|
كيف نرد الهدايا لمن اهدا الينا ..؟؟
السلام عليكم ورحمة الله وبركاته
يمكن موضوعي غريب بس فعلا انا في حيره من امري في موضوع الهدايا اللي تقدم لي كيف اردها ؟؟؟ وحبيت اخذ ارائكم وتجاربكم واقتراحاتكم من اخوات واخوان اكثر اللي حولي من صديقات وجيران واقارب مستواهم المادي عالي ماشاء الله اما تكون موضفه او حالتها الماديه ممتازه الله يبارك لهم لذلك يعطوني هدايا غاليه الثمن او مبالغ عاليه حتى اني والله اتضايق من اخذها لاني اعرف نفسي برد لهم اقل من هداياهم لاكن لازم اقبل هداياهم ومو حلوه ارفضها مثلا عندما نقل بيتي الجديد ماقصرو و في زواج بنتي غرقوني بالهدايا العينيه والنقديه السؤال اللي يطرح نفسه كيف اردها ...هل اردها بالمثل وهذا احسه مستحيل ..؟؟ او اعطي حسب امكانيتي وهذا احس فيه احرج لي .... فعلا انا في حيره خصوصا ان احدى قريبات زوجي ولدة بنتها ورايحه ازوها ولازم اخذلها حاجه محترمه لانها من الناس اللي انحرج من هداياها بس ما اقدر اجاريها لوكنت من الناس اللي ربي منعم عليهم وجاتك هديه متواضعه من وحده اهديتيها شئ غالي اش تكون ردة فعلك ؟؟؟ |
رد : كيف نرد الهدايا لمن اهدا الينا ..؟؟
اختي الفاضلة سؤالك له شقان الشق الاول خجلك من رد هدية باقل منها وهذا لاحرج فيه فالله جل جلاله يقول في محكم كتابه ((لايكلف الله نفسا الا وسعها))فمادمت تثقين في طريقة تفكير من تهدين اليه فلاحرج في ذلك ولتكن على حسب الحد الاعلى او حتى المتوسط لقدرتك المالية ::!الشق الثاني ساجيب عنه عن نفسي وهو مدى تقبل هدية بسيطة كمقابل هدية غالية نعم يااختي الفاضلة سافرح بها لان الهدية بالنسبة الي في قيمتها المعنوية وليست المادية والرسول صلى الله عليه وسلم يقول ((تهادوا تحابوا ))وهذا يشمل انواع الهدايا بكل قيمها ::::همسة ::قبل ان تقدم الشيء يجب ان تعي تماما مقدار الحاجة النفسية لمن ستعطيه هذا الشيء فالبشر يتفاوتون في طريقة التفكير ولكن اغلبهم يلتقون في نقطة واحدة هي المشاعر :::وفقك الله
|
رد : كيف نرد الهدايا لمن اهدا الينا ..؟؟
اختي نورث .. مثل ما قال اخوي مارد الجنوب ... و احيانا ممكن تشترين هدية سعرها مناسب ولكن جاية في وقتها الصحيح و ترضي المهدي اليه ،،، او تكون الهدية منتج او لبس لايتواجد في السعودية ، مثلا تطلبينه من الانترنت ... واكيد اهم شئ الاستطاعه ... نواف |
رد : كيف نرد الهدايا لمن اهدا الينا ..؟؟
الهديه عموماً تحتاج لذوق وذكاء ، واختيارات جذابه
اكثر من ان تكون باهظة الثمن .. لكن ياليتك عطيتني فكره عن هداياهم .. هل هي الماس مثلاً او ماركات عالميه ؟ |
رد : كيف نرد الهدايا لمن اهدا الينا ..؟؟
مارد الجنوب
فعلا صحيح ما قلته فانا بعض الاخوات اهديها وانا واثقه انها ستعسد بها بدون النظر الى قيمتها الماديه حتى لو كانت بسيطه جدا لكن هناك اناس تهمهم الماديات وينظرون للهديه بسعرها ويتباهون بذلك انا احب اعطي هديه مميزه ومفيده وسعرها مناسب لي ولا احب اهدي ورد او اي شئ لا فائده منه شكرا لمرورك جزاك الله خير نواف حلوه فكرة الطلب من الانترنت مشكور عليها بس هذا يبغالها طلب من بدري ان شاء الله اجربها خصوصا اني راح الاقي اشياء مميزه باسعار مناسبه شكرا لتواجدك جزاك الله خير شقرديه لكن ياليتك عطيتني فكره عن هداياهم .. هل هي الماس مثلاً او ماركات عالميه ؟ لا طبعا مو كذا بس انا اتكلم عن هدايا صديقات وجارات وقريبات من بعيد ماتوصل لكذا بس تضل غاليه نسبيا انا بصراحه بعد زواج بنتي سار عندي هم كيف اقدر اجامل الناس اللي اهدو بنتي ولازم احظر مناسباتهم وارد الديون اللي علي (وحده من صحاباتي تسميها ديون مره تقولي باروح ازور جارتي لها دين عندي وتفاجأت منها قلت دين ايش؟؟ قالت زياره وهديه هذا دين ) مشكوره شقرديه على تشريفك موضوعي جزاك الله خير |
رد : كيف نرد الهدايا لمن اهدا الينا ..؟؟
ممكن تحتفظي بالهدايا اللي جاتك و ما تستخدميها .. و ترفعيها ..
