|
تصرفات بنت عمي ( رجل الرجال .. البليغ)
السسسلام عليييكم ورحمة الله وبركاته
اساتذتي الكرام .. عذراً لكم ولكن ارُيد مساعده لاني مادري كيف يكون التصرف الصحيح .. المشكله تخص بنت عمي عمرها ( 15 ) سنه اسمها افنان .. تبدأ المشكله قبل ثلاث سنوات عندما كانت بالصف الاول متوسط انتهى الفصل الدراسي الاول وكانت متفوقه لكن عند نهاية الفصل الدراسي الثاني رفضت تدخل الاختبارات النهائيه يعني قبل الاختبارات باسبوعين امتنعت عن الدخول حاول عمي وزوجته فيها بس رفضت ضرب وانضربت بس كانت جداً عنيده تدخل عمي الثاني لكن ماكان فيه فايده وتهددهم انها بترمي نفسها من الدور الثاني اذا اجبروها ع شي .. تركوها لانها كانت تقول كثير ناس ناجحين بحياتهم مايحتاج دراسه مع ان كان طموحها جداً عالي .. هذيك الفتره كانت تغيرات ببيتهم علشان عمي تزوج وزوجته الاولى اصرت انها تسكن معاهم بنفس البيت افنان كانت تكره تصرفات امها وتقول ليش تجيبينها هنا انتي شخصيتك مهزوزه وتنتقد امها كثير .. الفترات الي فاتت كنت اكلمها عن دراستها كانت تتهرب من الطاري وتقول اذا تكلمتي بهذا الموضوع بطلع واتركك .. امها تشتكي لي منها كنت اقول لها لا تدلعونها لان عمي جاب لزوجته للاب وصارت افنان تدخل عليه كثير كنت اقول انتي تعطينها سبب علشان تنشغل عن دراستها .. عمي طلق زوجته الجديده بس البيت باقي الاهمال فيه.. هذا كله وانا بعيده عنهم في شهر 8 سافرت عندهم وسكنت ببيت عمي والله اني ماستوعبت وضعهم البيت منهار جداً كل الاطفال يتصرف ع هوه مافيه تربيه مافيه صح وغلط تعبت من اسلوبي معاهم اول خطوه سويتها مع افنان كانت اللاب ممنوع الوقت كله عليه خصصت لها ساعتين بس وبعدها اشيله عنها ماكان عاجبها بس ماكان عندها حل لما تتصرف تصرف مايعجبني كنت اعاقبها ماتاخذه بس للاسف العقاب يتدخل عمي او زوجته ويتوسطون لها وعلشان خاطرهم اتنازل عن العقاب .. حالتها بالغرفه وبس هي عالمها ماتتشارك مع احد من اهلها احد دخل غرفتها وحاس غرض عن مكانه يرتفع صوتها عليهم سوا ام او اب الاحترام مو موجود وهذي صفه فيهم كلهم .. تحب تخلط الزيوت وتسوي خلطات ومادري ايش وتسوي صبغه لشعرها من غير طبعاً استأذن بتقول بنت وانوثه لا ياستاذ افنان رافضه تتغطى رافضه تلبس الحاجات الخاصه في كل انثى اذا طلبت تتغطى تقول باقي صغيره ماراح اتغطى وعندها .. في اواخر رمضان زعلت من تصرفاتها فكانت نقطة ضعفها اللاب غيرت الرقم السري للجهاز لما عرفت دخلت بالغرفه ع صلاة العشاء تقريباً كنت انا وعمي جالسين قالت كم الرقم قلت ماغيرته علشان اعطيك صارت تصارخ بطريقه همجيه وقالت من ضمن كلامها راح تلتفتون بيوم ماتشوفوني انا ماجا ببالي لاني كنت اتوقع دلع قلت