|
ماني عارفة ليش أنا عايشة بالدنيا ؟
السلام عليكم و رحمة الله و بركاته
بعد وفاة أبوي الله يرحمه من سنوات و وفاة الوالدة من أسبوعين .. حاسة اني ماشية بالدنيا بدون هدف .. كنت ادرس عشان اخليها تفتخر بيا بالدنيا، كنت اعمل كل شي عشانها طيب دحين ؟ تعبانة و ماني قادرة ابكي .. دموعي نشفت و الغريب اني غسلت امي و ماني حاسة بشي بداخلي ؟ احب امي و متعلقة بها .. بس ماني قادرة ابكي يوم العزا .. ساعدوني، ايش ممكن اعمل اي شي لامي و أبوي ؟ ادري دعاء و صدقات .. بس كيف ؟؟؟ ابغى افكار .. عشان احس انه وجودي بالدنيا له معنى .. و الله صرت اقول بداخلي، يارب بس ابغى أعيش عشان اكبر الولدين و بعد كذا ابغى أموت .. ما ابغى أعيش كثير .. دام انه الحياة هم و غم و كد و تعب و مشاكل و مصايب ليش نعيش ؟ ليش اتخلقنا ؟ عشان نتألم ؟ عشان نبكي ؟ عشان نتعذب بالدنيا و الآخرة روح الطير دحين، مو هي روح الطير تبع زمان .. الماضي بكل ذكرياته و بكل شي يتعلق بطفولتي و مراهقتي .. قتلتلهم و دفنتهم للابد .. * |
صايرة بس ساكتة .. مافي شي يزعلني و لا في شي يضحكني ..
حتى زوجي صرت بس كذا عايشة معاه .. ما صار يهمني .. اقول بداخلي، خلاص اهم شي عايشين و بس .. قلبي احسه مااااااااات ما عاد ليا بالدنيا احد يحبني مثل امي |
استهدي بالله
اشعر بكل ما كتبتي لكن لا اعرف ما اكتب لكِ قلبي معك الله يغفر لوالديا ويرحمهم ويغفر لأمك وأبيك وجميع موتى المسلمين |
اخت روح الطير
هى دى سنة الحياه والكل مفارق .. ربنا يحسن ختامنا ويجعل احسن اعمالنا خواتيمها .. ياترى حنلاقى اللى يشيلنا ؟ |
طيب و ليه نعيش و نحب و بالأخير نفارق بعض ؟
كنت مجمعة مبلغ من المال عشان كنت أتمنى اشتري فيلا دورين بالمستقبل أعيش فيه و امي تعيش معايا طيب دحين ايش اعمل بالمبلغ هذا ؟ |
بموت امي و أبوي ، كل شي فجأة انقطع و اختفى من حياتي ..
ماني عارفة ليش اربي الولدين ؟ عشان اكبر و امرض و يتعذبوا معاي ؟ ماني عارفة ليش عايشة مع زوجي ؟ عشان اذا متت ، نساني و راح يشوف حياته ؟ . . قبل، كنت افكر اني اجمع عشان المستقبل .. دحين، صرت افكر اني أعيش يومي و خلاص .. ماهمنييييي المستقبل .. يصير اللي يصير .. و الموت واحد بالأخير .. |
ليه لو مت جوزك حاينساك ويشوف حياته ولو مات هو الاول حاتعملى كده ؟؟
|
كنت دائماً أتكلم مع امي، اكثر وحدة افتح لها قلبي و تفهم كلامي ..
دحين ماني لاقية احد مكانها و مستحيل اصلا مهما تكلمت مع اي احد، ما احس بالراحة .. امي قدام عيوني طول الوقت خيالها .. و صوتها بأذني طول الوقت .. اتخيلها بتتصل و تسال عني و تسألني ليش ما جيتي ؟ تتصل و تقول لي ترى طبخت الأكلة الفلانية، و شلت لك منها .. أتخيل و افتكر كل شي .. بس ماني قادرة ابكي و لو بدت عيوني تدمع، بسرعة امسك الدمعة .. و اللي قدامي يحسبني ماني متأثرة و مو لازم اقول لهم، أنا من يوم ما مرضت امي و أنا ابكي .. و باخر أيامها بكيت لحد ما نشفت الدموع .. و وقت ولادتي صرت ابكي و الدكتورة تقول انت بتبكي مو عشان الولادة .. فيه شي تاني متعب نفسيتك .. امسك الورقة و القلم عشان اكتب اي شي، احس نفسي عاجزة عن كتابة حرف واحد .. |
ياسمين
الرجال معروفين اغلبهم .. يفكروا بنفسهم .. و مهما وصل محبة زوجي لي، مستحيل يتقارن حبه بمحبة امي و أبوي لي .. لانه حبهم بدون مقابل و حب الابوين غير أناني .. و أنا اعرف نفسي، ما انساه أكيد .. لأني انثى .. و ما صار يهمني لو يحبني و لا لا .. مصيرنا نموت ..* امي و أبوي عاشوا مع بعض و بالأخير ماتوا .. و الحياة ماشية من غيرهم .. |
يقول العلّامه إبن عثيمين رحمهُ الله : الموتُ لا يعني فراقَ الَأحبَّة , الموتُ يعني فُراقَ العمَلِ الصَالِح :" فاجتهدي واهدي والدتك من العمل الصالح ،، من دعاء وصدقه جاريه او حجه لها او بناء مسجد بمالها او حفر ابار في الدول المحتاجه .. او كفالة ايتام ،، او المساهمه في بناء دار للقران او التكفل ببعض مصاريفها ،، تفقد حاجات الارامل والايتام والمطلقات والاسر المحتاجه ،، من مال او دفع فاتوره او ايجار او شراء اجهزه لها او غيره ،، واطلبي من الله ان يعينك على ذلك ،، اعانك الله وسدد خطاك ،، واوصيك ان تكوني إنسانه إيجابيه بتفكيرها ونظرتها لهذع الحياة الفانيه واسأل الله أن يرزقني واياك اليقين ،، فأنت الان بعد هذا الإبتلاء من ربك ،، خير لك في الدنيا والاخره ،، ففي الدنيا ،، يبين لنا ان العبره بالعمل الصالح وحسن الختام ،، وان نحاسب انفسنا قبل ان نحاسب ،، وان نجتهد في تزكيتها وتطهيرها والتقرب إلى الله بالعمال الصالحه ،، وضعي لك منهج تمشين عليه ،، من صلاة ليل ،، الذكر المتواصل ،، قراءة القران وحفظه ،، وغيرها من الاعمال ،، الله يرحم والدتك ويغفر لها ولموتى المسلمين ،، * |
| الساعة الآن 07:06 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©