|
انصدمت من تغيره علي بعد الزواج
السلام عليكم !
انا اول مره ادخل اشارك معاكم. يمكن عشان مهمومه ونفسي اتكلم مع حد بعيد عن نطاق العايله والصداقه علشان الموضوع اللي بتكلم فيه ما احب حد من الاهل يعرفه! أنا كنت ف يوم من الايام مطلقه. ما اتفقت مع زوجي الاولاني وانفصلنا وكانت ايام صعبه بس عدت والحمدلله. انا انسانه ناجحه ف حياتي ! الكثيرين يحسدوني! الكثير اللي تقدموا لي ورفضت لاني كنت حريصه جدا ف اختياري. ما بغيت اعيش تجربة القهر والحزن مره ثانيه. زواجي الاولاني حطمني وخلاني افقد ثقتي بنفسي. المهم تزوجت زوجي الثاني بعد تفكير طوووووويل وتردددد طويل. لكنه ضغط علي وقالي بخليكي ف عيوني وعمري ما هتشوفي مني الا كل خير. اهلي ضغطوا علي لانهم شافوه الانسب من بين اللي متقدمين لي. علي فكره زوجي الثاني كانت تربطني فيه صداقة بحكم اننا نشتغل مع بعض. وكانت علاقتنا كاصدقاء واايد حلوه ومميزه ويمكن علشان كذا ما بغيت اتزوجه ف البدايه لاني خفت انصدم فيه ! بس قبل لا نتزوج زوجي خبرني بقصه انه كان على علاقه بوحده من دول المغرب العربي. تعرف عليها زمان وانتشلها من الضياع وساعدها وقدم لها كل شي علشان ترجع بلدها معززه ومكرمه. وخبرني انه شبه متزوجها بس ما دخل عليها . لكنه خلاص يبي يستقر معاي ويتزوج وحده متعلمه ومثقفه يقدر يتباهي بيها قدام الناس وحلف لي انها خلاص انتهت من حياته ع الرغم من انه بعده يحبها بس علاقته فيها ما لها معني. أنا خبرته دام انها علاقه وانتهت انا ما عندي مشكله وطلبت منه ما يجرحها ويساعدها يعطيها فلوس علشان تقدر تكمل حياتها. كنت اتكلم معاه بكل حنيه ومتفهمه مشاعره واحاسيسه. بالعكس كنت اخليه يتكلم ف هالموضوع بكل حريه علشان اقدر اكسبه كصديق قبل عن اكسبه كزوج. واايد قدر لي هالشي لدرجة صار ينسى انه انا زوجته وممكن اغار مهما حاولت ابدي تعاطفي وتفهمي. عالعموم انا قبل لا اتزوجه خبرته انا فقدت ثقتي بنفسي وخبرته اني اكره الجسد اللي انا فيه لاني احسه قبيح. قالي انا اشوفك احلى وحده ف الدنيا وحبيتك عشان روحك الطيبه. أنا عندي بيت وكان طبيعي لما نتزوج اعيش ف بيتي بدل ما نعيش ف شقق وندفع اجارات. المهم انا انصدمت انه تغير بعد الزواج طوالي. كل ليله يسهر ويرجع وجه الصبح. زوجي ما يحب يبوسني ولا يحضني ولا يتغزل فيني. ويقولي هذا اسلوبي. بس ما كان كذا اسلوبك ف الملكه. كان غييييييييييير . صرت احس انه يقرف مني. وكل ما اجي اسوي له حركات يبعدني عنه. كسر خاطري والله وانا اللي شايلته وشايله اهله فوق راسي. هدايا وفلوس وكل اللي اقدر عليه. انا مافي شي ما سويته عشان ارضيه. عطيته حب وحنان وكل يوم البس واكشخ. حتي ما اكلف عليه عشان هوه تحمل مصاريف الزواج. قمت اساعده واعطيه بلا حساب لاني فكرت اني كل ما اعطيه حب هوه بالمقابل بيعطيني نفس الشي. هو طيب ويحاول بعض الاحيان يراضيني يجيب لي هدايا بس بالمقابل يرجع ياخذ مني الفلوس يوم يفلس وما عندي مشكله لاني اريد احافظ عليه وعلى بيتي. الله اراد وحملت من نفس الليله واليوم عندنا بنت مثل