السلام عليكم ورحمة الله وبركاته ,,,

أنا عضوة جديدة من شهر وشي كنت اتصفح وادور حل للمشكلتي ودخلت موقعكم ع اساس تمضية الوقت وكنت اتابع مواضيع الاعضاء وكيفية الرد والنصح حسيت انه الدنيا بعدها بخير ,,,

بختصرلكم المشكلة عشان ماطول عليكم ,,,

انا متزوجة من سنة و6 شهور تقريبا وعندي بنت عمرها ستة شهور (الله يحفظها لي)وحامل, بداية الزواج اعيش في دوامة مع اهل زوجي وخاصة زوجي من يقولوله كلمة يتغير عليه فجاة وييلس يصارخ عليه لين قبل 3 شهور استوت مشكلة هالفترة كنت عصبية وايد لانه قام يطنشني ومايكلمني وخاصة اني حامل ابا يحسسني بشي بالعكس زادت الفجوة بيني وبينه وقام يدخل اهله(أمه وخواته) في الموضوع وهم الله يهديهم بدال مايهدونه يزيدونه يقولوله هي هاي ماتنفعلك طلقها وهو يرد وراهم هي بطلقها انا اصلا ماحبها هم قالولي ارفعي قضية طلاق ولا خلها معلقة بنزوجك عشرة بدالها وهو مقتنع بالكلام جدام اهله ,,,

تميت في بيت هلي عقب فكرت سرت روحي المحكمة وفتحت ملف حسن العشرة ع اساس يتفاهمون معاه واذا مانفع معاه اتطلق بس اهم شي اضمن حقوق عيالي,,, مرت 3 شهور وانا الي احضر الجلسات وهو مايحضر وحضر مرة وحده وتم يصارخ عليه جدام المصلح الاجتماعي والمصلح كلمه اسلوبه معاي غلط وانه هو اصلا لازم يوفرلي السكن+خدامة+ مايستخدم الفاظ سوقية+ هله مايتدخلون في شؤوني موليه ولا يقربون من صوبي,,,

عقب الجلسه حسيت انه هو مايباني وكارهني وبيسوي اي شي عشان يجرحني لانه كلم اخواني وقال اختكم فيها وفيها وتعاند وماتستحي واني اسير مولات معاه والشباب يطالعونها يعني كلام ماينقال وقالولي هو مايباج اصلا ولا تتصلين فيه ولا تكلمينه وانا جي :eek: وسكتت بس من اسبوعين قام يتصل بين كل يومين ياخذ اخباري واخبار بنتي,,,

ويوم الجلسه الي هي اسبوع الي طاف اتصل فيه الموجه وصدمني انه بنى ملحق في بيتهم وبيسوي من بينهم يدار بس يوم اتصل فيه ماخبرني ولا قالي,,, استانست انه عائلتي مابتشتت بس نفس الوقت خايفة منه انه بيوفرلي ها كله بس عشان ينتقم مني او يعاملني معامله اخس عن قبل عشان بس اشتكيت عليه في المحكمة ,,, بس اهله هم الي طلبوا مني هالشي وكنت اتصل فيه مايرد عليه يخلي اخته ترد عليه وتقوله اخوي مايبا يكلمج ,,,

اسفة على اطالة بس تعبت من التفكير ابا مشورتكم ,,,