|
ممارسات خاطئة في العزاء ( من مشاهداتي )
ممارسات خاطئة في العزاء ( من مشاهداتي ) أولاً أتوجه للمولى القدير أن يتقبل موتانا وموتاكم ويرحمهم رحمة واسعة موضوع أود طرحه والتناقش حوله لأني لاحظت كثيراً في أكثر من عزاء حضرته عدم احترام الميت وأهله وتقدير الحدث الجلل الذي أصابهم وكأنهم في مناسبة عادية للأسف هذا ما شاهدته وسأطرح المواقف التي صادفتها وأتمنى التعليق عليها لأنها فورت دمي • ( عدم احترام هيبة الموت ) في عزاء عمي رحمه الله وكانت وفاته فاجعة لنا وكان موته فجأة بدون مقدمات لكن الحمد لله على قضائه ولا راد لحكمه وكنت وقتها متزوجة والنساء متوزعات في كل غرفة مجموعة وأعتقد كان ثاني يوم للعزاء كنت واقفة عند باب إحدى الغرف ولمحت كتاب طبخ كبير بيد وحدة هي أصغر مني بس متزوجة يعني المفروض تعرف الأصول قربت منها أتأكد وكانت مندمجة مع اللي جنبها بإحدى الوصفات وكان الكل يشوفها قلت وأنا مقهورة ترى هذا عزاء هل تعتقدين المكان والزمان مناسب ؟؟؟؟؟ قلت لها المفروض في بيتكم تتصفحين مو هنا على الأقل احترمي هيبة الموت وش يقولون الناس اللي حاضرين وأنتِ مو مهتمة أنتِ مو شايفة الكل يبكي مو عارفين نهدي مين وإلا مين ؟ أختي أغمي عليها وعمتي طاحت علينا وجدتي جاتها جلطة من صدمتها بولدها يعني الوضع مأساوي ( أعطيتها كم كلمة تعرفها قدرها ) ومن عقبها حطيت عليها x [/COLOR]حضور بعض المعزيات بمكياج خفيف في عزاء عمي وحدة حاطة المناكير والكحل والماسكرة والعدسات وطالع من شعرها كأنها رايحة فرح وين هيبة الموت صار ما في فرق بين الفرح والحزن والمبالغة في العبايات الملونة يعني كأنها لابسة فستان وفي العزاء اللي عندنا أمس شفت كم وحدة بهذا الشكل نسأل الله العافية والسلامة • عدم تصبير أهل الميت وتجديد حزنه في وفاة عمي كانت جدتي حزينة وتعرضت لأزمة قلبية وحنا نهديها وخلاص ما صدقنا سكتت شوي إلا دخلت وحدة وقالت وش اللي صار عليكم يا بيت فلان بن فلان ما تستاهلون اللي جاكم ( أستغفر الله هذا اعتراض على قضاء الله ) ورجعت حالة البكاء هذا بدل ما تصبرنا ( يعني كل اللي سويناه من وقت وجهد في تهدئة أهلي هدمته اللي دخلت علينا ) وفي عزاء أمس بنات المتوفاة منهارات وبعض المعزيات يزيدون عليهم الحزن بنفس الحركة اللي صارت لجدتي الله يرحمها ويبكون حتى تبكي بنت المتوفاة الله يكون بعونهم أمس حضروا بناتها وكل واحدة جاها انهيار عصبي والأطباء في بيتهم كل ما صحت واحدة طاحت الثانية والمهدئات عساها تهديهم بصراحة حالتهم صعبة عيالها صابرين بس فراق الأم صعب الله لا يحرق قلوبنا على غالي • التكلم بأمور دنيوية وعدم تقدير رهبة الموت متى عرس فلان ؟ في أي قاعة ؟ طيب وين احترام الموت أذكر في عزاء قريبي أنا انخطبت قبلها بكم يوم وقت العزاء وحدة تسأل عني باصرار تبغي تشوفني لما شافتني قالت لي عليكِ مبارك الخطوبة عاد لا تنسين تعزميني !!!!!!!!!! ( لا تعليق ) • الانشغال بالجوال خصوصاً البلاك بيري بشكل مبالغ فيه لو ذكرت أي مواقف أخرى سردتها ويا ليت نلاقي حلول لبعض الناس اللي ما يعملون أهمية للموت لأني فعلاً تضايقت من هذا الموضوع بانتظار حلولكم وردودكم |
