|
زواج الاخت الصغرى قبل الكبيره
انا الاخت الصغرى الي محرومه من الفرحه عشان فوقها خوات ماتزوجو
تعرفين شعورك انتي مو انثى ولا بنت يحق لك تفكرين في زوج المستقبل ولا يمكن الناس تلفت لك عشان فوقك اخت تعرفين شعور انتي عيب وشي مثير للاستغراب لو تزوجتي وانتي فوقك اخت والله والله والله شعور يحرق القلب حتى لو تزوجتي واهلك وافقو ويتعبرون وافقو على مضض الكل راح يشوفك نظره غيررر موضوعك هذا ونقاشكم طيب الصغيره وش موقعها يعني لازم اتأخر عشان عندي طيب مثل مااهي يحق لها تفرح انا بعد انسانه ويحق لي يروح عمرك زهره شبابك تنتظرين نصيب خواتك شعور صعب عليكم تتخيلونه لانكم فكركم ليه تفرح قبلي وانا اكبر منها في سنوات العمر اتذكر مره وحده تضحك علي تقول انتي مستحيل تتزوجين تدرين ليه تضحك مو عشان فيني عيب عشان فوقي خوات حتى صديقاتي اذا تكلمو في موضوع الزواج اشوف نفسي غلط اتكلم لانه فوقي خوات شعور صعب ومر ماراح تفهم كلامي الا وحده مثل وضعي وعمرها يمشي وحلم حياتها بعيد حتى ولو تزوجت قبل اختها فرحتها مو مثل فرحه اي بنت مستحيل فرحه مبتوره وحزينه قبل فترة سمعت وحده ماتت وكانت نفس وضعي مدري ليه جاني شعور انها ارتاحت من الحياه والهم الله يرزق كل وحده تتمنى الزواج بالزوج الصالح |
رد : زواج الاخت الصغرى قبل الكبيره
أختي ... ترى البنت الكبيرة تكسر الخاطر والبنت الصغيرة مالها ذنب بعد ..
أنا الأخت الكبرى وعندي اكثر من اخت أصغر مني ومتزوجة أمي قبل كم سنة كانت تقول مستحيل ازوج البنات الصغار قبل الكبيرة وكنت أقول لها يمه لا تقولين كذا ما تدرين عن الزمن ... وسبحان الله تزوجت خواتي واخواني اللي اصغر مني وعندهم اولاد ... أدري إن وضعك صعب لكن وضع الاخت الأكبر وأنا اكبر مثال قدامك صعب جدا جدا جدا ... بكيت أيام وليالي وتقرحت جفوني من البكا ... نظرات الناس وكلامهم لي وانا الحين في الثلاثين وما احد يناظر فيني ... لاني بنظرهم معيوبة والا ما كانوا تقدموا لاخواتي ... ومع اني فرحت لأخواتي واولادهم مثل اولادي ولكن اقول لك بالقلب غصة وحتى لو تزوجت الحين فرحتي ناقصة ... راح يظلون يعايروني اني تزوجت بعمر الثلاثين وان خواتي تزوجوا قبلي وخلفوا قبلي ... واليوم بالذات حاسة نفسي مخنوقة جدا جدا وأقولها بصراحة ... اتمنى الموت لأني أحس إن وجودي نكرة وما لي اي قيمة على العكس راح اكون عالة على اهلي واخواني لما اكبر ... وإن شاء الله ربي ياخذ امانته باسرع وقت وارتاح .. |
رد : زواج الاخت الصغرى قبل الكبيره
اهلا اختي
طيب ليه هالتشائم كله ... كنت اخترتي اسم يدل شوي على التفائل الدنيا حلوة والعمر لسه باوله ان شاء الله كل شي بهذة الدنيا رزق من رب العباد وانتي بكونك مسلمة لازم تكوني مؤمنه بهذا الشي ووجود اخوات اكبر منك ما هو الا سبب لتاخر رزقك الله وحده اعلم بالسبب والحكمة انا مثل ما سبق ورديت في موضوع الاخت امجاد عندي اختين اكبر مني ومع ذلك تزوجت قبلهم يمكن اكون شعرت بالقليل من الاحراج منهم ... الحقيقة كثيراا :25: لكن هذا ما يعني ان تكون فرحتي ناقصة او ان اتحسس منهم او يتحسسوا مني المشكلة مو بزواجي قبلهم او تاخرهم المشكلة بالمجتمع الي يحط حاجز ويعتبروا دام اختها الصغيرة تزوجت معناته خلاص هذة ما تنفع احد يدق بابهاااااا ...... طافها القطار حتى لو كانت صغيرة وما يعيبها شي لكن نصيبها تاخر عن اختها الصغيرة عن نفسي كان والدي ربي يحفظه يرفض تزويجي كل ما تقدم لي احد مع ان اول خطبة لي وانا بعمر 15 سنة والسبب كان وجود اخوات اكبر مني لكن يوم الله كتب نصيبي وامر ان يكون هذا الرجل زوج لي