|
أبشركم تصالحت مع نفسي
السلام عليكم ورحمه الله وبركاته
اخباركم جميعا . اخواني وخواتي هنا لكم فضل كبير علي بعد رب العالمين وكرمه معاي ماتدرون وش كثر هالمنتدى هذب من سلوكي حتى المشاكل المطروحه فيه خففت حجم الالم داخلي حسستني بان ماعندي مشاكل الحمدلله على كل حال سر هدوءي مع زوجي هالفتره صرت اتغاضى عن كل شي اماشيه بااسلوبه من داخلي اكيد مو مقتنعه بحاجات كثيره فيه لكن للمصلحه العامه صرت اطنش اول سبب للتطنيش انا خسرت كثير من صحتي شارفت ع الجنون بسبب الاحباط والمشاكل استوعبت بعد كل هالمشاكل اني ماطلعت ولابنتيجه كويسه هو كذا الله خالقه كذا ماعنده استعداد يتكيف معاي وانه تزوج صغيره وينزل لمستواي صعب الموضوع عليه انا بما ان هذا قدري كان واجب علي اكبر عقلي واطلع لمستوى حياته وتفكيره عشان خاطر صحتي وحالتي النفسيه وعيالي اللي مالهم ذنب في هالمشاكل كلها واكتشفت ان مشاكلنا على ولاشي اهله ماده تفكيره يعني ماهي شي جنب مشاكل غيرنا خيانه وسكار الحمدلله الذي عافنا مما ابتلاهم واسال الله لهم السلامه مما هم فيه احساسي بسخافه المشكله وقناعتي ان النهايه وحده وكلنا بنموت وان الحياه رحله قصيره خلاني اعيش بسلام مادام ماراح اطلع منها بشي على ايش اجل انافس فيها المهم حابه اشكركم من كل قلبي واستشيركم في شغله انا حابه احتفل مع زوجي بس للاسف هاليومين تعبان شوي ودي احتفل معاه بعد اسبوع يمكن يكون خف شوي طبعا هو ملتزم بحميه يعني اغلب الاكل ماياكله يادوب شوربه او حاجات خفيفه هل اعزمه بمطعم على انه مايحب هالاجواء مره بس انا من زمان ماطلعت معاه مطعم ونفسي بالتغيير وخصوصا انها هالايام قافله معاه او اخليها بالبيت واصلح الاكل اللي يحبه ولو اني كارهه هالفكره مره والاهم من هذا كله ابي افكار هدايا ترتيبات ويهمني راي الرجال ايش تحبون من زوجاتكم هدايا المشكله هداياكم تعقد بصراحه هو نفسه بعمره ودي احجز رحله ليوم واحد نروح ناخذ عمره بس اخاف يفشلني ومايقبل لانه مرتبط بااهله امه تعبانه واتوقع صعبه يسافر اخر هديه اعطيته هالاسبوع وكانت عطر ابي افكار مميزه تكفون ابتدا من الاكل ولحد ترتيب غرفة النوم انتظركم الله يسعدكم |
رد : أبشركم تصالحت مع نفسي
الله يوفقكم ويسعدكم ويبعد عنكم الزعل
بس إذا صار بينكم مشكله بعد كذا - لا سمح الله - لا تقولي حتى العمره انا اللي حجزت له ووديته ،، والعطر اللي معه انا اللي اشتريته . . بالنسبه للهديه ،، والله انا شخصياً افضل كبسة حاشي :s |
رد : أبشركم تصالحت مع نفسي
هههههه .زائر
وحدانية هل وجدتي اثر على حياتك الزوجية بعدتصالحك مع نفسك يعني هل تغير اشلوب زوجك معم بالنسبة لي انصحج اعملي تغيير يكون هو متقبلة علشان ما ينكد عليج |
رد : أبشركم تصالحت مع نفسي
خخخخخخخخخخخخخ لا والله انا مو من النوع اللي امن على احد بشي مستحيل اجلس اقول كذا الحمدلله تغيرت كثير عن اول يمكن كبرت وعقلت شوي كبسة حاشي اجل ممنوع عن الاكل الدسم بس شوربه وحاجات خفيفه او ممكن مره في العمر سمك مشوي وانا ماحبه ابي هديه مميزه اي حاجه تخطر في بالكم عطوني فكره عنها[/ |
