كنت اتمنى حل المشكله بخصوص جلوسي مع اهلي اكثر من جلوسي مع اصدقائي
 

السلام عليكم ورحمة الله وبركاته
بسم الله والصلاه والسلام على نبينا محمد وعلى اله وصحبه اجمعين
اتمنى انكم بخير جميعا اخواني واخواتي الكرام

عندي مشكله كنت اتمنى اني اناقشها معكم قبل ان تقع لكن ماحصلت فرصه واليوم حدثت المشكله
مشكلتي اني اغلب وقت في العمل ومع اصدقائي ومع نفسي في غرفتي الخاصه يعني جلسي مع افراد اسرتي قليله
صراحه اتمنى اني اجلس معهم اكثر الاوقات احينا تحصل فرص اصير جالس معهم بدون ابوي الله يحفضه
واحس بمتعه واحس اني انبسط معهم لما نتبادل اطراف الحديث ونضحك سوا لكن
المشكله اضن فيهم
اول شي اخوي الكبير علاقتي فيه ربما اقولكم 98%رسميه واحس اني كذا مبسوط
اخواتي اغلب الايام اجي القاهم مع الوالده الله يحفضها يكونون داخلين في حوار مع بعض ومندمجين معه وعلى قولتنا يسولفون سواليف حريم بس اصير جالس اناضرهم ولا اقدر ادحل معهم في الحوار انتضر انتضر يمكن اقدر ادخل معهم في سالفه ولا جدوى امل واروح يابغرفتي ولا عند احد اصدقائي واجلس عنده الين قبل وقت نومي شوي وارجع البيت اسلم على اهلي وانام
بنسبه لبوي الله يحفضه امنيه اني اجلس معه اسولف لكن احينا اجلس معه اقوله كلام يرد على على قد سؤالي ويسكت انا اسكت لاني احس اني ازعجه واروح واحينا هذا شي يضايقني جدا نطلع انا وياه مشوار طويل نضل ساكتين احينا يصير في فرص احسه ينبسط مني لما اسولف معه سوالف جاده واقوله والله ابوي انا بشاورك بشي ولا عندي لك راي بموضوع يخصك احس انه ينبسط مني من نضراته طبعا ولله الحمد علاقتي بأهلي فوق ممتازه ماشاء الله ولله الحمد ماقصر معهم بأي شي ودائمن ابديهم على نفسي وهم كذالك بس المشكله في جلوسي معهم
اليوم وقعت مشكله سببها استغفر الله اني ماصليت الجمعه في المسجد جاني ابوي في الغرفه وشافني نايم بعد الصلاه قومني وقال ماصليت انا سكت عصب علي وطلع كل الي مجمعه علي قال انت ليه ماتصلي الجمعه في المسجد ليه كذا وكان ربما هذا اليوم الي راحت علي نومه ولا دائمن اصليها في المسجد وقلي ايضن انت وش فيك دايم دايم طالع ماتجلس معنا ولا تتغدا معنا ولا تتعشا كنك غريب في البيت ليه كذا طبعا كان يقولها وهو يصرخ علي قلت اسف ان شاء الله راح انضبط راح وخلاني المهم رحت له اراضيه قال لاتسلم علي لين اشوفك تصلي الجمعه في المسجد قلت له ابسلم عليك وان شاء الله بصير اصلي الجمعه في المسجد قالي ماشي قلت سامحني ترا انا ماهمني الا رضا الله ورضاكم قال طيب سامحتك
ربما هذ فضفضه من عندي انا ابي القا حل وسط بين اصدقائي واهلي
على فكره عمري 23 عازب
وسلامتكم
وجزاكم الله خير
وصلى الله وسلم على نبينا محمد
والسلام عليكم ورحمة الله وبركاته
..
..
.

