|
ماقصرت بشيء مع خطيبتي أعطيتها الحب والحنان وطلبت الطلاق مني بدون سبب
السلام عليكم ورحمة الله وبركاته
أول مشاركة لي في منتداكم الغاالي أرجوا منكم مساعدتي في حل هذه المشكلة ودمتم : أنا متملك من فترة قرابة الخمسة أشهر ولكن خطيبتي دائما معي متقلبة المزاج أحيانا تحسسني بحبها واشتياقها لي وأحيانا العكس تماما . في بداية الخطوبة لمحت لي أنها لاتحبني ولاتكرهني تقول يأتيها شعور غريب لاتدري ماهو هذا الشعور ، وبعدها بفترة طويلة تصبح معي غير وتبدأ معي بالكلام الرومانسي ثم تظهري لي العكس .. تعبت والله معاها ما أدري تحبني والا لا طبعا صارحتني تقولي إعملي أشياء تحببني فيك وأنا طبعا ما قصرت من ناحية الهدايا والكلام الرومانسي ودائما أحسسها بالأمان والحب إلا الزيارات تقريبا في الشهر مرة لأني لست متواجدا بمنطقتها لظروف العمل ... يعني باختصار مرة تراسلني بكثرة مع اشتياقها لي وأحيانا العكس تماما .. إلى الآن ماذكرت مشكلتي الرئيسية ... المشكلة أنها قبل تقريبا أسبوعين طلبت الطلاق مني بدون سبب تقول ماعاد تقدر تستحمل أكثر من كذا مع انها ليست مجبورة علي لكن أحس إن أهلها ضغطوا عليها بالزواج وهي تقول ماتحس إنها تقبلتني ، أنا الآن أراسلها ماترد علي واتصل فيها تقفل جوالها أو ماترد عليا .: والله العظيم ما أدري أيش اسوي ؟؟ للعلم أنا بمنطقة بعيدة عنها لظروف عملي وناوي بعد أسبوع أسافرلها وأشوف وش السالفة .. تتوقعون إنها ما تحبني وإلا شيء طبيعي يجي البنات .. مع إنها في بداية الزواج كانت تطلب مني صوري يعني هذا حسسني إنها تحبني .. أنا محتااااااااااااااار جدا وما أدري ما أفعل لاأريد الطلاق لأني أحبها وأيضا لاأريد أن أجعلها مطلقة للعلم قد يحدث مشاكل بيننا أثناء المكالمات لكن مشاكل عادية جدا تحصل بين أي مخطوبين .. هل تتوقعون أن مشاعرها تجاهي ممكن تتغير وهل لابد من الحب في فترة الخطوبة أم ألبي لها ماطلبت لي _ أو أنها تختبر حبي لها ؟؟؟ أسئلة كثيرة تدوور في بالي لا أجد لها حلا !!! تعبت ... تعبت ... تعبت ... أنا رومانسي أريد رومانسية وأريدها تتعلق بي إذا فعلت هذه معي لو طلبت أغلى ما أملك مايغلى عليها .. أنا أبيها تحبني بس وأنا راح أدللها وأدلعها وأعطيها ما تريده بس فقط حب وتحسسني أني مهم في حياتها هذا ما أريد منها ... تعبت وأنا أبحث عن الحل فلم أجد بعد الله سبحانه سواكم ... فضلا لا أمرا من عنده خبره يساعدنا وله مني جزيل الشكر ودعوة في ظهر الغيب !!!؟؟؟ |
طيب بما انها ما ترد عليك
ما قدامك الا خيار واحد تروح لها وتتفاهم معها وجها لوجه وتخليها تقول كل اللي بخاطرها والعكس اذا البنت مره ما تبي تكمل فالله يعوضك ويعوضها واذا انه مجرد كلام فيبي لها جلسه لحالها سؤال هي كم عمرها ؟؟ أسأل الله لك التوفيق وراحة البال |
الله يسهل أمرك ويصلح حاللك
في هذا الرابط مشكله شبيه بمشكلتك أستفد منها http://www.66n.com/forums/showthread.php?t=231627 و http://www.66n.com/forums/showthread.php?t=231297 موفق يارب |
اقتباس:
عمرها : 21سنة |
السلام عليكم ورحمة الله وبركاته ,’~
من اصعب حالات الشخص ان يكون متقلب المزاج تماماً مثل خطيبتك .,~ لآ أعلم ماذا اصابها فجأة لماذا تريد الطلآق من غير اي سبب ,’~ الله يهديها عند سؤالك هل هذا شيئ طبيعي عند الفتيات !!أرد عليك لآ .. ممكن تجي لحظات نحس بضيق لكن ماتوصل للطلاق او انها تقفل جوالها من غير اي سبب يستاهل إحتمال صديقاتها أو قريباتها خوفووها من الزوآآآج ,’~ مافكرت تكلم والدها !! |
اقتباس:
خبرت والدها وعادي الوضع عنده ماقال شيء وأنا أنتظره يقولي شيء أصلا ... بس ما قال شيء وواصلته قبل فترة ماقالي شيء وحتى أمها كلمتها ولا قالت شيء مع إن أبوها وأمها يعلمون بطلبها ... |
غريبة أمها وابوها ماهونو عليك وهدوو من روعك ,’~
:: يا اخي الكريم استخير الله أكتر من مرره ,’~ وأدعي دائماً ان اذا فيها خير الله يقربها ليك واذا فيها شر الله يصرفها عنك .. من دحين تقدر تتعامل مع الموضوع تماام ,’~ أما لو اتزوجتو وصارت معاك زي كذا ايش حتسوي ,’~ فأحسن لك الاستخاره وان شاءلله ربي ييسر لك جميع امورك يارب دمت بوود =) |
اقتباس:
بس اللي مستغربه ليش أبوها وأمها ساكتين .. وأنا والله ماقصرت بشيء مع البنت أعطيتها حب وحنان وأمان وكل شي وأعطيتها قلبي .. والحمدالله أنا إنسان عفيت نفسي عن الحرام وكتمت مشاعري وقلت بعطيها لزوجتي العزيزة لكن أظاهر إنها ما تبي كلام الحب والدلع .. |
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ
غريبة يعني ما أحد يدري عن السبب تقريبيا ... |
دام الموضوع كبر بينكم لدرجة انها تطلب الطلاق كلم اهلها خلهم بالصورة لازم يعرفون ان بنتهم هي الللي طلبت الطلاق والطلاق مو سهل ولا لعبة وانت تقول انك مو مقصر معاها بشي انا من رايي لاتتصل فيها ولاترسل لها اي شي
بتقول لها ليش بتطلبين الطلاق بتطلع لك الف سبب وسبب لكن اذا الموضوع تدخل فيه ابوها واخوانها شي طبيعي بتقول السبب المقنع اما انت اكيد بتعلب فيك ومايكون لها خلق ترد عليك وبالتوفيق |
| الساعة الآن 02:27 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©