|
ولدي وزوجي سببو لي أزمه نفسيه
السلام عليكم ورحمة الله وبركااته
احس اني مصابه بإكتئاب حااد والظغط عندي مليوون من القهر اولا بحكي لكم عن ولدي عمره سنه يحب الازعاااج والحوسه والتخريب بشكل يفوووق الوصف صرت اذا احد اخذه مني ولا جلس عند اهلي ارتااح يكره الالعاب ولايحب يلعب مع احد يعشق الاسلاك والكهرباء يحب يخرب كل شي قدامه وطول الوقت يشتغل حتي الاكل مااياكل الا وهو مااشي عمره مارضى يااكل وهو جالس واللبس اجلس البسه ربع ساااعه البسه الحفاظ وهو واقف والبنطلون لازم احد يمسك يدينه بقوه وعقب اطارد لين مايلبس البلوزه جنني دمر نفسيتي كل الاطفال يكرهونه اذا جلس مع البنات يسحب اطواقهم وحلقانهم وشعرهم وكل شي يعتبره له لوحده يعني لو اعطيه بسكوت واحد ولاحلاو والصحن ملياان يجلس يصيح لحد ماياخذ كل اللي في الصحن اذا اعطيته حاجه ياكلها موز ولا اي شي ياكل شي بسيط ويجلس يعجنه بيده ولا بالارض ولا بالجدار دمر البيت عندي اي طرف سلك يشوفه بااي مكان يموووووت من الصياح عشان يشلعه من مكاانه يحب الجوالات ويحرجني عند الحريم اذا رحت مكاان وشااف احد يكلم بالجواال ولا احد حاط جواله يبكي عشاان يااخذه مشكلته مو انه يبكي وبس لا ينصرع وينتفض ويصير ازرق لو ماااخذ اللي يبيه يشاارف ع الموووت طبعه ممل مؤذي لي ولكل اللي حولي لما اطلع زياره احس الناس يزهقوون منه ثاانياا بتكلم عن نفسي انا قبل الزواج اعشق الاطفال كنت مربيه لهم عيال اخواني وخواتي والعائله كلها كلهم كنت اعرف لهم فيه منهم العنيد والزعول والمشاكس والهادي بس ماافيه احد شفته مثل ولدي كاانو يقلون لي لو تزوجتي وجاالك اطفال يااحظهم بالحناان بعد الزواج وبعد ماجبت ولدي كنت احضنه وابوسه واموت فيه وكااان هاادي وبس صار عمره 7شهور بدى يتحرك ويخرب صرت ماعاد اطيق نفسي على طوول اصااارخ ووصلت معاي اني اضربه تصرفاااته مستفزه كانه واحد عمره 10 سنين كل شي يبيه وكل شي يدمره جربت معاه كل الطرق دلعته شريت العاب مراجيح صرت العب معه صرت اطنشه مااكلمه اذا غلط ومانفع جربت اخليه يسوي اللي يبيه واسكت وماظبط جربت حتى الضرب ولانفع انا تدمرت دايم معصبه ومن اول ماايقوم تقفل معاي لدرجه اجلس ابكي حامل ومرهقه وهد حيلي احس دمي نشف منه صرت انطوائيه ولا احب احضر حفلات ولا ازور احد واذا مظطره انزله عند اهلي زوجه ابوه تقول اربطيه وخليه لين ماايزهق وبيعقل انا مايطاوعني قلبي اربطه عقدني احس اني ام فاشله وكل الناس يقولون لازم تربينه ولدك شقي حطموني ولا يطيقون شوفته ويحسسوني اني انا مدلعته واني اخليه براحته وانه عاجبني وضعه وانا ميته قهر اذا حطيت غداي اخلي زوجي ياكل وانا اروح اجلس معه ولا خلص زوجي يمسكه واروح اتغدى كل شي يشوفه معاي يبيه ببسي كيك ساندوش اذا اكلت وطفشني ارمي اكلي واجلس جوعااانه اول مااينام اروح اخلص اشغالي ويادوب الحق