الله يرحمنا برحمته
الله يرحم أموات المسلمين والمسلمات والمؤمنين والمؤمنات ويغفر لهم ذنوبهم تصدقين والله والله والله وربي يشهد إني ماأبالغ في عزاء قرايبنا قبل عام تقريبا وحدة من نسايب هذي العائلة تعتبر من الطبقة الراقية اللي هي الهاي كلاس أقسم بالله جاية بفل ميك أب تعرفي إيش يعني فل ميك أب ومناكير وحالة والشعر طالع برا صددددددمة والعباية حدث ولاحرج رح تتمزع من ضيقها الله يهديها ماتم أحد إلا وتكلم فيها وين حرمة الميت هذا عزى مو حفل ولازوارة صدق احتقرتها ماأكذب عليك الأدهى والأمر يانبرات ناس ماعندها كرامة تجي عشان العشى تاكل وتخلص وتمشي وطول الوقت وهي حاطة رجل على رجل وهي تعتبر من أهل الميت والألعن من كذا تتصل بولدها تعال فيه عشى يجي يتعشى ويمشي لاتستغربي وربي ماأمزح وياك طبعا هالشي صار في عزى جدي قبل أسبوعين الله المستعان جد شي يفقع يعطيك العافية |
أنا اسوي واجبي وأطلع لإن خلاص توبة ماغير أسمع دق كلام حولي أو حول ناس معينين الحين تاركين العزاء والحال اللي أنتوا فيه وفاضين تتكلمون في النّاس .! الله يرحم موتنا وموتاكم . |
أشكر جميع من مر بموضوعي وربي يتقبل دعواتكم تذكرت موقف صار بعزاء جدتي قامت وحدة بصراحة أنا انصدمت منها لأني أعرفها من قبل المهم قامت تتكلم عن وحدة وأنها تهاوشت مع زوجها وضربته ووصفت الطريقة أنا قهرتني ليه تشهر فيها وقالت بعد شوي بتجي هنا تعزي وشوفوها :29::29::29: عشان تعرفونها تراها بتجي مع أم فلان الفلاني عمات بنتي كانوا موجودات وردوا عليها لأنها بصراحة استفزتنا ليه تكشف سرها وأنا كنت جالسة بس حزينة على جدتي وأبكي مو فاضية أرد عليها وطلعت من المكان ما أبغى أشوف اللي تقصدها وبنفس العزاء على العشاء صار تعليق على نفس السالفة ومسخرة ودق بالكلام على كذا سالفة ( طبخ + مشاكل + ضحك ) وعمتي يعني بنت المتوفاة تتعشى بنفس السفرة تضايقت وين الاحترام يعني ما تحلى السوالف إلا وقت الموت وتقول كنت بأرد عليهم بس لأنه عزاء أمي وأنا بنتها الكبيرة كبرت عقلي واحترمت الوضع وفي موقف ثاني لا زال حاز بخاطري من أعز صديقاتي لما توفي عمي رحمه الله علمتها قريبتي بوفاته برسالة وردت على قريبتي برسالة بعد شهر تقريباً بس ما اتصلت علي أنا استغربت لأن أهل زوجها حضروا العزاء وبعدين توفيت جدتي ونفس الشئ علمتها قريبتي بس هالمرة باتصال وانحرجت قالت لها ارسلي رقم نبرات وأرسلت لها رقم أمي لأني رقمي جديد وما تعرفه وقالت لي قريبتي ترى بتتصل عليكِ فلانة توها أخذت رقم أمكِ كان يوم العزاء وما اتصلت وش سوت قريبتي قالت خلاص بأدق عليها وأعطتني السماعة وعزتني وقامت تتعذر عن وفاة عمي بأعذار بايخة لو هي ساكتة كان أحسن:29: مع إن أهل زوجها دارين وحضروا العزاء طيب ليه رافعة نفسك ترى الدنيا ما تسوى:29: وأكثر من مناسبة قبل العزاء أتصل ما ترد ولما يتصلون