|
فتحت جوال زوجتي لقيتها حاطة اسمي ....... اخ ياقهر
بسم الله الرحمن الرحمن الرحيم
السلام عليكم ورحمة الله وبركاته ،،،، تحيه طيبة وبعد لك الحاضرين والزائرين ،،،، لي موضوع هنا كتبته عنوانه ( ليش المرأة اطول نفس من الرجل اذا تخاصموا ) انا ماجبت الكلام هذا من فراغ لاني انا والمدام متخاصمين ولا عندها طاري تراضي . طيب زعلانه براحتها لا تراضيني ولا اراضيها ، لانها هي الغلطانه وراضيتها ورفضت . لكن اليوم بالصدفة افتح جوالها احصلها مسجله لقبي ب ( الخواف من خته ...... ) عصبت وتنرفزت مرة وقعدت الجوال - وانا ماغيرت اسمها وحطلها احسن وصف ولا طاوعني قلبي اغيره حتى لو هي زعلانه او غيرت لقبي . طبعا ما بنكلم بعض لنا مدة ، كانت في غرفة اخرى واول ماشتفها ماتمالكت اعصابي وتكلمت عليها بدون سب او غط , انها راح تندم ، واني بنتقم منها واقهرها قهر ، وماردت علي ولا بكلمه . وطلعت من البيت معصب وما بردت حرتي وارسل لها على الجوال رسائل تهديد بالانتقام . طبعا هي من النوع الي عصبي مرة ، عكسي بالتمام ، وهذا الشي الي يرفع ضغطه مرة . بالله وش اسوي معها الان مو راضيه ترضى ولا ترضيني وصعب اسوي الي براسها . الله يهديها بس ، ودي اتزوج او اخطب بس علشان تموت قهر :17: وش رايكم وش السواة . |
اخي العزيز تو الناس
انت ماغيرت اسمها ولكن هي غيرت اسمك لمذا ذكرت لكل شخص طريقته الخاصة بتفريغ غضبه ليس من حقك ان تفرض عليها طريقتك ! ما وضحت تفاصيل المشكلة كاملة تقول صعب اسوي الي براسها، هو قد يكون بعينك صعب لكنه بشكل عام سهل لو انك سهلته على نفسك عموما شي اقوله لك اتمنى تستفيد منه بحياتك : اسهل طريقة لحل المشاكل وتصفية الخلافات هي الاعتراف بالخطا وليس التهرب منه يعني لك كلامي شي ؟ |
وعليكم السلام ورحمة الله وبركاته ... بصراحة أنا ماأؤيد المناقر بهالطريقة ..
إذا هي طريقتها كذا معليش خلك أنت أحسن ... وأنصحك بالسكوت والهدؤ ريثما تهدأ الأوضاع ... والإنتقام مايكون بين الأزواج !!!!!!!!!!!! أنتم متزاعلين من قبل بغض النظر عن سالفة إسمك بجوالها !! فما نقدر نوقف بصفك لين نعرف جوانب المشكلة الأولى ممكن معها حق بزعلها وممكن لا !!! أنصحك بالتعوذ من ابليس بس تهدأ الأمور تناقشوا بهدؤ ... إختاروا مكان مناسب ووقت حلو للمناقشة والتفاهم وربي يهدي سركم ويوفقكم ... تحياتي .. |
لماذا لا تفترض أن الخطأ منـك ...
