احداث جديدة في حياتي((مستجدات في الرد 29-76))
 

السلام عليكم

شخباركم جميعا
لي فترة اتابع المنتدى بصمت بسبب الاحداث والعواصف اللي تمر بحياتي

باتكلم باختصار عن الفترة من ولادتي في بنتي لين امس

بالنفاس حدثت امور كثيرة كنا انا وزوجي بين شد وجذب ووقتها زوجته لعبت لعبتها وقلبته علي الى ان قاي قوسين او ادنى على الطلاق بس بفضل الله عدت الامور على خير

وظليت شهرين في بيت اهلي

بعدها انتقلت لي بيتي وكانت الاوضاع باردة وطلبت منه ان يسفرني او يحجزلي فندق ما رضى كلش وطبعا هذا كله وزوجته لا زالت تكرهه فيني
قلت له خلاص انا باخذ اجازة منك واونس عمري ورحت بيت اهلي اسبوع كان وقتها عنده مشروع تجاري ويبي راس مال وكان يبي يتسلف مني
وبحكم معرفتي في شخصيته والظروف اللي مريت فيها ما وافقت ليش اوافق لانسان ما حبني وجارحني
بعد الاجازة اللي خذيته سبحان مغير الاحوال قالي يالله جهزي اغراضج احنا مسافرين
بعدها بنتي دخلت المستشفى اسبوعين ولهيت معاها
بعد خروجنا من المستشفى محد عبرها لا بكيكة ولا هدية ولا اي احتفال ولو بسيط
مقارنة باهلي اللي شالوا الدنيا فيها
بعد طلعونا بيوم دريت ان بيرجع زوجته وان امه رايحة بيت اهل زوجته عشان يتصافون وترد حياتهم طبيعية
باختصار صرت انا داخلة حياتهم عرض وهو يحس بهذا الشي

بعد فترة قالي ان بيطلعني من بيتي ( اللي هو بيت اهله) وبجيبها مكاني وانا بيأجر لي شقة
اختلفنا وايد على تاثيث الشقة ومنو يدفع فلوس الاثاث
امس تناقشت معاه بخصوص تقسيم الايام يقولي انتي قلتيلي ان متى ما بغيت تعال زورني - وانا قلت عالكلام لان وقتها كنا متهاوشين والشياطين ترقص معانا-
قالي لا تضغطين علي مابي ارتبط بسالفة ليلة بليلة متى ما اسمحت الظروف زرتج انتي وبنتج
يعني من بعد ما كنت سيدة البيت صار زواجي مسيار- حسبي الله ونعم الوكيل-

المطلوب
انا ابيه يعدل ليلة بليلة وبنفس الوقت مابي اضغط عليه عشان لا ينقلب الموضوع علي واطلع انا سبب المشاكل

للعلم هو يعشق زوجته وانا قالي اشكره ما احبج واللي يربطني فيج البنت وبس

اتمنى رايكم كلكم

رد : احداث جديدة في حياتي
 

آتمنى لگ السعاده أختي ولا حول ولا قوة إلا بالله
لكن ياأختي خوفيه بالله يمكن يحس أن اللي بيسويه حرام وأنه يوم القيامه بيأتي وشقه مائل
عقاب من الله لعدم عدله وقولي سو اللي تبي أنا مابيدي شئ بس مابسامحگ على اللي قاعد تسويه
آعااانگ الله وفرج همگ ،، وحسبنا الله ونعم الوكيل

رد : احداث جديدة في حياتي
 

اذا خوفته بالله راح يقولي ليش احمل نفسي فوق طاقتها وبيطلق
هو متعلق وهيمان في زوجته وتزوجني رغبة من امه لانها تبي ام بديلة حق بناته
ولما شافوا ان ما صار اللي يبونه طلعوني من حياتهم

احس بقهر فظيع

رد : احداث جديدة في حياتي
 

السلام عليكم
لا اعرف طريقتاً للمتخاصمين اجمل من الكلمة الطيبة
إن كان لايحبك ووجودك معه أقترن فقط لوجود الطفله
فأعلمني بأنه محبته شيئاً هامشياً وليست كل الحياة ..
ف الحب الذي لابد أن نسعى له بكل ما اوتينا من قوة هو محبة الله
لأن محبة الله هي من تعطينا محبة عبادة ، وللتقرب من الله طرقاً كثيرة

أبحثي عن محبة الله ، ليعطيكِ الله محبة عبادة لاسيما منهم زوجك.

هداه الله لكِ.