قريباتي ترد أنا اكتشفت هالحركة لما دقيت بالعيد من جوال قريبتي ردت وقلت لها عسى ما شر ما تردين على رقمي قالت شوي بأتصل بس أتغدى ولا عاد اتصلت بعدين قريبتي قالت لي لا عاد تدقين عليها وعلمتني بسبب عدم ردها علي لأنها قالت لها تتوقعون وش السبب :24: طلع زعلها إنها كم مرة تعزمني في كذا مناسبة ولما أقول لها أحاول وإن شاء الله أحضر لو تيسر لي بس ما حضرت لأن زوجي كان ما يحب الاجتماعات هذا طبعه وهي ما قدّرت هالشئ وزعلت مع إني سبق زرتها حسب ظروفي وصارت ما ترد ومن يوم عرفت سبب زعلها حطيت عليها x ليه ما تقدر ظروف الناس:29: تقول أنا أحضر في بيتها ليه ما تحضر لي لو عزمتها وتزعل لو قلت بإذن الله بأحضر بعدين ما أحضر ولما أسأل أهلها عنها وإنها ما ترد إذا اتصلت وطلبت رقمها منهم توقعت إنها غيرته طلع نفسه وزعلت تقول لقريبتي سوت لي مشكلة لأني ما أرد عليها ومن عقبها حسيت إنها ما تستاهل واللي ما يعدك ربح لا تعده راس مال طيب هذا عزاء ما له علاقة ولما انفصلنا ما رفعت سماعة وأهلها عرفوا من قريبتي وزعلوا عليها لأنها صديقة الروح بالروح وسألوها ليه ما علمتينا قالت أدري من زمان وليه أعلمكم ما هي بشارة :29: قالوا لها كلمتيها تواسينها ولا رفعت سماعة ولما عرفوا أهلها إنها ما كلمتني ساءت العلاقة بينهم من بعدها صرت ما أتعمق بأي صداقة حتى ما أنصدم حتى قريبتي قالت لا تهتمين اللي خلقها خلق غيرها وأنتِ ما غلطتِ يوم قلتِ لأهلها ليه ما ترد عليكِ في حياتي انصدمت بصديقات عديتهم أكثر من أخواتي بس توبة أعيدها ما دام العزاء وفي أقرب الناس لي ما وقفت معي وواستني وفي طلاقي ما عبرتني مع إنه كان برغبتي وما أحتاج مواساة من بعدها خلاص طلعتها من قائمة حياتي |
الله يرحم جميع موتى المسلمين ويتغمدهم بأوسع الرحمات ونسأل الله السلامه والمعافات الدائمه وان يبصرنا بعويبنا ولاحول ولاقوة الا بالله صحيح عزاء الموتى تحولت الى عرس
|
في العزاء ضعو عزل في اذنيكم وضعو رؤسكم بالقرىن الكريم ااقراؤ
ولا تلتفتو لاحد انه وقت للعبره والخوف وليفكر الانسان لآخرته الله يعين حضرت عزاء هنا ولكن لم اجد شيئ يمكن لاني غريبه عنهم انما رحم الله جميع الاموات المسلمين |
صدقتي بكل كلمة يا أختي لو جت على كذا وبس يمكن تهون
لاكن فيه بعض الأوقات يجون حريم كبار بالسن في وقت العزاء وأول ماتدخل الواحدة منهم تصرخ بأعلى صوتها أنا والله استغربت كنت من بين المعزيين مع أخت زوجي لأهل الميت وكل شوي دخلت عجوز وصرخت مثل إللي قبلها كان معي بنتي الصغيرة والله إنها كانت تبغى تنجن من صراخهم تبكي وكل ماجيت أسكتها دخلت عجوز مرة أخرى واشتغلت صافرات الإنذار عندها وقلت لأخت زوجي يالله امشي روحنا البيت بنتى تجننت ولما رحت البيت جلست أسأل ام زوجي واخت زوجي ليش يصيحون والصياح والنياح على الميت حرام قالت لي ام زوجي يابنتي هاذولا هم عندهم كذا وطبعهم كذا وماينفع معاهم لا نصح ولا شئ وعاداتهم إنك لوماصاحوا على ميتهم معناته إنهم مايحبونه وقالت الحريم اللي