|
نصايحكم لاستقدام عاملة منزلية
السلام عليكم و رحمة الله و بركاته
حبيت أخذ رأيكم لو بأستقدم عاملة منزلية ..؟؟؟ أبغاها أهم شئ حنونة عالأطفال و تجي معاي للخارج إن شاء الله إذا سافرت .. يعني ترضى إنها تجلس معاي كم سنة ،. أبغى أعرف ، فيه وحدة جربت السيرلانكيات ؟ لإني ما ارتحت للأندونيسيات .. ؟ : ( ناس يقولوا البنت أفضل ، و ناس يقولوا المتزوجة و الكبيرة في السن أفضل ؟ شغالتي اللي سافرت ، كانت حنونة صح .. بس كانت تتكلم انجليزي و تتدخل في كل صغيرة و كبيرة بيني و بين زوجي و ولدي يعني يا تكون الكل في الكل في البيت و لا تقلب علي و تكششششر .. و غلطي إني نقلت كفالتها من عند أهلي ، فكانت أمي تحكي لها كل شئ عن خصوصياتنا اللي بأجيبها إن شاء الله المرة هذه بأتعامل معها بنفسي و الله يجزاكم خير |
بالنسبه لي احس احسن شي للاطفال الفلبينيه وتكون مو مشتغله من قبل
الفلبينيات راقيات في التعامل علميها شغلها وبس وافضل المسيحيه لانهن مثقفات وطبعا لا تنسين كتب الدعوه .....لانهم بسرعه يقتنعون بالاسلام موفقه |
قلبي معاك
ليت تفيديني أكثر عنهم الله يخليك ، لإني سمعت مثل ما قلتي بس ماعرف أحد من أهلي تعامل معهم ، بس نتعامل مع العاملات الأندونيسيات و أنا بأخذها معاي إن شاء الله بعد سنة للخارج و أتمنى إنها تكون بنت حلال و ما تسبب لي مشاكل المسيحية أخاف إنها ( تنصّر ) ولدي لا سمح الله :D مو كفاية بنتغرب في بلد أجنبي ؟ كمان أجيب مسيحية في بيتي ؟ : ( قلبي ما حيرتاح .. مع إني قريت كثير في النت يمدحوهم ؟ :24: شغالتي كانت مسلمة بس ما كنت أشوفها تصلي و ماكانت تقوم لصلاة الفجر و الشئ هذا يزعجني الصراحة تعرفي كم رواتب الفلبينيات و كم تكلف فيزتها و كل شئ ؟ و أتمنى العاملة اللي بأجيبها ، إنها تكون حنونة عالأطفال و نظيفة عشان يوم انشغل بدراستي ، تساعدني بتجهيز اغراض الطبخ و دايما يشتكوا من السيريلانكيات بإنهم يجوا العكس .. مادري ، هل هناك حالات مختلفة منهم ؟ اخوي يقول إنهم وقفوا دحين الإستقدام من اندونيسيا و مادري ليه احس نفسي مرتاحة للسيريلانكيات ؟ أحسهم على نياتهم و طيبين ؟ |
اهلا اختي من احسن انك تجيبها من نفس بلدك وكمان تكون كبيرة شوي
|
كيف من نفس بلدي حبيبتي .. مافهمت ؟
يعني إذا سافرت أجيب بيبي سيتر مثلا ؟ |
نعم يعني لما تسافري لبلد اخر شوفي خادمة هناك وروحي للمكاتب بتاع الخادمات علشان تكون مضمونة وكمان تكون كبيرة شوي في سن انت عارفة الخادمات وشطارتهم لما يكون صغيرات في سن .
