|
ممكن حل لعصبيتي ونظامي الزائد عن الحد ( رجل الرجال _ البليغ )
السلام عليكم ورحمة الله وبركاته
انا انسانه متزوجه عمري 28 وزجي 32 عندي طفلين 8 سنين و4 سنين مشكلتي عصبيه جدا ونظاميه جدا اتعب لما شي ما يمشي على النظام الي انا راسمته اعاقب اولادي كثير وغالبا الجأ للضرب واساس مشاكلي مع زوجي الاولاد من اسبوعين صار هو زي وضعي بس يخاصم ويضرب مررره استنكرت الوضع يعني حرام الوضوع الي هما فيه انا وابوهم ولدي الكبير عنده تأتأه يمكن من قسوتي عليه ما اعرف بس هو حساااااس مرررره الموضوع مو مرتب بس شي في خاطري ابغى اقوله |
ابنتي الكريمة :
إرحمي نفسك من نفسك وابحثي عن السبب الذي زرع فيك العصبية والنظامية الزايدة وأكتبي لي هنا كل موقف أثر في نفسيتك من الطفولة حتى الآن لنبحث معك فيما تفضفضين فيه ولا تهتمي لطول الكتابة ولا ألم استخراج ما في الذاكرة فقط أنثري ما يؤذيكي ويتعبك وأخرجيه هنا . ولي عودة بإذن الله. |
انا كنت انتقد على امي اشياء كثيرة ولا زلت
وللاسف انا زيها طبق الاصل في كل شي الوالد كان عصبي بس الان احسه اتغير كثير مو عصبي في معاملته معايه لا اشوفه مع اخواني الاولاد ما اعرف من وين ابدا او مين اتكلم احس الافكار كلها ضايعه في بالي |
بالنسبه للنظام في حياتي اتوتر من اتفه شي
لو الفرشه صارت مايله عن وضعها الطبيعي اتوتر واخاصم الاولاد عندي استعداد اشتغل ليل بنهار بس البيت ما يتوسخ تركت دراستي مع اني متفوقه جدا عشان ما ينقض شي على البيت وزوجي وولدي الاول ندمت مررره على هذا التصرف لاني ما حسيت ان احد قدر هذا التصرف حتى زوجي يقول هذا واجب عليك وكل امراه تضحي عشان بيتها وانا اشوف ان هو ما ساعدني عشان اكمل الدراسه انا ما احب اتكلم في موضوع الدراسه لاني احسه جرح كبيييير وانظلمت فيه بالنسبه للعصبيه ممكن لان امي كانت تعاملني بشده يعني اشياء كثيره كانت ممنوعه عليه مو زي باقي البنات وممكن شي وراثي |
ابنتي الكريمة :
ابدئي من الطفولة ما قبل المدرسه ثم مراحل التعليم وأكتبي المواقف التي مرت بك في كل مرحلة ومشاعرك تجاه كل موقف. ثم أكتبي نتائج ما توصلتي إليه بعد الكتابة. |
بحاول ان شاء الله اتذكر كل شي واكتبه
فيه شي ابغى اقوله انا اشيل هم كل حاجه لازم عليه انجازها حتى الصلاة والاذكار اشيل همها واتوتر لدرجة الصباح وقت الفطور ما ابغى الاولاد يتكلمون لحد اخلص الاذكار مع انه بامكاني ااجلها لحد يروحون المدارس |
او شي انا اخر العنقود
اخواتي الكبار اتزوجوا وانا لسى ما اتولدت ماعاد اخر وحده اتزوجت وانا عمري 4 سنين او اقل يعني كاني بنتهم مو اختهم ما عشت مع اخوات بنات ما كانت امي تسمحلي اختلط مع احد من البنات الا لازم بوجودها كنت داءما اقولها يارب تحملي ببنت وتولديها يكون عمرها على طول قدي احسن مكان كان بالنسبه ليه المدرسه وكنت متفوقه جدا من الاوائل دائما كانت اممي تتحكم في لبسي افتكر مرة وانا صغيره