|
حامل بالتاسع و عندي طلق .. قلقانة جداً
السلام عليكم و رحمة الله و بركاته ..
الدكتور الفاضل / أنا حامل بالأسبوع الثاني من الشهر التاسع و المفروض إنه ولادتي يوم 24 ذو القعدة .. و عندي طفل عمره 4 سنوات و ولادتي كانت طبيعية و ما شعرت بالأعراض اللي تجيني حالياً .. و جبت ولدي بعد أسبوعين من العاشر و أخدت وقتها أعشاب ساعدت على الولادة ، مثل القرفة و كف مريم ،، لإنهم قالولي لو الرحم ما انفتح فلازم طلق صناعي بعد 3 أيام ، فخفت و أخدت الأعشاب . . المهم .. عندي كم سؤال ليت تجاوبني عليه رجاءً بأجوبة تريحني .. لإني تعبت أدور بالنت عن الأجوبة .. ------------------------------------- 1 - قبل 4 أيام جاتني إفرازات - الله يعزكم - من بعد العشاء لحد الصبح .. مو كثيرة مرة .. لكن بلل مستمر و لونها مائل للأخضر ،، و رحت المستشفى و الدكتورة قالت لي إنها افرازات خطيرة و لازم ( تحاليل ) .. أخدت مسحة و النتيجة المفروض إنها تظهر بكرة بإذن الله .. لإنه لازم يعملوا له مزرعة على قولتها .. و سألتها عن الالام اللي تجيني أسفل البطن ، و قالت احتمال من الإلتهاب ؟؟؟ سؤالي الأول : ليه الإلتهابات هذه خطيرة ؟ و هل صحيح إنها تسبب - فقدان النظر - للطفل إذا أنجبته الفترة هذه ؟؟؟ لإنه وحدة تقرب لنا ، كانت عندها التهابات - ما أعرف إيش نوعها - و ماتعالجت منها .. و وقت الولادة قالولها لازم عملية قيصرية ، عشان الإلتهابات حتضر الطفل لو جابته طبيعي ؟؟؟ -------------------------------------- 2 - نسبة الدم وصل لـ 8 عندي و الدكتورة وزنتني و طلع وزني 57 و قبل الحمل كنت 47 .. و على أساس نسبة الدم و الوزن .. وصفت لي 10 إبر حديد .. و مرررررة الإبر مؤلمة الصراحة .. أمس أخدت ابرة و قبلها بيومين ، و باقي لي كمان .. سؤال الثاني : هل الإبر لها مفعول - واضح - و نتائج كويسة بفترة قصيرة ؟؟؟ و كم من الممكن ترفع نسبة لدم بمثل حالتي ؟؟؟ و هل وصول نسبة الدم لـ 8 ،، معناها إنه الجنين أصابه شئ لا سمح الله ؟؟؟ أقصد هل الإبر هذه من الممكن إنها تنقذ الجنين و تعوضه عن الحديد اللي كان ناقصني بالفترة السابقة ؟ أخاف أكون ضريت الجنين لا سمح الله بسبب فقر الدم .. و الحمد لله إني لحقت أخد ابر لإني وصلت لمرحلة ماصرت أقدر أقوم فيه بسبب الضعف و فقر الدم و الدوخة .. --------------------------------------- 3- و هو الأهم .. أمس من الظهر كنت حاسة بتحجر ببطني و ألم من تحت أشد من كل مرة .. و من بعد المغرب ساعة 7 المساء ، بدأ يزيد الألم بشكل ماقدرت أتحمله ، و رحت المستشفى عشان أخد ابرة الحديد و الألم بدأ يزيد لدرجة إني ماسكة حالي بالقوة من التأوه و البكاء .. شافتني الدكتورة و قالت الرحم مازال مقفل و إنه بدري لسى عالولادة ، باقي 3 أسابيع .. و عملوا تخطيط للجنين ، بس الممرضة ما عرفت تضبط التخطيط .. حتى إنه الدكتورة كلمتها بالإنجليزي و قالت لها ( إيش هذا ؟؟؟؟؟؟؟ ) فردت عليها الممرضة ( إنه البيبي ماشاء الله يتحرك بكل مكان و ماهي قادرة تعمل له كنترول ).. المهم ،. الدكتورة قالت إنه من التخطيط باين إنه فيه طلق خفيف ، بس طلق مو حقيقي .. و عطتني حبوب قالتلي أخذه عند اللزوم و كل ماجاني الألم ، و لو خف الألم فهو طلق كاذب ، و لو استمر .. فأراجع المستشفى على طول .. و أخدت الحبوب من أمس و الحمد لله خف الطلق ،. بس المشكلة ، إني مجرد ما أتحرك عشان ( أتوضأ أو أصلي ) أو حتى لو مجرد أوقف و أمشي خطوتين ترجع الالام و صايرة أمشي خطوة ، خطوة .. و زي العجايز لازم أتكئ على شئ .. و طول الوقت راقدة .. السؤال الثالث : هل تنصحني إني أمشي كثير و أخذ أعشاب و محفزات لفتح الرحم ؟؟؟ أو إيش الحل برأيك ؟؟؟ و لا استمر بالراحة التامة ؟؟؟ أخاف أمشي كثير و يرجع الطلق و يستمر الرحم مقفل و أتعذب مثل أمس .. لإنه أمس صرت أبكيييييي في الأخير و الممرضة و الدكتورة ماخدين الموضوع ببروووود تام .. و زوجي كان مو عارف إيش يعمل ؟ يسألهم و يقولوا بيروح الألم بعد شوي مع الحبوب .. طمنني الله يسعدك.. لإنه الدكتورة اللي أراجع عندها .. أمس ماكانت موجودة و بأشوفها بعد أسبوع ، و أمس كانت موجودة وحدة جديدة و كل ما سألتها عن شئ ، ترد علي بأسلوب جاف و كل شوي تقول ( نعم إيش تبغي ؟ ) و ما قدرت أخد أجوبة منها .. --------------------------------------- مع العلم إنه المشيمة عندي كانت نازلة من الشهر الخامس لحد الثامن .. بس من 10 أيام و أول مادخلت التاسع صورت بالسونار و كانت النتيجة كويسة و الحمد لله و المشيمة كمان وضعها كويس ، مثل ما قالت لي الدكتورة و كمان دكتور التصوير .. و حتى وزن الجنين و السائل و القياسات كلها تمام و الحمد لله .. و رأس الجنين على أسفل من 10 أيام و الحمد لله .. و وزن الجنين وقتها كان 2 كيلو و 8 من عشرة .. . . و الله يجزاكم كل خير .. |
اقتباس:
|
ألف شكر طبيبنا الفاضل ..
الله يجزاك كل خير على الأجوبة .. طمنتني عالجنين و الحمد لله .. لإني قريت كثير إذا الدم نسبته نقصت عند الأم ، فالطفل دماغه يتأثر بسبب نقص الأكسجين و خفت يوم شفت الدم وصل لـ 8 إنه يكون صابه شئ .. و الطلق يجيني مجرد ما أتحرك لو من الغرفة لحد المطبخ ، و تختفي مجرد ما أجلس و ما أتحرك أي حركة ثانية و جالسة حاليا بأجمع أدعية تسهيل الولادة و إن شاء الله بأستمر بالمشي .. خوفي بس إنه يجيني الطلق و الرحم مقفل ؟ لإني ما جربتها و الحمد لله ، في ولدي رحت المستشفى و كان الرحم مفتوح و بدأ الطلق .. . . ربي يسهل لكم أموركم جميعها :) |
الطق هو اللي بيقتح الرحم اساسا مافيش حاجة تخافي منها
|
| الساعة الآن 11:45 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©