حياتي تنهار امام عيني
 

الله يعينك حبيبتي
طيب هذا لو يقول لو طلبتي بيت الي هو ابسط حق من حقوقك وليش اصلا الوحدة تتزوج االا عشان تجتمع مع زوجها تحت سقف واحد..هل تضمنين هذا الرجل في المستقبل انه ممكن يطلقك لو طلبتي شى اخر؟
اترك الاجابة لك

انتي على حق واذا رفض يوفر لك مسكن وطلقك فهذا بايع خالص ومعليه حسافه
الا اذا كان مفهمك من قبل الزواج انه راح يكون هذا وضعك فهذا شيء ثاني

حبيبتي لا تتحطمين ولا شى
اذا موفر لك ولو غرفة ليه تتحطيمن هل يستاهل منك التحطيم
المفروض تطلبين بيت من اول ماتزوجتي وهذا الشى الطبيعي عنده ولا ماعنده اجل ليش تزوج؟
ان شاء الله غرفة اهم شى تكوني مع زوجك

الله يعينك يا أختي هاذي هي مشكلة بعض شباب اليوم يتزوج ومايبغى يشيل هم المسؤليه إللي عليه أنا أشوف إن أفضل شئ تجلسين عند أهلك حتى يجي إجازه ويتفاهم معاه أبوك على البيت وإذا أنتي عارفه إن ظروفه الماديه أو راتبه ضعيف فلازم تصبري أنت عارفه اليوم الإجارات نار وأنتي تقولي توه متوظف يعني أكيد إن وضعه مو ذاك الزود يمكن إن راتبه مايساعد يفتح بيت علشان كذا سكنك عند أهله أنا عارفه إن الوحده دايما نفسها في بيت لحالها وبتاخذ فيه حريتها وتتصرف مثل ماتبغى أنت من حقك تطالبين ببيت لك شرعي
بس أحيانا تكون ظروف الزوج صعبه بالذات إذا كان توه طالع من مصاريف عرس وأكيد عليه ديون أو قروض وطبعا توه متوظف فلازم تراعي ظروفه مو من أول عاصفه في الحياة تتركينه أختي إذا الزوجه أحبة زوجهاوهوأحبها يعتبر قلب كل واحد سكن وبيت لثاني وياما حريم ساكنين عند أهل أزواجهم وعندهم ثلاثة وأربعة عيال وعايشين ومرتاحين أنت عارفه بعض المشاكل لابد تحصل من أهل الزوج أنت توك عروس وماعندك عيال يعني باقي ماعندك مسؤليات كبيره وشئ أكيد إذا كنتي قريبه من زوجك إن شاءالله تغيريه
وأنت بمعاملتك معاه وحسن عشرتك وتفاهمك معاه أكيد إنه بيرجع يحقق لك إللي تبغينه منه اما إنك جالسه عند أهلك
ويابيت أو طلقني ليش كذا أنت بكذا بكلامك هاذا تزيدين عناده وكلهاكوم وكلمة طلقني كوم وأنتم بعدكم عرسان خلي عقلك براسك وإذا زوجك أنت تقولي ماتعرفي شخصيته كيف بتعرفيها وأنت جالسه عند أهلك حبيبتي تبغين تعرفين شخصية زوجك وتعامله خليك جنبه وعينك في عينه مو أنت بديره وهوبديره وتقولي شخصيته ضعيفه يسمع كلام أهله لاتنسين إن البعد يولد الجفاء والقرب يولد المحبه سكنا مع أهل أزواجنا وعندنا عيال والحمدالله إذا إحترمناهم إحترمونا وقدرونا وطلعنا بعد تحسن ظروفنا وحنا نبكي على فرقاهم
ولحد الآن أحن على أيام جلستي عند أعمامي لأن هناك ذكريات لاتنسى ممكن هناك بعض المشاكل ولاكن أعتبرها ملح الحياة أهم شئ إحترام أهل الزوج بالذات أمه وأبوه وصدقيني إذا عاملتيهم بإحترام إنه راح يحبونك ويعزونك صراحه أنا أذكر عمي أبو زوجي كان لوجلس على سفرة الأكل وماشافني قدامه ماياكل ويقول لبناته وين فلانه قالوا الحين تجي يقول لا أحد يمد إيده ياكل قبل لاتجي فلانه يقصدني وبصراحه حتى بناته كانوا يغاروا من تعامل عمي وزوجته معي وكان قبلها زوجي قد أستأجر بيت في منطقة عمله بس سأت الظروف وكان عليه دين قال له أبوه جيبهم عندي في البيت حتى تتحسن ظروفك وبعدين شيلهم معك
أذكر يوم سافرت من عندهم عمي أبوزوجي ودعنا هو وزوجته وقال لزوجي جيت تاخذهم عقب ما تولعنا في عيالك وعيونه أدمعت أذكر زوجة عمي كان عندي ثلاثة عيال كان إثنين منهم مايناموا إلا بحضنها ولوالواحد منهم مريض ماتنام اليل أنا أمه ما أسهر عليه كثر جدته عسى الله يحفظهم لنا
وأنا أنصحك نصيحه إنك تعيدي تفكيرك زين يا أختي والله إني مادخلت إلا رايده مصلحتك إذا كنتي تعرفي إن إمكانيات زوجك زينه ووضعه المادي ممتاز فلك حق تطالبيه في بيت لك لحالك أما إذا كنتي تعرفي إن وضعه مايساعده فإصبري وإن شاء الله ربي يفرجهاعليكم من أوسع أبوابه ويرزقكم من حيث لاتحتسبون وتحققون ماتصبوا إليه أنفسكم أختي الحياة الزوجية تحتاج صبر وتضحيات في سبيل من نحب أتمنا أن تشيلي كلمة طلاق من قاموسك وتحلين هاذا الإشكال بجلسة تفاهم وهدوء أنت وزوجك وأنتما مازلتما عرسان فيجب كل واحد أن يعطي الآخر فرصة كي كل منكما يفهم الثاني أكثر أتمنا لكي حياة سعيده وأرجوا أن لاتتضايقي من كلامي
لأني والله ماقصدت إلا الإصلا ح في حياتك وأردت نصحك حتى لا تهدمي بيتك ومستقبلك .