الله يهدي أبوي!! .. بشو تنصحوني؟
 

السلام عليكم و رحمة الله

أنا شابة عمري 24 سنة جدًا طموحة و متوسطة الجمال و مجدة في دراستي و في عملي حاليًا و الحمدلله ، أنا أصغر أخواتي و كلهم متزوجات، من قبل ما أتخرج تقدم لي كذا حد و لكن تم رفضه إما لأنه بخيل أو لظروفه كمكان إقامته بره البلد و غيره..
أبوي أحسه جدًا قلق عليّ خصوصًا بعد ما تخرجت، أنا الحمدلله مؤمنة إنه حتى لو الوحدة كانت عايشة في قبو و رب العالمين كاتب لها الزواج .. فبتتزوج إن شاء الله .
تقدم لي مؤخرًا أحد أقربائنا و من كلام زوج أختي اكتشفت إنه المتقدم يشرب و يحب يستلف كثير و لا يرجع الدين لأصحابه، و الولد هذا أصلاً عاش في أسرة مفككة ، أمه و أبوه منفصلين. و نصح زوج أختي أبوي و خبره عن الولد. و لكن الوالد مو مصدق .. حسيت و كأنه يبه الفكة مني و يبى يدبسني فيه .. وايد تضايقت و أحس إني أبى أبكي ما أبغاه ..
أخواتي حاولوا يقنعوه إنه يرفضه، و هو بالعكس يقول بيتعدل بعد الزواج. و غير كذا الولد يشتغل عمل حر .. يعني يوم يحصل و يوم لا .. أحس إني ما بقدر أستقر معاه !
آخر شي أبوي يوم فقد الأمل من خواتي قال لهم يمكن أخطبها لولد خالتها .. و ولد خالتي مرة خلوق و طيب و حنون و متدين بس ما عنده شهادة جامعية. تقدم أخوه قبل لأختي و أبوي رفضه و فضّل ولد عمتي عليه.

على فكرة أبوي لين الحين ما فاتحني في أي من الموضوعين. بس خواتي خبروني عشان يهيؤني نفسيًا

ما حبيت طريقة أبوي لا في اقتناعه بالأول (الله يهديه) و لا في طريقة طلب الثاني لي .. محتاجة نصحكم أخواني و أخواتي ..

لو كنتوا بمكاني شو كنتوا بتسون؟

الاول ارفضيييييي بكل اوتيتي من قوه لان الوحده ماتبني حياتها على احتمالات انه يمكن يتعدل ويمكن لا هذي حياه وعشرة عمر فمن باب اولى نحسن الاختيار والا بقاك في بيت اهلك افضل
الثاني اذا كان طيب اصل وخلوق ومتدين فهذا شي مشرف وان شاء الله يصير نصيب ولايهمك الجامعه ياااااما ناس عندهم اعلى الشهادات وتفكيرهم ضيق جدا وماعنده حسن تعامل ولا اخلاق بس انتي استخيري عشان ربي ييسر لك اللي فيه الخير وابوك مايبغى يفتك منك يبغى يتطمن عيلك لانه مو عايش لك للابد يبغى يشوفك مع رجل يحميك من غدر الزمان بس مو معناته انه يزوجك لسكير مستهتر ويقول كملي حياتك هذا دورك تقولي لا استوب انا ابغى انستر وابغى اتزوج بس رجل صالح ويتقى الله فيني

رح اقبل بولد خالتي الحنون الخلوق
واشجعه على اكمال تعليمه الجامعي

وفقتـــــي في نصيحتك ..

صاحبة الموضوع .. يســـر الله امرك ..،،

اقبلي بابن خالتك بكل تأكيد

والاول ارفضي بكل ما اوتيتي من قوة على قولة يا جرح


التدين والاخلاق وتقوى الله سبحانه وتعالى لا تعوضها شهادات واموال الدنيا مجتمعه


ربي يوفقك وتبشرينا بالفرح قريب يا رب

مع كريستالة

و الشهادة مو كل شي :)

عادي عدم وجود شهادة مو سبب لرفض
اذا هو ماعندة طموح وماعندة استعداد لدراسة هذي هبة من الله
اكيد له مجال ثاني

فعلاً أنا نويت أرفض الأول و أصلاً أمي حتى رافضته .. و كل خواتي بعد
و ناوية أقول للوالد الحديث : (إذا جاءكم من ترضون دينه و خلقه فزوجوه) و أكررلهم دينه و خلقه عشان تتحسن المعايير عندهم في الاختيار .. الله يهدينا و يهديهم و الجميع
بالنسبة للثاني أنا مو حابة طريقة أبوي .. إنه هو اللي يخطبلي .. بس الله يقدم اللي فيه الخير ..
شكرًا أختي يا جرح .. بجد استفدت .. و الله لا يحرمنا من نصايحك ..

و هذا اللي كنت بجد أفكر فيه .. لأنه هو شاطر بس ظروفه المادية هي اللي منعته من إكمال دراسته

لا فض فوك حبيبتي كريستالة .. لك جزيل الشكر .. و ادعيلي

الأخوات ما قصرن وأنا معهن في ما اقترحن من أن ترفضي الأول وتقبلي بالثاني والشهادة هي شهادة الخلق والدين كما ذكرت في الحديث الذي قاله المصطفى عليه الصلاة والسلام
ولا تنسي أن الشهادة ممكن تداركها لكن سوء الأخلاق مستحيل تعديله إلا أن يحدث الله أمرا
أسأل الله أن يختار لك ما فيه الخير وييسر أمرك
وأسأل الله أن ينبه أبوك لذلك
الله يسر خطبتك من ابن خالتك بطلب منه
ولا تنسي أن تعزيمنا بالعرس الله يوفقك ويبارك لك

http://www2.0zz0.com/2010/11/01/21/991585849.jpg