ياكثر كلامك أسكتِ شوي! ، وتغيرت حيـاتي!
 

السلام عليكم ورحمة الله وبركاته
،
أحبتي أقول لكم مشكلتي هذه بعد أن ترددت كثيراً في طرحها وبعد معاناة 5 سنوات الحمدلله على كل حال ، كنت إنسانة ثرثارة نوعاً ما إذا جلست بمجلس أكثر مايمسك المجلس ويسولف أنا وواثقة من نفسي عادي أسولف مع الشخص أول مره أشوفه كني أعرفه من زمان حساسه وأحب المرح والسواليف أكره الهدوء والخجل (الخجل مو الحياء) وقبل 5 سنوات كنا بمجلس فيه عماتي وبناتهم وأبوي وأمي وأهلي كلهم وبنت عمتي تتكلم بموضوع وتكلمت أنا بنفس الموضوع بنص السالفة قالت عمتي (ياكثر كلامك أسكتِِ شوي)!! سكت ومسكت دموعي وهم يناظروني جلست شوي وطلعت لغرفتي أبكي كرهتها لكن الله يسامحها ماعندي إحساس تقول لي كذا كان قالت لي ونقدتني لوحدي مو كذا قدام الناس وتنتقدني بإسلوب عادي أتقبل بصدر رحب لكن أسلوب زي كذا مايقوله ولا ...... وبعدين أنا توني أتكلم من جلست بالمجلس وكلهم يتكلمون مو بس أنا قلت والله من اليوم ما أفتح فمي إلا للضرورة وليتني ماقلت الحين ما أسولف أبد نادر جدا جدا أسولف ومو مع أي أحد وثقتي بنفسي شبه معدومة أحياناً عندي سواليف كثيرة بس ما أسولف! فن الإلقاء والحديث شبه معدوم وقبل كانت الناس تتعلم مني وتسألني عن فنون الإلقاء الحين الله يرحم الحال بس من ذاك الموقف تغيرت كّلي والكل لاحظ علي تغيري مدري تحطمت نفسياً ولا مدري شسالفة ودي اقرأ على نفسي لعله يزول مافيني والله اتمنى أرجع زي أول لو أقدر أزور طبيب نفسي بدون علم أحد رحت حتى أمي ما ابغى تحس أن فيني شيء لكن صعبة وكل سنة أكون اسوأ من قبل ، رجل الرجال اتمنى الله يوفقك ويسعدك ويطول بعمرك على الطاعة والصحة والعافية تساعدني بمشكلتي والله مستعدة أطبق كل كلامك وكلام الأعضاء الله يبارك فيهم.

رد : ياكثر كلامك أسكتِ شوي! ، وتغيرت حيـاتي!
 

اختي انا بنت مثلك واعرف شعورك


لاتكونين حساسة جدا .. اجلسي مع نفسك .. وخذي اراء الناس العقلانيين ومشهود لهم بذلك من الجميع وقولي لهم هل صحيح انا ثرثاره واطلبي منهم يكونون صريحين معاك وخليهم يقيمونك


وانا متأكدة لو رجعتي لنفس العمة اللي قالت لك وسألتيها هل انا جد ثرثارة وان كلمتك ياعمتي في بالي من ذاك اليوم وانا حزينة راح تلاقينها تقول لك كلام ثاني ..




موفقه

رد : ياكثر كلامك أسكتِ شوي! ، وتغيرت حيـاتي!
 

عزيزتي...

كنت فخوره بثقتك بنفسك وحق لك ان تفرحي بما وهبك الله من مهارات في شخصيتك يفتقدها الكثير لكن في نفس الوقت فقدت ثقتك بنفسك عندما وقعتي في فخ التعميم فهذا الموقف الصغير اصبح ضخما واصبح يسيطر على تفكيرك وربما قلت لنفسك كلما تحدثتي
لا تتحدثي هم لا يستحقون او ربما تظهرلي وحده مثل عمتي ..الخ من العوائق التي ظهرت نتيجة الاحباط وحساسيتك

انصحك...

غيري طريقة نظرتك للموقف واعتبريه شوكه تنبهك لتتعرفي على اهمية ترك مجال للغير ان يتحدث وهو مهارة من مهارات الحوار فالناس طبائع وشخصيات كما تعلمين وغالب الناس يحبون المشاركه في الحوار

اذا لم تستطيعي تناسي الموقف تحدثي مع عمتك حول الموقف ثم احتوي الموقف واغلقية بسلام
صغري الموضوع فعمتك عندما اغضبتك باسلوبها فهي تمثل نفسها



اذن
الحياة اساس عبارة عن قرارات

قرري انك ستعودي لسابقك تتكلمين بطلاقه ومهاره زي زمان مع الاخذ في الاعتبار ان اعطي فرصه لغيري ان يتحدث وان تتوقعي مواقف تحصل من غيرك لا تحبينها رغم ذلك تحبين نفسك مهما كان ومهما قال عنك من قال...