|
زوجي ونوبات الغضب المميته
السلام عليكم
لااعلم كيف اصف مشكلتي وانا حالياً اكتب لكم وانا ارتجف والخوف بداخلي مزقني وارهقني الى درجة اني افكر بالهروب ابي امشي وامشي وامشي لين تهدا نفسي تعبت وربي تعبت زوجي اذا غضب مايكون غضبه عادي يصير مايدري عن نفسه وربي لو امه وابوه قدامه من شدة غضبه مايشوفهم ولايدري انهم امه وابوه مايدري من اللي قدامه..لاانا ولا عياله..مواقف كثيره واغلبها تكون الاسباب خارجيه ويعصب لين صرت بسبب غضبه ادخل في نوبات خوف وارتجاف شديدة ومن شدة خوفي ابكي بصمت شديد عشان مايعصب زيادة يكسر ويضرب وشوي يذبح نفسه او اللي قدامه من شدة الغضب اخرتها قبل ساعتين بالضبط بسبب شيء تافه ، (ابيكم تعيشون وضعي..كنت تعبانه ومهدود حيلي بزيادة اليوم ودخلت المطبخ ابي اسوي رضعه لولدي بنومه وابي انام معه، ولدي الصغير لحقني للمطبخ وفي لحظة وحده وانا اسوي رضعته فتح دولاب المطبخ وكب الزيت كله وامتلت ملابسه والزيت انتشر بكل المطبخ صار مسبح مو مطبخ وانا شايله ولدي ومااقدر اتحرك اخاف ازلق ويصير فيه شيء واصوت لزوجي وجا اخذه وطلعت من المطبخ وغيرت ملابس ولدي وعطيته رضعته وحطيته بسريره ورحت اغسل الارضيه ولدي خلص رضعته وصار يبكي وانا باقي لي شطفه وحده زوجي صوت لي عشان اسكته مع العلم ان ولدي بغرفة النوم وزوجي بالمجلس يعني باخر البيت كملت شطفتي على عجل ابي اخلص واطلع مره وحده انوم ولدي وانام والتفت الا زوجي داخل علي وكل الشياطين فوق راسه ويسحب المساحه ويصارخ ويدخل بنوبة الغضب المميته ويسحبني للصاله ويضرب الجدران اللي اوقف عندها ويرجع للمطبخ وياخذ المساحه ويكسرها تخيلوا كسر العصا صارت نصين بين يدينه ويصارخ علي واانواع الالفاض التي لاتذكر ويروح لغرفة النوم ويشيل ولدي من طرف بلوزته وبالتحديد من اسفل الخلف لبلوزته من تحت وياعمري ولدي تخيلوا شكله مخنوق ويبكي ويرميه علي ويقول لا اسمع نفس انا اخذته ورحت لغرفة النوم وعطيت ولدي من اكسسواراتي يلعب فيها لاني لو عطيته العاب بيبكي ولازم اعطيه شيء جديد عليه عشان يسكت وامسك جوالي ابي اتصل على اهلي لاني ياجماعه توي مصحصحه من نوبة غضب شديده جدا صارت يوم الخميس في السوق والسبب من الكاشير وصاير هالفتره ماينطاق ابد ابد ابد مع ضغط الدوام وعدة ضغوط خارجيه احتويته واحتويته واحتويته لين صرت احتاج للي يحتويني وماهو يمي ابد هالفتره مضغوط لدرجة شديدة انا مقدره وفاهمه لكن انا بحاجة له وهو عارف عندي صغار من جهه وبيتي من جهه وهو من جهه ولنفسي علي حق من جهه وولدي الصغير بسم الله عليه صاير ثلاثة ارباع هالتعب كله..شقي جدا مجنني ماخلى فيني نفس ماارتاح الا اذا نام ماعاد فيني..طلبت منه اسافر عند اهلي ارتاح شوي وارجع ورفض وعصب(زوجي مايقصر بس رفض لانه محتاجني)..نفسيتي في الحضيض.. اكمل لكم مسكت الجوال بتصل على اهلي خلالالاص واصله حدي ومنهاره وارجف وانتفض واشاهق وكل شيء فيني ابيهم بس ياخذوني ارتاح ماابي ازعل او اسوي مشاكل بس ابي ارتاااااااااح..واطالع الساعه 12 وربع ،واتردد ماابي اقلق ابوي وامي حبايبي وانغص نومتهم..