منتدى عالم الأسرة والمجتمع - زوجي اتصل على أبوي يشكي له مني (أبو حكيم، بيتا، نورا، و كل إللي يعرفوني من

السلام عليكم ورحمة الله وبركاته

:( زي ماهو باين في العنوان، حصلت مشكله تافه بيني و بين زوجي و راح إتصل على أبوي يشكي له مني ولكن ما قاله ايش المشكله
و أنا بدوري اتصلت على امه أشكي لها اللي صار بنفس الوقت اللي زوجي في الغرفه الثانيه يكلم أبوي،
طبعاً أنا عارفه اللي سويته غلط و ما كان المفروض اتصل عليها، بس كنت ابغاه يحس بأنه اللي هو كمان سواه غلط (أدري الحين بتقولي مايصير تصلحين غلط بغلط)
المهم إلي صار صار و كنت في داخل المشكله و ما فكرت تمام.،

صراحة للحين ماني قادره استوعب إللي صار، و ماني قادره أفهم ردت فعل زوجي القويه بقدر تفاهة المشكله إللي صارت
الموضوع هذا صار يوم الخميس و إلى اليوم و احنا ما نكلم بعض مع إنه أبوي أصر علي إني اعتذر له و كمان أصر عليه إنه يعتذرلي
اعتذارنا طبعاً ما كان من القلب و كان بس عشان نرضي أبوي إللي قال عننا تتصرفون زي العيال و انتوا عندكم عيال.

صارلنا 7 سنوات متزوجين ولا مره قلت لأهلي عن مشاكلنا ولا هو قال لأهله، مع إننا مرينا بمشاكل كثيره و كبيره ولكن كنا نزعل يومين و نرجع نتفاهم و نتصالح و كل شي يرجع تمام.
المره هذه بصراحه جرحني و كل ما أقول أروح اعتذر له أتذكر إنه كلم أبوي و أقول ما يستاهل اصالحه لأنه حط بكرامتي الأرض و ما سوالي أي إعتبار
أبوي طبعاً إنفجع و استغرب لأنه أبداً بحياته ما توقع إنه زوجي يتصل يشتكي له مني، أنا العاقله الحكيمه الكتومه الصبوره اللي دايماً أدفن مشاكلي داخلي

قولولي كيف اصالحه؟ و أنا أحس إنه طاح من عيني.

معليش اعذروني ماني تمام و أحس مشوشه
مستعده أجاوب على اسئلتكم عشان تتضح الصوره أكثر