|
منين ابتدى الحكايه
السلام عليكم عليكم ورحمه الله وبركاته م اني عارف منين ابتدى الحكايه ، لكن بحاول اكتب الموضوع بـ اختصار وانتظر ارائكم على احر من الجمر . في البدايه انا انا شاب مقبل على الزواج عمري 29 سنه ، في الفتره الأخيره كنت افكر كثير في الزواج وكلمت الوالده والأهل يبحثون لي عن عروس ، كان عندي شرطين ، تكون طيبه ومقبوله شكلياً ما اشترطت تكون جميله . في اواخر شهر اثنين كلمتني اختي انهم لقو وحده ، كويسه ومتعلمه توها جايه من الخارج معها ماستر ، سألت عن امها قالولي دينه وسألت عن عمرها ذكرو لي انها مثل وحده تقربلي ، هنا اول غلطه ارتكبتها ماسألت عن عمر الي تقربلي ، المهم اعطيتهم الضوء الأخضر بعد ما اخذت عمره واستخرت في الحرم وارتحت كثيير تمت خطبه النساء ، في هذه الفتره طلبت من الوالده اني اتواصل مع البنت عن طريق الجوال رفضت وعللت ان هذا الأمر عيب وم اقدر اطلب من امها هذا الطلب وهنا كانت غلطتي الثانيه اني م اصريت على الموضوع . شفت البنت وارتحت لها وهي كذلك بعدها حدثت خطبه الرجال ، لحد هذه اللحظه كل شي حلو وممتاز ، استأذنت وقدرت اتواصل مع البنت بالجوال لـ الأسف اكتشفت اشياء عجيبه ماكانت مثل م وصلتني اولها ان البنت متأثره كثيير ب حياه الغرب واسلوبهم ، مجالها له علاقه بـ الأمور الطبيه وانا وصلني غير كذا نهائياً عن تخصصها ، تحب الخرجات والكافيهات وجلساتها كثييير ، جافه جداً معي رغم اني اجاملها تكلمت عن الأختلاط في العمل وانه عادي مافيه شي مثل الأختلاط في الشارع وعملها مهم جداً لها وتحبه ( توها متخرجه م اشتغلت ) ، انصدمت كذلك في العمر طلع 27 سنه حسيتها كبيره علي انا قالولي تخرجت ومباشره للخارج جلست ثلاثه سنوات والأن توها راجعه يعني بحسبه بسيطه بيكون 25( عموماً العمر ماهي مشكله كبرى لي ممكن اتغاضى عنها مع العلم اني احسب بغصه تمنيت انها اصغر وتمنيت انهم وضحو لي من البدايه ) كذلك تحدثت عن النقاب وانها خارجه المدينه الي ننتمي لها م تلبسه . تضايقت كثيير وبعد يومين من التطنيش لها والتفكير قلت لها عندي مجموعه من الأمور بوضحها لك ومثل م قالو الي اوله شرط اخر نور : كلمتها عن اسلوبها الجاف هل الغرض من ايصال رساله معينه خصوصاً انها كانت لها اسأله غريبه مثل هل لك علاقه مع بنات وانا رديت عليها بالمثل هل لك علاقه مع عيال صدمتني بجواب اني لا م فكرت اطور علاقتي مع احد فقط متواصله مع البنات ( الصدمه من الأسلوب ) واخبرتها اذا كنتي مجبوره يابنت الناس قوليلي وانا احل الموضوع ، والنقطه الثانيه العمل اعطيتها خبر ان دوام في مكان مختلط مافيه اما مكان نسائي او تجلس في البيت ، النقطه الثالثه النقاب يكون دائم وفي كل مكان ( الغريب في الأمر وصلني ان امها دينه ومن اهل التحفيظ ) بعد يومين ردت علي وقالت والله اسفه واعذرني وانا غبيه وم اعرف اتكلم والله العظيم اول مره اتكلم مع شخص وماني عارفه افتح سوالف وقلت لي انك حق منتديات جاء هذا السؤال في بالي وسألتك عن البنات ، وبخصوص العمل ماهو بلازم في المستشفى بدور على مكان نسائي وبخصوص الغطاء بلبسه في كل مكان ماهو فقط في المدينه المتواجدين فيها . بعدها بيومين كلمني ابوها واجتمعنا وانصدمت انه قالي الملكه (كتابه العقد) يوم الأثنين القادم وجلس يتكلم عن البنت وانها مشتريتك وهي اعجلتني ،الملكه محددينها في نهايه شهر اربعه وما زالت الحفله في وقتها . محتار ياجماعه الخيير لمحت لـ ابوها على التأجيل لكن م قلت له بصراحه ،وهو ونعم الرجل والله محترم جداً واخلاق ، ا نحرجت اطلب التأجيل ، كنت محدد الزواج في شهر سته وأجلته كل شي متعسر معاي كأنها تنبيهات حسابي في البنك صارت له مشكله ومتوقف حتى راتبي ماني قادر اسحب منه والقرض كذلك متوقف ، لفيت مدينتي كلها ما حصلت شقه كنت حاجز شقتين ومتفق مع اصاحبها فجئه قالي المأجر انه بطل مايبغى يأجر ، والشقه الأخرى اول ماخلصت وكنا على اتفاقنا فجئه جاني بطلب عجيب اني ادفع مقدم اجار ثلاثه سنوات ، زميلي في الدوام قال ممكن خيره لك والكلمه كان لها وقع شديد في نفسي صرت مهموم محتار حتى اخوي لاحظ هذي الأمر وقال لي اذا ماودك ماهو لازم وانا متردد ومحتار كثيير حاس بضيقه ودي اهون لكن خايف اظلم البنت وفي نفس الوقت خايف اقدم على الموضوع . اتمنى تنوروني بـ ارائكم محتاجكم كثيير ، واعذورني على اسلوبي مالي في الكتابه ، واعتذر على طول الموضوع لكن حبيت اعطيكم تصور كامل . |