والدي ما عارض ابدا و وافق عليه باسرع ما يمكن ان اتصور مع انه الوضع ما تغير ... اخواتي ما تزوجي ويمكن يكون الي تقدمو قبل زوجي مو اقل منه لكن كان الرفض نصيبهم الان اخواتي الاكبر مني الاولى تزوجت والثانية مخطوبة والفال لك ان شاء الله كل شي في هذة الدنيا رزق ومحد ياخذ رزق احد والمشكلة مو فينا ...... المشكلة بالمجتمع انسي وافرحي وعيشي حياتك بدون اي تحسس او احراج انتي ما اذنبتي بشي واضحكي على صديقتك وقولي لها لي اخوات اكبر مني صحيح لكن لي رب كريم اكبر مني ومنك وقادر على كل شي شعرت بكل كلمة كتبتيها وشعرت بحرقتك بين حروف كلماتك لكن هذا لا يعني ان تقسي على نفسك كثيرااااا او ان تحقدي على وضعك مثل ما انتي في هذا الوضع في غير الكثير فقولي الحمدلله الحمدلله وادعي الله ان يسر لك ولاخواتك الازواج الصالحين ولا تستعجلي على رزقك الا بالدعاء ربي يسر لك ولاخواتك ويصلح حالكم ويجبر بخاطركم جيمعاااااا ويسعدكم اللهم امين يارب العالمين وارجو منك ان تعيدي النظر في معرفك وتختاري شي جميل يليق بروحك الجميلة بالتوفيق |
رد : زواج الاخت الصغرى قبل الكبيره
اقتباس:
حتى خواتك هل تتوقعين ينسون او مايجيهم كلام لو نفترض خواتك ماتزوجو وبقيتو كلكم في البيت هل تتوقعين ألمك راح يخف اسمحيلي تأخرك نصيبك مو سبب أحد صح كل شي مقدر ومكتوب وبرضو لو تتزوجين تكون الفرحه لك فرحتين والكل يفرح لك بعكس الي تتزوج وفوقها اخت محد يفرح لها ياحبيبتي مقدره وضعك ولا الومك لكن النصيب نصيحه لاتفكرين في خواتك لانهم مالهم دخل ابدا لكن احدي ربك انهم تزوجو ولاتفكرين بأنانيه هم مثلهم مثلك وزوجو وفرحتهم ناقصه انا في وضعهم ومحجوز علي ومحرومه وبكيت الي يشوف وجهي يعرف انه الحزن ماكله ولو اتزوج فوقي خواتي راح اكون حزينه مو يوم فرحي الله يجبر كسر قلوبنا ويرزقنا الفرح قولي امين |
رد : زواج الاخت الصغرى قبل الكبيره
اقتباس:
الحمدالله انها دنيا بس الشي اذا تأخر راحت فرحته وانا حلم حياتي من عرفت نفسي اني تزوج يالله الحمدالله مافيه شي يجيب السعاده والفرح حتى الطاعه استغفرالله صارت ثقيله على نفسي بعد ماكنت احب ادعي وبالنسبه لوضعي في البيت صفر على الشمال على اني احب اخدمهم واهتم فيهم لكن محد يشوف لي شي وانا انسانه راعيه مسؤليه لكن بسبب وجود خواتي فااانا مهمشه عموما ماايهمني الله يعين على الدنيا |
رد : زواج الاخت الصغرى قبل الكبيره
اقتباس:
جوري يعلم الله حسيت بكل كلمة قلتيها ودمعتي نزلت جوري آنا ماعندي نصيحة انصحك الا أن أكثر من الحمد والثناء على الله وأدعي الله وتصدقي أنا مثلك أقول اذا راح شباب الشخص وهو جالس ينتظر هل الزواج بيكون له فائدة وبعدها ادخل بدوامة الحزن لكن اذا صليت واستغفر ودعيت احس براحة الله يفرج همك وييسر امرنا وامرك |
رد : زواج الاخت الصغرى قبل الكبيره
جزاك الله خير على فتحك للموضوع ؛؛
اتركيني أوضح لك شي الله الوحيد الذي يعلم مايخفي صدري وصدرك. اللهم لا تجعل في قلبي على أخواتي او اي مسلمة حقد او حسد&&& انتي واضح لي فهمتي غلط' الزواج مش من طموحاتي ولا احلامي &&'ة لاكن هذه سنة الحياة صرتي بسن زواج لازم تزوجين ولا تصرين عالة على اهلك. هذه مش وجهت نظري هذا واقع مجتمعنا كلنا نعاني مااقول آنتي وضعك افضل مني ولا وضعي افضل منك. نسال الله السلامة. مجرد شعور كتبته بالمنتدى ولم أبوح بها لأأقرب قريب. تدرين ايش حابة شي واحد انه السيرة ما تنفتح بحضوري &&&&وبعدها العافية أعجبتني وحدة تقول الزواج مثل الموت يعني اذا جاء لاختك تقولين لا تعال خذني أنا هذا محال. اللهم لا نواخذنا ان نسينا او أخطائنا ولا يعيش كل بنت الشعور الذي نمر به. ربي اشرح صدور اولاد ادم وبنات حواء. اللهم صل وسلم على نبينا محمد عدد ماذكره الذاكرون الأبرار وعدد ماتعاقب الليل والنهار. استغفرالله العظيم وأتوب اليه. |
