|
محتاجه نصيحتكم,,ابغى اعيش مطمئنه
السلام عليكم ورحمة الله وبركاته
انا مطلقه من خمس اشهر الحمد لله راضيه باللي كتبه ربي وكان الطلاق بعد استخاره وقناعه مو ندمانه عليه بالعكس حياتي الحين افضل بكثير اللي شايله همه اولادي وتربيتهم بس ربي كريم عطاني اب وام من احن الناس علي وعلى اولادي وابوهم كمان مع زيارته البسيطه والقليله لهم الاانه يحبهم وانا دايما اذكرهم فيه واحببهم فيه مشكلتي او بالاحرى مشكلتين ابي نصيحتكم فيها الاولى اولادي 3 اعمارهم بنت 8سنوات ولد 7 سنوات وبنت سنتين ونص اولادي مايدرون عن طلاقنا وماني قادره اقول لهم اي شي بنتي الكبيره البنات فالمدرسه قالوا لها ابوك طلق امك وقالت لا بابا بيشتري بيت وياخذنا سألتني مو صح ماطلقك ياماما ماقدرت اجاوب خنقتني العبره وقلت ايوه محتاره كيف اتصرف معاهم ثاني مشكله تقدم لي شخص كان متقدم لي قبل زواجي واللي اعرفه من اهله انه مانساني وانه يبيني وشاريني انا وعيالي في البدايه كنت خايفه بس لما جاء وتكلم مع ابوي كان كلامه مريح جدا هذا الكلام من اسبوع والمفروض الخميس يجي للملكه صليت استخاره وارتحت له كثير المشكله من يومين دق على ابوي وقال ضروفي ماتسمح لي واعتذر منه وماقال الاسباب المشكله انا احس اني تعلقت فيه وافكر فيه على طول انا ادري بحبه لي من زمان بس كنت متزوجه مااسمح لنفسي افكر فيه الحين صار واقع وبعدها اختفى تحطمت بصرااااحه كثير مدري ايش السبب اللي خلاه يتراجع ومدري كيف ارجع طبيعه ومافكر فيه صار عندي امل انه يرجع يطلبني ودايما ادعي اذا فيه خير لي يرده ربي واذا شر ينسيني اياه ابغى نصيحتكم كيف اقدر ابعد التفكير فيه وخاصه انه من قرايبنا ودايما بسمع سيرته؟؟ |
السلام عليكم
ابنائك ضحيتك وضحية ابوهم والله يكون بعونهم ، ومادام تقولين ابوك وامك عليهم حنونين الحمدلله هذا شي طيب الشيء الآخر لابد ان تعترفين لهم وتخبريهم بموضوع الطلاق بالنسبه للرجل اللي تقدم لك ، ليس بوسعك سوا نسيان كل شيء فإن جاء للخطبه مره أخرى استخيري والامر راجع لك ، لكن اعتقد انه فكر قبل ان يقدم على الموضوع وتراجع لسبب ما أعانكِ الله |
لا حول ولاقوة الا بالله
تصدقين اختي من قلتي جاتك بنتك وسالتك انكم تطلقتو ( تاثرت وحمدت ربي اني ماطلقت زوجتي) يالله اش قد يتاثر الاطفال من سيرة الطلاق واحنا مو حاسين فيهم اختي مالك الا نسيان هالشخص واذا الله كاتب لك بيرجع لك او اساله العلي الكريم ان يعوضك بخير منهما التفتي لابنائك حاليا واشغلي نفسك بهم وفوضي امرك لربك اسال الله العلي القدير ان يكتب لك الخير والصلاح تقبلي تحياتي |
اقتباس:
فكرت اطلب من احد من عائلتي يبلغهم لاني لو قلتلهم بنفسي ماراح امسك دموعي وبيتاثرون بسببها وانا اهم شي عندي نفسيتهم ماابيها تتأثر جزاك الله خيراا على المرور اقتباس:
انا بالنسبه لي اعتبره رحمه لي من ربي لاني كنت اعيش الم نفسي مايعلم فيه الاربي ان شاء الله ربي يساعدني وانسى كل ماجاء في بالي استغفر بس غصب عني اتضايق ردك اشعرني ببعض الراحه اشكرك جزيلا على المرور |
أختي إذا هذا الشخص من قرايبكم يعني على قولتهم عارف البئر وغطائه وماتقدم إلا مقتنع وإذا على أعتذاره يمكن صحيح
