الحرام وقولي لخالتك ولدها البيوت لها البواب اذا يحبها ليش ما يتقدم ويخطبها اذا كلامكم صحيح اذا كان يحبها ما يطعن ظهر اهلها بدون علمهم اذ كان نوياكم صالحه وقولي لخالتك ترضينها عل بنتك ان تخونكم من وراكم واذا قالت نعم فهاذي المصيبه لو تقدمو لا ترضون فيهم الناس مايحق الشرف فيهم ما اذا اعترفو في خطاهم وجو وعتذرو لكم الخيار |
جزاك الله خيرا أختي الحائرة على حرصك على أختك
-تصرف أختك تصرف فتاة مراهقة مع شخص مراهق في سنها -الحل تحذيرها من زلاتها وسحب الجوال منها وتغيير الجوال ورقمها الى رقم جديد إنذار ابن خالتك من قبل اخوانك واعطائه درس قويا كي يرتدع ويفككم من شره |
خليه يخطبها إذا كان صادق
قولي لأختك ، بكرة يطفش منك و يخطب وحدة ثانية و يتزوجها و تعيشي إنت بقلب مكسور .. إلخ |
اقتباس:
خالتي الا اهي ام الولد ماتعرف بالموضوع ابدا... وبعدين الولد صغير بعمر اختي كيف راح يتحمل المسؤليه....؟ مشكوره |
اقتباس:
انا عارفه اني مو غلطانه بس انا صرت غلطانه عند خالتي واختي... اهم شي عندي اختي مهما قالو مايصح الا الصحيح بالاخير شكرا |
اقتباس:
|
| الساعة الآن 12:58 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©