|
لا أريد أن اكون انثى (رجل الرجال)
السلام عليكم ...
ادري ان عندك استشارات وايد وانك مشغول ~ الله يعطيك العافية ،،، أنا عندي مشكلة من زمان من وانا صغيرة الى الحينه و لها تراكمات كبيرة وايد و تكبر مع الزمن ... مع أني مستحيه أقولها أخاف أتفهم غلط عسب جيه ما ارمس فيها وايد أتمني أتخلص منها و ابيك تقولي شقايل أتخلص منها ... مشكلتي او عقدتي أني مابي اكون انثي و اكرررره هذا الشي لا ارادياً .. حاولت و قاومت وايد لكن مع كل موقف ترجع و ظروف كثيرة زادت هالعقدة عندي .. حتي صرت اكره احمل أخاف ايب بنيه ، و تتعب بعدينه و اجلت الحمل بعد ولدي الى الحينه عسب جيه .. نفسيتي تتعب اذا فكرت انه ممكن ايب بنيه اقول حرام شو ذنبها استحي اروح دكتور نفسي يقولون مريضة ~~ هالعقدة سببها أشياء وااااايد من طفولتي و الله طبعا ما راح اقدر أقولها كلها لكن بقول بعضها .. امايه الله يهديها كانت تقولي كلام ما ينقال حق بنيه صغيرة و بعد تلبسني ملابس صبيان و تقص شعري بوي و تزقرني باسم صبي مع ان عندها ولد بس مادري ليش ؟! و تقول اذا مات أبوج بيصير فيج جي و جي و تألف لي قصة طويله مرعبة و أقولها ليش تقول عسب انتي بنيه و البنيه جي يصير فيها !! ابويه الله يسامحه ما قصر تزوج على امايه حرمه مب زينه و كنت اقول ليش جيه ابويه عنده حرمه غير امايه و امايه ما عندها الا ابويه ~~ تفكير على قدي طبعا لأني كنت أشوفها تتعب وايد و ابويه يروح و ييي على كيفه و هاملنا و هامل امايه معنا ... فكنت اقول لها روحي يبي ريال غير ابويه فتقول لا ما يصير أبوج ريال و أنا حرمه ~ يعني الريال بس هو اللي يسوي جيه أنا تعقدت وقلت اذا ما ابي أصير بنت ابي أصير مثل ابويه كبرت و الأفكار تكبر معي و العقدة تزيد بشكل وايد كبير و مع كل موقف وثاني اسمع كلمة البنيه غير عن الولد و انتي بنيه عيب تسوي جيه ~~~ و كل موضوع يخصني لازم ابويه يعرفه و امايه ما تكفي يعني !! هو وايد يعارض أشياء و امايه مسكينه ما لها كلمة و اخويه على كيفه و ما حد يساله وينك فيه و لا يدخل فيه أنا احب امايه وااااااايد و ااااااايد و أتعاطف معها و تالم لكل شي ياذيها و هي كانت دايم تشكي و تبكي و صرت حسااااااسه وايد من اي كلمة اتاثر ما فكر بعقل أبدا أبدا قلبي يحكمني بشكل كبير ~~ و هذا سبب بعد لعقدتي خاصة يوم اشوف الريال قاااسي و ما يفكر الا بنفسه و بقسوة و عادي عنده كل شي و بعد وانا صغيرة كانت الأبله تشرح لنا الدين بطريقة غلط و الأحاديث الخاصة بالمرأة و الحجاب و النار و قوامة الرجل و معلومات وايد كلها مب مقتنعه فيها ~ و يبون لنا محاضرات دينيه عن العفة و الطاعة و الزينة بطريقة ما تناسب بنات صغار في المتوسط .. و البنيه اللي ماتت عسب نمصت و الثانية اللي ماتت و تعذبت عسب كانت ترقص و قصص مب صح ~ و كبرت عقدتي يوم عرست الله يسامح ريلي تذكرت كل كلام امايه لي و اغلبه صح !!! وان الأنثي مظلومة وااااايد و تتحمل امور وااااايد .. و أنا كنت رافضة أتزوج لأني كنت معقدة من حياة امايه و يا ابويه و علاقتي بأخواتي وإخواني من ابويه خلا عندي إحساس أني بمرتبة ثانية مب اولي .. فكنت ارفض أتزوج أخاف الماضي