|
اليوم بعت سيارتي وزعلان عليها ) :
السلام عليكم ورحمة الله وبركاته اسعد الله اوقاتكم والبسكم لباس الصحه وانعم عليكم بالعافيه واذهب عنكم الهموم وملاء حياتكم بالخير وسهل أموركم وسدد خطاكم طبعاً الموضوع باين من العنوان ومن أول اتقلب اتقلب ماجاني نوم قلت ادخل المنتدى افضفض شويه وارجع وان شاء الله انام قبل خمسه سنوات كانت في سياره اتمنى اني اشتريها وربي كانت حلم بالنسبه لي والحمد لله ربنا فتح علي واكرمني ولقيت واحد من الشباب عنده نفس السياره وكان وقتها يبغى يبيعها فا اخذتها منه بسعر غالي شوي بس كانت تستاهل لان السياره كانت مره نظيفه وقالي خويي تراني موضب الجربكس قلت الخير واهله واخذتها ومشت معاي شهر احس فيها شي غلط المهم بعدها بشهر خرب الجربكس وغيرته بـ 5 الاف ريال وقلت خيره مو مشكله السياره نظيفه وتستاهل مشت معاي اول سنه ثاني سنه ويخرب علي الجربكس قلت مو مشكله السياره على يدي واغير لها جربكس بـ 3500 المهم من يوم ما غيرت الجربكس الثاني وانا قلبي ناغزني السياره مو بعزمها الاول بس قلت دام انها ماشيه مو مشكله وتزوجت الحمد لله والسياره معاي بعد زواجي بأقل من شهر ويخرب الجربس مره ثالثه وتعرفون الواحد بعد مايطلع من الزواج ودوشته واغير لها جربكس بـ 5000 الاف مارضي ينقص ريال لانه صادف عيد الحج بس برضه انا متعلق في السياره لانها مره مريحه ومنظر وقوه وكل شي حلو فيها قعدت معايا السياره الين قبل شهر بالظبط حسيت ان نفس الفلم بينعاد حق الجربكس رحت فحصتها وجددت استمارتها ونزلتها المعارض واول زبون جاني بعته بس والله اني بريت ذمتي وقلت له كل عيوبها وخليته يجرب السياره ويمشي فيها والخراب واضح انها تتأخر في التغيير المهم وقعت ع المكاتبه واخذت فلوسي و والله انها ماوصلت نص المبلغ اللي اشتريت فيه السياره بس الله يبارك لراعيها ومن وقتها وانا نفسيتي تعبانه شوي وزعلااان على سيارتي وكل شوي اقلب في صورها وربي كأني فقدت شخص عزيز وبصراحه حبيت افضفض لكم في المنتدى لاني وربي مو قادر انام محروق عليها ادعولي ان الله يرزقني بسياره احسن منها والله يوفق راعيها ويعطيه خيرها ويكفيه شرها لاتبخلو علي بالدعاء الله يسعدكم ويوفقكم سامحوني طولت عليكم في أمان المولى وحفظه |
بصراحه انا حاسة لك لاني اشوف ان السياره شئ مهم وعزيز عند الرجل
تدري ليه لان زوجي قبل فتره شارى سياره قيمتها220 الف ريال يوم قلت له كان حطيت هذا البلغ في شئ احسن يعني زود عليها وخذ شقه تمليك مثلا:29: قالي انا منتظر هذا السياره من زمان وسألت عنها في المعرض قالو خلصت صاحب المعرض جاب له وحده من البحرين يوم شافه مصمم عليها والاولي كانت متسوبيشي باعها لما جبت ولدي الثالث قال لازم سياره اكبر عشان تكفي لمقعد لنونو وعشان العابهم اذا روحنا كباين او استراحات ومن حبه لسيارته مستحيل يخلي احد يسوق سيارته او يستخدمها مهما كان هذا الشخص:( واتمني انها تكون سياره العمر وانت الله يعوض عليك بسياره احسن ونادر جدا ماتلقي سياره مستعمله وفعلا تكون نظيفه في المره الجايه استخير مره ومرتين وثلاث قبل لاتشتري موفق ان شاء الله:22: |
السياره هي القسم الاخر للرجل
يعني المره الجايه احسن الاختيار لتدوم معك واغلب المستعمل يكون مليئ بالعيوب عليك بالاستخاره واي شئ يصير بعد الاستخاره فعلم انه خيرا لك حتي وان لم يوافق هواك |
الله يعوضك باحسن منها
الحمد لله خمس سنوات مشيت معاك يعني شبعت منها اكيد راح تلقى شي احسن واجدد |
ربي يرزقك من واسع فضله السيارة اللي تحبها ومن الوكالة كمان جيدة لنغ :)
الصورة اللي بتوقيعك تجنننننن :) نظرة البنت عجيبة |
اقتباس:
|
الله يهديك يا أبو جوري .. زعلان على سيارة مستعملة وكل شوي تصلح فيها وتدفع مبلغ وقدره؟!!
بصراحة حرام .. ومع احترامي الشديد لمشاعرك لكنني لا أرى أن سيارة مستعملة تستحق الزعل أو الضيق. على كل حال .. عوضك الله بأحسن وأحلى وأريح .. وأجدد منها ;) |
اعتقد السيارة زعلانة بعد
تبي صاحبها القديم الله يعوضك خير يارب |
يعني زعلان إن قيمتها نزلت أكييييد بما إنك إستخدمتها كثييير ..
و سيارة بدالها ألف .. ما فيه شيء يزعل ويسبب لك ارق ؟؟!! |
صراحة استغربت وايد ؟؟؟؟؟؟
ما في شيء يستاهل انك ما تنام الليل حسب كلامك اصلا السيارة خربانة ومستعملة حالك من حال زوجي عنده سيارة اجرة لنقل البضائع قديمة وايد واصلا شاريها مستعملة كل مرة تخرب فيها حاجة ويصرف عليها دم جوفه اكثر ما يصرف علينا بس ايش بنسوي هدا حال المستعمل على العموم الله يرزقك ويرزقنا احسن منها تقبل مروري |
| الساعة الآن 01:17 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©