هل يصدق عليك هذا الوصف "الخوّاف من أختـه" ... وكـن صريحاً مع نفسك قبل الآخريـن .. هل تسمح لأهلك بالتدخل في حياتك ؟! |
تتزوج عشان سبب زي هذا؟؟
بنات الناس مو لعبه الله يهديك مو تجلس معها شهرين بعدين تردها لاهلها خافوا الله في الحريم |
اقتباس:
اسمح لي أخوي بعد إذنك بعقب على كلامك ... خلكم واقعيين شووي معليش ممكن أخونا تو الناس غلطان لكن حنا مانعرف القصة فكلامنا مجرد احتمالات !!! لكن الشئ الأكيد إن فيه ((بعض )) الحريم تبي تتحكم بزوجها !! واذا رفض أي شئ قالت أنت خواف أنت جبان أنت مو زي فلان رجل أختي ولازي علان زوج جارتي ... بسبب إنه بس رفض طلب واحد .. أنا مااقصد قصة تو الناس أنا أتكلم بشكل عام ... فلابد من الموضوعية في معالجة مثل هالأمر ... إما أن الأخ تو الناس يشرح لنا الموضوع من الأول وممكن نساعده لأن الزعل الأول هو مصدر مشكلة الإسم ... أو مالنا إلا ندعي لهم بالهداية !! |
:* والله أفتكرتها مسجلة أسمك (آخ يالقهر..):d قلت لهدرجة مجرم حرب..؟! :* لي عودة بس حاول توضح لنا أسباب الزعل إذا ماهي مررة خاصة لأننا بها الشكل ماندري من الظالم ومن المظلوم :* |
اقتباس:
حلو كلام سليم ( اسهل طريقة لحل المشاكل وتصفية الخلافات هي الاعتراف بالخطا وليس التهرب منه ) اكيد يعني لي الكثير وبناقش بهدوء . طيب انا ما أخطأت علشان اعترف بالخطاء ، لذلك ماتهربت . بقول المشكله وانتم الحكم هل انا على خطاء ام هي . المشكله بدأت عندما اتت شقيقتي مع اولادها واكبر مني لزيارة الوالده وطلبت مني ان اوصلها الى محل ملابس قريب من المنزل لشراء بعض حاجات العيد لان الموضوع هذا حصل قبل العيد باسبوع تقريبا . فقلت لولدي او صل عمتك لاني عجزان اروح ، راح شغل ابني السيارة لتوصيل عمته للسوق . فاتصلت المدام تسال ليش الولد شغل السيارة رديت ببراءة بانه سوف يوصل عمته . فجأة صرخت وعصبت وقعدت تتوعد وتنافخ وتزابد ، رحت للبيت وقلتلها سلامت يام الشباب وش السالفه وش صاير بالدنيا قابة ومولعة نار . قالت لا ياشيخ كاني مادري ، ليش تخلي ابني يوصل اختك للسوق ليش ما ستأذنت مني مهوب على كيفك هي وكالة من غير بواب يا خوية دهدي - قلبنا فلم مصري ههههها وتهاوشنا هوشة كبيرة وحضرت بنتنا وفكتنا وقعدت تبكي وحنا متماسكين بالشوش . اختي بالسوق ماتدري يوم خلصت اتصلت على ابني يجيبها وقالت له امه ماتروح ولا تجيب عمتك . جيت انا بروح اجيب اختي ورفضت وقالت اختك ماتركب سيارتنا ، ما طوعتها رحت وجبت اختي لكن ياقلبي اختي كانت حاسة ان فيه شي والوالده سمعت اصواتنا ولجتنا . وهذي المشكلة الي انا بريئ منها برائة الذيب من دم يوسف . هل انا غلطان ياربي . |
اقتباس:
بعد قراءة القصة ... أرى إنك مو غلطان بردة فعلك ... وزوجتك (( ربما )) يكون بينها وبين أختك مشاكل حريم ... ومناقر ... لكن مالها حق تخلي مناقرها مع أختك يؤثر على علاقتك مع أختك أو علاقة إبنها بعمته !! المفروض تفصل بين مشاكلها مع أختك وبين حياتها معك ... الله يهدي سركم .... الله يوفقكم ويسعدكم ... لازم تقعد معها وتفهم منها ليش ماتبيكم تودون العمة !! ولازم تفهما مهما كانت بينها وبين أختك مشاكل لازم يكون هناك فاااصل .. تحياتي ... |
أكيد في سبب يخلي زوجتك متضايقة من أختك لهالدرجة ؟؟ موقفها مو طبيعي
يا ليت تقول القصة كاملة مرة واحده ... مو ضروري حلقات |
| الساعة الآن 12:23 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©