|
احساس غريب في اخر فترة مع خطيبتي
السلام عليكم
ندخل في صلب الموضوع انا ياجماعة خاطب ليا 7 شهور تقريبا ومتفقين عالزواج بعد سنة كمان .. وخطيبتي اكبر مني بسنتين في اخر فترة ما ادري ايش اللي صابني .. جاني احساس حتى انا استغربت من نفسي انا اقولكم انا احب خطيبتي جدا وهيا كمان .. وبيننا لحظات جميلة .. بس المشكلة انها من النوع اللي ابدا ما يبادر .. يعني لازم انا اسوي كل شي عشان تكمل معايا حصلت مشاكل كبيرة و كتيرة بسبب هذا الموضوع وحاولت افهمها .. بس ابدا مافي فايدة .. الطبع يغلب ! وبعدها جات فترة انا بصراحة طفشت كل شوية اللي اتكلم واسوي وهيا تستناني لين ما اسوي عشان تتفاعل معايا .. الفترة دي سبتها تقريبا اسبوع وشوية .. في دي الفترة هيا اللي حسيت بالاحساس الغريب حسيت اني ماني محتاج لخطيبتي .. وانو الزواج كدا كانو سار تقييل عليا جدا واني انا ليش باتعب نفسي وكدا .. مدري ليش حسيت الحياة مريحة شوية بدون خطيبتي .. وانو قدرت اروح واسوي اللي ابغاه من دون ما اكلم احد ولا احد يسألني عن شي انا بصراحة استغربت من نفسي قلت يعني ليش بأفكر كدا ؟ قلت صح معاملة خطيبتي مو مرة .. بس يعني انو لما بنتكلم بنكون حلوين .. وقلت اتعوذ من ابليس وان شالله ارجع اكلمها ويكون كلو تمام رجعت كلمتها أنبتني وهزأتني قالتلي فينك ما تهتم وحطت الغلط عليا وزعلت ومدري ايش راضيتها بعدها .. بس المشكلة الاحساس الغريب حسيت انو زاد .. وسرت ما ودي حتى اكلمها .. ولما اكلمها ما عندي شي اقولو وكلامنا يا دوب كلو كيف الحال وبس المهم بعد ما راضيتها اتكلمنا كم يوم وبعدها انا طنشت ولين دحين مطنشين بعض ومني داري ايش حتكون النتيجة ! بدات افكر بالانفصال .. بس قلت ليش يعني دا موضوع مرة خطير وانا احب خطيبتي يعني .. ما يحتاج دا كلو عشان كدا متردد جدا ومني عارف ايش اسوي ادوني ارائكم يا جماعة انا ليش باحس كدا ؟ وهل هوا صح ولا غلط ؟ وكيف ممكن اعدلو ؟ ساعدونا الله يسعدكم |
السلام عليكم ورحمة الله
يا أخي انت جالك هدا الشعور لانك مو حاسس باهتمامها لك و الي صار أنك مليت من ان تكون انت دايما المبادر و هادي اكبر غلطة بين الخطيبين لازم يكون التبارد من الطرفين و في العادة يكون من البنت اكتر عشان كدا انا مستغربة من تصرفها بس في نفس الوقت انا فهمت من كلامك انك تحبها و انك متأكد من حبها لك عشان كدا ارجوك يا أخي ما تتسرع الطلاق مو حاجة سهلة اقعد معاها و صارحها وقولها ليش ما تبادر هي و أنك تتمني تحس انها مهتمة فيك و الله هيا في نعمة مو حاسة بيها غيرها يتمني انو الخطيب هو الي يبادر بس اعيد و أقولك انه شعورك دا صدقني بس كان نتيجة لعدم اهتمامها بك و هو موسبب كافي يخليك تفكر بالطلاق في كتير يفكرون اني لو اتصلت عليه او كلمته بيفكرني خفيفة يمكن هيا تكون كدا الله يجزاك الخير اخي ما تتسرع اعطي نفسك فرصة مرة و اثنين و ثلاثة و الله يوفقك و يقدملك الي فيه الخير يارب |
اخوي
استخير .. الله يدلك على الصواب وان كان مو مرتاح فالانفصال الان افضل.. توها خطوبة والسبب عدم الارتياح .. استخيييييييييير بكل صلاة .. والله يسعدك |
أخي شعورك هذا سببه إحساسك بعدم مبادرتها لكن رأي الشخصي أن المرأة ليس عليها المبادرة أو على الأقل فليتقدم الرجل بتسعين خطوة و يترك للمرأة عشر خطوات أعتقد و في تصوري شعور بالقيادة بالنسبة للرجل و شعور المرأة بأنها جذابة و مرغوبه فتتقدم العشر خطوات و مستقبلا حتى لو خطا الرجل خطوة واحده فقط ستخطو هي التسعة و التسعين المتبقية لإنها إستشعرت قيادته و تريد أن تبقى مرغوبه وجذابه هذا رأي الشخصي و قناعة لا ألزم بها أحد |
احساسك ناتج عن عدم مبالتها
الانسان لما يحب من قلبه مستعد يعمل اي شي مقابل يسعد شريكه والمفروض خطيبتك ماتكون سلبيه معك ومنتظرة المبادرة منك اخوي كلمها بصراحة يمكن تحس وتتغير قول كل الي بقلبك لان غلط انك تسكت وبعد الزواج مارح تقدر تسوي شي |
| الساعة الآن 07:44 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©