وراح يرجع لك ثاني مرره وإذا ما رجع ثاني مره فتأكدي أن مجرى حياتك يسير كما كتب له في اللوح المحفوظ فاللهم لا إعتراض جميع الخلق راضين بحكم الخالق وأما مسئلة أطفالك فلحظت البكاء وتعب النفسيه عقبه وراح تعديها صارحيهم فالوضع راح يطول وافتراض انه تقدم لك الخاطب وطلبك وتم الزواج صدقيني راح تصعب عليك مصارحتهم أكثر يعني شيء لامحاله أخبارهم أسئل الله لك التوفيق لما فيه خير لك ولاتنسي صلاة الأستخاره في كل شيء ....شااااب |
هل هو اعتذار عن اتمام الزواج كله ؟؟؟
او اعتذار عن الموعد المحدد لوقت اخر ؟؟؟؟ اذا كان اعتذار عن اتمام الزواج اعتقد هناك تدخل خارجي افسد موضوع الزواج بطريقه او اخرى ؟؟؟ فيه احتمال اخرى ؟؟؟ انه قد تقدم لك ورفضتيه او حاول ورديتيه قبل زواجك وحاب يردها لك ...لكن خلي هذا السبب بعيد ان بعض الظن اثم ؟؟ اختي لو اجتمعت الأنس والجن على ان يضروك بشي لم يكتبه الله عليك لما استطاعوا لو اجتمعت الأنس والجن على ان ينفعوك بشي لم يكتبه الله لك لما استطاعوا نصيحه ؟؟؟ وكلي الله ولا تنتظرين شي وشغلي نفسك بتربيت اولادك لين الله يفرجها من عنده ولا تدورين وراه وتهينين نفسك اذا مكتوب راح يجي ...عليك بدعاء وكثر الأستغفار |
أختي شيليه من رأسك تماماً الرجل شكله حسبها واتضح انه غير قادر بالفعل ان يتزوجك
والرجل عندما يعتذر في مثل هذه الامور معناته انه غير راغب في الزواج وهي نزوة منه وراحت لما أصبحت الأمور جد .. وبعدين انتي استخرتي والله صرفه عنك لانه أعلم سبحانه بما يؤل اليه هذا الزواج .. الله يحفظك ويعوضك خيراً منه ... |
اقتباس:
اللي تقدم من قرايبنا ويعرف كل شي عني ان شاء الله تراجعه خير ليوبأّذن الله بحاول اصارح اولادي الله يعين اقتباس:
مشكوووره ع المروووور المشجع اقتباس:
انا مشكلتي مدري ليه مو قادره اشيليه يمكن لاني حسيت بالرحه بعد الاستخاره وانه انسان كفو الحمد لله على كل حاااال مشكووور على المرور |
اختي لدي فقط سؤال !!!!!
هل وصلت الأموربينك وبين طليقك الى درجة انكم لاتستطيعون العيش والاستمرارمع بعض .... خصوصا بعد مرور هذه العشرة الطويلة .. |
اقتباس:
بدت مشاكلي معاه من 5 سنوات فرق العمر بيني وبينه كبير انا الحين في 26 وهو في بداية ال50 تفكيرنا مختلف وحاجاتنا مختلفه ونضرتنا لكل الامور تختلف كثيرا بخيل في المشاعر وفي المصروف تحملت وعدم عدل بيني وبين زوجته رجل في هذا العمر من المفروض ان يكون العقل هو الراجح لديه ولكنه يجري وراء اهواءه وورا نساء لاادري ماذايريد منهم مع اننا زوجتان لاينقصنا شي من الجمال والمرح والنظافه صارحته في يوم بمشاكله وبان تصرفاته تغيضني فقال انه يشعر بأنه مدمن على المكالمات من قبل ان يتزوجني تحملت وطلبته منه ان تكون علاقتي معه كما عشيقين اذا اراد مكالمة احداهن يتصل بي وانا احادثه بما يريد بعيدا عن احاديث البيت والاولاد,,,لكن اتضح لي انه يلعب بي ولايريد الصلاح تحملت من اجل اطفالي كانت حياتي لاتطاق ولكن من اجلهم كنت ساصبر العمر كله مع اني وصلت لمرحلة الكره الشديد له ولنفسي بالقرب منه وكنت اعيش الم نفسي يومي وفي النهايه لمشكله بسيطه بينه وبين والدي طلقني سؤالك بسيط واجابتي طوووويله اعتبريها فضفضه من اخت لاختهاااا ,, واعذريني |
| الساعة الآن 05:10 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©