|
اعاني ومعاناتي تختلف عن المطلقات!
بسم الله الرحمن الرحيم
السلام عليكم ورحمة الله وبركاته .. اشوف المطلقات دايم يشتكون الفراغ العاطفي وظلم الاهل الفراغ العاطفي الكل يعاني منه لا المتزوجه مرتاحه ولا المطلقه مرتاحه عشان كذا اطرد الوساوس عني خاصه لما اتذكر الفراغ العاطفي الكبير الي كنت اعيشه وانا متزوجه والي هو لايقارن بالفراغ العاطفي بعد الطلاق لاني ماانتظر من احد الاهتمام والمشاعر بعكس لما كنت متزوجه عشان كذا المعاناة كانت اكبر لكن معاناتي انا غير !! بس جيت ارتب افكاري عشان ادخل بالموضوع نزلت دمعتي اعاني من التحطيم .. مشكلتي طموحه وحساسه ابي ادرس ابي اتوظف ابي اعيش لكن كل الابواب مسكره انا مطلقه وعمري 30 وعندي 3 بنات ومعي بكالوريوس علمي .. عزيزة نفس ومااحب عطف احد علي معيشه نفسي ملكه بالي يجيني .. تحطمت لما كان اول اهتماماتي ارضاء الي حولي وانسى نفسي ولما انتظر احد يرد الجميل لايبادر القى اني انتظر سراب اقوم بامور البيت كله ولا امل .. احب اكون مسيطره على الامور بس بدون تسلط مااحب اعتمد على احد يقوم باموري .. بالعكس الا اساهم بشكل كبير بامور غيري سبب طلاقي اني مليت من برود زوجي الي وصل للموت وبنفس الوقت مكتفني يعني لايرحم ولايخلي رحمة ربي تنزل وزاد عليها كثر المشاكل والنقاش واشياء كثيرة مابي اذكرها ربي يستر عليه فصار بيننا شرخ انتهى بالانفصال ولليوم احمد ربي واشكره اني انفصلت المهم عند اهلي اصحي الكل للمدارس ومن ضمنهم بناتي واقعد لحالي احوس بالنت احس اني بانفجر ابي انجز شي بحياتي .. احس اني جماد .. مكانك سر .. فيني طاقه ماشاء الله عن 10 اشخاص لاتقولون لي شغل البيت .. فيه خدامه وشغل البيت يخلص ومهما سويت اخرتها باقعد يعتمد علي ابوي باشياء كثير لما ياثث ياخذني لما يروح بنده ياخذني لما يشتري اي شي للبيت اكون طرف اساسي .. لما يكون عنده مناسبه اكون المدبره لكل شي والله يخلي الوالده لنا لما نويت اغير غرفتي قال ابوي مايبي العمال والحوسه طلبت اصبغها بنفسي ورفض لكن لما جيت ااثثها اثثتها بدون لا اشاوره وانا قصدي والله اريحه شريت اثاث غرفتي وانا ركبته عشان مايبي عمال لكن هو تدخل وجاب عمال وكملوا الباقي .. لما اروح السوق اقضي لبناتي ولي ولخواتي .. ابوي مع الكبر اهمل اخواني الصغار واختي واخواني الكبار مامنهم فايده الكل لاهي بنفسه واصدقائه فصرت اطلع اخواني وبناتي للمجمعات مع سواق نلعبهم بالملاهي ونتعشى ونقضي بعض الامور الاكيد انا مايعيقني شي عندي حل لكل شي الحمدلله ولا احتاج احد بس هالشي سبب لي مشكلتين اول شي ابوي صار يحس اني احب الطلعه وصار يغثني بالكلام وانا ادري اني جرحته لما حسسته اني مااحتاجه لكن انا مااحب اكلف عليه ولا اعرف اطلب مستحيل. ويمكن الي ضايقه زياده انه مثلي والاصح انا طالعه عليه مايحب يطلب من احد شي والدليل مدلع اخواني وللحين نعتمد عليه بكل شي الله يطول بعمره عشان كذا مستنكر اني مستغنيه عنه صار يرفض بعض طلعاتنا بدون سبب ووالله العظيم ان 90% من مشاويري لاهلي وبناتي مالي منها الا الشقاء قلت له مفروض مره بالاسبوع يكون للاسره نطلع وننبسط قال لا مره بالشهر للعلم انه بشبابه كان يطلعنا 3 ايام بالاسبوع وانا مااطلب منه بحكم السن يطلعنا بس يسمح لنا وانا ادري مو اعتراضه طلعتنا مع السواق بس اعتراضه لانه حس اني بافرض راي وباسيطر بعدها تركت الموضوع وصرت ماابادر بشي ابد حتى