|
متى ابدأ في تعليم اطفالي القرآن
السلام عليكم و رحمة الله و بركاته سأبدأ بالموضوع على طول بدون مقدمات بنتي (اللي في الصوره) صار عمرها 3 سنوات و 8 أشهر و ما شاء الله تتكلم بطلاقه و كلماتها جدا مفهموه و تكون جمل صحيحه من ناحية القواعد يعني حاليا تعرف تعد و تكتب الأرقام من1 الى 10 بالعربي و الأنجليزي و تعرف كمان حروف الأبجديه العربيه كلها حتى كتابيا ما شاء الله ما انكر انه صعب عليها كتابة بعض الأحرف مثل ط ي س ش بس ما شاء الله في تحسن يوم بعد يوم :22: و كمان ما شاء الله بنتي تتكلم 3 لغات العربيه و الأنجليزيه و لغة البلد هنا بحسب سنها طبعا فا انا شايفه انه بنتي عندها قدره على التعلم و تحفظ الكلمات و الأشياء بسرعه ما شاء الله تبارك الله فبدأت اعلمها القرآن هي الحين تعرف الفاتحه و الإخلاص و المعوذتين لأني اقراهم عليها كل ليله قبل النوم فحفظتهم تمام بس حابه اعلمها صغائر السور اول شي و شوي شوي كل جزء عمه ان شاء الله قبل تصير 5 سنوات اذا معقول بتسألوني وين المشكله.. المشكله انه عدم صبري على اخطائها في النطق و احيانا انشغالها بأشياء ثانيه يعني هذا قرآن مش لعبه و صراحة ما اتحمل شقاوتها و لعبها لما احاول احفظها القرآن بعكس الأشياء الثانيه مثل الحروف و الكلمات و الأرقام فهي لاحظت الشي هذا اني حازمه و اني ما اقبل عدم تركيزها و اخطائها فصارت ترفض تتعلمه و تقولي ماما بعدين قرآن تعالي نلون او تعالي نكتب 1 2 3 :( يعني اي شي ثاني غير القرآن و انا اعترف خطأي اني ما طولت بالي عليها و اني المفروض اراعي صغر سنها بس والله صعب احس انها تتلاعب بكلمات الله استغفر الله العظيم بس و كمان اخاف اضغط عليها تتحول لعقده تقوم تكره القرآن لأنه عقلها الباطني بيربط حزمي و شدتي و قساوتي مع حفظ القرآن و انا هذا الي خايفه منه ما ابغى اعقدها من القرآن بالعكس ابغاها تفرح فيه مثل الأشياء الثانيه طبعا زوجي يقول انها صغيره و خليها تصير 5 او اكبر و تستوعب اكثر و قتها تقدري تنبهيها من ناحية الشقاوه و أحيانا يقول اانه اول 7 سنوات هي سنوات اللعب و الشقاوه و خليها تعيش طفولتها و لاحقه على تعليمها فقاعدة زوجي هي: 0-7 سنوات= لعب, شقاوه, طفوله, استكشاف العالم 7-14 سنه= مرحلة التعليم و التربيه و الإرشاد و العقاب 14- 21= مرحلة التنفيذ و مرحلة حصد ثمار السنوات الماضيه 21 + مرحلة الأعتماد على النفس كليا طبعا كلام زوجي هذا جابه استنادا بما روي عن السلف (( لاعب ابنك سبعاً، وأدبه سبعاً، وآخه سبعاً، ثم ألق حبله على غارب )) و أنا ابغى استفيد من وقتي الحين بما اني بالبيت و في اجازة الأمومه عندي كمان سنتين و بعدها راح ارجع على الدراسه و يمكن اشتغل كمان ايش رايكم انتم.... تعتقدوا اني كثرت عليها,, ايش تنصحوني! |
علميها تحفظ السور
هذه فرصتك بس لازم تصبري عليها حتى لو مخارج الحروف ملخبطه و لا تركزي على سوره وحده نوعي لها يعني كل ثلاثه مع بعض خلصتي المعوذات و الفاتحه انتقلي على الي وراها المسد النصر الكافرون الكوثر يمكن الكافرون تلخبطها و كمان علميها الاذكار و ردديها امامها من تجربه يحفظو و تتقوى مخارج حروفهم و تركيزهم يقوى ويضبطو كل اللغات زي بعض |
