الخفقان و زيادة الوزن
 

السلام عليكم يا دكتور احمد
في البداية احب اشكرك على جهدك المتميز الواضح في هذا القسم وجعله الله في ميزان حسناتك
ثانيا انا عندي كام سؤال
١ـ انا الحمد لله حاليا وصلت للأسبوع ال٢٨ من حملي الثالث ولكن زيادة الوزن على حسب ميزان العيادة ٣,٥ كجم من اول الحمل ولما سألت الدكتورة قالتلي انه مفيش مشكلة وده كان من اسبوعين واغلب الزيادة حصلت اول الحمل لكن من الاسبوع ال17 وحتى اخر زيارة من اسبوعين الزيادة نصف كيلو بس..هل ده طبيعي ولا فيه مشكله والجنين المفروض وزنه بيزيد وانا مش ملاحظه ان بطني بتكبر بوضوح
ملحوظه انا باكل عادي مش بعمل اي رجيم طبعا
٢ـفي بعض الاوقات بتحصل حاله من الخفقان بحيث يوصل النبض ١٠٠ الى ١٢٠ في الدقيقة وبحس بهبوط شديد جدا وارهاق ومش بقدر اتحرك قبل ما النبض يرجع طبيعي بعد ١٥ او ٢٠ دقيقة والموضوع بيتكرر مثلا كل يومين او ثلاثة مع العلم ان ضغط الدم عندي في اطار ال ٩٠ الى ١١٠ /٦٠ من اول الحمل
فتفتكر حضرتك الحالة دي ايه السبب فيها وازاي اتفاداها
واخيرا الف شكر

1- لا في سيدات مش بيزيدوا كتير في الوزن لطبيعتهم اصلا
والجنين بنطمئن عليه بالسونار

2- معلش انا عاوز أسألك برضوا انت ازاي عرفتي الأرقام الدقيقة لمعدل النبض بتاعك؟
انت بتشتكي من مشاكل صحية وبتتابعيها

السلام عليكم يا دكتور احمد
بالنسبة للوزن فانا في الحملين السابقين زاد وزني 20 كيلو في المرة الاولى و 12 في الثاني عشان كدة مستغربة من الزيادة البسيطة المرة دي ومش كل مرة بيكون فيه سونار لان شركة التامين بيدفع 3 فحوص سونار خلال الحمل عند الاسبوع 8 و 20و 30 والباقي تحاليل و كشف موضعي
اما موضوع النبض فانا عديت النبض لكل دقيقة في الوقت اللي بحس فيه بزيادته وانا الحمد لله ليس عندي مشاكل صحية مزمنة اكثز من الصداع النصفي و الضغط المنخفض زي ما قلت لحضرتك واللي بيكون مكتوب في دفتر المتابعة وده من قبل الحمل هو العادي بتاعي

لما بتحسي بالخفقان بتكوني بتعملي مجهود او في حاجة معصباكي مثلا؟ والا بيجيلك وانت مرتاحة جدا وريلاكس؟

السلام عليكم يا دكتور
الخفقان ممكن احس بيه بدون مجهود مثلا وانا بشتغل على الكومبيوتر في المعمل مكان عملي يعني تقريبا مفيش حركة او توتر وبيرافقه الاحساس بالارهاق او الدوخة و الهبوط مش عارفه احدد بالظبط

لا في الحالة دي انصحك تزوري طبيب ... لو تأكد من شكواك وتكرارها ممكن نديكي جهاز تاخديه البيت يتركب لك 24 ساعة نراقب ضربات قلبك فيها

شكرا على ردك يا دكتور
قصد حضرتك الجهاز اللي زي رسام القلب بس بيسجل تغير نشاط القلب لمدة يوم كامل؟؟ اانا عندي فكرة عنه وهسأل الدكتورة تاني لأني سألتها المرة اللي فاتت من ٣ اسابيع وقالتلي ان السبب تغير في الherzachse بسبب ضغط الرحم على الحجاب الحاجز و بالتالي تغير وضع القلب
طيب حضرتك تنصحني اروح لطبيب باطني (طبيب الاسرة) ولا طبيب قلب ؟
بس ياريت حضرتك لو شاكك في حاجة محددة تقولي عليها واكون شاكرة لسيادتك
ومرة تانية الف شكر وربنا يبارك لك في صحتك ومن تحب

لا هو الحمل فعلا بغير دورتك الدموية لأسباب كتير الحقيقة

بس المشكلة انا بعيد عنك وماشوفتكيش وجها لوجه وانا بس بحاول احرص من لغط القلب وهو احتمال مستبعد بس الحرص واجب
لكن لو الطبيب اللي هايشوفك وجها لوجه طمنك يبقى خلاص لانه على الواقع يقدر يقيمك احسن مني

اه طبعا هاتروحي لطبيب الأسرة ده النظام في ألمانيا