|
ماعاد للدنيا طعم زوجي دمرتني
السلام عليكم ورحمه الله وبركااته
احياانا الانسان من كثر الصدمات والتجريح والقهر تجيه حااله غريبه يصير يضحك بدال مايبكي ماادري وش اقرل ولا من وين ابتدي اعيش مع كائن حي غرريب الاطوار احيان اشك انه انسان لان الانسان يحس ويتأثر وهذا لايحس ولا يتأثر باللي حوله يجرح يغلط يهين يطنش وكل هالتصرفات مايسمح انها تصير له زهقت بتنفجر المراره وبولد والسبب نفسيتي الزفت احاول اعديها وعيت تعدي بقوولكم وفي ذمتكم ان كاني غلطانه تعلموني لو تسبوني وتمسحون فيني الارض بس ابي نصيحه صاادقه وحطو نفسكم مكااني ابي حل زهقت من عيشتي اااخر مستجداات حيااتي الزوجيه قبل العيد رفض يعطيني فلوس العيد طبعا طبيعي لانه دايم ينشف دمي وعقب يعطيني لما بقى يمكن 5 ايام اعطاني 1000 قال لك ولولدك قلت ماتكفي هذي لي انا بس ولدك ياما عطني زيها ولا انزل معي واشتري له انت وشوف كيف السوق والاسعار قاال لو نزلت والله ماشتري له الا من اردي محل احمدي ربك ودبري نفسك طبعا حقرته وقلت ليش احرق اعصابي بقضي لنفسي وغصباا عنه يقضي لولده اشتريت لنفسي وخلصت جيته قلت ابي فلوس لولدي رفض وجلس يقل ادبه ويتكلم كلام كله سب وانتي بزر وهمك المظاهر جرحني لدرجه جلست ادعي ربي اموت لو قبل لايدخل يوم العيد بدقيقه بغيت انجلط من الزعل يعني انسان ربي منعم عليه ويحرمني وانا مااطلبت شي صعب كل الناس تلبس بالعيد طبعا كان ماينام عندي قبل العيد باسبوع ينام عند ابوه لان زوجه ابوه مسافره يوم جاء اليوم اللي قبل عرفه وجت الساعه 10 بالليل قال يالله امشي قضي لولدك وداني خريص الوقت ضيق والمحلات بتقفل وكاان حووسه مره رحت ودمعتي علي خدي وكل مامسكت شي غالي قاال ووعععععع هذا ذوقك لو دريت مانزلت فيك السوق طبعا المقاسات مخلصه واللبش بايخ كل شي فوق بعض حتي راعين المحلات يقولون مره متاخرين انتن وبعضهم مارضو يطلعون مقاسات كانو بيقفلون اشتريت بدلتين اي كلام ب 400وطلعت رجعت البيت قستها علي ولدي وحده كبيره مره ووحده صغيره اول ماشفتهم علي ولدي انهرت من الصياح فصختهم وحطيتهم بالكيس قلت رجعهم بكره وولدي ورب البيت مايعيد عندك الا اذا انا بنت حراام حسيت من وجهه انه حس انه ظلمني سكت وطلع دقيت عليه الصباح عشان اصلح ضرسي وداني ورجعت للبيت كان يوم عرفه وصايمه وتعبانه رجعني قال اطلعي مع السواق بدلي ملابس ولدك وعطاني 500 قال هذي مصروفك للعيد انتي وولدك حفايظ حليب اي شي تبونه ان شريتي فيها لبس له تري ماراح اعطيكم مصروف وانتي حره شوفي وش الاهم بالنسبه لك سفهته ورجعت لبس ولدي وطلعت لغرناطه واشتريت لبس البرد وخلصت كل الفلوس كان بإمكاني ابقي فلوس بس حطيته عناد له ولانه معطي عياله وحريم عياله وكلهم مقضين من اسبوعين الا انا خلاني اتسحب بالسوق حامل وصاايم مارحمني قلت والله لاقهره رجعت مامعاي ولا ريال بس ماهمني يوم جاء العيد وزع علينا 100 انا وحرمته وعياله وحريم عياله طبعا يفترض احاسبه علي اسلوبه معي وهوااشه بس قلت كبري راسك وخلاص اشتريتي لولدك وانتهت السالفه طبعا عندي شغاله بالشهر وكل شوي يحاول يطفشها ويهزئني عشانها بس انا سااكته هو جايب لحرمته شغاله وانا من يوم تزوجته وهو مقدم لي بس مابعد جت طبعاا يكذب وانا قلت له كذا مره ورني اوراقها ويجلس يصارخ ليش انا كذاب وش شايفتني مراهق قلت بالطقاق لاجت تجي امشي الي بالشهر بس لايمكن امشيها بدون شغاله طبعا شغاله حرمته سريلانكيه تهبل قال انا قلت لها تجيب وحده من جماعتها ومشي انتي اللي عندك قلت لارحت المطار واستلمت شغاله ودخلت بيتي امشي شغالتي حسيته حقد علي قلت وبعدين انت تقول مقدم لي ليش تجيب وحده ثانيه انقهر عرف اني