وسويت نفس اللي اسويه كل مره توضيت وصليت ودعيت ربي يسكنها علي وينتزع هالغضب منه الخ مادعيت، وربي ادعي ومااقدر اكمل الكلمه يوقف نفسي في صدري ومايطلع الا بصعوبه..ابي حل جذري لان غضبه الشديد صاير مميت اخاف انهبل او يوقف قلبي بسبته.. بتقولون هاتي خدامه..حاليا مانقدر عندنا ضغوط ماليه تنتهي بعد سنه تقريبا..وكنت احاول فيه يدبرها بمعرفته وحسيت اني ضغطت عليه زياده واستخرت ربي اني مااجيب خدامه وارتحت وبلغته بهالشيء وانتهينا من هالموضوع. تقولون مايساعدك الصدق كان قبل اربع شهور وش حليله يساعد يمسك عني ولدي عالاقل فترة مااطبخ الوجبه وفترة الصلاة وكذا لكن من بعدها انضغط واحسه يبيني بدون عيالي اللهم فترة الاربعاء والخميس يصحصح لهم ويعطيهم قليل جدا من وقته مو زي قبل..انا فاقدته وهم فاقدينه..وزود على هذا كله صايرين مجموعه من اخوياه اللي كانوا خارج المنطقه في منطقتنا ويجتمعون يوميااااا وايام الاربعاء والخميس يسهرون فخلاص صرت انا وبيتي وعيالي محطة للاكل والنوم يرجع من الدوام يتغداء ويريح ساعتين ويصحى يطلع ويرجع في الليل يتعشاء ويجلس عالنت او التلفزيون ويبي بنفس الوقت هدوء عشان يصيد النوم على قولته:29: ومرات يرجع وهم نايمين واذا رجع وهم صاحين يبي هدوء عشان ينام تكلمت معه كثير ومرات اعصب عليه شلون تبي هدوء وعيالك يبون يشبعون منك عطهم من وقتك عشان يملونك ومايطيحون عليك اذا دخلت في الليل..تعبت مرره ..احسه يهرب من الواقع لأخوياه صار زي المدمن عليهم.. مشكله جرت مشكله احس اني متشتته ومو مركزه اكتب وانا تعبانه وكل شيء في راسي مجتمع..لااله الا الله. |
لا اله الا الله ..
اختي زوجك عسكري ؟ او ايش وظيفته ؟ تتوقعين ايش اسباب عصبيته ؟ وليش ما ينام كويس ؟ الله يهديه و يرزقه الحلم ويرزقك الصبر ويحننه عليك |
لا حول ولا قوّة إلا بالله ..
أختي ,, مبدأيّاً ,, حاولي بقدر الإستطاعة ,, تجنّب مايُثير غضبه .. إذا تكرّرت هذه الحالة ,, لأيّ سبب حاولي أن تؤمّني نفسك ,, (وأطفالك) ,, في مكان آمن في المنزل ,, وبعيداً عن ذلك المشهد الثّوري .. ناقشيه أثناء هدوئه ,, وبلطف عن سبب تلك التصرّفات .. إذا كانت حالته مستديمة ,, فلا بدّ أن يعرض نفسه ,, على طبيب نفسي مُختصّ ,, حتى يتخلّص من هذه الثّورة ,, وإلا فإنّ العواقب وخيمة .. |
اقتباس:
اسباب عصبيته متاصله فيه(من طبعه) اللهم امين وياك يااختي وربي يسعدك ويوفقك. |
السلام عليكم
بادء ذي بدء اسال الله العظيم رب العرش العظيم ان يشفي زوجك الغضب من نزغات الشيطان ، ولهذا يخرج به الإنسان عن اعتدال حاله ، ويتكلم بالباطل ، ويفعل المذموم ، وينوي الحقد والبغض وغير ذلك من القبائح المترتبة على الغضب ، لهذا قال النبي صلى الله عليه وسلم الذي قال له : أوصني قال : " لا تغضب " فردد مرارا قال " لا تغضب " فلم يزده في الوصية على لا تغضب مع تكراره الطلب استمري في الدعاء له فالله تعالى يحب العبد الملحاح واخبريه في ساعات هدوءه ان الغضب من الشيطان فليتذكر التعوذ بالله من الشيطان الرجيم كلما احس ببداية غضبه ليذهب عنه ما يجد وفي حالة تكرر المشهد كثيرا لا باس من اللجوء لطبيب مختص تحياتي |
...