|
هناك عندهم بيبي سيتر و تجلس كم ساعة و تروح بيتها و ما أضمنهم
و أنا أبغاها تكون معاي هنا و أخذها معاي لهناك بعد سنة أو سنة و نص إن شاء الله كنت في الخارج و الفكرة هذه أبدا ما ضبطت معاي و ما عجبتني العاملة بالرغم من سلبياتها ، لكن لها ايجابيات خاصة إذا كان معاك طفل و زوج و بيت و دراسة شغالتي السابقة صح كانت تحبني ، بس كانت تتأمر علي مرات كأني بنتها لإنها كانت أكبر مني و لإنها عاشت مع أمي .. بس إذا جبت وحدة ، أتمنى إنها تكون - كبيرة و لها أطفال كبار - عشان ما تحنّ و تشتاق لهم كل ساعة و تتنكد : ( ملاحظة : اعتذر لكتابتي للجنسيات بس من جد محتارة و الشهر الجاي نويت أقدم بإذن الله ، بس ما أعرف إيش الأفضل ؟ و هل هناك جنسيات محددة مثلا أقدر أخذهم معاي للخارج مثل أمريكا فرضا ؟ <- إذا أحد له خبرة ؟ و لا مافيش شروط ؟؟؟؟ طبعا إذا جبتها بأقول لها كل شئ من البداية .. إني بأسافر و بتجي معاي هناك .. عشان كل شئ يكون واضح من البداية و لا نتعب بعض بس مالي خبرة في كل الجنسيات هل أقدر أشترط ؟ و المكاتب ما راح يضحكوا علي و يتغاضوا عن الشروط مثلا ؟ مع العلم إني حامل حاليا و الحمد لله ، و عندي ولد صغير و متعبني مع الوحام و بأسجله في الحضانة الشهرالجاي إن شاء الله و بأبدأ دوامي كمان الشهر الجاي إن شاء الله أو اللي بعده فبأحسب حساب لوقت الولادة و النفاس ، لإنه أمي بتكون تعبانة و أخواتي مشغولات اللي بأطفالها و اللي مسافرة و اللي بوظيفتها و دراستها و بأستخير طبعا ، بس ماأستغنى عن مشورتكم |
الله يعينك وييسر لك حملك وولادتك
انا زيك افكر في السريلانكيات لانهم طيبات الصراحة خالتي كانت عندها وحدة سنين من ايام ما كانت البنت الكبيرة عمرها 9 سنين ودحين البنت متزوجة بس تعبت ومرضت ورجعت لبلدها وجابوا بنتها بس خالتي عندها شغلات اندوسيات غيرها يعني لو اعتمدت عليها كان البيت راح في خبر كان واللي مصبرها عليها انها كانت امينة ومن خلال عشرتها بالاندنوسيات اتعلمت كلامهم واكتشفت مؤامرة سحر لام زوج خالتي وبنتها المريضة....... هذه تجربة خالتي وحسب ما قرأت في النت انك تشترطي ع المكتب انها قد اشتغلت في الكويت او لبنان ع الاقل تكون مفتحة شوي لا تجيبيها غشيمة لانها حتكون وسخة وحتتعبك نفسيا و جسديا وغير انها حتتبكبك لكي من كثر ماهي مشتاقة لاهلها وبزورتها الله ييسر لك ويسر لي بخدامات بنات حلال على فكرة انتي من الناس اللي تعجبني ردودهم و رجاحة عقولهم واحب اتابع ردودك سامحيني طولت عليكي |
الخادمة ستكون وفق ما تحبين وعلى الشروط التي ترغبين فيها لو أنك تفهمت معنى ( الإحسان للخدم ) ..
ما الذي يدفع الخادمة لأن تبطش بأهل مكفوليها إلا على سبيل الرد والانتقام ممن أساء لها وفتك بها ولم يراع الله في حقها كإنسانة لها عرضها وكرامتها التي لا بد أن تحفظ وليس لأحد المساس بها مهما كان هناك من مبررات .. أحسني للخادمة ، وأطعميها مما تطعمين ، وتجاوزي عن تقصيرها ، وليس شرطا أن نعاقب الخادمة على كل تقصير بالضرب أو السب أو التجريح .. جربوا أن تكافئوا الخدم على تقصيرهم ، وأن تقابلوا إساءتهم بإحسان ، فوالله إنهم سيقدرون لكم ذلك ، وسيخدمونكم ( بعيونهم ) .. لدي خادمة ( متخلفة لنظام الإقامة ) لكن لا تريد الخروج من عندنا ، ولها ما يقارب العامين ، يحبها ابني كثيرا وهي أيضا تحبه وتشتاق له إن غاب عنها بل وتراه في المنام !! تقصر أحيانا في العمل