اهلين حبيبتي غربه :) الحمدلله طمنتيني يعني انا ما كثرت عليها صح? و اللي اسويه الحين هو اني احفظها سوره معينه خلال اليوم يعني بعد كل صلاه تيجي تجلس جنبي و اعلمها و أحيانا لما اكون مشغوله بالمطبخ و هي تكون جالسه على الطاوله ارجع اعيد عليها السوره و كمان احيانا لما نكون برى و نتمشى مثلا ارجع اذكرها بالسوره و كذا يعني تكون حفظت السوره و ترددها بنفسها لما تكون مشغوله بشي :22: و كمان انا اعلمها السور عشوائيا من غير ترتيب لأني مركزه على السور القصيره مثل الكوثر و النصر و تكون اسهل لها يعني ايش رايك.. كويس كدا |
ماشاء الله عليها ربي يحميها
و يفرحك فيها و في اخوها ... كملي اللي انتي فيه .. ولا تركزي كثييير وتحزمي عليها شوي شوي عشان زي ماقلتي ما تتعقد و تكرهه...و لحالها مع كثر سماعه و التصليح منك راح تتعلم المهم انها تحفظة كا خطوة اولى .. كمان بالليل قبل لا تنام و هي عالسرير .. شغلي لها السور اللي حفظتيهم ياها او اللي ناوية تحفظيهم و راعي يكون المقرء بطيء شوي عشان تلحق تعيد معاه ووراه .. و هذا برضو بيساعدها تركز شوي و تصحح اي خطا و حتى تنام مرتاحة طيب سؤال لك و للغربة ... الحين انا متى ابدأ اعلم ابني ؟؟؟؟؟؟؟ عمره سنتين و 9 اشهر .. يتكلم عادي مو بطلاقة طبعا لازال عنده اخطأ في عمل الجملة مثلا يوسف يطلأ برا لا ... يعني يوسف يطلع برا لا . يعني لازال عنده حروف مأكولة :) و الجمل مخبوووطة .. من اي عمر ابدأ بتعليمه ؟؟ بشغل له شريط قران بالليل من كان صغير .. الحين لما بيسمعه . بيمشي معاه لحنا مو كلاما فاهمين قصدي ؟؟ و كأنو بيرتل مع الشيخ بس بدون كلمات .. فياليت تنصحوووووني متى ابتدي معاه.. و سوري ياالوفي بس قلت بدل ما احط موضوع جديد استفيد من خبراتكم |
لوفي و نورا
اهم شي تتاكدو انه يردد وراكم الايه و حتى لو بس نطق اخر ايه يعني فسبح بحمد ربك و استغفره انه كان توابا يقولو بس توابا او سوره الناس بس حيقول الناس و تدريجي بتزيد الكلمات نورا ابداي الان معاه مش بس قران ممكن تعلميه يقول سبحان الله و الحمد لله ولا اله الا الله و ان شاء الله ،،، الخ في اناشيد حلوه اولادي اتعلمو منها و يقومو يردد ويدندنو بين نفسهم بدل الnursery rhymes مثل سامي يوسف و في كمان dawud wharnsby ali الي موضوع بلثقافه الاسلاميه http://www.66n.com/forums/showthread.php?t=220147 هذه الحفله رحناها و ضاع ابني الصغير وقتها كان عمره 3 سنين و قعدنا ندور عليه كبار وصغار يرددو عندي بلبيت في نشيد خطير عنده اسمه sing children of the world انت كمان لوفي شوفيهم يفيدو كثير |
اقتباس:
هلا بنورا :) و الله فكرة المسجل بصوت القارئ يكون بطيئ راحت عن بالي,, عندنا صوت القارئ سعد الغامدي طول اليوم شغال و ما شاء الله اطفالي لما اشغلهم يهدوا يعني يطرد شياطينهم :d اتذكر لما كنت صغيره و كنت اروح تحفيظ القرآن كان بابا يشغلي المسجل على القارئ عبد الباسط عبد الصمد و ما شاء الله كنت اردد وراه و احفظ بسرعه لأنه كان بطيئ بالقراءه فكنت جدا مستفيده منه مشكوره على الفكره و ان شاء الله بجربها اما عن سؤالك يا نورا فهو شي يعتمد على الطفل نفسه اولا و مدى تقبله للتعلم,, لأنه ابن اخو زوجي اكبر من بنتي بسنه يعني عمره قريب من 5 سنوات و توه بدأ يتكلم بوضوح و جمل مفهومه و امه دائما تشتكي من شقاوته و انه ما يحب يجلس و يكتب او يلون... احب ما عنده يجري و ينط و يلعب بسياراته و الكوره :23: فما ادري عن صحة الكلام اللي يقول انه