رد : زواج الاخت الصغرى قبل الكبيره
اقتباس:
نظرتهم انه جريمه وجرح كبير ولا احد فكر في الي اصغر منها كأن الكبيره هي الي تكبر والي اصغر منها العداد موقف كأن الكبيره هي الي تحس وعندها مشاعر والي اصغر منها لا والي يقهرك لو جاء خاطب للكبيره تبداء تتشرط ولو تقولين وافقي او تقنعينها تشوفك مجرمه تبينها تتزوج عشان تشوفين نفسك مو قصدي اجرحكم بكلامي لكن على الاقل انتو اهون مني مافيه احد قدام طريقكم وتقدرون تتزوجون بدون ماتفكرون في مشاعر غيركم لكن انا لو يطق بابنا احد معنا جرح لغيري ولو اجلس انتظر نصيب غيري وياليتهم في النهايه راح يشوفونك بالعكس اردى معامله منهم |
رد : زواج الاخت الصغرى قبل الكبيره
أنت تبالغين كثيرا .. الأخت الصغرى عندما تتزوج الكل ينظر لها انها ملكة جمال .. لانها سبقت أختها الكبرى ..
أما الكبرى إذا تشرطت وش عليكي أنت ؟ هل ترينها عثرة في طريقك ويجب عليها القبول بأي خاطب لكي تفسح لك المجال ولا تتنغص فرحتك !!! أنا ما ألومك ولا الومها ألوم الأب اللي حجر الصغيرة عشان الكبيرة .. تقولي فرحتها بتكون ناقصة يوم فرحها لانها تزوجت قبل أختها ! طيب ليش ما تكون الكبيرة هي اللي تتعذب كلما تقدم بها العمر وترى أختها محرومة معها !! هذه اللي أصعب .. وان تزوجت الصغرى سينظر المجتمع للكبرى نظرة شفقة مؤلمة .. وبعدين كيف ما يحق لك التفكير في الزواج .. أنا واخواتي دايم نمزح اقولها انتي تتزوجي اول تقول لا انتي وبعدين نقول أصغر وحدة هي اللي نزوجها لانها أجمل وحدة .. صدقوني الأخت الكبيرة قلبها وسيييع جدا حتى ان تزوجو إخواتها سترعى ابنائهم .. وستحبهم جداً .. تبقى الغصة انها لم تتزوج فهل تلومونها حتى في هذا ؟؟؟؟ هل يجب ان تكون سعيدة فعليا دون أي جروح طفيفة لكي لا تتنغص فرحتك ؟؟؟ ريحي نفسك فرحتك محفوظة .. وحتستانسي وكل شي .. ويارب تتزوجو كلكم .. بالمناسبة كم عمرك ؟ |
رد : زواج الاخت الصغرى قبل الكبيره
اقتباس:
ولكن الفرق بينا انتي في اي وقت ان شاءالله راح تتزوجين ومن حقك لكن انا لا تدرين ردك هذا هو رد الجميع والواقع غير هذا تماما وننكره الغريب فينا انا نشوف ألمنا ولا نفكر في ألم الأخرين بسهوله هاذي اتزوج وانا اعرف اختي راح تتألم وكأن الكبيره هي صاحبه القلب الكبير والصغيره هي الدلوعه الي ماتفكر في احد ولو تزوجت يقولون سبحان الله نصيب والا اختها الي اكبر منها اجمل هذا الي اسمعه شفتي قلتي تختار الخاطب انا فكرت مثلك وفكرت خلها تتزوج قبل تدخل الثلاثين لانها وقتها فرحتها راح تموت وانتي حسبتيها مثل مااهي حسبتها عشان افتك وانا بالعكس عشانها اما عثره في طريقي سبحان مسبب الاسباب مقدر الاقدار هذا نصيبي في الحياة تكون فوقي وتتأخر وكل سنه من عمرها انا مثلها واكثر اما ابالغ راح افصل لك مثلا لما تتكلمون عن الزواج وتقول لك اختك لا انتي مطوله في العزوبيه لسبب فوقك خواتك !!! لما صديقاتك يتكلمون وردهم لك نفس هالكلام عشان فوقك خواتك !!! مااتحسين ماتتألمين والا مايحق لك وتبالغين انتي قلتي في موضوعك حلم الامومه حلم كل بنت وحلمك وحلمي لكن انا ماايحق لي لازم اكون انسانيه وافكر في خواتي وانا فعلا افكر في خواتي وشايله فكرت الزواج من بالي لكن متألمه علي وضعي !!! غصه في حلقي ياارب |
| الساعة الآن 12:30 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©