![]() |
رجل الرجال وسيدة الموقف (أخي متزوج وصاحب معاكسات اريد طريقه لنصحه)
السلام عليكم
بدخل في مشكلتنا على طول هي مشكله كبيره وطويله بس راح اختصر واعذروني اسلوبي يمكن مو متناسق لاني تعذبت المشكله مع اخوي متزوج والحمدلله عنده عيال وزوجته ماشاء الله قايمه بواجباته وجميله ماشاء الله وهو اختارها من نفسه مشكلة اخوي قبل زواجه كان يكلم بنات وما ندري عنه إلا بعد زواجه بسنه وزوجته صارحتني قالت اخوك يكلم بنات قلت طيب اكيد انتي مقصره بحاجه قالت لا كل شي اسويه له المهم مع الايام اخوي كتبت لي ورقه قال فلانه ماقصرت بشي إلا في لبس النوم ماتهتم فيه وماتغير احيانا لبسها المغرب تلبسه للنوم وقال لي هي بارده جنسيا طبعا كلمت زوجة اخوي وتفاهمت معها تغيرت البنت وقامت تشتري ملابس نوم حلوه وكل شي واخوي قال لي سبب المعاكسات لان زوجتي مقصره في حقي من ناحية النوم طبعا مو هذا سبب بس اخوي علق مكالماته بهالسبب المهم اخوي الحمدلله محافظ على الصلاة ويحب يسمع محاظرات والوالد قبل سنتين اكتشف انه يكلم بنات واخذ جواله وكسره وزعل عليه وحلف اخوي وأقسم بالقرآن أنه ماراح يكلم بنات وللأسف رجع لهالطريق وزوجته تقول لي أنه تاب لكن أخوي ماتاب رجع للمعاكسات ويكلم بنات \ما ادري كيف اقنع اخوي يطلع من هالطريق تعبت نفسيا تعبت من السكر والسبب التفكير فيه المشكله انه يدلع زوجته ويصرف عليها فلوس بس عشان ماتشك فيه وأنه يكلم بنات هي تقول وش اسوي له الله بيهديه انا مانقصر ندعي له وله الآن أكثر من 8 سنوات على هالطريق وبسبب هالمكالمات صار عليه دين فوق 100 ألف لأنه يطلب من البنات صور جنسيه ويطلبون منه فلوس يعني كل صوره بالف أو ألفين بتقولون كيف عرفتي زوجته فتحت جواله وجابت لي الجوال وقرينا الرساله البنت تقول ماراح ارسل لك صوره إلا إذا حولت في حسابي الف والثانيه تقول الفين\ اخوي طيب وعقله ناقص والمشكله انه ما يقصر معنا لو نطلب اي شي يسويه يشتري اي شي نطلبه حتو لو عنده دوام طلع من دوامه يودي الوالده لمشاورها ويرجع ادري عن اخوي يسوي كذا عشان مانلاحظ عليه وش اسوي عيون اخوي زايغه ويحب يناظر البنات يعني مسافر وعيونه على البنات المتبرجات\ اخوي غريب وش اسوي له ومشكلته ما يحب زوجته تجلس في البيت لوحدها يعني لو يداوم يودي زوجته لاهلها وما يحبها تجلس لوحدها وعيالها ويفرح اذا راحت لاهلها ويتركها وقت طويل كل هذا عشان ياخذ راحته وش اسوي معه اتعبني الناس يعرفون عن اخوي انه يكلم بنات عشان كذا ما احد خطبني \يمكن يقولون اخته مثله والله تعبت وش اسوي مع اخوي ذبحني من التعب ابي طريقه عشان انصحه ويكون رجال مثل الرجاجيل ساعدوني تبعت اكتب وانا ابكي ما ادري اخوي وش فيه نفسي يطلع من هالطريق وفيه شي بقوله اخوي يشتري للبنات اي شي يطلبونه مثلا لو يطلبون جوال آخر موديل يشتريه ما اكذب عليكم اذا جاء يسلم على امي كل يوم ابكي على حاله والمشكله الوالد مو راضي عنه يقول ماراح ارضى الا اذا صرت رجال وش اسوي ساعدوني عشان اترك البكاء نقطه مهمه اخوي عمره 37 وزوجته 36 ومستواهم التعليمي متقارب |
|
أشكرك على رحابة صدرك والله يجزاك خير الإجابات * عندما تقدم أخاكِ لزوجته هل كان مقتنعاً بها ونظر لها النظرة الشرعية أم كان زواج دون نظرة ودون مهاتفه بينه وبينها..؟ نعم كان مقتنع بها ورفض أن ينظر لها نظره شرعيه الوالده طلبت منه قال لا استحي ولم يتحدث معها ايام المكله لكن هو من أختارها بقناعة نفسه ورفض ان يتزوج بغيرها *هل لديه أطفال وكم عددهم وأعمارهم ؟ (أريد أن أعرف أن كانوا بسن متقاربة أم لا) نعم ولله الحمد لديه طفلان فقط ولدعمره 9 سنوات والثاني 6 سنوات *هل له أصدقاء يخرج معهم ولهم تأثير كبير عليه ؟ أم هو بيتوتي . .؟! نعم لديه أصدقاء ونادر ما يخرج إلا إذا زوجته طلعت لأهلها يطلع معهم الإستراحه نعم أصدقائه لهم تأثيرعليه مع أن بعضهم ماشاء الله مستقيم لكن البعض يمكن 2 منهم فقط عليه بعض الملاحظات *هل سبق وتذمرت زوجته من شكله أو شعرتِ أنها غير مقتنعه بِه؟ بالعكس زوجته لم تشتكي منه أبد اللهم في سالفة أنه يكلم بنات والمشكله تحبه وتموت عليه وتقول بدعي له لحد ساعات الموت وهل هي ممن يتمتعون باللسان المعسول ؟ ما أظن ما يهمها الكلام المعسول يهمها رجال وبس *هل تحبه فعلاً وتثني عليه أم تلاحظين أنها زوجة تقليديه تهتم بالناحية المادية وأنجاب الأطفال ووجود الرجل في حياتها كظل يستظل به لا أكثر. .؟ نعم تحبه وتثني عليه دائما وأحيانا لا والله تكذب عليه وتقول أنه يرفض يوديني للسوق مثلا وهو المسكين ما يرفض لها طلب لو تتطلب عيونه قال تفضلي يدلعها ويحبها لكن ساعات هي تقول هو ما ينفذ طلباتي مو مهمتها إنجاب الأطفال تهتم في الماده وبس وأنه يوديها اقاربها يعني لو تقول بروح لعمي مثلا وقال أنا مشغول تزعل يومين أو ثلاثه إلا يوديها وتحب تتطلع لاقاربها مع أنهم ما يحبون أحد يزورهم واتوقع تعبتر الرجل ظل فقط |
:: |
اشكرك على الرد
واخوي من ناحية الدين بالعكس يصلي الصلاة في وقتها وللعلم اختي هو كافل أسره يتيمه ما قال لأحد من العائله إلا انا يحب الخير لكن!!!! يحب المعاكسات نعم زوجة أخي لاتجيد الكلمات الحلوه ولاتعرفها نهائيا في أحد الايام سألتها يا أم فلان بالآمانه هل تقولين لأخوي حبيبي بعد عمري حياتي أو كلمه حلوه قالت بكل برود لا يا اختي ما أكذب عليك ما أقولها له أخاف عيالي يسمعونها هي لسانه ما يعرف كلمات الحب جافه في حديثها حتى عبارات الشكر نادر ما اسمعها تشكره أتمنى أجد مناسب لحالة أخوي لانه بجد اتعبني وابكي على حاله اتمنى يكون رجال بمعنى الكلمه اخوي اصغر منه بكثير يعني اخوي عمره 25 ماشاء الله لا إله إلا الله الوالد يعتمد عليه كثير ورجال بمعنى الكلمه عكس أخوي هذا |
:: |
وعليكم السلام
مقدره اشغالك هنا وخارج المنتدى مشكوره أختي على النصائح وإن شاء الله راح تقرأها زوجة أخوي وراح أشوف ردة فعلها لأنها للأسف مهمله من ناحية العاطفه لكن أكيد راح تستفيد من كلماتك الهادفه وراح أنقل لك ردة فعلها وتجاربها ومدى إستفادتها |
:: ننتظرك ياعزيزة واتمنى إن أخي في الله وأبينا جميعاً رجل الرجال يدلي بدلوه ايضاً :: |
ابنتي الكريمة :
تتعاملين مع هذا الأخ وكأنه مراهق لا يعي ما بفعل؟ وكأن زوجته أختك الصغيرة التي في شهر العسل. وكأن والدكما غير موجود وأنتي ولية أمره. 37 و36 وجاك السكر منهم . بذلتي النصح والإرشاد وفيه أمور خير كثيرة وفيه هذا السبب نسأل الله له المعافاة منه وأشارت زوجته لكِ إلى أنها تعرف وتسأل الله له الهداية. حتى رسول الله صلى الله عليه وسلم لم يتمكن من هداية عمه أبي طالب والعلاج هنا يكون لنفسيتك أنت وليس لسلوكه هو فهو ذو إرادة ويعي ما يفعل ويعلم ما يخسر ويعرف الحق والباطل (إنك لا تهدي من احببت) وزوجته تعرف أثر ذلك عليها. وإن رغبتي في علاجه أو زوجته فاليحضرا هنا وتتم مناقشتهما ومعرفة الأسباب والدوافع والعلاج. وليس هذا إحباط لك عن دعوته ونصحه ولكن أبذلي المستطاع وأدعي له بالهداية ولا تتحملي ما فوق طاقتك. |
أشكرك رجل الرجال
\واخي من المراهقين لانه يتصرف تصرفاتهم واما والدي قال له كلمه ونصحه وحلف بالله ان لم يترك هذا الطريق لن يرضى عنه لكن اخي احب هذا الطريق ووالدتي نصحته وتعبت منه والسبب الذي جعلني اهتم به لان جميع اقاربي يعلمون ان اخي صاحب معاكسات حتى زملائه في العمل وبعض زملاء والدي يعلمون ذلك يعني الجميع يعلم ان اخي معاكس وانا انصحه لمصلحتي\ لان الناس لايتقدمون لي بسببه! يقولو ن اخيها معاكس كم تقدم لي الكثير واذا سالو عنا قالو الناس اخيها معاكس تركونا مع ان والدي محافظ وكل اخوتي واحد اخوتي امام مسجد لكن اخي هذا سيرته سئيه مع المعاكسات ابي رجل الرجال اعلم ان الهدايه ليست بيدي لكن اسعى على الاقل لتحسين سيرته حتى انخطب وارتاح من همه فهو من المراهقين وكيف له يدخل هذا المنتدى! لا يدخل اي منتدى فقط همه الوحيد في الجوال حتى انه لايوجد في منزله نت اما زوجته لاتعرف للنت طريقا لكن ساطلب منها ان تكتب مشكلتها هنا لعل وعسى تاخذ بكلامي شكرا لك ابي رجل الرجال ونفع الله بك |
الساعة الآن 08:13 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©