طفلتي تغيرت بعدما علمت أنه ستصبح لها أختا
 

السلام عليكم ورحمة الله وبركاته :

بعد غياب رجعت للمنتدى اكتب لكم مشكلتي مع بنتي .. لاني اعرف تفاعل اعضاء المنتدى بجديه ..
الله يوفقكم لما يحبه ويرضاه..
عندي بنت عمرها 4 سنوات ووحيده .. من فتره طويلة تتمنى عندها أخ ودايم تسألني ليش كلهم عندهم اخوان وانا لا ..؟ وبحكم دراستي كنت مأجله موضوع الحمل .. خلصت دراسه وفكرت بالحمل .. لكن سبحان الله كل ماحملت مايتم حملي .. ثلاث حملات متتاليه .. وبكل مره أأملها ان بيكوون عندها اخ او اخت لكن مايتم .. وطوّلت السالفه بالنسبه لها تنتظر هالاخ خخخخخخ..
والحمدلله الآن انا حامل بالشهر الخامس .. قبل شهر تقريبا سويت سونار وكانت معي ابيها تشوف صورة النونو .. وكانت غلطه مني اني اخذتها بس كنت ابي افرحها لأنها تنتظر .. يوم قالت الدكتوره ان جنس البيبي بنت والدكتوره تناظر في بنتي وقالت لها بتصير عندك اخت .. تفاجأت ببنتي تصرخ بالعياده وتبكي ابي ولد ولد .. الين هديتها وقلت ايه ولد .. بس بنتي تغيرت كثيييييييييييييييير .. صارت عنيفه ونفسيتها تعبانه وتضرب وتبكي لأتفه لاسباب .. وانا موظفه في روضة اطفال وهي معي .. بسبب ضربها للأطفال وعُنفها فصلتها عن الروضه لأن الكل يشتكي منها .. والمعلمات مستغربين تغيرها .. بعد ماكانت الطفله المؤدبه الهادئه صارت عنيفه وشقيّه وماعاد تدخل الفصل .. وكم مره تحرجني مع الامهات لذلك فصلتها وخلينها تقعد بالبيت ..
وصايره تضربني انا ضرب عنيف احيانا تركلني على بطني متقصده .. وفجأه طلع معي حل بالصدفه
قلت لها الولد يبكي ببطني يقول اختي تعورني .. قامت تضحك تقول هو ولد ؟؟ قلت ايه واختارت له اسم هههههههه .. وبكل مره اذا ضغطت على بطني او اتعبتني اقولها الولد يبكي وتهدأ ..
لكن عنفها مع الاطفال اصدقائها وعيال اقاربها الى الآن مستمر ..

.. قالوا لي وديها طبيبه نفسيه بس ماابي اكبر الموضوع .. لأن الكل بدا يتضايق من ازعاجهاعيال اعمامها وزوجاتهم وجدتها وحتى اخواني الصغار..
انا مدري كيف اتعامل معها واخليها ترجع مثل اول ..؟
وكيف احببها بوجود اخت لها معنا ..

حتى مره رحت السوق واخليها تختار ملابس بنت تبكي وتروح لملابس الاولاد ...

اسفه على الاطاله .. لكن ماكتبت الموضوع الا بعد ماتعبت نفسيتي عشانها واخاف هالعنف يستمر معها ..

نورا انا ودي تشوفين وجهها وملامحها اذا جبت لها طاري البنت بقصه ..

اختي مره جربت معها تقول قصة بنتين خوات كيف يلعبون مع بعض .. وحده ثانيه عندها اخو واالاخو دايم مع الاولاد او مع ابوه ومايجلس بالبيت .. وكذا .. لكن تصرخ بنص القصه وتبكي تقول مااحب البنات ..

المشكله اللي متعبتني اكثر عنفها ماادري شلون اتصرف معها
. اعجبتني فكرة المكياج مع انها بتحوس وجهي بس الشكوى لله بجربها ههههههه
اخاف اقولها اللي ببطني بنت وترفسني لاياشيخه ماراح اجيب لها طاري هالموضوع ابد ههههه

ومشكورة على الرد..

الله يعينك
وانا من رأيي انك تودينها دكتورة نفسيه بس من دون لا اي مخلوق يدري حتى هي
لاتقوين لها انك رايحه لدكتورة قولي لها انها زميلتك
وان شاء الله تنحل بسرعه قبل لاتتطور وتلقينها لاسمح الله يوم رافسه البنيه بكبرها

سوي اي شي يحمسها ان يكون عندها اخت
وافتحي مشاريع اذا كبرت تلعبون سوا وتلعبون مع بعض
ومن الكلام ذا
واذا مره مافي فايده وديها لطبيبه نفسيه وبدون محد يدري
وان شاء الله تنحل بس لا تأجلين على طول لان لازم تهيئينها من اللحين ولا بتعذبك اذا ولدتي

الله يعينا عليهم..

انا عكسك.. تبي اخت .. ماتبي اخو.. وايدي على قلبي.. خايفة يكون ولد وتنصدم بنتي!!

لانها رااااااافضة موضوع الولد بتاتا البته..

حتى ماتبي نجيبه ..


وانا قاعدة ابين لها اننا ماندري يمكن ولد ويمكن بنت..

مشكورين على الردود ..

احلاهم ... الله يعينك اهم شي لاتاخذينها لجلسات السونار تسوين نفس غلطتي
والله يقومنا بالسلامه ويكتب لنا الخير حيثما كان ..

هههههههه لا خلاص اخذتها وشافت بس كنت اقولها ماندري هو بنت او ولد..
وهي تقول لا اكيد بنت عشان يصير عندي اخت.
ماراح يكون ولد لاني ما احب الاولاد..

والحين خلاص انا اليوم بكرا بيشرف النونو وربي يستر -
اذا بنت بتفرح..
بس اذا ولد مدري عن ردت الفعل!!

ولو اني عارفه الجنس كان هيئتها لكن انا نفسي ما ادري بنت ولا ولد..

انا كانت بنتي زي بنتك بس قلت لها أن ربي جاب لنا بنت خيرة ممكن لو ربي جاب لنا ولد يكون يضربك وكذا
علميها انه مو بيدك !