نووومه غثيث لو ينام ربع ساعه وسمع صوت خفيف يقوم وهو شبعان ومروق كنت هااديه صوتي ماينسمع صرت عصبيه دايم اتأفأف وانافخ علي اي احد صرت اضربه واصاارخ بوجهه بقوووه لحد مايجلس يغمض من الخوف راحمته بس مو عارفه كيف اتصرف وهو صغير لايفهم ترغيب ولاترهيب ثالثا زوجي عقدتي معاه هالولد راافض اني اوديه مستشفى واكشف علي اعصاابه يقول ماعنده الا فرط حركه ويخلي الولد لو كان مريض لين يصير الولد ميت من المرض ويسمح لي اوديه اليوم حرارته 38 وزياده قال اعطيه فيفادول اعطيته ونزلت الحراره شي بسيط وماارضع ولا اكل من الصباح الساعه7لحد الحين 5 اعطيته رضعه وشربه وبس فك الرضاعه استفرغه كله (وانتم بكرامه) وجاالس يتغصص يوم قلت لابوه قال عادي عنده التهاب خليه يطرحه عشان يركد ولاجاء بالليل اعطيه مضاد اروح للصيدلي ويصرف له اي مضاد ومافيه الا العافيه الولد تعباان وطاايح وانا ماادري اعاند واطلع مع السواق واوديه المستشفى وهو يقول ماتودينه مو شغلك هذا ولدي وانا افهم اكثر منك مشكله زوجي لايمكن يقتنع بالمستشفي مره خلاني لين صارت حرارتي40 وهو يعطيني اشياء شعبيه لين تشنجت عليه وجلست يومين منومه قال الدكتور بغى ينفجر الدماغ عندها ولايتوب ودايم ولدي يخليه لين تتأزم حالته ولا يوديه انا اللي لاشفته مرض مره وديته الحين مره تعبت وولدي له ساعتين نايم ووجهه احمر وحرارته ترتفع اوديه ولا اشوف وش اخرتها مع ابوه وكيف اقنع ابوه ان الدكتور حااجه مهمه تكفون ردوو علي باسرع وقت مره متضاايقه |
اقتباس:
حبيبتي كل اللي قلتيه كوم و إنه ابنك الحين المريض بوصفك هذا كوم ثاني لا تستني ولا دقيقه، اتصلي على زوجك و خلي نبرة صوتك حازمه # أبنك مريض و طايح بالفراش و حرارته عاليه و من الصباح ما أكل شي. يا تجي توديه المستشفى ولا أنا بنفسي أروح اوديه الحين و لا راح استنى دقيقه واحده، أنا أم و ما أقدر أشوف ابني بالشكل هذا أبداً # الله يشفيه إن شاء الله و طمنينا عليه بالأول و بعدين نشوف حل لمشاغبته و هدي نفسك الحين :) |
مرحباً أختي .. عندي كلام كثير .. بس نأجله .. إلى شفاء الصغير الله يحفظه .. الآن ضعي كمااادات ضروري تنزل حرارته بإذن الله .. بعدين لازم تقنعين أبوه يوديه المستشفى .. ( الكلام الكثير إلى أن يشفى بحول الله ) . |
وحدانيية غاليتي
ارتفاع درجة الحرارة عند الطفل دون السيطرة عليها او تخفيفها او معالجتها لة عدة اضرار ومضاعفات كبيرة وخاصة بعمر طفلك الله لايقدر ممكن يوثر علي الاذن والسمع او صرع لانها حصلت لصديقة اختي طفلها سخن كثير واثر فية حاولي تحممية كل شوي بحمام دافي وبجو غرفة معتدل والكمادات لاتكون مرة باردة او مثلجة والافضل من كل هذا تودية مستشفي الله يعينك ويشفية ويقومة لك بالسلامة اما شقاوتة فكل الاطفل كذا الله يسعدهم ويعينك علي تربيتة :15: |
الله يكون بعونك يا اختي