فاهمه كذبه الزبده قال لافتحت المكاتب بطلع فيزا ونجيب اخت هالشغاله طبعا انا مره فرحت مع العلم ادري بيماطل بس قلت بزن عليه وبقول للشغاله تزن عليه وتقول مانيب جالسه الا لاجت قريبتي واتفقت مع حرمته انها تساعدني بكذا طبعا ماقصرت قالت له وجلست اظغط عليه واقوله اريح من اللي بالشهر ومن هالكلام طبعا جتني اليوم الطامه لي يومين مريضه وعند اهلي واليوم تدق علي زوجه ولده وهي مررره مغروره وتكرهني استغربت قلت معقول بتتطمن علي مارديت ويوم جيت بيتي قال دقت عليك فلانه قلت ايه بس مارديت قال ليش ماكلمتيها قلت الحين ادق عليها ليش وش صااير؟ قال حامل ومعها نزيف والمشيمه نازله عندها ومانعينها من الحركه وابيك تدورين لها شغاله بالشهر بااي سعر ضعيفه تعبانه وعيب علينا نخليها تروح لبيت اهلها وخلي الشغاله تجي من بكره طبعا نزل كلامه زي الصااعقه علي بولدي كنت حامل بعد زواجي ب 4 شهور وجاني نزيف وتوني عروسه نطلني عند اهلي لحد الشهر السادس وجلس كل مره يجي يقول بجيب لك شغاله وكله كذب وبحملي هذا تعبانه وولدي صغير وعندي فقر دم حاد وحصواات بالمراره جننتني ويقول ماانتي محتاجه شغاله وبيتي دور وكله سراميك وزوجه ولده بيتها شقه غرفتين وصاله وبنتها عمرها 5 سنين وبيتها مفروش وعمتها اللي هي زوجه زوجي تطلع لها الاكل والشغاله تقصص لها الخضار والبصل وكل شي وتحطه بالفريزر يعني لو طبخت التعب ع القدر طبعا هي شخصيتها قويه وتعلم اهلها بكل شي وهذا اللي خلاه يفكر يجيب لها شغاله لانه خايف تفضحهم طبعا كل هذا وماقلت شي دقيت عليها وتحمدت لها بالسلامه وعطيتها ارقام الشغالات اخذت شوي قلت بذكره بموضوع شغالاتي قلت الله يعافيك خلص لي موضوع الشغاله قبل اولد ولا تروح علينا قال ايه صح انا كلمت فلان يقصد ولده اللي حرمته حامل وقلت بكره تطلع الفيزا عشان نرسلها من الفرحه طمرت وحبيت راسه قلت الله يطول في عمرك مااقصرت وجلس يضحك انصدمت منه قال لاتشققين ماهي لك لزوجته هم اكثر حاجه منك وانتي شغالتك بالطريق بس هم مستعجلين بغيت اموت مااتكلمت ولاحرف ولابكيت بس احس ان قلبي وعقلي منهارين انهيار تااام هالحين هو نام وانا احس ان روحي بتطلع مو مصدقه الموقف نفسي اقتله ولاراح تبرد حرتي تكفون وش اسوي كلهم يدرون انه واعدني وهالحين بيعطيها لزوجه ولده ماهي اول مره يسويها فيني قد وعدني بشغاله اندنوسيه ورحت معاه للمطار واخذها ونزلها عند امه ولازعلت قلت اكيد بيفضل امه علي بس هالحين وش عذره قسم بالله افكر انحاش لبيت اهلي زهقت منه* |
أقول ياأخت وحدانيه الله يكفيك شر نفسك زهقتي منه عشان شغاله مو قالك خلاص بيجيب لك ولا همك كلام الناس وخلاص؟؟ بصراحه ولا تزعلين مني وين حسن التبعل؟؟ مرررررره تعاندين بشكل مرعب يعني كل سالفتك في هذا الموضوع فلوس العيد وملابس وشغاله وكلهم عارفين وهمك الناس ومدري ايش انتي عايشه للدنيا بس ولا كيف؟؟؟ وكمان مافي طريقه أفضل من الصراخ والدموع والدعاوي على نفسك عشان تاخذين اللي تبينه وبعدين تعالي..... يعني اللي تطلع شي عن زوجها وأهله عند أهلها وتفضح فيهم هذي شطاره وصارو خايفين منها؟؟!!! وأشوف الفكره عجبتك وودك تنحاشين وتكملينها ياختي هذي أقل شي اغتابتهم والغيبة معروف وضعها والله لو تحب السماء والأرض سوا ما ينمحي هالذنب أبد لحد ما تعتذر منهم وتقول أنا قلت فيكم كيت وكيت وهم بعدين يشوفون الوضع يسامحون ولا يقتصون منها يوم القيامة والله على بالي زوجك سكير ولا راعي مخدرات ولا ماسح فيكم أرض بيتكم من كثر الضرب ولا ما يصلي ولا منحرف أخلاقياً ياختي روعتيني من مقدمتك لدرجة اني أقول الله يعينها على بلواها وآخر شي رافعه ضغطك عشان شغاله يابنتي كبررري عقلك قالك بجيب لك وانتهت السالفه الله يكفيك شر نفسك وبسسسسسسسس |