رد : احداث جديدة في حياتي
 

موهبة ..

انا بفترة الحمل و الولادة و اقل شي سنة عشان النونو يعتمد على حاله ..
ما أحس اني اكون طبيعية ..

علشان كذا ..

خذي مانع اول شي لانك محتاجة لفترة تصفي بالك من اي تفكير ..

.
.

ثم .. حاولي تجيبي شغالة تساعدك ..

و تفضيييييي لنفسك ..

.
.

لا تلاحقيه ..

مصيرهم يرجعوا مثل ققبل .. مشاكل وووو الخ
يعني دحين وجودك .. هو الي خلاها تعقل ؟

فكرتيني باختي .. تقدم لها مطلق و قالولنا مستحيل يرجع طليقته وووو الخ
بس اختي رفضت رفض نهائي .. و الان انا مؤيدتها ..

رد : احداث جديدة في حياتي
 

أختي الفاضلة موهبة الكويت
دام هو قرر رجوعها و يريد الامساك بك على ذمته فمن حقك تطالبي بما لك من حقوق و تضعي النقاط على الحروف من البداية
الموضوع ليس حسب المزاج فالزوج حتى لو كره زوجته فهذا لا يعطيه الحق بأن يقصر معها
طالبي بهدوء بالحقوق الأساسية مثل المبيت و النفقة وبدون انفعال و إذا عاند الأفضل يصير اتفاق بحضور من تثقين به من أهلك الرجال
و يا أختي أخرجي من عقلك فكرة انه لا يحبك
فتصريحه بذلك بلحظة غضب أو بوقت الشجار أو تحت ضغوط

رد : احداث جديدة في حياتي
 

اخي رجل في زمن اخر
انا اللي مخليني متمسكة فيه دينه اللي الله يحبه يعني التزامه الديني ما اتوقع اني بالقى مثله هالايام خصوصا بكثرة وجود مدعي التدين

حبيبتي روح الطير الله يرضى عليج ويسهل عليج امورج عندي شغالة و عامله مانع بس ابيه يعدل ما اقدر اضغط عليه واطالبه راح اكون انا الخسرانة 100٪

بديع المعاني اذا طالبت راح يقولي ما اقدر فالافضل الانفصال
وزوجي انسان مزاااااااااجي لحد الجنون ويغير رايه بلمح البصر

رد : احداث جديدة في حياتي
 

رد : احداث جديدة في حياتي
 

رد : احداث جديدة في حياتي
 

موهبه .. اللي خلاهم متهاوشين ومشاكل قبل طلاقهم هو الحياة الزوجيه بكل ما فيها من ملح وبهار وتفاصيل .

الان انقلبت الأدوار مرة ثانيه ورجعت هي لبيته بحياة زوجيه كامله ..

من رأيي تبعدي وتلعبي لعبتك بنفس طريقتها بالضبط ..

تذكرين كيف تركته فتره لحاله لكنها موجودة بالواتس وأخبارها عداله دون ما يكلمها ( موجودة ومش موجودة )) وبعدها بدأت تتسلل شوي شوي بحجة البنات ومسجات وتواصل من بعيد لبعيد يخلي كل ممنوع مرغوب .. تواصل من بعيد تقدري من خلاله تظهري بمظهر ملائكي وتنسقي كل كلمة قبل ترسليها وتدرسي كل مسج بما فيها من معاني توضح له الصفات اللي يتمناها انها موجودة فيك بشكل غير مباشر .. ومش غلط لو كان بينك وبين بناته موده انهم يكونوا حجة لك للتواصل اضافه لحجة بنتك .. ومن بعد هالمقدمات توصلي للشوق والغرام .

تذكري أسلوبها كيف كان؟؟ .. زوجك الظاهر انه يحب حياة المغامرات العاطفية

لا تستعجلي ما دام ودك تكملي معاه وودك تكسبيه ..

مافي محبة تجي بالغصب وفرض الأمر الواقع وفعلا مثل ما قلتي ولأنه متدين لو حشرتيه بزاوية الاثم ممكن يطلق .

ما أتوقع لما قال لك أنه ما يربطه فيك إلا البنت أنه كان يعنيها تماما .. لو ما عنده ولو شيء بسيط من الموجة تجاهك ما كان خلاك على ذمته .. لكنه يسعى أن يثبت لنفسه أنه شخص وفي بحبه اللي هو حاليا لزوجته الأولى وبالتالي ما عنده مشاعر لغيرها .. يبي يثبت لنفسه صدق مشاعره تجاهها .