هذا الباب مفتوح اطلعي ماحد بيردك طلع فهمها الانتحار راحت للثلاجه واكلت الادويه يمكن اكثر من 50 حبه من علاجات جدتي سكر وضغط واسبرين ومنظم السكر وعلاجات غيرها امها انتبهت لها لانها كانت ترجع اسالتها قالت اكلت بس 3 حبات وكانت عارفه انها تكذب اخذوها للمستشفى وتركهم عمي من غير مايعرف ايش فيها لان امها قالت له تسمم من اكله جلست سبوع بالمستشفى وقبل العيد بيوم طلعت طبعاً لبس العيد انا شريته لها .. انسرق جوال افنان بالمستشفى بس تصرف اهلها زعلني بدال مايكحلونها عموها انا اصريت انها ترجع معاي لبيتنا لان كانت البيئه ماتساعد البنت ترجع لطبيعتها واختي بنفس عمرها قلت يفهمون ع بعض كلمت افنان ووافقت تروح معاي وطلبت جوال بلاك بيري من اهلها وانا كنت منبهه امها ماتشتريه لها لكن جاها البلاك وسافرت معاي جبتها عندنا اسبوع نزلتها لسوق بس بشرط تتغطى لانها كبيره وسمعت الكلام شريت لها حاجات خاصه للبس كانت ترفضها عند اهلها علشان ماتبين انها كبرت بس عندنا لبستها داومت مع اختي اول يوم وكانت اختي تقول ماشاء الله شاطره وتشارك ,,حاولت اقنعها تكون منازل بس رفضت وانا لحد هالوقت احاول فيها جا عمي كان عنده شغل بمنطقتنا واخذها معاه جاتني قالت كلميه مابغى اروح وانا موافقه اروح معاك للشيخ بس مابي اروح للبيت عمي ماسمع مني وقال ارجعها بعدين راحت معاهم .. كلمتني امها تقول نفس حالها اول مادخلت البيت تصارخ ليش الغرفه وسخه ليش وليش قلت جيبيها هنا وتركوها البنت تبغى تنبيه وارشادات وبيجبونها ع العيد بشهر 12 ان شاءالله لاني بكلم المدرسه من غير ماتعرف وبنقل ملفها وابغاها تختبر انتساب .. انا كتبت هنا ابغى اعرف كيف اتصرف معاها التصرف الصحيح لمثل حالتها .. اساتذتي اعذروني ع الاطاله بس حبيت اذكر بداية المشكله لحد اليوم .. وجزاكم الله كل خير وجعله في ميزان حسناتكم .. |
اساتذتي انا بإنتظار تواجدكم بموضوعي ..
|
ابنتي الكريمة
أسأل الله لها الهداية وحسن البصيرة ولك الأجر المضاعف على حرصك عليها ولنعلم ابنتي العلاج لا بد أن نعلم رأي الفتاة قبل ولماذا تتصرف هكذا فالإنسان كائن يتعلم لا يوجه بمتحكم عن بعد فلا بدأن تمتنع عن السوء بنفسها لا بالقيد على بدنها لذلك لعلك ترين إحضارها هنا ومشاركتنا المنتدى فتستفيد ثم تدخل بنفسها تطلع على ما فيه من مواضيع وهي مفيدة وتنير العقول بين مشاكل وحلول ثم نفتح معها صفحه تخصها ونبدأ معالجة ملفات عقلها لتقود نفسها بنفسها للأفضل بدون توجيه من أحد إلا نفسها التي تراقب الله لا أن تراقبك أو غيرك في سلوكها. بانتظار تعليقك. فضلا تغيير مقاس ولون الخط. وعرض الموضوع بفقرات أفضل لترتيب الأفكار.وارد عليها. |
استاذي الفاضل اشكرك ع تواجدك ..
