|
الوالده وزوجتي
السلام عليكم ورحمة الله وبركاته.. مشكلتي الوالده الله يطول بعمرها قبل فتره صارت بينها وبين حرمتي مشكله اللي عرفته أنه حرمتي غلطت والوالده ما قصرت فيها ,, وحرمتي معترفه بهذا الشيء انها غلطت , المشكله الوالده الله يصلح حالها لليوم واضح عليها زعل يوم تكلمني كلمتين ورد غطاهم كانت زيارتي لها قليله بس كنت متواصل وياها بتليفون ساعات أكلمها باليوم أكثر من مره لاني حاس أنها زعلانه مب طبعها هي دووم تحب تسولف وياي وتسألني عن حرمتي ولكن هذا الاسبوع أبد ,, سالتها شو فيج في أحد مزعلج الوالد مزعلج :25: ,, بس بصراحه ما حاولت أفتح موضوع زوجتي ,, ترد عليا لا يا ولدي الله يعينك بس ,, والمشكله أني متأكد أنها تحب زوجتي ولا ترضى أني أغلط عليها , وهي دووم تقول عارفه ظرووف حرمتك ... لحين مب عارف شلون أرضيها , كيف أقنعها بطريقه غير مباشره انها لو حاطه بالها أن زوجتي تيجي وتعتذر منها هذا من سابع مستحيلات زوجتي وأدريبها ,, مب ناقص مشاكل اللي عندي مكفيني بس والله يهمني رضاها.. وصارت بعد هذا الاسبوع اول مره اسمعها منها كل ما أكلمها أو أقولها سامحيني أنا ادري مقصر وياج ولا أزورج كل يوووم تقعد تقول انا مب بالبال يا خالد الله يهديك , والله العظيم أكره نفسي يوم أسمعها تقول هذا الشيء والعبره تخنقني هذه أمي تقول جي شو شو أسوي أحس مب قادر أرضي احد .. والسموحه على الازعاج ... |
رد : الوالده وزوجتي
هلا أخوي
اشحالك أول شي رح ايلس مع امك تفاهم وياها عن تقصيرك انت معها بعدين حرمتك مستحيل تتعتذر عشان جذى رح لأمك زيارة ثانيه مع زوجتك وابتدو صفحه يديده ولا تيبون سيرة المشاكل اللي طافت وخذ لها هدية وياك الله يعينك والله |
رد : الوالده وزوجتي
أشتر هدية حلوة وروح لأمك وأجلس عند رجولها بعد ماتبوس رأسها ويدها
وقول لها يمه مو هاين علي زعلك وضيقك مني وقلبي يتقطع لاشفتك تعامليني بجفا وإذا كان بدر من زوجتي إساءة فحقك علي وتقدر تأخذها معك بالسيارة لمطعم وتعزمها وتجلس معها جلسة وديه وتقدم لها الهدية وبتسامحك أنت ضناها وتحبك الله يحنن قلبها عليك ويهدي زوجتك ويسخرها لك |
رد : الوالده وزوجتي
من جملتها الله يعينك
أظن انها بدأت تفهم و تحس اللي كنت تشتكي منه فهي يمكن زعلانة ( عليك ) مو منك و منها |
رد : الوالده وزوجتي
الله يعينك بصراحه
حاول إرضاء امك , لانه رضاها بدنيا وما فيها حاول معاها بكل الطرق صدقني بترضى لانها تحبك واضح انها زعلانه عليك وعلى وضعك مع زوجتك ( الله يهديها هي كذلك ) . |
رد : الوالده وزوجتي
طيب المشكلة بين امك وزوجتك انت وش دخلك تزعل عليك من جد الله يعينك ’’
|
رد : الوالده وزوجتي
السلام عليكم ورحمة الله تعالى وبركاتة
خالد ليه قاعد احسك ضعيف وقليل حيلة !! هاذي امك يارجل الدنيا كلها كوم وهي كوم الحالها ، خذ مرتك دامها معترفة بخطأها وخلها تروح تعتذر ( امك ثم امك ثم امك ) والله ان حب الام عبادة ، ولاتنسى ان جنتك حدر رجليها ، ورضاها من رضى الله عليك ، لاتراعي وتتفهم شعور زوجتك وعنادها ، وتترك امك زعلانة ، الام ماتتعوض ياخالد ، ودامها بالدنيا استقل هالشي وبرها عسى ربي يرحمك ويكتبك من البارين . شغلة ثانية امك المفروض تكون عند زوجتك خط احمر ما تقبل عليها اي شي حتى لو كانت مخطئة ، وبعدين زوجتك جاهل تجي اتغلط على امك الكبيرة بالسن ؟؟ اتخيل انها مو امك فقط انها حرمة كبيرة بالسن ترضى زوجتك تغلط عليها !!! طبعاً لا الدنيا مافيها خير ياخوي ياخالد بوس رجول امك وخل زوجتك تعتذر بأي طريقة او حيلة تناسبك شد حيلك شوي بس واحزم . كل الإحترام. |
رد : الوالده وزوجتي
الله يهديك اخوي
امك ثم امك ثم امك والرجال مافيه خير ان ماكان فيه خير في اهله وزوجتك داامها غلطت على امك من حقها أمك تعتذر لها زوجتك حتى لو امك ماقصرت فيها لان زوجتك اللي بدت وغلطت لاتقول مستحيل ترضى زوجتي انت زوجها واجبرها علم زوجتك تحترم امك واهلك عشان تتعلم ان تحترمك المفروض الوحدة تحترم كل من هو كبير في السن حتى لو غلط عليها فكيف ام زوجها الحق اشتر هدية لامك وخذ زوجتك وروحوا لها وسوو قهوتكم واجلسوا معها عصرية او مغربية وتعتذر زوجتك وتحب راس امك وانت بعد وقدموا لها الهدية وبتشوف امك كيف تفرح وترضى عنكم ترى قلب الام رهيف على ابنائها وبسرعه ترضى ويطيح الحطب عندها يالله همتك الليلة وخليها جمعه مميزة والله يفرج همك ويكفيك كربك ويعينك:d |
رد : الوالده وزوجتي
اقتباس:
هلا وغلا أخوي الوالده متعوده أني دوووم أزورها بس هالفتره انشغلت بمشاكل البيت ولكن كنت اتصل فيها أكثر من مره باليوم وحسيت أنها زعلانه , زوجتي مستحيل ترضى تسير وياي لانها في نظرتها الموضوع انتهى هي غلطت والوالده مدت أيدها , لكن بسير لها بروحي وبخليها أطلع اللي بخاطرها وبعتذر لها ان شاء الله تهدأ نفسها .. ايه والله الله يعين شاب شعرنا من زواج :25: |
رد : الوالده وزوجتي
اقتباس:
الله يسمع منج والله يجزاج خير |
| الساعة الآن 05:17 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©