لكن لم نهزئها يوما أو نوبخها بل كان ديدننا في التعامل معها كما كان ديدن الرسول - صلى الله عليه وسلم - في تعامله مع أنس ، فلم يقل له لشيء فعله لم فعلته، ولا لشيء لم يفعله لم لم تفعله !! عذرا أن أطلت عليك ، وأعلم أنك ممن يخاف الله في الخدم ، حتى أذكر أن هناك موضوعا اتهمت فيه صاحبة الموضوع خادمتها بسرقة المال فقمت بتسجيل دخول خاص لتنهي صاحبة الموضوع عن اتهام الخادمة دون وجه جق ، فبارك الله فيك . وهنا تذكرين أن خادمتكم السابقة كانت تتأمر عليك ولم ألاحظ أنك قمت بنهرها أو توبيخها ولمست أنك تحترمينها لفارق العمر وهذا أمر تشكرين عليه وسيجازيك الله به خير الجزاء . لا أنصحك بالخادمة المسيحية ، خشية أن تنقل ثقافتها للأطفال ، ثم إن الفقراء من المسلمين هم الأولى بأن نمد لهم يد المساعدة وأن ندفع لهم أموالنا . الخادمة الأندنوسية لا يعلى عليها ، تتميز بالأمانة والعطف على الصغار وحسن تدبير أمور المنزل . لا أعتقد أن هناك مشكلة في اصطحاب الخادمة لبلد الابتعاث ، وأعتقد أن هذا الحل أفضل من ترك الأبناء في الحضانات ونحوها . راجعي مكتب باداوود للاستقدام واستفسري منهم وستجدين الإجابات الوافية إن شاء الله .. لكن لو تعرفين خادمة عند صديقة لك أو قريبة وأرادت أن تستغني عنها فبإمكانك استقدامها بعد أن تسافر ,, وفي هذه الحالة توفرين عليك رسوم المكتب ( 6000 ريال ) تقريبا ، ولا تدفعين إلا رسوم الخارجية ( 2000 ) ريال . أسأل الله لكم التوفيق . |
روووح الله يعينيك حبيبتي
صراحة ماعندي اي معرفة بالعاملات بس حابة اقولك لا تحصري الصالح بجنسية معينة بكل مكان بتلاقي الصالح و الطالح و استغربت لما قلتي الاندنوسيات مو كويسات كنت اعيش في احد الدول العربية و كان عندنا جارة رحمها الله عندها اطفال و الشغالة هي اللي تربيهم و امهم ما تعرف مسؤليتهم بتاااتا غير بس تبوسهم :) اما طبخ و اكل و شرب و تبديل و تنويم و اهتمام وقت المرض و ودي المدرسة و جيبي من المدرسة حتى التعليم كانت الشغالة هي الي تجري بعدهم عشان يتعلموا سبحان الله كانت زي الام لهم و بعدين خلاص تعبت و كبرت بالعمر و رجعت على اندونيسيا بس بقيت على اتصال مع الاطفال و العائلة تعرفي ايش صار ؟؟ جارتي توفت الله يرحمها و تركت اطفالها صغار ماحد فاضي لهم ولما الشغالة درت ماقدرت تصبر عنهم .. قالت خلاص برجع اشتغل عندكم والحين هي اللي تهتم فيهم بعد وفاة امهم الله يجزاها كل خيييير وفعلا اذكرها زي الام حنونة و طيبة و دايما الحجاب على راسها و ماتسيب فرض فا الشغالات حظوووووظ زي البطيخة :) ياحمرا يا قرعة فا برايي اهتمي بالسؤال عن خلفيتها وين اشتغلت وليش تركت و اعتقد الي اشتغلت من قبل تكون افضل لانها بتكون اتعودت عالغربة و بعد الاهل و عارفة كيف النظام عندكم .. بس ضروري تستفسري ليش تركت و لو تقدري اتصلي على اللي اشتغلت عندهم من قبل و اساليهم عنها تكون متزوجة و عيالها كبار شوي .. عشان زي ماقلتي ما يقعد قلبها متعلق عندهم وبنفس الوقت تكون عندها خبرة بالاطفال و تساعدك تكون مسلمة.. يكفي البيئة الخارجية مسيحية .. و بعدين هي بتكون معاه كثير و تجاوب على اسئلته فايفضل تجاوبه بما يناسب ديننا .. مو تقوله حرية شخصية :) و اخييييرا لا تنسي الدعاااااء و الاستخارة .. و ان شاء الله ربي يوفقك بعاملة طيبة و حنونة .. |
| الساعة الآن 11:45 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©