بالامور البسيطه لاني تحطمت وودي ارجع زي اول بس عجزت !! لانه فقد اشياء ومساهمات مني كثيره بس غصبا عني والله عزلت نفسي ودايم بغرفتي .. يعني حتى مشوار بنده صار مايروح لاني مااروح معه الشي الثاني تعبت اقدم على وظايف لدرجة اقدم على نفس الوظيفه كذا مره بدون لا ادري وتوظفت بوظيفه اختلاط مجبوره ابي بس شهاده خبره سنه وباطلع والله مرت علي كنها دهر تعبت نفسيا مع ان شغلي مع بنات واكون بمكتب لحالي ايام اداوم واطلع ماشفت احد لكن نفسياااااااا تحطمتتتتت على كثر ماكنت احسب شخصيتي قوية وكنت ميته اتوظف الا اني استنكرت الوظيفه هذي وكنت ابكي يوميا وانا رايحه وجايه ماقدرت اندمج معهم مع انهم والله محترمين واخلاق لكن ماقدرت اتحمل فكرت اني احتك بالرجال كذا وماصدقت طلعت بعد 7 شهور وبكيت من الحرقه ماكملت الخبره يعني كنك يابو زيد ماغزيت حسبي الله على الي كان السبب وخلانا نضطر لهالوظايف وبعدها صرت اقدم وكلهم يطلبون لغه ودورات بالحاسب وفكرت ادرس لغه او حاسب ولمحت لابوي بهالشي ويصرفني .. انا والله غرضي اشغل نفسي واحب اكون نفسي ويكون لي مصروف خاص الي قاهرني ابوي مو ناقصه ماشاء الله لكن انا مااطلبه ولو عطاني صرفته على البيت اساسا الي يجيني من الضمان ومصروف بناتي من ابوهم اساهم فيه بالبيت فدراستي لو قلت له انا بادفعها بيزعل ولو قلت ع حسابه مقدر اقولها ماعمري طلبت منه ريال هذا الي قاهرني كل طموحاتي تبعثرت بسبت تحطيم ماله داعي ولا له اساس ابوي انسان ديمقراطي وطيب بس حس اني بافرض شخصيتي صار يعاند ويقول لاشياء لا لو هو مقتنع فيها صار يقول لا قبل لايسمع وش باقول .. سمنت من الطفش قلت له باركب حلقه قال لا .. كل شي لا ياليت ماتفهمون غلط اني احب السيطره وشخصيتي قويه واني ابي كل شي لا والله واكبر دليل لي سنه كل امر انتقده فيني وقفته وماصرت اسوي شي غير اني اكل واشرب وانام بدون حياة ! مااحب المناسبات والمسايير والتمشيات وجمعات البنات .. انا بس ابي انجز ابسط اموري بدون لا احد يحسسني انه شي صعب لاني ماشوف شي صعب ولاتقولون ابوي يعاملني كذا لاني مطلقه .. انا اعرف ابوي مايفكر بهالامور واكبر دليل انه رضى اتوظف بمكان مختلط وانا الي كنت كارهه ابوي بس حس ان طلباتي ماتخلص ومشاويري كثرت ولا فكر هالامور الي اسويها لي والا للكل امانه عليكم بدون تجريح الي فيني مكفيني ابي منكم دعوة صادقه وهالكلام السابق مجرد فضفضه فمان الله |
أوصيكِ ونفسي بـ صلاة الليل وصلاة الضحى وأكثري من الدعاء في الثلث الأخير الله يحفظج انتي ماشاء الله ما يعيبج شي بس سوي اللي يبيه الوالد لأن هو في سن كبير ويحتاج في هذا السن إحتواء منكم واذا أنتي دايما ياخذ رايج في كل شي ف أكيد أنتي مهمه احتويه ولا تنرفزينه أبداً الله يطول في عمره ويحفظه لكم وييسر أمرج يارب |
حاسه فيك
جلسة البيت تقتل خصوصا للي عنده طموح ورغبات كبيرة انا مثلك خلصت دراسة وجالسه فالبيت انتظر وظيفة! الفرااااغ يقتل ويخلي النفسيه زفت احس علاقتك فأبوك قوية من كلامك ليش ماتجلسي معه وتصارحيه بكل اللي قلتيه لنا خصوصا فموضوع الدورات .. بتقضي وقت وبتستفيدي فنفس الوقت لا تعزلي نفسك وارجعي مثل قبل اطلعي مع ابوك مشاوير البيت كذا انتي تتعبي بزيادة ،، ربي ينزل عليك السكينة والراحة النفسية يارب |
كلام الأخوات
Bushra فديت ال M جميل أضيف عليه أختي الفاضلة - ألم تفكري بالأعمال الحرة؟ - ألم تفكري بإكمال دراستك؟ وفقك الله،،، |
