|
أحتاج مساعدتكم حتى استطيع الخروج من هذه الدوامه
السلام عليكم
انا ما سجلت في المنتدى الا يوم شفت ردودكم ونصايحكم واشهد الله اني اعتبركم اخواني وخواتي ومن جد محتاجه نصيحتكم وتوجيهكم انا من البدايه بعترف اني غلطانه من جميييع النواحي وكل غلطه اكبر من الثانيه بس ابي صبركم علي وارجوكم لا تحكمون علي من البدايه انا من جد انساااانه ضاااايعه واحتاج احد يشيلني من الضياع اللي انا فيه بقولكم قصتي او بالاحرى غلطاتي اول غلطه واكبرها اني عصيت ربي ومشيت بدرب غلط ويمكن كل اللي يصير لي لاني عصيته وانا استغفر ربي لكن اللي سويته مو شوي انا طلعت من اسره محافظه جدا جدا واخلاقي الحمدلله الكل كان يشهد لها وكنت سيده ماعندي يمين ولا يسار تعرفت على وحده من البنات ايام المدرسه والبنت جدا طيبه -عشان ماظلمها- وتطورت علاقتي وياها وصرنا قراب من بعض وكنت اوقات ادخل المسنجر -كنت ماعرف شي اسمه مسنجر بس سويت لي وكنت اكلم صديقاتي بس- ومره كنت اسولف معها ومتمللين قالت لي تعالي بدخلك مكان تستانسين وتغيرين جو وعادي ضحكي وسولفي بس لا تحبين حاولت فيني مره ومرتين لين الشيطان غلبني ودخلت معها الشات، مدري تسمونه غباء ولا طفوله ولا مدري ايش بس كنت ابي اكون محبوبه وعندي حياه مثل باقي البنات اول كنت ادخل واظل ساكته بعدين قمت اسولف وهي كانت تشجعني لين كلمني شخص قالي يبي يتعرف علي ودخل واسطات وكل شي بس يبي يكلمني وانا كلمت صديقتي قالت لي اي عادي كلميه بس لا تحبينه لا هو ولا غيره، كلمي اللي تبين بس لا تعورين قلبك معاهم المهم سوت لي ايميل ودخلت اكلمه والشاب كان بالبدايه محترم معي وكان يحسسني باهتمامه ويشكي لي واشكي له لان ظروفي وقتها كانت صعبه وكنت بأمس الحاجه لاحد يسمعني ويكون جنبي وصديقتي الله يسامحها بدل لا توقف معاي دلتني على طريق الخراب ، كان يسمعني ويوقف معي ويحسسني باهتمامه لين انا تعلقت شوي شوي تطورت العلاقه وبعدين صار يعرض علي يكلمني جوال وانا كنت ارفض لين رضخت له لاني خفت يتركني ، ما تتصورون شنو كنت اسوي عشان اكلمه ، الله يشهد علي كنت وقتها مو مرتاحه لاني ادري اني قاعده اخون اهلي بس استمريت معاه ، تطورت الامور وصار يفاتحني بأمور جنسيه وانا كنت اصد واقفل الجوال بعدين هو هددني اذا ما سمعته راح يتركني وانا رضخت له لاني كنت اخاف افقده لحد اليوم اللي اجبرني اسوي شي معاه بالجوال -استغفر الله- يشهد الله اني ماكنت راضيه بس مدري ليش كنت اسايره ، بعدها ماستحملت وطلبت منه يتركني وهو اصلا بكل مرة مالبي له طلباته يزعل ويتركني بعدها بفتره طلب يشوفني ويجلس معي بمكان بس انا اكيد رفضت وهو حدد المكان والزمان وراح ينتظرني بس انا مارحت لان هالشي ما يرضي ربنا وانا مارضاها على نفسي وادري نيته شينه طبعا تركني بعدها سنه وبعدها رجع لي وصار يطلب مني صور مره عاديه ومره فاضحه وانا اكيد ارفض وبعدها قال خلاص مايبيني وتركنا بعض، طبعا كل مرة يتركني ونظل فتره وانا ارجع له واترجاه لين يرضى يرجع لي مع ان ادري ان هالشي غلط وهذي احدى غلطاتي اني ارجع له وهو تفكيره كذا وادري ان الشي حرام، يمكن انا تقريبا في سنتين رجعت له عشر مرات وهو كل مرة يتركني فيها لاني ما ارسل له الصور على جهازه اخر مرة قام يدعي علي ويقول كلام قوي وانه ما راح ينساها لي ومن هالكلام لاني مارضيت ارسل له صور ، وهذي غلطتي جد لاني انا اللي كنت اترجاه يرجع لي وهو رافض انا وربي ضااااايعه غلطاتي كثيره وكل وحده اكبر من الثانيه ادري وربي انا متربيه صح وعارفه ربي لكن مدري ليش اسوي كذا ساعات اقول احبه وساعات اقول ليش احب انسان تفكيره كذا ومنحرف