|
بنت اختي الله يهديها .. اريد الحل المناسب منكم
السلام عليكم
واجهتني مشكله واتمنا اجد الحل المناسب عندكم. اختي وزوجها مسافرين لأمر طارئ جدا مدة شهر واختي تركت عيالها عندنا وهم الحمدلله كبار مو اطفال تقولون لي ليش تركتهم شهر..يعني اكبرهم بنت 18 سنه واصغرهم ولد 9 سنين المهم في يوم جاتني بنت اختي قالت لي ممكن اروح بيت بنت عمتي انا ماوافقت. بعد شوي جايتني امي تتوسط لها برضوا ماوافقت بحكم اني خايف عليها ياتروح معك يا مافي طلعه وقلت لأمي انتي على العين والراس وكذا يعني..وهي نفسي غيرت رايها ولا وافقت بعد طلعة الروح وافقت لها ووصلتها انا...بس بشرط 11 ارجع آخذها.. طلعت اجيبها 11 اتصلت عليها ماترد بعدها نزلت ارن الجرس قالت لي عمتها ان فلانه مو موجوده راحت مع بناتها واخوهم المطعم...جن جنوني اتصلت عليها وينك قالت توني داخه البيت قلت وين انقلعتي فيه؟ قالت كذا وكذا ومع النقاش قالت مالك شغل وسكرت بوجهي طيران رحت البيت عسى ماشر ان شاء الله خير..من متى طوالة اللسان وصلت ورحت لها عصبت وجلست اهزئ فيها غسلت شراعها غسل وضربتها بعد انا ماكنت بمد يدي نهائيا كنت بس بهزئ لكن وش اسوي عصبت هي اللي عصبتني خاصة يوم سكرت بوجهي ومالك شغل بعد؟؟؟؟؟ ماعمر وحده من بنات خواتي او اخواني طولت لسانها علي وانا مااقول اني شديد معهم لا بالعكس امازحهم وادلعهم وامشيهم ويحبوني كلهم المهم ولو كان تبي تروح كان على الأقل تستأذن حتى ولو الحين صار على السالفه اسبوع وانا مااكلمها ولا التفت لها..ارسلت لي اخوها جايني يقول فلانه اسفه ماكانت تقصد...جاتنب الضحكه مارديت عليه وطلعت وهي حابسه نفسها ماتاكل ولا تشرب امي كل شوي رايحه جايه عليها ...واخواني نفس الشي ومو هاين علي اشوفها كذا صرت ماانام زين..لدرجة كل ليله اطل عليها اشوفها تبكي ولاني عارف شلون اتصرف اول شي مو المفروض هي بنفسها تجي تعتذر انا ماابيها تعتذر لي..انا ابيها تعرف حدودها معي ولاتطول لسانها مره ثانيه علي.. ماادري اروح لها اكلمها؟ او ؟؟؟ يعني الموضوع عادي بس هي مكبره الموضوع وحابسه نفسها ليش مدري ابي رايكم خاصة البنات اكيد عندكم خبره بهالأمور :30: |
احنا البنات حساسات شوية ويمكن حستها صعبة انك ضربتها وانت لك مكانة عزيزة عندها و في نفس الوقت انا ما اقولك هي مو غلطانة بس المفروض كنت تحاورت معاها قبل لا تمد ايدك و بعدين بقولك شي و الله الباين انها حبوبة و طيبة و الله لو وحدة تانية و انا اعرف كتير لو انحطو في نفس موقفها ما بتفكر تعتدرلك و بتقعد بس تستني امتي ترجع والدتها عشان تعلمها الي صار بس الباين من تصرفها انها تعزك و حاز بخاطرها انك ضربتها يعني سبب زعلها و ماترضي تاكل و تبكي هدا يدل علي انها حاسة بنفسها غلطانة انا رايي انك تدخل عليها و تطبطب عليها وقولها انا ما سويت كدا الا لاني خايف عليك و ما ارضي فيك نغزة الشوكة وانت بنت اختي يعني انا اعتبرك بنتي و ابغي احطك بعيوني واحافظ عليك لانك امانة عندي و بعدين الخال لاه الحق انه يصارخ علي عيال اخته في اي شي فيه مصلحتهم و مو فق يا اخي ان شاء الله |
علمي امها بلسالفه اذا جت من السفر
بلتفاصيل وتكون امك موجوده لاني ابتوقع البنت بتطلع اكشنات لاامها اللي هي اختك !!وبيجيء بينكم مشاكل او اشياء بنفس اختك عليك ّ فتكون امك موجوده افضل بلحوار مع اختك وهي اتركيها الى ان تاتي امها لانها مخطئه!!100% |
البنت راحت بيت عمتها ، مو بيت أحد غريب