الله يسر لك اختي صبرا جميل امرك
وتلقي لك وظيفة محترمة فعلا اتفق مع Bushra بصلاة الليل والضحى والدعاء في الثلث الاخير والصدقة على ماتجود به نفسك لو كان قليل ولا تنسي الدعاء ( ياحي ياقيوم برحمتك استغيث اصلح لي شاني كله ولا تكلني الى نفسي طرفه عين ) وفقك الله لمافيه الخير لك واعانك الله على البر بابيك دعواتك لي بالزوج الصالح |
آه ياصبر الحمدلله كل وقتك احمدي الله مهما كان نحن افضل من غيرنا بكثير
لكن احمدالله عزوجل مهما بلغت ضروفي من صعوبة لكن احمدلله فأنا افضل من غيري لعل ماتعانين منه اعاني اكثر على الأقل انتي تحسين احد يبيك اولادك يايتمنونك وتحسين فيه احد يفكر فيك اولادك تخيلي الحمدلله انا لا اقول اهلي سيئين لكن تخيلي غبتي سافرتي جيتي برود ماتحسين احد مهتم فيك فقط سلام ودك تحاكين احد امامك ودك تحسين اهلك يكلمونك لكن الكل لاهي الكل لديه ظروفه بس الحمدلله انا اشكر الله شكرعظيم والله لأنه رزقني الرضى ورزقني من يساعدني بالرغم مهما اشتدت الظروف اجد من يقف معي احتاج شيء ربي يساعدني ربي لن يهملنا لن يتركنا لكن تقربي لله بمختلف القربات صلاة صدقة قيام زكاة راح تحسين بشعور آخر لو الدنيا كلها بعيدة عنك كافي الله معاك استشعري نعمة الله عليك كيف نجاك من زوجك وادعي ربي يحنن قلب والدك والله الدعاء شيء عظيم ادعي ربي يسهل امرك دائما واي شيء تبينه صلي واطلبي ربك حتى لو شيء بسيط خروج اي شيء صراحة هذه طريقتي اريد اخرج مكان اشتاق لمكان اصلي وادعي قبلها بمدة احيانا في نفس اليوم يحدث واحيانا بعد زمن اذهب لو سوبرماركات لعلك تستعجيبين لكن هذا وضعي واذا فكرتي انه ابتلاء واختبار لصبرك سوف يوفقك الله واطلبي من الله الرضى ترى لم اطالع بغيري اشكر ربي احس اني في نعمة عظيمة واحمد الله اني موب تحت سيطرة رجال مايخاف الله |
أنتي رائعة بكل ماتحمله الكلمة من معنى ....... ليت كل المطلقات مثلك ومثل تفكيرك
لاتيأسي اختي طوري من نفسك .. اشتركي بعمل الجمعيات الخيرية والله عمل ممتع وفرغي طاقتك فيه اجلسي مع ابوك تناقشي معه بكل هدوء .......... وبالتوفيق يااختي .... |
والله إنك جيدة ما شاء الله تبارك الله
بس وأنا أختك ترى الوحده فينا ما يصلح تكون خراجه ولاجه.. حفظاً لها شرعاً لكن ليه ما تلتحقين بدورة تحفيظ القرآن .. وإذا ما سمح أبوك ليه ما تحفظين بنفسك دامك ما شاء الله طموحه .. وفيه بعد اقتراح.... ليه ما تشوفيلك شغل عن طريق النت... زي بحوث ..بوربوينت للبنيات منها تشغلين نفسك ومنها يدخلك دخل حتى لو بسيط وشوفي المنتديات النسائية كيف شغلهم فيها وكيف الأسعار >>> شي خيالي وتعلمي على هالبرنامجين ترى مو صعب ابداً مجرد اقتراحات لك والتيسير بيد الله وفقك الله في الدنيا والآخرة |
مافي اصعب من الفراااااااغ
احسه موت بطيييييييء الحمد لله عندك من يملأ وقتك عيالك الله يخليهم لك في احد يفتقدك يشتاقلك لو غبتي يسأل عنك مو وجودك وعدمه واحد الله المستعان * |
ياهلااااااااا وغلاااااااا فيك بالعكس فضفضي وخوذي راحتك
ماشاء الله عليكِ كلااااااامك كله عن الطموح ومساعدة اهلك وهذا شي إيجابي وانا مع اختي العقد الفريد ليه ماتدخلين تحفيظ والاتسوين مشروع بسيط شوفي عندك المنتدياااااات النسائية تقدرين تشتغلين وانتي ببيتك الله يوفقك ويسهل امرك |
| الساعة الآن 07:49 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©