رد : أبشركم تصالحت مع نفسي
الله يهدي سرج ويسر امركم
بالنسبه للعزيمه خليها غدى ومنها ماراح يخترب الحميه اذا ترك العشى وكلها يوم واحد تغير جو شوي وبالنسبه للهديه انا اجوف تهدينه بوك مع سن كلاسيس الشباب يحبون هالسوالف ويحبون التغير يعني لو عنده خذيله الزود والله يوفقكم |
رد : أبشركم تصالحت مع نفسي
فاكهه ابشرك تغير كثير ولا ماكان انا استمريت على هالاسلوب الجديد
لكن هالتغير من ناحيته اخذ وقت طويل لكن صبري جاب نتيجه يعني حاجات كثيره صار يطاوعني فيها وسبحان الله قبل كان دايم يشوفني غلطانه واهله صح الحين عرف انهم ظالميني وصار ينتبه لكيدهم وحريص انهم ماينكدون علي صار تهمه راحتي ويسعى لها يفقدني اذا غبت وقبل كان عادي اغيب او اجلس زي بعض بس انا صح تغيرت وهديت كثير لكن وصلت له رساله عكس رسالتي القديمه بديت احسسه انه صح مهم عندي لكن ماهو الشخص الاهم يعني بدى يلاحظ علي اهتمامي بنفسي واولادي اكثر صرت اركز عل حاجات كثير غيره عشان اجلب انتباهه لي وجابت نتيجه هالطريقه |
رد : أبشركم تصالحت مع نفسي
السلام عليكم ورحمة الله. ..
صراحة موضوعك حلللو ... ويعتبر حل لأغلب المشاكل ... ﻻن اهم نتيجة نرضى الله عز وجل ونريح النفس من العقد واﻻشتبكات ... اما حكاية الحفلة فان شاء الله البنات يفيدونك.. |
رد : أبشركم تصالحت مع نفسي
نسيت احط ملاحظه زوجي فوق الخمسين سنه راعو هالنقطه في الهدايا
غدى ماودي عشان بيروح وبيطلع وبيخرب ترتيب جو الغرفه انا ودي ارتب غرفتي بالورد وحركات واطلع معاه للعشى ونرجع للبيت على طول يعني احجز معاه موعد ع ال 9 بالليل ويصير نرجع متاخر وشسمه بوك قد شريت له ولااستخدمه لانه محتفظ ببوك شخص عزيز عليه توفى ولايرضى يستخدم غيره ياشين اذا شريتي هديه ولاقبلها الشخص شفت بوكه قديم ورحت شريت قال لو سالتيني كان قلت لك ان هالبوك معاي له 15 سنه بغيت انجلط شاريه بوك غالي وفخم وللحين بالدرج عندي عطورات كثرت شريت له هالسنه 3 عطورات ملاحظه هو تقاعد هالشهر ودي تكون الهديه للتقاعد ويكون فيه طرافه شوي يعني شفت وحده مصلحه كيكه عليها لمبات بما ان اللي يتقاعد يحب يطفي اللمبات وكذا ابي شي فيه مرح وخفة ظل |
رد : أبشركم تصالحت مع نفسي
من مبدأ الاهتمام بصحته وخاصة ان أكله صحي خذي له ملابس رياضة متنوعة مع حذاء رياضي و كاب و بقية الاحتياجات خاصة إذا يحب رياضة المشي أو ناوي ينتهجه كأسلوب حياة مستقبلا
|
رد : أبشركم تصالحت مع نفسي
وحدانيه امس كنت في بالي اتمنى ان تكوني بخير وعافيه
والحمدلله على النتيجة التي وصلت لها فالتصالح مع النفس يحقق نوع من الطمأنينة والرضى طبعا دخلت لسؤالي عن حالك اما الهدية فلا اعرف واذا ممكن تذكرين الطرق التي حاولتي تعالجين بها موضوعك مع زوجك وتصالحك لاخواتك المتزوجات فشيء تؤجرين عليه للاستفادة وكيفة التصالح مع ذكر امثلة وفقك الله |
| الساعة الآن 01:29 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©