مادام الأب كذا الله لايلومك |
يابناات تكفوون وش اسوي
ولدي عطيته فيفادول المغرب بعد الصلاه وقبل شوي حرارته 38 وجلست اكمده وصارت 37 وثمان شرطات ورافض يشرب رضعته وقام العصر لعب شوي والحين ناايم وصدره له صوووت وابوه المتخلف دقيت عليه وجاء واقوله شووفه كيف طاايح ي يقوول مو شغلك قلت يااوده يابروح اوديه قال اذا فيك خير اطلعي شبر واحد بري البيت انا الرجال وافهم اكثر منك انتي مطفووقه قال بروح الصيدليه الصيدلي دكتور ويفهم وبخليه يصرف له علاج وعطيه ولاعاد ترفعين السماعه علي بروح لامي ولاخلصت جبت علاج ولدك وخلي عنك ضعافه النفس بذمتكم انا غلطاانه الولد حلقه ملتهب ويستفرغ ولارضع ويكح ويقول ماتفهمين انتي!! حسبي الله ونعم الوكيل والله من طلع وانا ابكي وخشمي ينزف دم من الزعل احسه عظامي تناافض والله كل همه الفلوس يخاف اوديه ويصرفون له ادويه وتكلف عليه الله يحرمه نعمة المال كانه عايش عشانه وبيموت عشاانه اتمنى يجي اليوم اللي يدور ريال ولايحصله زي ماينكد علي ويخلينا لين نموت من التعب وعقب يفكر يطلع فلوسه والله لو انها اول مره كان امشيها ولو ولدي تعبه خفيف ممكن اسكت بس اليوم هو عند زوجته وبيروح يكبر المخده وانا اللي بجلس علي اعصابي طول الليل اخاف انام ويتشنج الولد وش الحل اطلع مع سواق وماعلي منه ولا اعطيه العلاج اللذ بجيبه |
اذا كان وضع الفتى يزداد سوءً فاذهبي به الى المشفى
ولا تهتمي لكلام زوجك ، ( اعتقد ان انفجار صغير منك كافي لأسكاته ، في حال اخذ الأمر بأنفة وكبرياء كبير ) همسة لو كنت مكانك : لوضعت هذا الفتى في قفص! |
وانتي جالسه تطالعين لما الولد يموت
اتصلي على اقرب اخ لك او حتى اخ زوجك اذهبي به بسرعه إلى أقرب مستوصف او مشفى |
اختي وحدانية
ولدك محتاج لمغذي جلوكوز ماينفع مجرد خافض للحرارة و الله يعينك من جدددد هدي أعصابك انت حامل و اتصلي على امه او تصرفي لا تتركوا الطفل كذا |
اول عشان للحراره اعطيه تحاميل السخونه (أتبعي التعليمات على العلبه) حمميه لدقايق بسيطه بمويه شبه بارده عشان يخفض الحراره لبسيه ملابس خفيفه و خليه ينام في حضنك عشان لو حرارته ارتفعت تحسي فيه ازا قاعد يرجّع فلا تعطيه حليب، لان الحليب يهيج البطن كثري مويه و عصيرات و حاولي تعطيه فواكه او حتى بس خبز يابس اختي لا تهتمي لكلام زوجك ابداً، انتي ام و ادري بخطورة الحاله اتصلي على اخوك او احد من اهلك يجي يروح معك لو الوضع صعب ، اللي قاعد يسويه زوجك حرام بالطفل هذا، و انتي المفروض ما تتفرجي كدا والله ما ابغى احرضك على زوجك، بس الحين الوضع محتاج حزم منك و ابنك محتاج مساعده زوجك لو شخص عاقل راح يفهم تصرفك و يعذرك، والا فعلا محتاج احد يتدخل و يوقفه عند حده الله يشفيه ان شاء الله و الله كسر خاطري هالمسكين * |
| الساعة الآن 01:26 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©