منتدى عالم الأسرة والمجتمع - وش ذنبي إذا ما أحب أجلس بالبيت ’’ كرهت نفسي ’’ وزوجتي تضايقت ’’

منتدى عالم الأسرة والمجتمع (http://www.66n.com/forums/index.php)

- المتزوجين (http://www.66n.com/forums/forumdisplay.php?f=6)

وش ذنبي إذا ما أحب أجلس بالبيت ’’ كرهت نفسي ’’ وزوجتي تضايقت ’’

السلام عليكم ورحمة الله وبركاته ’’

مساء الخيرات لكم جميعا ’’

الموضوع باختصار ’’ إني ما أحب أجلس في البيت ’ وأحب حاجة اسمها شغل ’’
في الابتدائية كنت أخلي الوالدة تسوي سندوتشات وحلويات وكيك وأبيعها وكنت أشتري كييس كامل لشيبس البطل وأعطي البطاطس أخوني وبعضها أبيعه بالفصل وأجمع الصور وأبيعها ,,
في المرحلة المتوسطة كنت أغسل سيارة أبوي وانظف الحوش وآخذ 200 ريال شهريا والوالدة الله يحفظها معلمة متقاعدة وكنت أغسل الملابس وأكويها , طبعا الرجالية فقط , ملابسي وملابس أخواني فقط هههههههههه وآخذ 150 ريال شهريا وكنت أيام المواسم مثل الصيف أبيع آيسكريم على العيال في الحارة إذا تذكرون عصير التانج والفيمتو نحطها في أكاس ونحطها في الفرايز أو الفريزر ثم نبيعها بعد ما تتثلج ’’ وأيام رمضان والعيدين كنت أبيع طراطيع وصواريخ على عيال الحارة ’ كنت أحب حاجة اسمها تجارة وشغل ’’ ما أدري ليه ’’ بس في شايب كبير بالسن عندنا بالجماعة يقول فلان هذا ( يقصدني ) مثل فلان يقصد أبو جدي ’’ يشتغل بأي حاجة وحتى يوم صرت بالثانوي والجامعة صرت أقصد على الجماعة والمعارف أدوات كهربائية واللي أعرفه إن آخر مرة طلبت أبوي فيها فلوس كانت أولى متوسط وبعدها من فضل الله علي إلى الآن لم أطلب أحد ولن أطلب أحد بحول الله وقوته وفضله وإنعامه ,,
يوم تزوجت قلت الحين أبدأ أرتاح وأجلس بالبيت وراحت أيام الشغل والتعب الحين الحمدلله تزوجت ومن هالكلام ’’ لكني تفاجأت أني لا أستطيع أن أجلس بالبيت أتضايق جدا وأتنرفز ’’ لازم أطلع أشوف لي أي شغلة ليش ما أدري ’’ حتى الوالدة والله إنها بعض الأحيان تبكي على حالي ’’
هذا جدولي ’’ وأنتم احكموا ,,
العمل مدرس : الدوام من 6 ونص إلى 12 ’’
العودة : بعد صلاة الظهر ’’
إن كان هناك تكليف للجامعة أتممته ونمت ,, وإن لم يكن هناك تكليف أتغدا وأنام ’’
العصر : أروح المؤسسة وما أطلع منها إلا 10 مساء أو 10 ونص وأذهب للبيت وأتعشى وأنام ,, ولا تقولوا لي حط عامل ’’ حطيت عامل وسرقني الله لا يوفقه ’’ تجارتي بيدي أنا أشتغل فيها وما أثق في أحد تماما ’’
الماستر بعد التنسيق مع عمادة الكلية تم جعل جدول الماستر يوم الأربعاء من 4 إلى 10 وثلث مساءًا والخميس من 8 إلى 2 ونص مساءًا والعصر أروح المؤسسة وما أرجع البيت إلى الليل ’’
بالعربي ما أفضى لزوجتي وبنتي إلا صباح الجمعة مع أني غالبا أكون مرهق إلا أني دائما ما أقوم بدري وأفطر معهم ونجلس مع بعض أو نخرج ليلة الجمعة إلى الفجر ثم أرجع وأنام ’’

هذا جدولي ’’ وماني قادر أعدل شيء ’ والله إني أحزن لزوجتي ولبنتي لكن عزائي الوحيد إني باني لهم فلة فيها كل شيء وغالب أدوات الترفيه من مسبح وأدوات رياضية وألعاب وغيرها ’’ ومؤمن لهم عمارة مؤجرها وإيجارها دخل لهم ’’ أما غير كذا ماني قادر ’’

يا جماعة الخير ’’ زوجتي أحسها بدت تتضايق كثير وتتذمر من الوضع اللي احنا فيه ’’ والفلوس ما هي كل شيء لكن أحس إني مدمن شغل ’’
الناس تأخذ إجازة وتتمشى ’’ وأنا آخذ إجازة وأشتغل ’’ هههههههههه والله حالة ’’ تصدقون إني مسافر لماليزيا بالأهل ونيتي ماهي عشان أفرح أهلي ولكن عشان أشوف بضاعة وأرجع ’’ يا ناس والله تعبت أحس إني مريض ولا موسوس ’’ كرهت نفسي من كثر ما أشوف زوجتي متضايقة ومتحمله الوضع ’’

ياناس وش أسوي ’’’ في الإجازة إذا ما كان عندي شغل أتضايق في البيت وأتنرفز مع إني أكتم ذلك لكن بعض الأحيان توصل لمرحلة خلاص لازم أطلع ولا أسوي مصيبة في البيت ’’ ما أرتاح إلا إذا طلعت خارج البيت ’’
حسبي الله ونعم الوكيل ,,