|
مللت من تصرفاتها
السلام عليكم ورحمة الله وبركاته بالبدايه تحيه لكم جميعاً موضوعي وبدش فيه على طول من غير مقدمات يا جماعه بديت أتحسف على كل ثانيه وعلى كلى لحظه قضيتها وياها على كل لحظه قصيت على روحي فيها أنها ممكن تتغير القلب امتلاء من صوبها يالتيني أقدر أرد لها ربع العذاب اللي عيشتني فيه على هذا كله مب قادر أذيها أغفر لها زلاتها اذا تذكرت ظروفها أغفر لها لشفت عمري وحياتي غلا أضعف جدامها لشفت دموعها يا جماعه انسانه ما عرفت شلون أرضيها شنو بغت بحياتها استويت مب عارف بغيت اخسر أهلي وسبب حبي لها مع هذا كله مب قادر أحصل حرمه تحل مكانها زوجتي الثانيه قايمه بواجباتها ودور رضاي لكني والله مب قادر أحبها وأعلنتها لها صراحه وفاجأتني أنها عارفه وحاسه بحبي لزوجتي الاولى بغيت أشيلها من قلبي وعقلي هي بنت عمي وزوجتي وأم لبنتي وبتظل جي ومستحيل أتنازل عنها عرضت عليها فكرة السفر للعلاج لكن بشرط ما تعلم أحد من أخوانها لانهم مستحيل يوافقون رافضه وقالت اذا غصبتني بفضحك عندهم قلت لها عجيب امرج فوق أني بترك شغلي ولا تنسين انه عندي زوجه ثانيه غيرج وسفرنا ممكن يتجاوز شهر تخيلوا بكل برود ترد وتقول أنا غير عنها انا حزتها عاد ما قصرت وغسلت شراعها يا اخوان مب عارف شلون أتفاهم وياها؟؟؟؟ هجرتها هاوشتها عاقبتها هددتها يشهد الله أنه بالنهايه نتيجة وحده ممكن تتغير جم يوم وتلين ولكن الموضوع ما يطول عندها مستحيل تتنازل واللي براسها بغت تنفذه عنيده بطريقه مستفزه والله وصلت لمرحله أني أشك فيها واجهتها وسالتها يا بنت في راسج أحد ثاني وعمي (( الله يرحمه )) جبرج تتزوجيني قلت لها أدري أنه فلان خطبج وفلان وعلان حتى أخوي العود خطبج أنتي بغيتي أحد فيهم خليني أفهم عطتني نظره وعلى الصامت من غير ما حتى أدافع عن نفسها تركتني ولا كاني ارمس وياها مليت من تصرفاتها ومن حياتنا المشكله أنها تمر علينا لحظات تكون فيها قمة بالوناسه والسعاده لكن الموضوع ما يدوم وياها |
رد : مللت من تصرفاتها
مال الرجال الليلة يشتكـــــون ..!! *** أخي الكريم أعلم أن موضوعك مع زوجتك متشعب وطويل .. دعها كما تشاء وأنت استمتع بحياتك ..!! هل بحياتنا أحد يحب الشقاء والألم ..؟!! لماذا تجري خلف شقائك وألمك .. وزوجتك الثانية بداخلها تطوى من الألم والعذاب ويكفيك علة مصارحتك لها بحبك للأولى الله يفرج أمرك ويكون بعون الجميع |
رد : مللت من تصرفاتها
اقتباس:
وما تسمح لنفسها تكون مثل بنت شوارع على قولتها من معرفتي فيها اقدر أقولك أن سؤالك صدمها وخوفها ولهذا السبب سكتت |
رد : مللت من تصرفاتها
هي تجرحك وانت تجرح زوجتك الثانية والاثنين مو عارفين السبب
انت تقارن لجين بالثانية وتقارن الثانية بلجين والمقارنة تقتل النساء وتوجع في الصميم سوالك الاخير لم يكن له داعي وردة فعلها لاتدل الا على رقي اخلاقها مايحيرني ماهو سبب رفضها للعلاج؟قد يكون لطريقة طرحك الموضوع سببا في ذلك ؟؟ لااعلم حقا سببا لرفض العلاج قد يكون خوفا من فشل العلاج وخسارة الحلم الوحيد اعد عليها الموضوع ثانية وثالثة باسلوب الطف دون ان تمن عليها بوقتك سخرها الله لك في طاعته وحنن قلبيكما على بعضكما البعض |
رد : مللت من تصرفاتها
الله يعينك
يااخي تقرب من الله في الثلث الاخير من الليل و الفرج قريب ان شالله |
رد : مللت من تصرفاتها