اهلا بك ياخي
ارى مافيه مشكلة اصلا ، عادي دامك عزابي ، اغلب الشباب الي بعمرك كذا ،
طيب اخوك الكبير معك رسمي والام والاخوات مع بعض ولا تجوزلك سوالف الحريم
والوالد الله يخليه لكم مهوب راعي سوالف ، طيب انت وش بتسوي يعني عادي اجلس بغرفتك
تسدح بالصاله يمكن يحسون فيك ، لانهم مايدرون ان عندك مشكلة .
لكن صلاة الجمعه توفتها صعبه ومن حق ابوك يزعل ويعصب ويطلع الي بقلبه .
اجلس مع الوالده كثير سولف عليها . والله يوفقك .

جزاك الله خير على النصيحه
ننتضر اراء الاخوان والاخوات

المشكله فيك وانا اخوك
والدليل انك عصبت ابوك انك ماتصلي
ترى الاب يسامح في اي شي الا ترك الصلاه
حافظ على صلاتك في المسجد ومع ابوك وألأوقات اللي تجلس فيها مع اصحابك
خلك مع ابوك وخاوه وتعلم منه وخذ علومه
بكره بيجي يوم تتمنى تبوس ألأرض اللي يمشي عليها
ونفس الكلام ينطبق على امك


وفقك الله

Beta2

متى الوقت اللي تجتمع فيه العائلة كلها مع بعض ؟
غالبا بعد المغرب.لكن تقريبا يمكن الساعه 10.30اليل بدون الوالد

كيف علاقة أخوك بالعائلة ؟؟ وموقف والدك منه ؟
يعني علاقته ممتازه ويقوم بمتطلباتهم على اكمل وجه

تشتغل وللا تدرس ؟؟
انا اشتغل

شنو المواضيع اللي تثير اهتمام والدك .. ما هو مجال اهتمامه ؟ ديني ؟ سياسي ؟ اقتصادي
غالبا الوالد صامت ولا لاحظت عليه سي يميل له


..................

جزاك الله خير والله يجعله في موازين حسانتك الكلام هذا
لكن انا اصلي ولله الحمد ومواضب على صلاتي بس هي يوم واحد الي تقريبا ماصليت في الجمعه في المسجد صليتها في البيت لانها راحت علي نومه
والله انا اسعى لكن مالقا قبول من الوالد يعني لما اتكلم معه يجاوبني على قد سؤالي احيانا اطلع معه مشاوير استفيد منه حفظه الله وكل مسلم
انا الوالده حفظها الله وكل مسلم فعلاقتي معها فوق الممتازه ولله الحمد

في البدايه اخوي الغالي Beta2اشكرك كل الشكر على اهتمامك ومتابعتك لموضوعي اسأل الله ان يجعله في ميزان حسناتك
صراحه خطواتك ربما اقولك انها كانك رايحه عن بالي ربما تكسر بعض من الحواجز والرسيمه الي نوعا ما بيني وبين ابوي
صراحه فكره حلوه بس اتمنى انها تجيب فايده اتمنى صراحه اني اكون مع الوالد نسولف ونضحك ونتشاور في مواضيع ,
تصير احيانا كذا نسولف واشاوره ويشاورني بس يمكن يصير الشي ذا مرررررررررره قلللليييل بس احس بوقتها متعه وسعاده
الله يوفقك لما يحب ويرضا واسأل الله العضيم ان يستخدمنا فيما يحب ويرضا وان يضلنا بضله يوم لا ضله وان يدخلنا جنة الفردوس الاعلى وكل مسلم

ولا نستغني من ارائكم وتوجيهاتكم اخواني واخواتي الكرام

ماعندك مشاكل
الوالد من النوع اللي مايتكلم كثيير وواضح ان فيه فارق في العمر حاول تتحاور وياه عن البرامج في التلفزيون او احداث 2011 ما اعتقد ان حوارها بيخلص او الحوادث اللي صايرة اليوم اي شي احكوا فيه

روتينك اليومي
ضروري يترتب _ وقت للعمل _وقت للاهل _وقت للاصحاب اذا كانوا غير اصحاب العمل طبعا _ وقت للنوم
وجبة الغداء والعشاء ضروري تكون مع الاهل حدد يوم او يومين يكون مع الاصحاب
بكذا يكونوا راضين ومبسوطين منك وانت كمان راضي عن نفسك

ربي يوفقك