ومايهمه الا ذاك الموضوع انا مابي اعصي ربي لكن ساعات امر بلحظات احتاج فيها احد معي وبصراحه هو اول شخص يحسسني بالاحساس هذا ودايم افكر ، كل هذا بسبب صديقتي لو مادلتني هالطريق وشجعتني عليه ما كان هذا وضعي مو قادره اسامحها ولا اغفر لها الشي هذا ، كل حياتي ضاااعت انا مستحيل كنت افكر بالشي هذا او اني اعصي ربي بالجرأة هذي كنت مفكره اني بصون نفسي لزوجي المستقبلي ومستحيل اخونه او اخون اهلي اللي وثقوا فيني مدري ضااايعه ، ابي نصحكم ومشورتكم كيف اشيل نفسي من هالدوامه ، انا خلاص ما برجع له بس كيف اعوض السبع سنين اللي راحت من عمري معاه والشي اللي مضايقني جد انه جد كان يحبني ، وخايفه من دعواته علي :( ادري كلامي ابد مو مرتب بس اعذروني |
وعليك السلام ورحمة الله وبركاته
مرحباً أختي الكريمة أبشرك أولاً أنك لا ضعتي ولا شئ أنتِ غلطتي نعم ولكن حسب مافهمت أنها مجرد محادثات ماسنجر وتلفون وأعتقد إلى هنا خلاص يكفي .. وبرافو عليك إنك ماعطيته صور أو أي أشياء أو خرج معك أو آذاك وهذا يدل على أنك مقتنعة بداخلك أن ما يحدث غلط في غلط ولذلك يجب عليك تقوية هذا الأمر بداخلك .. وهو أن علاقتك بهذا الشاب غلط .. ولا يمكن أن تتصحح أو تنجح علاقتكما .. حتى ولو صدق في نيته وتزوجك فستعيشين حياة تعيسة كلها شك وغيرة أما مسألة حبه لك .. فهي أكبر كذبة كنتِ عايشتها ومازلتي مصدقتها لحد الآن وأما مسألة دعائه .. فبماذا سوف يدعي عليك ياأما تغلطين وترتكبين الحرام .. يا أما يدعي عليك للأسف .. إن كانت هناك دعوات مستجابة .. فهو دعائك أنتِ عليه .. لأنه ضحك عليك وأستغفلك وتلاعب بمشاعرك ويريد أن يجرك لطريق الحرام أخيراً أختي كوني قوية بالله سبحانه وتعالى وأدعيه بإخلاص أن ينجيك من هذا الذئب البشري ثم إستشعري الخوف والحياء من الله سبحانه وتعالى وهو مطّلع لعلاقتك المحرمة مع هذا الشاب ثم تذكري تربية أهلك لك ولا ترتكبين أي غلط يسود وجهك .. ووجه أهلك أمام الناس وأعلمي أنك لمجرد أنك طلبتي النصيحة من الناس فأنتِ في الطريق الصحيح وأكيد أن عندك القدرة الكبيرة على قطع علاقتك بهذا المستهتر نهائياً والتي للأسف لا يرضى على أخته أو بنته .. ما يرضاه معك أعانك الله |
انتي عندك0 مخافه الله بس الشيطان شاطر لحد الأن إنتي ما انزلقتي اتحمدي ربك ولا تكلمينه صدقيني متكلم مع 10غيرك ولابحب ولاشي والحب فعلا مابسمحله بهيك تصرفات
|
أخي الرسمي
ألف شكر لك على ردك ونصايحك والله يجزيك خير زرعت فيني شوي تفاءل من وضعي فعلا انا ندمانه واعترف اني غلطت الشي اللي يقهرني اني كل مرة ارجع له وانا اترجاه يرجع لي وهو يرفض الا لما احقق له اللي يبيه كل مرة يرفضني وارجع بعد شهر ولا شهرين واترجى ونفس الشي ليش انا كل مرة ارجع ؟؟ وربي انا اكون طول الفتره افكر واقول ابي ارجع له وبنفس الوقت ادري ان تفكيري غلط بس استمر بالتفكير لحد الوقت اللي يلعب علي الشيطان ويزين لي الفكره وادق او ارسل رساله وانا وقتها راضيه بس مجرد يرد علي او يكلمني يبتدي عندي احساسي بالذنب وابي ابتعد بس اكون وسط الدوامه ووقتها بس ابي أي طريقه تخليني ابتعد عنه كل مرة كذا نفس الشي بالنسبه لموضوع الزواج هو ماعمره فتح معي الموضوع وقال انه يفكر يتزوجني على حكم ان ظروف اهلي واهله مختلفه وما راح يوافقون بالزواج حتى لو فكرنا بس هو ماعرض علي الموضوع او حسيته يبي بس يبي يكلمني ويعيش معي كزوج وزوجه بس بالحرام -والعياذ بالله - :( مرة ثانية الف شكر لك اخوي وربي يجزيك الجنه |
أم عبودي جديد
تسلمييين لي على ردك والله يجزاك الجنه |
