اتمنى تشاركوني همي
 

السلام عليكم

سبق ان وضعت قصتي للاستشاره ولقيت منكم كل دعم نفسي وتشجيع , لكم مني كل الشكر وهذا رابط المشاركة في قسم المتزوجين:

http://www.66n.com/forums/showthread.php?t=217293

انا الان اجتزت كل شي والحمد لله حتى طلاقي لم يهزني ولله الحمد فلابد من الايمان بالقضاء والقدر وهي تجربة مضت في حياتي استفدت منها الكثير. ولكن على رغم اني اشغل نفسي كثيرا عن التفكير ولكن اصبح لدي مثل الهواجس يعني كثير ما أفكر لماذا زهد فيني لماذا تخلى عني , الحقيقه حصلت بعض الحده في مناقشاتنا بالرسائل القصيره بعد الطلاق وذلك اني كنت ارسل عليه رسائل دعاء فقط الساعة 2 بعد منتصف الليل ان الله سوف يأخذ حقي منه وانه سوف يرى ما فعل بي في اقرب الناس ( لا تلوموني من الحره اللي فيني ماني قادره امسك نفسي عن الارسال) طبعا الان وقفت ما عاد ارسلتله شي, فبدأ يرسل رسائل وجرحني كثيرا بكلامه انا لما قرأت رسائله لاول مرة اهتز جسمي وانفاسي تكاد تنقطع من كثر الصدمه لدرجه اني وجدت في رأسي شعره بيضاء بعد هذه الرسائل بدون مبالغة !والله لا ادري يمكن يكون منها لاني ابدا ماطلعلي شيب قبل كذا. تبين لي والله العالم ان لديه مشكله نفسيه لانه يقول فيني اشياء لم تحصل مني ويقولها كانه متاكد منها وهو ظالمني من بينها يقول انك زورتي التقرير الطبي للزواج لان فيك انيميا والانيميا الحاده من موانع الزواج وفي الشوفه الشرعيه وضعتي الكثير من الميك اب وانتي خدعتيني ذكرتي انك دينه وجميله وانتي لست كذلك. يقول انك تشكلين الدين على كيفك وانتي تدعين الايمان يقول انك وصلتي شعرك وانتي تعلمين حرمه ذلك وانا لم افعل . بديت اشك في شكلي انا عارفه نفسي يعني قد تقولون عندك عدم ثقة في النفس, حتى لما كنا نقف امام المرآه انا وهو اجد الفرق الكبير من ناحيه الشكل ولا اقول هذا تكبرا او احتقار له انا حتى في الرسائل كان بامكاني اقوله تراك ماعجبتني في الشوفه الشرعيه( مثل ماقال عني) واني اكثر ما اعجبت فيه هو اخلاقك ودينك, بس انا عقلي اكبر من كذا ..وتعرفون انه صعب على المرأه ان ينتقص من جمالها خصوصا من احد كان يعني لها شيء في الحياة. انا يمكن مصدومه الان اقف امام المرآه واقول في نفسي _هذه انا ما هو العيب اللي فيني ليش زهد فيني كذا؟؟ .. هل هذا تفكير طبيعي؟!!! .. .. والله هالانسان ششككني في نفسي ..يعني الان افكر ان اهلي يقولون ما اعجبته لو اعجبته ما فرط فيها بسهوله وهذا التفكير يتعبني جدا خصوصا اني اصريت على زواجي منه ورماني كذا .كمان يجيني احساس اني انسانه ليس لها قيمة.. اشاهد من يتزوج حديثا كيف يكونون متعلقين بزوجاتهم خصوصا الايام الاولى من الزواج واقارن بينهم وبين حالي.. هل احتاج اراجع عياده نفسيه لاني قد لا اكون مؤهله لبدء حياه جديده . حتى من يتزوج من صديقاتي واخواتي لا اقدر انصحها بحسن معامله زوجها لانها اختلطت علي الامور!!.. مع العلم اني الان اكتب ما حصل معي وما أؤمن به من افكار واستنتاجات في ورقه واقرأه واجد نفسي ترتاح بعد ذلك اعرف اني انا اللتي على حق وهو يبرر لنفسه او بالاصح يحاول يدور اي سبب لابتعاده .