و لما تروحي لمناسبة ، تهديه لصاحبة المناسبة .. مثلا ، وقت ولدت أنا .. جا لأمي الله يرحمها سريرين أطفال .. فأمي شالت الزايد و مادري أعطته لمين ، ما سألتها .. |
رد : كيف نرد الهدايا لمن اهدا الينا ..؟؟
اقتباس:
( فلوس ) وهذي تطير بسرعه :d سعدت بمشاركتك يا عصاميه |
رد : كيف نرد الهدايا لمن اهدا الينا ..؟؟
اااه يانوره حطيتي يدك ع الجرح وكتبتي موضوع من زمان مسبب لي ازمه نفسيه
مااحد متعقد من الهدايا كثري لدرجه ادعي من كل قلبي ان ماااحد يهدي لي شي احنا عندنا لما تولدي لازم القريب لك يعني من اهلك خوال عمان بناتهم وكذا لازم تهدي 500 ريال او1000 او اقلها300 وهذي حسب قرب اللي بتهدين لها يعني لو من بنات الخاله ماتنقصين عن 1000 ريال وياليتها بس ع المبلغ وترتاحين لو جيتي تزورين لازم تاخذين قهوه وشاي وحلويات وفطاير وتكلفك بحدود200 واهل امي اذا صارت النفاس واصله ل 30 يوم لازم نسوي لها عشاء قطه من 200 ونروح نعشيها يعني تخيلي لما يصير عندك ثلاث او اربع حريم ولدو ورى بعض قسم بالله جتني فتره ابكي من القهر زوجي يقول مالي خص بالحريم يولدون ولايقعدون وانا ولدت مرتين وكل العالم قهوتني واهدت لي كرهت نفسي ويطالعون مستوى زوجي ومايعذروني والله اخر شي قلت ماعاد بروح ل احد عشان لاحملت وولدت مابي احد يهدي لي احسها دين واحراج وعندنا العروس لازم تهدين لها طقم ذهب انا فيه وحده حرمه كبيره تحبني مرره هي ماتقرب لي بس من بعيد ل بعيد ودايم تهدي لي وهداياها مكلفه وربي تحرجني صرت اكره هداياها مره شفتها بمناسبه وكنت من زمان عنها وانحرجت منها قمت عطيتها 500 لاني ملقوفه طبعا واخذت اسبوع الا وترسل لي 1000 وساعه الماس يمكن ب5000 وطقم عطورات والله انهبلت منها والحين جايه زياره عند بناتها وبتسافر بعد اسبوع وابي ازورها ولازم اشتري لها شي ولاادري وش اجيب لها احرجتني مره الهدايا هالوقت اغلبها مجاملات وتكلف وتضيق ع الواحد مو زي اول والله نفرح بااي حاجه حتى الورد كان له قيمه كاانه ذهب الله يعينك لازم تردين الجميل |
رد : كيف نرد الهدايا لمن اهدا الينا ..؟؟
اقتباس:
آمين ويعينك حبيبتي شكلك فهمنتيني صح الله يسعدك ويفرج همك فعلا صارت الهدايا في هذا الزمن هم لان اكثرها مباهاه وفشخره مي لوجه الله بس صعب الواحد ما يواصل الناس عشان الهدايا لكن يهدي على قد استطاعته انا هذا اللي اسويه احيانا يكون عندي مناسبه وتحتاج هديه وتكون امكانيتي طيبه فاهدي هديه غاليه واحينا تكون في وقت صعب مثلا قبل الراتب والا في وقت زنقه احط اللي اقدر عليه والله يعيننا |
رد : كيف نرد الهدايا لمن اهدا الينا ..؟؟
وعليكم السلام ورحمة الله وبركاته
ليس بالضروره رد الهدايا ولكن إن كنتي تريدين ردها فرديها إليهم في مناسباتهم بمقدورك المادي ، لايكلف الله نفساً إلا وسعها والهديه ليست بقيمتها بل بمعناها |
| الساعة الآن 12:38 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©