اقتباس:
|
اقتباس:
ذكرتي بموقف وقت ماحجينا وحنا في مزدلفه تونا داخلينها وندور مكان نجلس فيه(طبع زوجي مايحب الزحمه خاصه اذا صار فيه رجال) فكان يدور مكان بعيد عن عيون الرجال وقريب من باصات الحمله بنفس الوقت ويمشي ويسب وبالاخير فرش فرشتنا بين كفرين باص :22: وهو يفرشها انا قباله يقول تعالي هنا وخليك كذا وانا متغطيه ومتستره :24: <<يقول كذا وهو مو معصب مني بس مايرتاح الا اذا حطها فيني:d ويتلفظ بالفاظ من ضمنها سب لراعي الحج..وانا في مكاني صبت عظامي وجتني ام الركب خفت من ربي ليسوي بزوجي شيء جلست استغفر وادعي ربي (اللهم لاتؤاخذه واعفو عنه واصفح وارحم حاله وارأف به وووووالخ). وهالسنه قلتله ابي احج اعوض حجتي اللي ماادري وش كانت..قال اصبري سنتين :14: ومن ناحية اقوله تعوذ من الشيطان مااعتقد لكن ممكن ارسله رساله بإذن الله..والعلاج سبق ورديت فوق. |
دخلت فقط لأحييك ياأخيه :) اثلجتي صدري والله ،جميل أن تمتص غضب انسان ،هذه قوه منك ماشاء الله تبارك الله فحافظي عليها !! والله لايضيع اجرمن احسن عملا. أقرأي في كتب الغضب وعلاقته بالحاله النفسية ؛قد تجدين فيها بعض الحلول المفيده . وقد تجدين بعض الأكلات المريحه للنفس والتي قد تخفف من نوبات الغضب . موفقه اختي |
اختي عندي بعض النصائح لك :
1- تجنبي أسباب غضبه 2- نومي أطفال باكراً الطريقة: الاطفال لا بد ان يناموا 9 ساعات أقل شي اجعليها من الساعة 8 مساء و حتى ما يسهروا ، لازم ما يناموا خلال النهار ، و اذا ناموا ايقظيهم بعد ساعة فقط و بهالطريقة بتعبوا بدري و بناموا بدري (عن تجربة) 3- لما يغضب زوجك تجنبي الكلام معه الاخد و الرد و إياك تتصلي بأهلك 4- لا تضغطي عليه لما يكون بوقت غير قابل للنقاش 5- لو تجاوز حدوده بالتعامل معك او مع اطفاله انتظري ليهدأ و ناقشيه بوقت مناسب 6- لو تمادى و ما كان معه اي حق (يعني غلطان 100% ) واجهيه بشدة و حزم 7- دائما امدحيه و امدحيه و لا تملي من مدحه ، حتى اذا جاء الوقت المناسب ، لما يكون هادئ ومستمتع بالمديح و الغزل قولي له انت انسان كامل لولا عصبيتك ! و اضحكي قوليله انا ما ممكن أجد انسان افضل منك بس لو تخفف عصبيتك حبيبي ..ألخ مع الوقت و مع كثرة المدح سيتعلق بك و بالبيت و بعد انتهاء مشاكل العمل الحالية بهدأ |
الله يكون بعونج يا اختي
والله انج اصيلة وقوية الله يزيدج قوة اذا عصب انتي تعوذي من ابليس واقري اية الكرسي - وهو معصب- وبعدها استغفري الى مالا نهاية ووقت الصفا مثل ما قالت اختي ماريا عاتبيه على ضحك تخيلي مرة زوجي قاعد يشوف المباراة وخسر فريقه - طبعا كانت الطامة الكبرى - وبعدها قعدنا نسولف ونضحك وبدا يزود معيار كلامه يعني بدا يتطنز علي كاني واحد من الشباب اهني بكيت وقلت له ماله داعي تجرحني ما سويت لك شي اهني كانت نقطة الانفجار بدا يشوت الفراش والمخدات تتطاير وياخذ العطورات ويردها بمكانها بس بقوة شوي ويكسرها وانا ساااااااااااااااااااااااكتة وبعدها مشينا الموضوع ولا كانه صاير شي بعدها المباراة الثانية هم خسر فريقه شويت نفسي خايفة وما اقدر احط عيني بعينه حتى لما اجيب له الشغلة اللي يبيها ما اطالعه عشان يحس ان جنونه كان عالفاضي ومرة من المرات قلت له والله هذاك اليوم كان ودي اصور شكلك يضحك عقبها حسيته نقد على نفسه ان عصب زيادة على اللزوم موفقة يا غالية |
| الساعة الآن 01:13 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©