طيب ليش ما تقولي لأهلك ؟؟؟؟ يمكن يخاف ينفضح عندهم |
خيتو وحدانيه هدي الوضع شوي مافي اي كلام سلبي عن زوجك بين اسطرك
ولاكن انتي تتعبي نفسك ويمكن بسبب الحمل وتعبك تزيد همومك الحيآه حلوه عيشيها عيشي ايامك لاتشغلي نفسك في فلانه عندها وانا ماعندي فلانه جابت شي وانا لا كذا الحيآة ماتمشي ماشاء الله لاقوة الا بالله عايشه في بيت وشغاله بالشهر وفلوس يعطيك وش باقي تبغين أحمدي الله شوفي من هو ادنئ منك .. قال تعالى: (لَئِنْ شَكَرْتُمْ لَأَزِيدَنَّكُمْ ) دمتي بحب وسعادة.. |
الله يسعدكم وشااكره لكم
يابنات افهموني تكفوون كل شي يوعدني فيه يخلفه ويحققه لغيري والله مقهوره ليه يوم حملي الاول وهو مقتدر وانا لسه عروس رماني عند اهلي وكذب علي انه بيجيب لي شغاله وكان معي نزيف ولاهمه وهالحين بحملي الثاني مررره تعباانه ودايم يعايرني بموضوع الشغاله كل من شاف معي شغاله يحسبها جت بطيب خااطر منه والله انه يكرهني فيها كل ثانيه كل شوي اجيب وحده جديده ولدي تعقد مت كثر ماتدخل علينا اشكال غير واقوله هالشغالات بس فلوس ع الفاضي جيب وحده علي كفالتنا وياليته يقول لا المصيبه يقول انا مقدم وهو يكذب وهالحين زوجه ولده قليله ادب معاهم وبنتها كبيره وبيتها صغير وتوها بدايه حملها وساكنه فوق زوجته يعني حتي لو ماجتها شغاله يقدرون يطلعوون لها شغالتهم تساعدها ودايم يوفرون لها كل شي مااحسدتها بكيفها يجيب لها بالشهر بس ليه الشغاله اللي وعدني فيها بيعطيها لها وبعدين مو ضروري زوجي يصير زاني ولا يضرب ولا مايصلي عشان اشتكي منه انا بشر ولي احساس واتأثر بتصرفاته البايخه واكره صفه الكذب وتدمرني الوعود المزيفه ياااربي سااعدني وهون علي |
يا جماعة الأخت معاها حق .. لازم تتنازل وتسكت عن شي من حقها .. وخصوصاً أنه مأمنه لزوجته الأولى .. وبيأمنه لزوجة ابنه .. طيب الأولى يأمنه لزوجته .. هي حرة تتنازل عن حقها ولا لأ ... ولا يعني إذا في مشاكل أكبر من مشكلتها أنها ما لها حق !! صحيح يمكن لو كنت مكانها ما كنت تدايقت مثلها .. لكن أرى أنه من حقها تتدايق من تخاذل زوجها عن شيء هو من حقها أصلاً ... لكن ما جاوبتيني أختي .. إذا هذا الشيء مضايقك لهذا الحد ... ليش ما تقولي لأخوك مثلاً يكلمه بهدوء ؟؟ |
استخدمي اسلوب اللطف معه يمكن باللين يلبي مطالبك
شوفي كيف اسلوبهم معاه وكيف يلبي مطالبهم |
مانبيها تتنازل عن حقوقها لكن ودي انها تريح نفسها من هالهم كل شي ملحوق عليه في الدنيا واللي مايجي اليوم بيجي بكره وإذا مانفع مع زوجها وكان عنيد وراحت الشغاله لزوجة ابنه وش تسوي تحرق في دمها زياده وبعدين معاها وقت من هنا لحد ماتجي وشوفوا كم بتاخذ ويمكن كم أسبوع ويمديها في هالفترة تتحرك باسلوب وطريقه تنفعها ما تضرها لكن تفكر انها تطلع من بيتها عشان شغاله !!! فهذا مش طبيعي أبداً |
الله أكبر الدنيا بكبرها صار ما لها طعم عشان شغالة وأمور تافهه !! كبري عقلك حبيبتي |
ياشيخة والله انك عايشة في نعمة زوجك بيعطيك الالف عشان لبسة العيد بس ومو عاجبك
طيب في بيت اهلك بتشوفيهم هالالف ؟؟ لاتزعلي مني بس احس انك عايشة وسط بيئة مليان كيد ونكد وسطحية .. يا اختي وسعي المدارك شوية حتى تكسبي صحتك وتكسبي زوجك وتعرفي تربي ولدك كمان معليش الشغالة مصيرها تجيك وانت عندك هالحين شغالة يعني مو انك تعبانة من شغل البيت ومنكسر ظهرك من الكرف ..حنقك الشديد سببه المقارنة الي عاقدتها في راسك مع زوجته وعياله وحريم عياله استعيذي بالله من الشيطان ربي يصلحنا واياك |
| الساعة الآن 02:18 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©