البنات اسرع في الكلام و التعلم من الأولاد بس انتي لا تستسلمي اشتريله الوان و اقعدي لوني معاه و قوليله عن اسم اللون عشان يتعلم اكتبيله الأرقام من 1-5 و خليه يتعلم كيف شكلهم و بعدين راح يحفظهم و ارجعي علميه من5-10 خليه يقول أسماء الأشياء, مثلا لما يقولك ماما عطشان اخذيه على المطبخ و اسأليه تبغى تشرب المويه في الصحن ولا الكاسه هو يمكن ما راح يقولها و بس يأشر بس عيدي عليه صحن ولا كاسه الين يقول كاسه و بعدين اعطيه و نفس الشي لما يبغى ينام مثلا اسئليه تنام على الصوفا و لا السرير و كدا يعني اعطيه خيارات منها يتعلم الكلمات و منها يحس انه ياخذ القرارات بنفسه من ناحية القرآن زي ما قلتيلي شغليله المسجل و حتى لو بدأ يلحن من غير حروف لأنه بنتي كمان كانت تسوي كدا راح يتعلم شوي شوي و كمان لازم يشوفك انتي تقرأي القرآن بصوت عالي عشان يسمعك و يبدأ يقلدك لأنه العيال يحبوا يقلدوا كل شي لو حسيتي انه صعب عليه وقفي و ارجعي حاولي بعد كم يوم,, كمان فيكي تعلميه الأذكار و الأدعيه مثلا اذا عطس يقول الحمدلله, قبل الأكل بسم الله, و بعد الأكل الحمدلله, و كدا الأذكار القصيره اليوميه و اعيد لازم يشوفكم انتم كمان تقولها لأنه ما راح يتجاوب يتعلم و يردد لحاله يوميا سويله برنامج تعليمي في البيت يوم تعليم الحروف و يوم الأرقام و يوم اسماء الأشياء و يوم قرآن و يوم ادعيه يعني نوعي عشان ما يمل و يكون احسن من انه يقعد يلعب طول اليوم لأنه راح يمل و يبدأ بأزعاجه و الحنه فوق راسك و انتي اللي فيكي من حمل كافيكي الله يحفظه و تفرحوا فيه متخرج و بأعلى الدرجات |
اقتباس:
ايه صح يا غربه قصة الأناشيد مره محببه للأطفال فيه نشيد بنتي تحبه مره اسمه Glory be to Allah يردد (( سبحان الله و الحمدلله و لا اله الا الله و الله اكبر و لا حول و لا قوة الا بالله العلي العظيم)) و بنتي اتعلمت منه و طول اليوم تردد مره كنا في باص و الباص مره مليان و بدأت بنتي تنشدها و بصوت عالي و الكل يطالع عليها طبعا هما اجانب و مش فاهمين شي الا انهم ابتسموا لها و وحده عجوزه جالسه جنبي قالت بنتي تغني بصوت حلو على بالها اغنيه هههه :d اتحفينا بخبرتك يا غربه بما إننا بغربه فأحنا نفهم بعض و احتياجات اطفالنا |
غرربة يا عسل مشكوووووورة
و كل شي تعلمينا ياه ربي يجعله بميزان حسناتك يارب راح ادور عالاناشيد هذه و اطبعها في سي دي لووفي .. لا الحمدلله من ناحية الكلام .. مااايسكت .ز بس زي ماذكرت المشكلة انه الجملة عنده ملخبطة يعني زي الضماير و غيرها .. و الارقام علمته ياهم الحمدلله يعد من 1 الى 10 عربي و انجليزي و الحين بدا يعد لل 3 بالالماني ( مسكها من دورا دورا :) ) و فعلا بديت اعلمه .بسم الله و الحمدلله من فترة ..صاير يقولها اذا اكل و اذا شبع قال خلاص الحمدلله بعشت :) بتبع نصايحكم مشكوووووورررين ياا عسل انتو .... |
لوفي نسيت اقولك ..
انه ماشاء الله عليه هااادي و احب ماعلى قلبه اني اقعد الاعبه بالمركبات او باللعبة الذاكرة (تبعت الصور عرفتيها :) ) او اقعد اكتب معاه بالسبورة بس محسوبتك صااار خلقها ضيييق:( نص ساعة و اامل الله يعين بس |
متابعه والله موضوع مفيد ربي يسعدك حبيبتي
انا ولدي حاافظ بس الفاتحه وهو عمره 4 سنوات تخيلو؟؟ |
| الساعة الآن 06:59 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©