أسأل الله العظيم رب العرش العظيم أن يرزقكِ بالزوج الصالح الذي يسعدكِ ويرزقكِ بالذرية الصالحة والله يثبتكِ على الطريق المستقيم ويستر عليكِ ويصده عنكِ فالتائب من الذنب كمن لا ذنب له والله غفورٌ رحيمٌ وكرري اللهم من أرادني بسوءٍ فأشغله بنفسه واجعل كيده في نحره واجعل تدبيره تدميره يا أرحم الراحمين اللهم اكفنيه بما شئت |
انتي بداخلك عارفه ان اللي تسوينه غلط
وهذا شي حلو لانك باذن الله قادره تنهين كل شي وتبدين حياه جديده بعيده عن هالطريق وزي ما قال الاخ الرسمي انتي غلطتي لكن ما ضعتي واشكري ربك انك ما ارسلتي صورك اول شي تسوينه توبه صاااادقه واشغلي وقتك ورقمه امسحيه غيري شريحتك وايميلك وابعدددددي عنه بلا عوده صديقتك هاذي اقطعي علاقتك فيها نهائي لان اللي بيجرك للطريق الغلط صداقته مامنها اي فايده جددي كل شي بحياتك والتووووبه التوووبه وكل ما طرى ببالك تعوذي من الشيطان واشغلي نفسك باي شي اسال الله لي ولك ولجميع المسلمين والمسلمات الهدايه والتوفيق |
سبع سنوات وانتي تتحادثي مع هذا الشاب
حرام انك ضيعتي وقتك مع انسان ما يجي من وراه الا المعصيه والحرام ... بس الحمدلله انك كنتي واعيه ولا اعطيتيه صور ولا حتى رديتي عليه وقابلتيه .. ****** كيف تخرجي من هالدوامة...؟ اشتغلي على نفسك .. كيف ..؟ حاولي ان تتركي هذا الشخص والهي نفسك باي شيء بعيد عن الشات والمحادثات .. اقرأي مثلا كتب تثقيفيه تهمك ... تعلمي مثلا طبخات او حلا تفنني .. خصصي وقت لقرآءة سورة من القران الكريم ... مثلا ساعه كل يوم... والاذكار اليوميه .. زوري صديقاتك اقربائكم .. يعني ضيعي وقتك بامور مفيده في الوقت الي كنتي تجلسي فيه عالشات ممكن تستثمريه بامور مفيده كما ذكرت من امثله .. هذه الامور بتساعد على نسيانه لو فكرتي ترجعي استعيذي بالله وخلي عندك اراده مرة على مرة بتنسيه ... وتذكري انه مافي من وراه خير بس تضييع وقت ولكلام فاضي .. وفكري انتي حتى تقتنع نفسك ماذا حصلت في 7 سنوات لما كنتي تكلميه ...؟ شو اخر المشوار برايك ...؟ بتفضل حياتكم هيك .. محادثات وكلام لايسمن ولا يغني من جوع ...!! الجواب عندك وهو الي بيخليك تقنعي نفسك من داخلك بالعزوف عنه ... ولا تنسي دعاء رب العالمين بان يبعده من طريقك ويرزقك ربنا بالزوج الصالح الي يعرف قيمتك .. |
نبرات شعري سطرت
اللهم آمين اللهم آمين حطموك يا قلبي اللهم آمين وان شاء الله راح اسوي اللي قلتي سندريلا حبيب اللهم آمين والف شكر لك على مرورك الله يجزييييكم خير اخواتي على نصحكم وارشادكم وارجوكم لا تنسوني من دعوه صادقه بظهر الغيب الله يستر علي ويبعدني عن هالطريق ويرزقني بالزوج الصالح |
كلاكما مخطيء
انتي مخطئه لأنك تدعين البرائه ولاتحاولي اقناعنا ابدا بأنك كنتي على علاقه مع شخص لمدة سبع سنوات بدون وعود منك لهذا الشخص بالحب والعطاء والخ الخ الخ ولاتحاولي اقناعنا انك مكسورة الخاطر والقلب وانك محطمه ومكسورة الجناح انتي تكامي عن 7 سنوات اكيد العلاقه تطورت وكبرت ومستحيل يكون العلاقه ( حب طاهر وشريف) سوري ع القسوة لكن حدث العاقل بما يعقل فأن صدقك فلا عقل له ومش طبيعي ابد ان هذا الشخص العاشق يطلب منك صور وشوفه وغيرو بدون ماترخين انتي له الحبل او بدون انتي ما طلبتي منه انا اتوقع انك خدعتيه ولعبتي عليه وبعتي له الوهم فعشان ذا انتي خايفه من دعواته فما امامك الا حلين الاول : تتوبين الى الله وتندمين على مافات وتصدقين في الندم و وكلي امرك الى الله الثاني: ترجعين للعاشق وتلبي كل طلباته وتطلبي منه السماح والعفو والمغفره وتستمري في طيشك وعبثك معه وعقلك في راسك |
| الساعة الآن 04:05 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©