أولا مبروك عليك الخطبة ونتمنى لك كل السعادة ثاني حاجة عليك بكثرة الدعاء والاستغفار الى ان يصفى بالك في مثل خالتك صعب النصيحة لأن مافي شيء واضح لأن تتراجع فما ما يدور في راسك مجرد شكوك لاكن لاتضغط على نفسك اذا ما انت متأكد من قرارك تماما أطلب تمديد وقت للملكة وفكر بهدوء اما فيما يخص بتأثر الفتاة ببعض عادات الغرب صدقني مافي انسان يغترب الا ويتأثر ولو بالشيء القليل ولا يمكنه ان يعرف بمدى تغيره الا شخص يعرفه عن قرب المهم انها دات دين وخلق ربي يوفقك للي فيه خير لك ولها |
|
استخير ربك كثير واجل الملكة
واذا ما ارتحت افضلك تفسخ الخطوبة قبل لاتعقد والله يقدر لك اللي فيه الخير بالتوفيق |
لاتقدم على خطوه الا وانت مقتنع الله يجزاك بالخير
و باين البنت مشتريتك مسأله العمر احب اوضحها لك تخرجت من الجامعه 23 طلعت ماستر 3 سنوات = 26 سنه ماكذبوا عليك فيها الله يوجهك للي فيه خير وخيره لكم |
امس اجتمعت مع ابوها وكلمته عن اعتراضي على مكان الوظيفه ، واليوم كلمني ان البنت رجعت تمسكت فيها ، اختلفنا وكل واحد راح في طريقه الله يوفقها ويكتب لها الخير وتحصل الي يصونها ويحفظها والله يكتب لي الخير والاقي بنت الحلال .
اشكر كل الي عقبو على الموضوع |
اتمنى حذف الموضوع .
|
زميلي في الدوام قال ممكن خيره لك والكلمه كان لها وقع شديد في نفسي صرت مهموم محتار حتى اخوي لاحظ هذي الأمر وقال لي اذا ماودك ماهو لازم وانا متردد ومحتار كثيير حاس بضيقه ودي اهون لكن خايف اظلم البنت وفي نفس الوقت خايف اقدم على الموضوع
................................. سبحاان الله هذا كله مكتووووووب ومقدر من ربك لآنك لجأت لربك واستخرته واستشرت رب الأرباب والحمدالله انها انتهت الحكـــــــــــــــــآآيه ... اللهم يا رب يا اللـــه يا حنان يا منان يا بديع السموات و الارض يا ذا الجلال و الاكرام يا حي يا قيوم يا بر يا رحيم ,,,اللهم اني اسالك بعزتك و ذلنا و قوتك و ضعفنا و غناك و فقرنا و اسالك بانك انت اللــه لا اله الا انت الاحد الصمد الذي لم يلد و لم يولد و لم يكن له كفوا احد و اسالك بكل اسم هو لك سميت به نفسك او انزلته في كتابك او علمته احدا من خلقك او استأثرت به في علم الغيب عندك ان ترزق أخووي الحائــــــــــر زوجه هنيه دينه مرفوعا ذكرها في السموات و الارض و ترزقه منها الذرية الطيبة عاجلا غير اجل انك على كل شيء قديــر,,, اللهم يا ذا الوجــه الاكرم و الاسم الاعظم و العطية الجزلى يا ودود يا ودود يا ذا العرش المجيد يا مبدئ يا معيد يا فعالا لما تريد اسالك بنور وجهك الذي اضاء اركان عرشك و اسالك بقدرتك التي قدرت بها على جميع خلقك و اسالك بعزك الذي لا يرام و ملكك الذي لا يضام ان ترزق أخووي الحائـــــــــر زوجه صالحه طيبه حنونه مخلصه وفيه جميله طيبه المعشر انك على كل شيء قدير,,, لا اله الا انت سبحانك يا مغيث اغثه وأعنه يآآآآآآآآآآآآآرب ,,,, آمين يارب ... قريب نسمع أخباار مفرحه :14::14::14: إن شاء الله ... |
^
أمييييييييييييييييييييييين أميييييييييييييييييييييين أمييييييييييييييييييييين |
وفقك الله أخي الكريم واسعدك، الحمدالله، وبما أنك أستخرت فثق أن الله عز وجل اختار لك القرار الأنسب، وهذا ماينسبك، فالحمدالله على كل حال.
|
| الساعة الآن 11:08 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©