العسل. المشكله اني اكتشفت انه ما قطع علاقته بهذيك البنت وواجهته وكل مره يقول اليوم وبكره والشهر الجاي بقطع علاقتي بيها. وهوه يأكد لي ان هالعلاقه ما منها رجا. المشكله اللي تاعبتني انه ما محسسني اني انثى. نفسي يحضني ويبوسني. نفسي ينام جنبي ف السرير مو ف اخر الطرف. لا وساعات يحط مخده بالنص. انا ما قبيحه . بالعكس وجهي حلو ومقبول . يمكن جسمي مو لهذيك الدرجه مغري بس هذا شي ما اقدر اتحكم فيه. وادفع فلوووووس بالهبل عشان احافظ علي شكلي واناقتي بس ولا يعلق ولا يقول كلمه تجبر الخاطر. بالعكس كله ينتقد. انا صرت وااايد اشك فيه لانه زرع الشك بداخي. تلفونه كله مطفي يوم ف البيت. كل ليله يرجع متاخر. علاقته بهذيك ما انتهت. محتاجه حب وحنان. تكلمت معاه بكل عقلانيه وخبرته ايش اللي يزعجني ف علاقتنا بس ما يحاول يتغير. انا بأمانه وصلت لنتيجه وحده انه انا بالنسبه له الدجاجه اللي تبيض الذهب وبس. لكن اني اكون زوجته وحبيبته هذا شي مستحيل. صدقوني ترا الجفاف العاطفي مو سهل خصوصا للي مره بتجربه صعبه قبل . انا احس بقهر لانه وعدني انه يسعدني بس طلع مافي منه. بالعكس قهرني اكثر. افكر انفصل لاني ما سعيده. انا حاسه انه يستنزفني. حاسه اني عايشه على اعصابي وخلاص دخل الشك ف حياتنا وصرت ما اثق باي شي منه. سعيده لان ربنا رزقني ببنت ومستعده اعيش حياتي ليها وما احتاج زوج يقهرني يجرح كبريائي. اعرف طولت عليكم بس بغيت اشرح لكم الوضغ اللي انا فيه. شوروا علي. |
ان شاء الله يفدونك الاعضاء
الله يكون فى عونك امين يارب |
طيب ايش هي مشكلة جسمك ؟ وليش ماتحاولي تحليها في مراكز العناية بالجسم والبشرة طالما عندك فلوس ؟ ترى إنتي محظوظه وحالك افضل من كثير متزوجات لأنك منتي محتاجه تطلبي زوجك فلوس اذا حبيتي تهتمي بجمالك وتعتني بجسمك |
حبيبتي
الله يكون بعونج اخطات خطا فادح في الصرف علي زوجج الله سبحانه يقول في كتابه الرجال قوامون على النساء بنا فضل الله به بعضهم على بعض وبما أنفقوا من أموالهم واجب عليه وحق من حقوقج الشرعية انه ينفق عليج الحين لا تفكرين بالانفصال أبدا حاولي تعالجين مشكلتك اولا ابدي بالتدريج وقف الصرف عليه ووجهي الصرف على نفسج ثانيا لابد ولابد ولابد ان تكون ثقتك بنفسج 1000٪ صدقيني ممكن هذي المغربية ما تكون جميلة ولكن ثقتها بنفسها مخليتها ملكة جمال بعين زوجج تهتمي واعتني بنفسج لإجل نفسج مو عشانه اهمليه شوي خلي يصير عندج شي ثاني يشغل بالج غيره وبين فترة وفترة ذكريه بالله وان اللي يسويه يتعبر إثم عظيم وخيانة والصراحة انتي غلطتي لما دستي على قلبج وخليته يكلمج عنها بهالشي ازلتي حاجز الاحترام بينج وبينه لازم يعرف انج أنثي ولج حق تغارين بس أهمس لج همسه باذنج حاولي تحلين مساءلج بهدوء وبالروية بعيد عن الصراخ والمشاكل الله يوفقج ويسددج لما فيه خير وصلاح لج |
شكرا اختي عفراء
انا اسوي اللي اقدر عليه واراجع عيادات وادفع فلوس بس المشكله انه ما يحاول يتقرب لي لان هذيك بعدها ف حياته علشان كذا ما قادر يشوفني لو ايش ما سويت. |
حبيبتي موهبة الكويت.