أنا قايل يا أم بلال أنها تيها بعض الفترات متغيره وتكون لينه ولكن الموضوع ما يدوم سبب رفضها للسفر بالبدايه كان عشان موضوع غلا وانها مستحيل تتركها عند الوالده فهمتها أنه صعب ناخذها ويانا وعشان خاطرها اقترحت عليها أنه كل عشر أيام بطلب من اخوي العود يبها لنا وتيلس ويانا كم يوم وترد بالبدايه وافقت ولكن ما مداها قلبت وقالت لا من غير ما تعطيني سبب مقنع الممنوعات اللي هي مخليتها عذروب بكل مشكله تستوي من بينا ما اعتقد أنها سبب لانها هي تجوف شنو تسوي زوجتي الثانيه وهي بغت مثلها والمشكله هي مب قايمه بواجباتها الاساسيه عشان تقارن نفسها فيها زوجتي الثانيه على كثر ما أنا مب طايقها مع ذلك مب مقصره وهي في عالم اخر وحتى وهي ساكنه بيت اهلي مب متحمله احد واذا احد ناقشها ودخل عندها تنفجر فيهم لدرجه وصلت فيها انها ترفع صوتها على الوالده والمشكله انه الوالد يطبطب عليها ودخلته بمشاكل ويا الوالده بسببها عنجهيتها وسوء تصرفاتها .. |
رد : مللت من تصرفاتها
اقتباس:
أنا مفهمها حاليا أنه سفر بيكون قبل رمضان وغصبن عنها ولنا فتره واحن على الصامت اذا دشيت عندها يلست ويا بنتي وأظهر تحت عند اهلي ... |
رد : مللت من تصرفاتها
بالنسبه يا أم بلال للمنوعات اللي ذكرتيها وتقولين هي سبب هالمقارنه مع زوجتي الثانيه منعتها عن دراسه وسبب أنها مب محتاجه تكمل دراستها واذا بغت طور نفسها عندها أكثر من طريقه غير ذهاب للجامعه بتقولين زوجتك ثانيه تكمل الماستر وسامح لها زوجتي ثانيه كان شرط من شروط الزواج انها تكمل اجبرتها على الغشوه وزوجتي الثانيه ما تتغشى بالعكس المفروض تستانس أنه هي أغار عليها والثانيه مب هامتني لكن هي خبله ومب فاهمه موضوع انه منعتها من زيارات لاهلي أو حتى بيت اخوانها لانه هي مب طايعه تفهم أنها حتى لو هم أخوانها او أعمامي لازم تكون متقيده بتعاملها وياهم وتحشم أنها معرسه صحيح أنه احن عندنا مسموح نجوف حريم أخوانا أو بنات عمومتنا لكن بتقيد بعطيج مثال بسيط قبل فتره كان عندنا عرس المهم اني سمحت لها تحضر لما جيت اخذها صدمتني أنها يالسه ويا أعمامي وأخواني اثنين وكم واحد من عيال أعمامي وهي لابسه عباه شفافه وتحتها فستان لركبتها بكامل زينتها وهي وحده ثانيه ونفسها بعد أنا أدري أنه شيء وارد عندنا جي ولكن أنا فهمتها هذا الشيء بالنسبه لي غير مقبول مره تنفذ ومره تقولك نسيت عشان جي ريحت عمري ومنعتها حاليا منعتها عن النت والتليفون هذولا الاثنين من قهري منها ولما شفت ردة فعلها البارده وانها ما اهتمت ما سمحت لها تستخدمهم للحين بتقولين هي تعاند وتغار من زوجتي الثانيه بسبب هذه الممنوعات برد أقولج هي ما قدرت تثبت لي أنها تتحمل المسؤليه |
رد : مللت من تصرفاتها
اقتباس:
الوالد ينظر للمشكلة نظرة رجل عاقل يوازن الأمور ..ووالدتك الله يحفظها تاخذها الحنية عليك وتميل لجانبك أي واحد لما يحس أنه مظلوم بينفجر . ما تلاحظ أنها صارت متوترة طول الوقت ؟؟ من أسبوعين لما كلمتها اخر مرة قالت لي انا ما كنت جذي يا خاله .. موعارفه شنو صابني . صرت عصبية وأصرخ ما احس بنفسي وش أقول اللي عنده اكتئاب ما تقدر تقول له تعال أعالجك .. تبيلها مداراه يا ابن الحلال .. أعرف انه شيء متعب لك لكن لك الأجر باذن الله .. كرمال عمك الله يرحمه |
رد : مللت من تصرفاتها
الله المستعان
الله يصلح لك زوجتك وكسرت خاطري الثانية اللي صارت ضحية مشاكلكم |
| الساعة الآن 06:25 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©