اللي يصدم في الموضوع كله ان نفس الرجل اللذي كسب قلبي بكلامه وتعامله ورقه قلبه ومدحه لي ورسائله اللتي تذوب الصخر هو الرجل نفسه اللذي الان يعيب وينتقد ويهاجم ويسب.. صدمه لي لا اعلم هل ساتجاوزها ام لا. هل سوف اتجاوز هذه المرحله بسلام ام ستبقى في عقلي الباطن وتسبب لي شيء من عدم الثقه بالنفس... شاركوني همي خصوصا من لديهم المام بعلم النفس وانصحوني ولو بالقليل حتى لو بزيارة دكتوره نفسية ما عندي مشكله اذا استلزم الامر. شكر الله سعيكم

انسيه وحاولي الزواج من غيريه

- أختي الآن فترة بعد الطلاق تكون صعبة شوي..ونفسيتك تكون منهاره حتى لو كان بطلبك فاسترجعي الله ورددي اللهم آجرني في مصيبتي واخلفني خيراً منها.

- أكثري من الاستغفار طوال اليوم..وإذا شعرتي بالضيق استمعي لسورة البقرة وأنصحك بالشيخ أحمد العجمي
قرائته تشد سبحان الله ويخليك تركزين معاه ..أو شوفي قارئ ترتاحين لصوته وقرائته..

لا تهملين النقطتين الي فوق لأنها أهم شي..ممكن تراجعين أخصائية اجتماعية او طبيبة نفسية تعطيك مهدئات
رغم أني لا أشجعك عليها (ألا بذكر الله تطمئن القلوب)

- انسي ترسلين له..الضرب في الميت حرام..هذا الشخص لو كان في قلبه ذرة مخافة من الله لما أقدم على مافعل
وربما أختي أنه مريض نفسي فعلاً ..
انصحك انك تسامحينه من قلبك وتدعين له لا عليه ..بترتاحين
التسامح يزيدك ما ينقصك
ورددي حسبي الله نعم الوكيل

- لا تقارنين بين الي توهم متزوجين وبين وضعك فكل انسان له نصيبه وما يرد القضاء إلا الدعاء
ادعي لنفسك وتصدقي واستغفري

- لا تدخلي الحزن على قلب أمك وأبوك وأهلك
لا تتوقعين ان ما أحد يفكر فيك والا ناسينك .. صدقيني انهم متضايقين لأجلك
لكن قوي نفسك وتعوذي من الشيطان كلما أدخل الحزن لنفسك
ورددي آمامهم الله يعوضني برضا وطيبة نفس

- اندمجي مع الناس وانسيه والله لا يستحق الموضوع منك تفكير زايد ..والحمدلله إن الموضوع وقف عند هالحد وما صارت فضيحه .. الحمدلله انك تزوجتي والعالم كله عرفوا وما كمل نصبه عليك وتركك بنص الطريق

- لازم تعرفين إن الخير موجود والشر موجود .. فاعتبريه اخذ الشر معاه وراح..باقي الخير إن شاء الله

- اتعضي مما حصل..الأهل لهم نظرة واحساس..فخذي برأيهم إذا صار نصيب واستخيري..

- اهتمي بنفسك وبعلاجك..اختي بالنسبة للبهاق هل هو منتشر؟ أم لا؟وانتبهي على نفسيتك لانه يزيد مع الحزن.

- أسال الله لك الراحه والاستقرار والزوج المحب الحنون عاجلاً غير آجل.

انا لحد الان ما شفت ورقه طلاقي فانا ما برتاح لما اشوفها لاني انا اللي ما يشرفني ارتبط بانسان بهالشكل. حتى لو يرجع ندمان ويدفعلي بلابين ما ارجعله لو يصير اللي يصير . اللي سواه معاي لا يغتفر أبدا ولا له اي عذر. انا اللي متعبني غلطت كثير في حق نفسي وكرامتي من يرجع لي كرامتي .. أحس اني كأني كنت مصاحبته مو زوجته وبعد ما اخذ اللي يبي كرهني ورماني حسبي الله ونعم الوكيل. حتى يوم ارسله الرسايل كانت بدافع الانتقام ويمكن هو يفهمها اني اتمنى يرجع لي لانه ارسلي يقول (لا تحاولين بكثره رسائلك فانتي مثل اللي يمسك بآخر عربه في القطار لا تتعبين نفسك انتظري قطار آخر كبير بالسن) . بالنسبه للبهاق مو منتشر بس هو فعلا يزيد مع الظغط النفسي والله يستر.

مشكورين والله على مشاركتي همي وانا قصتي بالتفصيل ما قلتها لاهلي لاني كل ما اقول عنه اي شي يلوموني وصديقاتي لو بقولهم يرحموني وانا ما ودي يحسون تجاهي كذا.