ينعاد معي .. ابي ريال غير عن اللي عرفت ، يحبني أنا و بس و ما يكون مثل ابويه عصبي و يهملني او يفضل عليه غيري .. مخاوف كثيرة و عقد وايد متراكمة داخلي ~ الى ما تزوجت في الاخير و ليتني ما تزوجت .... ريلي هادي خلوق متدين لكن كان جاف معي في البداية الا ما عرفت انه يحب وحده ثانية لكن هي عرست و راحت بحالها و بعد سنتين من زواجنا تطلقت و تزوجها ريلي تغيييرت وايد و تعبت نفسيتي و طلعت عقدتي بشكل أوضح ريلي ما تغير لكن أنا داخليا تغيرت و اختلطت كل احداث الماضي بالحاضر و ارتبطت كل الماسي و الألم عندي بالانثي و رجعت بمرتبة ثانية مثل ما كنت طفلة بمرتبة ثانية ~ و ما قدرت اسيطر على نفسي الا الحينه ما بي اكون زوجة و مابي احمل بعد ولدي و مابي أولد و مابي اكون مطيعة و ابي اكون حره اسوي اللي ابيه و ما حد له خص فيني ابويه قاطعته من زمااااان يذكرني باشيا ابي أنساها و امايه ما تحمل كلامها رغم أني احبها وايد... ابي انسي بس مب قادرة ، ابي أسامح بس عجزت ابي اقتنع بجنسي و بحياتي و نصيبي بدون إحساس بالظلم و الإهانة و الدونية ... ابى اشيل كل هالافكار من ذهني و ارتاح ... ابى احب نفسي مثل ما هي و افصل بين الماضي و الحاضر * |
ابنتي الكريمة :
ماشاء الله تبارك الله فكر واعي ونفسية جميلة وعقلية متوازنة استعرضتي كل المطلوب منك قبل أن أطلبه وعلاج هالموضوع وتحقيق رغبتك في آخر موضوعك بالتمرين التالي : أكتبي رسالة لوالدتك بخط بيدك تخبرينها بما كانت تقول لك من أمور خاطئة ثم أكتبي لها ما كان يجب أن تقوله لك من أمور صحيحة وكتابة هذه الرسالة ليس عتاب لها ولا إنقاص من قيمتها بل هو رفض لسلوكها الخاطيء معك وأنت طفلة واكتبي رسالة لوالدك ولكل الرجال القساة مع النساء توضحين لهم خطأ ما يفعلون. أكتبي بحث صغير عن سلبيات الرجل وسلبيات الأنثى وإيجابيات الرجل وإيجابيات الأنثى ثم بعد أداء التمرين نتابع. |
و الله نفسيتي مب زينه ولا شي ...
كتبت رسالة لامايه بس كانت رمستها صح الخطأ بس انها قالتها ليه وانا صغيرة .. و ابويه بعد كتبت له و تذكرت امور وانا اكتب قهررررتني البحث كتبته بعد بس تصدق ما لقيت ولا سلبيه للرجل كلها ايجابيات طبعا لأني متخيله نفسي مكانه و لا لقيت اي إيجابية للانثي الا كلها سلبيات في سلبيات حاولت اركز و ادور منيه مناك اي سلبية للرجل او إيجابية للانثي لكن حسيت أني اخدع نفسي واكتب شي مب مقتنعه فيه .... |
ابنتي الكريمة :
تكلمي مع الوالدة عن كلامها لك وأنت صغيره وناقشيها ليش قالت كذا وليش حشت راسك بهالسوالف وعلميها الصح. تذكري أن الرجل والمرأة على حد سواء . |
اقتباس:
وشو اعلمها وانا عندي افكار اكبر بوااايد من كلامها ..!! و الريال و المراة مب على حد سواء اذا كان الدين يفرق منبينهم شلون في الحياة ...!!!! اصلا انا عارفة ان مافيه امل اتغير انا جي من زماان .. و جزاك الله خير ... |
ابنتي الكريمة :
في المنتدى مواضيع مماثله إلى درجة المطابقة وتمت مناقشتها والرد عليها لعدد من الأخوات وحفظاً للوقت والجهد أرجو الرجوع إليها والاستفادة منها. |
| الساعة الآن 01:59 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©