باقي ع الوظيفه الجديده تكه ... دعواتكم
 

السلام عليكم يامعشر منتدى عالم الاسره

وش لونكم


كيف اموركم


كيفكم مع هالبرد ان شاء الله تدفون كويس


مالكم بالطويله


امس وانا في دوامي جاني اتصال من صديق واخ يقول لي ان فيه شركه فيها تقديم وظائف روح قدم
التقديم كان في فندق الانتر الجبيل الصناعيه
رحت الصباح اليوم الاحد الساعه 8 ولقيت امة لا اله الا الله
صفيت في الطابور
وشوي ولا احد المسؤلين قال بصوت عالي انهم مايبغون الا الخبرات وتخصصين فقط واقل خبره 5سنوات
ولله الحمد انا خبرتي 8 سنين عجاف
انسحب من الفندق نصف الموجودين لان ماتنطبق عليهم الشروط

سلمت اوراقي

نادو اسمي رحت لدور الاول
صاله مفتوحه حاطين بوفيه مفتوح افطار شي يفتح النفس والعالم تطحن طحن وبصراحه طحنت لي كم فطيره على كم توستايه مع شاي وشوي كوفي وشوي عصير ..... هو انا كول يوم بفطر ببلاش فرصه
انتظرت حول الساعه نادوني ثاني دخلت ع اللجنه تبع المقابله الشخصيه
مكونه من 3مهندسين خواجات + مهندس سعودي وكلهم مدراء اقسام

عاد انا عندي خبره في المقابلات الشخصيه

دخلت وسلمت بالعربي وصباح الخير بالافرنجي عشان اعطيهم الامان واعلمهم سلومنا

وكلهم وقفو صافحتهم فردا فردا وشديت يدي ع ايديهم .... والله الخواجات رصو يدي رص

بس والله سلامهم نشمي اذا مسك يدك وصافحك تحس انك تسلم ع رجال حي

مهوب بعض شبابنا الله يخلف يسلم عليك بأطراف اصابعه


المووووهم قالوا لي تفضل اجلس وقلت من بعدكم ولما جلسو جلست .... الادب يشر مني

عرفو ع انفسهم .... ولاثبت ولا اسم واحد منهم ابد

وعرفت على نفسي

طبعا كان معي في يدي ملف بلاستيك فيه اوراقي ماسكه بحنيه وحاضنه

الخواجات قالو بكل ادب بالافرنجي طبعا خذ راحتك وضع الملف ع الطاوله

قلت بكل خبث وبراءه مصطنعه : لالا ما ابغى اوراقي تضايقكم خلوها معي احسن

وكانت عندهم الـ cv تبعي قرأوها وسأووني


Speak for yourself
تحدث عن نفسك


سميت باسم الله وماخليت ولابقيت تكلمت لهم عن نفسي من بداية مولدي حتى دخولي للقاعه

والكلام يجر كلام والخواجات يستمعون بأهتمام وادب

ماعندهم انه يقاطعك او يعاندك مخليني ع راحتي

وسألوني كم سؤال

هل انت متزوج

لماذا تقدمت للانضمام لنا

لماذا تريد ترك عملك


جاوبتهم


وسألوني عن طبيعة عملي .... وجاوبت

وسألوني كم سؤال نسيتهم وانا دخلت في مواضيع يمين وشمال تكلمت عن ارتفاع الايجارات والسلع
وتكلمت عن هزيمة ريال مدريد امس ..... يعني لازم الواحد يخرج شوي عن الموضوع
وهم والله ماقصرو ياخذون ويعطون


سألوني ماذا ستقدم لنا لو انضممت الينا؟ او احنا وش راح نستفيد منك لما نوظفك
قلت جهدي وخبرتي ومثابرتي وانا متأكد ان الفائده بتكون لطرفين

آخر سؤال سألوني كان وش تتوقع نقبلك او نرفضك

قلت وانا اضحك بخبث اني خبره لايستهان بها ان قبلتوني فأنا كسبان
وقبولكم لي معناه حياه جديده وتحدي جديد وطموح جديد وتجربه جديده
وانا اعشق التغيير مثل رئيس الولايات المتحده اوباما كان شعاره للنتخابات الرئاسه التغيير
(بحكم ان الخواجات امريكان )

وان رفضتموني فأحترم قراركم وانا سعيد لاتي تشرفت بلقائكم واعتبرها دعوه للافطار والتعارف واعطيت كل واحد منهم كرتي الشخصي
فيه اسمي وارقامي ...... حركات يحبونها واعطيهم ع جوهم

قاموا وودعتهم وصافحتهم فردا فردا بنفس مابدأت به

وانا طالع واحد من الخواجات قال لي لاتروح انتظر ساعتين برى نونونو دقيقتين....

طلعت من القاعه وبعد دقيقتين او اقل ينادوني ويعطوني الموافقه النهائيه بقبولي وقدمو لي التبريكات

مابقى لي الا اوراق اخلصها من عملي السابق وفحص طبي واقدم استقالتي

عاد اليوم بروح اخلص اموري

دعواتكم لي بالتوفيق يا اخواني

الله يوفقك و يعطيك خيرها و يكفيك شرها و يجعلها فال خير لك

ألف ألف مبروك الله يوفقك وعقبال إن شاء الله الترقيات والفال الطيب يارب ...........شااااب

عالبركة ياخوي ..
الله يعطيك من خيرها ويكفيك شرها يارب ويوسع لك بالرزق ...

اختك ..

ألف مبـروك وتستـاهل كل خير ,,
في يوم رديت على موضوعي عن حياتك ووصفت نفسك ضائع ،،
ورديت عليك وقلت لك تفائـلو بالخير تجدوه ’’
شفت أن خير ربي بكل مكان بس ينقصنا التقاؤل ,,
موووفق يااارب بكل خطوه ,,

واياك ان شاء الله

لاهنت

الله يطول عمرك ويجزيك خير على هالدعوه