اول مادخلوا غرفة العزاء وصرخوا هاذولا يردون الواجب لأهل الميت يعني هم قد صرخوا في عزاهم والحريم جايين يردون لهم واجب صراخههم بس لاغير واذكر مرة من المرات سافرت لديرة ويوم وصلنا المنطقة اللي فيها اهل زوجي كان لنا جارة مريضة وتوفت الله يرحمها وقالت لي اخت زوجي خلينا نروح نعزي بنات الحرمه المتوفية طبعا حينها أنا كنت لابسة في يدي 12حبة بناجر ذهب وكانت ضيقة على يدي ولها فترة مانزعتها من يدي وانحرجت اروح وأنا لابستها قدام المعزين واضطريت إني انتزعها بالقوة والله العظيم حتى جلد يدي تسلخت وأنا جايبة اكياس نايلون وفازلين وفيري ومن هنا وهنا ويالله طلعتها كل ماطلعت منها حبه احس روحي تطلع معاها وأم زوجي وأخواته يقولون لي عادي خليها تحت العباية ما فيه احد بيشوفها بس انا أستحيت احرك يديني ويسمعوا صوتها ففضلت نزعها كليا ولما وصلنا للعزاء وجدت كل بنات الحرمة لا بسين ذهبهم واكبر بناتها والله إنها لابسة بناجر مثل اللي عندي بالعدد ولابسة ثوب كم قصير قالت لي أخت زوجي شوفي بنات الحرمه والحريم الحاضرين كل وحدة لابسه ذهب وانتي بس اللي استحيتي تجين وذهبك معاك رديت عليها إني انا ماني جاية حفلة انا جاية بعزاء واهم شئ اعمل مايمليه عليه ضميري والناس ماعليه منهم وكمان سمعت قبل فترة بمكياج إسمه مكياج الحزن يعني خاص بأوقات العزاء ولبس ولون محدد للعزاء بصراحة هناك مخالفات صريحة وعادات ماخلق الله بها من سلطان وكمان السوالف والضحك بين المعزيين بل بعض الأوقات تسمع واحده من المعزيات تقول لصديقتها يالله يفلانه مشينا نبغى نلحق نشوف المسلسل الفلاني اليلة الحلقة الأخيرة او نبغى نتجهز للحفلة الفلانيه بدون تقدير واحترام للمكان اللي هما فيه ولاتفكير بمشاعر الآخرين اذكر مرة من المرات كنت في عزاء وكان المجلس مكتظ بالحريم وشويه إلا وفيه حرمة قالت يالله استأذن برو ح بيتي احس إني جيعانه برو ح اتعشى استأذنكم اتعشى وارجع لكم بعدين وكمان لاحظت وقت العزاء بعض الحريم مايتوسعوا في المجلس وكل من جاءت بدري ترو ح علشان تفسح مجال لغيرها من المعزين لا تطق حنك وتجلس تبربربزوجها وعيالها وفلانه وعلانه بدون ماتعمل حساب للحريم اللي متزاحمين في غرفة الجلوس كمان اذكر موقف يوم وفاة الوالدة الله يرحمها ويرحم اموات المسلمين جميع كانت لأمي بنت عم لها وتعتبرها أختها وصديقتها وكانوا يحبون بعض ويوم موت أمي تأثرت بنت عمها بشكل كبير جدا وأغمي عليها وتشنجت وهي قد سبق وعانت من حاله نفسية بسبب موت امها وكانت الصدمه الثانيه لها وفي وقت قريب من بعض هو وفاة الوالدة صديقتها وبنت عمها فتأثرت والحريم شافوها وهي مغمى عليها وتشنجت وقاموا ثنتين من الحاضرات للعزاء سلامتها وش فيها هاذي الحرمة فيها سحر وإلا مس شيطاني وجلسوا يشخصون حالتها مع باقي الحريم ورجعنا شلناها وديناها غرفة لحالها وجلست عندها بنتها حتى تحسنت حالتها كانت كل ماتفوق تنادي بإسم الوالدة وتشهق ويغمى عليها مرة ثانيه من شدة صدمتها النفسية وبعد ماتحسنت حالتها