هلا حبوبه، كيفك و كيف العيال مسوين معاكي؟

طبعاً ما يصير أشوفلك موضوع و أمر عليه مرور الكرام :d

شوفي أنا بنتي الحين في الأسبوع ال3 و هي عمرها 4 سنوات
كنت متوقعه تكون ردة فعلها مثل ما سوى يوسف، بس طلعت العكس ما شاء الله
كانت جداً هاديه و تلعب مع العيال و تجلس جنب المدرسه و أنا ولا على بالها،
و وقت رجوع البيت تبكي و ما تبغى تروح البيت :)

طبعاً رحت معها 3 أيام، أول يوم بس ساعتين عشان تتعرف على المكان و المدرسه و العيال
ثاني يوم كان نص يوم من 9-12 إلين وقت الأكل عشان تشوف العيال ياكلوا و عشان تفهم شوية توجيهات
ثالث يوم، كان يوم تجريبي يعني يوم كامل لحالها بس أنا كنت موجوده في الحضانه في غرفة الإجتماعات مع الأمهات الثانيه عشان ما يشوفونا
عشان إذا في أي لحظه خافوا ولا جاتهم حالة بكى نكون نحنا قريبين و بكذا يعرفوا إنه نحن نقدر نرجع في أي وقت

على فكره بنتي تتكلم لغتهم بس مش كويس مره، لكن تفهم عليهم كويس
و هي كانت تتعلم لغتهم من الكرتون و من كتب المكتبه و من الحضانه المفتوحه اللي كنا نروح لها

بالنسبه لإبنك أكيد اللغه هي اللي مزعجاه، لأنه راح يكون هناك ساعات كثيره و هو ماهو فاهم عليهم شي
بس لا تخافي يا نورا العيال ما شاء الله عليهم يتعلموا بسرعة البرق، بس إنتي اصبري شوي ترى هذا بس أول إسبوع
و كلمي المدرسه و اسأليها ايش تسوي لأنه هم عندهم خبره في هذا المجال و راح يعطوك نصائح تنفع لحالته

و كمان اللي أعرفه إنه مسموح لك تكوني هناك أسبوع كامل معاه على ما يتعود إذا هو فعلاً خايف مش يتدلع
خلي زوجك إذا يقدر يروح معاه، عشان يشوف ابنك إنه حتى بابا يتكلم زيهم و هو راح يتشجع يتعلم بسرعه

بالنسبه لطريقة التشجيع حلوه، بس خليه يحصل الشوكولا بس إذا كان كويس و ما بكى
و لما يرجع البيت عيدي عليه طول اليوم (يوسف مره شاطر اليوم، أبداً ما بكى، كان يلعب و يتكلم مع العيال) قوليها لأبوه و كمان لأخته

إن شاء الله هما بس إسبوعين و راح يفهم الوضع الجديد و وقتها بتطلعلك مشكله ثانية،
إنه ما يبغى يرجع البيت :d

الله يوفقه و يحميه من كل شر إن شاء الله