شكرا على الرد. كنت افكر اني لما اوقف مع زوجي انه بيقدر هالشي. بيحبني وبكبر ف عيونه. على فكره ابدا ما اصرخ ولا اعلي صوته علي. وحاولت ازرع الثقه بنفسي بس هو كل مره يحطمني باسلوبه معاي |
عندي استفسار * هو و ذيك البنت كيف يعني شبه متزوجين , هل يعني مثل الأزواج بس بدون زواج رسمي وعقد ؟و إذا كده يعني علاقة محرمة و انت كنت تدرين فيها و مع ذلك وافقت ؟ كيف توافقين أصلا أنا أستغرب صراحة * قلتي كان زميلك في العمل ,هل لا زال يشتغل معك , يعني تشوفينه في الشغل ؟ و مين اللي أعلى مركز هو ولّا انت ؟ * بغض النظر عن القسمة والنصيب و ضغط أهلك كما قلت ,ليش وافقت عليه ؟ إيش اللّي ميزه عندك ,,,,لأنه أشوف أنك متنازلة في أشياء كثيرة حتى البيت هو ملكك... لو توضحين حبيبتي عشان نفهم الصورة أكثر |
أختي الفاضلة ، أعانك الله بما ابتلاك وزادك صبرا عليه
أنا أضم صوتي لصوت أختي موهبة الكويت ولكن الاضافة بهيك موضوع الراجل ما يغيظه شي الا اذا زوجته ثقلت عليه ترى لما تكون الزوجة ما وراها غير الاهتمام بزوجها والانفاق عليه وهو مطنشها هاي مصيبة هو يحسك مرمية علية وميتة فيه وما تقدري تعيشي بدونه وبهيك انتي ملزمة تصرفي عليه اتركيه وانشغلي عنه بأي شي ولا تعطيه أي فلوس لكن كمان ما تتعدي واجباته أولها راح يقولك جت من الله ، بطلت تسألني ولا تهتم وبعد كدا راح يبدأ يفكر شو سر تطنيشها ، ولو رجعلك لا ترمي نفسك عليه تاني بالعكس كوني راكزة وثقيلة وتقبلي مروري |
اقتباس:
الله ينولج اللي في بالج ياربي لا تخلينه هو بنزين الثقة يعني استمدي ثقتك من ربج اولا ثم من نفسج بان تتذكرين مزاياج وان الله فضلج علي غيرج فيها ودايما رددي ان جسمج رائع واكثر من رائع لا تحطين كلامته بعين الاعتبار صدقيني الأزواج الخليجيين جذي يحبون ينتقصون من ثقة الوحدة واحنا الله يخلف علينا نصدق لي عودة بإذن الله |
باضيف بعد نقطة الانسان بشكل عام والرجل بشكل خاص يحس في نظرة زوجته لنفسها
يعني اذا كنتي ترين نفسج بصورة ما حتى وان ما قلتي له شفوي هو راح يشوفج بهذي الصورة بعدين لابد تفرضين احترامه عليج يعني حتى انتي انثى ولج احتياجاتج العاطفية والنفسية ولابد عليه ان يوفر لج هذه الاحتياجات الحين اللي فان مات والحل: 1- تزيدين جرعات الثقة لنفسج. 2- تثقلين عليه وتشغلين نفسج بشي ثاني 3- توقفين صرف عليه 4- تفرضين احترامه عليج وكل شي يجي بالهدوء واللين واكثري هالايام من الاستغفار والدعاء وخطي في بالج شغلة ان انتي اولى الناس بزوجج ومحد يأخذه منج لو منو كان الله ييسر امرج* |
| الساعة الآن 05:00 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©