حاصروها بالأسئله فلانه وش فيك صار فيك كذا شكلك مريضة فيك سحر او عين او مس تعالجي روحي عند الشيخ الفلاني يعالجك شفتي فلانه كان عندها نفس حالتك واشد وافضع منك وراحت تتعالج وطلع فيها سحر مشروب وطلع معاها مس وانتي الحقي نفسك المهم قرقروا اللين طفشوا وراحوا لبيوتهم وكمان نسيت لما يغسلو الميت ويحنطوه ويكفنوه ويجوا اهله يلقون عليه النظرة الأخيرة لوفيه مشكله بين المتوفي واحد أقاربه او إخوانه او جيرانه ويجي يبغى يساعدهم في دفنه ويعزيهم يقوم بعض من أهل الميت يطردونه ويمنعونه وإذا ما امتنع تصير مضاربه والسبب هو الخلاف اللي كان بينهم سابقا سبحان الله مايتخذوا العبرة ويعتبروا بالميت اللي مات وإن الدنيا فانية وماراح يبقى غير وجه الله عز وجل بالنسبة للحل لمثل هائولاء بصراحة كل شئ له دواء إلاالحماقة أعيت من يداويها وصعبه تفرض رأيك على مجموعة من الناس اللي أبتليت بهاذي الطباع وماتقدر الظروف ولاتحترم مشاعر الناس وانا من وجهة نظري ماأشوف إن هناك حل جذري ومناسب لهاذي الفئة من البشر يعني بالعربي الفصيح غسلي إيدك منهم ومن إصلاح الخلل إللي فيهم . |
عظم الله اجركم ورحمه الله
انا بعزاء جدي الله يرحمه جلست عند الحريم نص ساعه ما تحملت الجوالات ماطفت والكل يضحك حشى ماهو عزى والله طلعت بغرفتي والكل ينقد علي طيب مايشوفون الناس اللي جايين لا تجي وحدة وتقول لي شفتي ياروز حواجبك سبحان خفيفة ليش مارسمتيها بالعزاء من جدها تتكلم هالمجنونة عزاء جدي اللي مربيني وتبيني احط مكياج وين اللي له نفس ولا تجي وحدة 3 ايام والله العظيم 3 ايام وهي تبكي وتصيح من قلب بس تزود الحزن تخيلوا جدي مايقرب لها ولا بعمرها شافته وحنا ماصدقنا اول يوم يروح ويخف الحزن شوي عن عياله الله يرحمه ويطرح البركة بعمرهم استغفر الله وش هالتخلف اخاف صرنا بعهد الجاهلية الله يكون بالعوووون ويهدي الناس ويبعد عنهم عادات الجاهلية |
اقتباس:
جزاكِ الله خيراً والله يرحم والدتكِ وجميع موتاكم صدقتِ بخصوص اللي تدخل وتصرخ نفس هذا الوضع حصل في الموقف اللي بعزاء عمي رحمه الله اللي دخلت وقالت ما تستاهلون اللي جاكم أول شئ صرخت بعدها قالت هالكلام يعني النياحة أصلاً حرام وفوق كذا أنتِ ياللي جاية تعزين المفروض إنكِ جاية تخففين علينا مو تزيدينا وترجعينا إلى نقطة الصفر :29: بس الله ينبه مثل هذه العقليات |
اقتباس:
الله يرحم جدكِ ويسكنه فسيح جناته فعلاً كلامكِ وش هالتخلف صرنا بعهد الجاهلية أصلأ من السنة في التعزية نخفف على أهل الميت ونمشي الحين ناس تجلس وكأنها زوارة !!! مو مشكلة أهل العزاء وأقاربهم يجلسون هذا واجب عليهم بس اللي مو من أهل الميت وش يجلسهم ؟؟؟ أصلأ وجودهم يزيد العدد وأكيد كل من دخل أحد ويسوي نياحة الكل بيبكي يعني حالة التوتر بترجع مع كل وحدة داخلة أستغفر الله العظيم من هذا الحال من بعض الناس ما أدري متى يصحون من غفلتهم ويقدرون الشئ حق قدره |
| الساعة الآن 08:50 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©