يعني بيت أخت أبوها هي يوم خرجت مع بنات عمتها و أخوهم ، فأتوقع إنه البنات + أمهم و اللي تصير عمتها جلسوا فوق راسها ، تعالي معنا و هي تحمست تروح معهم و يمكن أمها و أبوها ما يمنعوها ، فمتعودين ؟ و وقتها هي خافت تكلمك و ترفض ، لإنها ما راحت لبيت عمتها إلا بطلوعة الروح فهي تدري إنها لو استأذنت منك ، راح ترفض هي قفلت السماعة عليك و يمكن إنت شتمتها ؟ مهما حصل و صار ، مالك حق أخوي إنك تضربها عمرهم أعمامي أو أخوالي ، ما مدوا يدهم علي و لا على أخواني و خواتي ما يحق لك تمد يدك مهما صار ،. أبوها عايش و أمها و الله يخليهم لها ، ما يحق لك تضربها هي اعتذرت بما فيه الكفاية ،. يكفي لحد هنا لا تكبر الموضوع روح أجلس معها و فهمها فين غلطها و اعتذر إنت كمان لإنك مديت يدك أنا مستحيل أسمح لأحد من أخواني أو أخواتي يمدوا يدهم على ولدي إذا ولدي غلط ، أنا أأدبه ، مو هم .. |
اقتباس:
الله يجزيك خير ان شاءالله وانا مو متعود على هالاسلوب اني امد يدي او ماشابه لكن غصب عني بذاك الموقف ماكان ودي ابدا وانا ندمان اشد الندم اشكرك اختي |
اقتباس:
لا ان شاءالله الموضوع ماراح يكون بهالشكل وبنت اختي الحمدلله انها مو من هذا النوع الله يسعدك وييسر امورك يالفاضله شكرا |
اقتباس:
صدقتي البنت ماراحت بيت احد غريب لكن ايش اسوي اذا امهم امنتني عليهم قبل لا تروح قالت لي حط عينك على عيالي امانه عندك لايروحون ولا يجون الا مع امي (جدتهم ) ثم ان بيت عمتها ماشاءالله كله شباب ,, وابوهم الله يحفظه دايم موجود بالبيت, يعني انا مالي دخل راحت والا جات ولا اتدخل فيهم او ماشابه فقط شددت شوي لأنها امانه عندي امهم كل يوم تتصل تحرص علينا كل ساعه وانا معك اني غلطت يوم مديت يدي عليها.. لكن اسلوبها استفزني لأني اساسا سألتها قلت لها متى طلعتي كان دقيتي على الأقل قامت تطول لسانها وتعلي صوتها ومالك شغل وسكرت بوجهي الخط وفوق هذا حرقت جوالها فوق 20 مره ولا ترد علي..قبل لا اوصل بالنسبه لأمها وابوها لا امها حريصه بزياده صدق تخليها تروح وتجي لكن البيت اللي كله شباب ماتخليها تروح كثير ماشاءالله 7 شباب..والبيت صغير مره . وانا ان شاء الله راح انهي الموضوع اليوم باللي يسرها ويسعدها ان شاءالله الأمانه كبيره فوق طاقتي خصوصا اني عندي التزامات كثيره وشغل الله يحفظهم ويستر عليهم انا مااعتبرهم الا مثل عيالي وبس..وهم عارفين هذا الشي كويس اشكر حضورك الكريم |
الكلام اللي كتبته هنا ، قوله لها و اشرحه لها :)
حتى لو هي ما فهمت الكلام دحين ، راح يجلس في بالها احتمال كانوا بنات عمتها جنبها و كل وحدة تعبي راسها ططنشيه يا شيخة ،، ماله كلمة عليك .. ردي علييه و هو مو أبوك .. إلخ ( ما أبغى أسيئ الظن لا سمح الله ) باين إنها ندمت دحين على غلطها عليك |
هي فهمت الدرس أكيييد.. ناديها ع العشاء.. ولا جات وسع لها جنبك وطبطب عليها وضمها لقلبك.. وخلي الكلام بعدين,, وربي راح يكون تأثير الأمر عليا جداً إيجابي,,
وأهم شي فهمتها درس راح ينفعها العمر كله.. كان لازم تلتزم بوعدها لك,, ثم إن البنت لو تم التساهل معها في أمر الخروج لن يوقفها أحد,, هي قالت بيت عمتها وعلى الراس والعين العمة.. أما مطعمّّّ! ,, ولا ننسى إنها أمانة عندك وهي عارفة إنها ماراحت إلا بطلوع الروح.. عموما هي صغيرة وكان لازم تتعلم درس,, ووصلها,, |
اقتباس:
وليش لاء احتمال بنات عمتها وسوسوا براسها الله اعلم مانبي نسيئ الظن.. والكلام ان شاءالله بنظم الكلام واجلس معها افهمها واشرح لها مشكوره على تواجدك اختي الكريمه |
| الساعة الآن 10:09 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©