عمري 9 سنين خاصمتني لاني لابسه بيجامه لان البنطلون ممنوع عند امي وكانت تقارني بحرمة كبيرة متزوجه وعندها اطفال تقولي شوفي فلانه كيف سافرت برى مع زوجها ولسى متمسكة بحجابها وما لبست البنطلون وانتي فعلتي وفعلتي وانا صغيره عمري 9 سنين حتى غير مكلفه لسى كانت تختار الناس الي اجلس معاهم تقولي ليش مثلا تجلسين مع فلانه في المناسبات ليش ما تجلسين مع فلانه افتكر موقف كنت احب لبس معين وانا صغيره وما كان من الممنوعات فقط كان فيه الحزام الي يتثبت في الوسط ويجي على الظهر كان اللبس طويل وساتر ومن زمان انا نفسي فيه جابته ليه وحده من اخواتي وانا صغيره كمان يمكن 10 سنين او اقل وعجبني وفرحت فيه وحلفت انه يرجع لان الحمالات هذي زي فؤاد المهندس مالها داعي وبعد ما فرحت في اللبس رجعوه اخواتي لازم بعد اي جمعه اتهزأ على اي شي ليش قلتي هذا الكلام وليش فعلتي هذيك الحركة تنتقدني كثير صح من خوفها عليه بس امي اهم شي عندها كلام الناس لا احد يتكلم عليها ما اعرف هي كذا او لان ابويه اتزوج عليها في بداية حياتها قبل ما تخلف ( لانها اتاخرت في الانجاب ) وزوجةابويه شرانيه وقويه مع انهم عادي ساكنين مع بعض ويزروا بعض بشكل يومي صح فيه حزازيات وتحفظات بس عشان الحياة تمشي قلبي صار يعورني احس افتكرت اشياء كثيرة مررررة لو تسالني وانا اجاوب افضل واسفه لو طولت في الكلام |
مرحلة الابتدائي ما افتكر منها شي كثير
بس افتكر نقلنا من البيت لحي ثاني بعيد وطبعا نقلت من المدرسه في مدرستي القديمة كنت ارجع مشي وفي الجديده كانت لا بعيده لازم بالسياره كنت داااااااائما اتاخر واطلع اخر وحده على بال ما يخلص ابويه ويجي ياخذني مع العلم انه عمله حر يقدر يطلع في اي وقت ويقدر يحط سواق بجد هذي النقطه كانت تقهرني مررررررره المتوسطه كانت مرحله الطيش والنضج كره كنت كذا ومره كذا مرحلة الثانويه كانت احلى مراحل حياتي والى الان اقولهم لو اقدر ادفع فلوس وتنعاد ايام الثانوي مستعده ادفع انا عندي قناعه ان الي كانت تعمله امي في اغلب الاوقات صح ومن خوفها عليه وانا كمان نفس الشي اعمله في اولادي بس متأكده راح ياثر فيهم زي ما اثر عليه اتمنى اكون زي الامهات الي عندهم تبلد عادي اولادهم مو نظيفين عادي بيتها مو مرتب تاركين اولادهم على هواهم في الصح والغلط انا كل ما افتكر شي ادخل واكتب انتظر ردك |
في الانتظار
|
ابنتي الكريمة:
تابعي الكتابة وأجيبي على هذه الأسئلة 1- هل أنت مقتنعه من نفسك أو تابعه للوالده بدون إرادتك؟ 2- هل التنافس مع زوجة الوالدة أو الخوف من شرها أدى بالوالدة لما تفعل وسحبتك معاها؟ 3- هل تقيمين أن الوالده تبالغ أم هي الصح وغيرها الخطأ. 4- هل تملكين القدرة على التغيير والرغبة في ذلك؟ أم تشعرين بأنك اسيرة لما تفعلين؟ 5- هل جربتي التوازن في السلوك وردود الأفعال؟ |
| الساعة الآن 11:36 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©