وجزاك ربي كل خير .. ماقدر اجيبها هنا الا في شهر 12 لانها في منطقه غير منطقتي وراح يزورونا بالعيد ان شاء الله .. يمكن معاك استاذي تستجيب بس بالبدايه اجوبتها مهمشه مو مفهومه حتى لما ناقشتها وبينت لها حكم الانتحار لانها كانت تقول يوم القيامه راح يكون في 2012 قلت لها ربي يعلم الغيب وهذي اكاذيب .. وانتِ خايفه من القيامه وبنفسك كنتي بتموتين روحك تسكت .. بعدين قلت لها ليش سويتي كذا علشان الكمبيوتر لهدرجه مهم ماتستغنين عنه يوم ردت علي لا مو علشانه بس اشياء كثيره ماتعجبني حاولت افهمها بس عجزت تشتكي من البيت من امها من ابوها من خوانها وتوصفهم انهم مايفهمون .. كلمتها عن تنظيف البيت قالت بالبدايه كنت انظف بعدين ماشفتهم يهتمون وتركت كل شي .. استاذي اشياء كثيره ببالها مادري احل اي مشكله فيهم .. بس حابه اسألك بخصوص اتخاذي قرار تكميل دراستها عندنا من غير مااقول لها الا وقت الاختبار هل هو صحيح او لا ؟ انا عارفه ان التغير الصحيح يكون من داخلها واقتناع بس انا بعد احتاج اعرف انسب طريقه اتعامل مع تصرفاتها ايش احياناً تنرفز طريقتها لما كنت عندهم بس عندنا انا انصدمت بتصرفاتها جداً خجوله تسمع الكلام الحاجات الي كانت ترفضها ببيتهم تسويها عندنا مادري كيف اشرح لك بس جد خايفه عليها من نفسها وابغاها تتغير ارجع اشكرك استاذي ع ردك .. |
ابنتي الكريمة
حتى تحضر هنا فلعلكِ تدفعينها للكتبة عبر تشجيعها على أنها تملك أسلوب للتعبير وأنك ترغبين أن تكتبي قصة حياتها وإجعليها تكتب كل شيء عن مشاعرها وأي حدثٍ أثر على نفسها وفلسفتها في الحياة لتخرج من الأفكار التي تختزنها ونطلع عليها ثم ضعيها هنا ونحللها ثم نتابع ثم أخبرك بالتمارين المطلوبة لك ولها. هدى الله الجميع ورزقنا وإياكم صحة النفس ووالبدن ووفقك الله على مشاعرك تجاهها. |
استاذي معاك افنان ..
تعبير بنت عمي كله خطا بصراحه انا اعترف اني جدا عصبيه ولا احب الازعاج ولا احد يحوس ويوسخ الغرفه ولا يفهمون انا ماعندي غير الاب اجلس عليه يونسني وهو النقطه الوحيده اللي توصلني لصديقاتي فجاه يتصلون ويقولون افتحي الااب وفشله اقولهم مسوين حصار ع الاب ولا افتحه غير بالملعنه وهي ملقوفه راحت وغيرة الرمز المفروض ماتغيره ولا تقربه مع العلم الوالده هي اللي علمتني الرمز بارادتها اما عن المدرسه بجد كرهتها ولا احب حتى الطاري لانه ينرفزني ولا فكرت ارجع للمدرسه مهما كان الثمن وممكن اسوي اي شي بدون مااستغرب من نفسي بس |
السسسلام عليييكم ورحمة الله وبركاته ..
كل عام وانتم بخير وعساكم من عواده ع الخير والطاعه يارب.. اساتذتي اعلم بأشغالكم والعذر لكم .. انا بنتظار استفيد من علمكم .. وجزاكم الله خير .. |
ابنتي الكريمة أفنان:
كل عام وأنتم بخير 1- في البداية الشكر لله ثم لابنة عمك على حرصها ومبادرتها طلب النصح من أجلك وليست ملزمة بذلك . 2- دورانك على كلمة أنا يجعلك تقعين في أمور خير صحيحه وهي رؤية ما تحبين وتكرهين فقط دون الالتفات لما يحب ويكره غيرك وهذا يجعلهم يفعلك لك كما تفعلين ولو أمتدت تعاملاتك بمدارات ما يحبون وما يكرهون لفعلوا مثلك. 3- العصبية والدوران على محور أنا يجعلان أفق نظرتك للحياة ضيقهة جدا فيفوت عليك مصالح كثيرة لو رفعت مدى رؤيتك لمن حولك. 4- آخر جملة كتبتيها (وممكن اسوي اي شي بدون مااستغرب من نفسي بس) يدل على عدم قيادتك لعقلة بشكل متوازن وسليم بل تعيشين على ردود أفعال وأفعال غير مدروسة تحقق التوازن المنطقي لك فيما يفيدك ويفيد الآخرين. بعد مناقشتك لكلامي نتابع بإذن الله . |
وانت بخير وصحه وسلامه
بصراحهـ عقلي مخربط مره ولا استوعب شي صدقت ماعلي من احد اللي اشوفه صح اسويه واحيانا اسوي اشياء تظرني بس معاندة للي قدامي اصر ع موقفي تقدر تقول صايره طايشه اكثر من قبل |
استاذي الفاضل
شاكره لك تواجدك مع علمي بأنشغالك جزاك ربي خير الجزاء .. حبيت اضيف للموضوع ان عمي سافر وأفنان جلست عندنا بس الله وحده يعلم متى ترجع لمدينتها .. هي الآن تتابع معاك وانا مرتاحه لوجودها هنا .. * |
| الساعة الآن 02:32 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©